Matta 21

Njir Urshalima tə Dləutsə Yesu na Hirgyaɗi

(Mar 11:1-11; Luk 19:28-40; Yoh 12:12-19)

1Nda Yesu ka shawa nyi tə ɗa ləhə dza Urshalima, nda shili vu Baitafaji a dza Dəgəl Zaitun, Yesu tə sə mətlə ku huɗa shawa nyi. 2Ga nar nda, “Ma'i ma gwa ku mələm ngə biya manə hi nga, Gwakura hi hyo həya kwara tə mba ana zər nyandəla cha. Hya pəliya hya shili nanda na'a. 3Ma kala ndə tə nar hi vanya səu, hya nar nyi, ‘Tlakə ngə kwa gwa'a nda,’ ya təma cho ngya hi na nda.”

4Səngə tə ɗa ənga aka ga nja nyabiya sənda ndər mətakər tə na, 5“Nar nyi ma nə njir Sihiyona, janə təl nghə kwa shili da ka! Ndə kəla həkəra kərnyi cha, kwa shili tə ya kwara, atə ya dalnjiɓa.”

6Shawa mətlə inda tə mər tang wi nda Yesu tə nar nda. 7Nda shili na kwara nda tsa'a na zər nyi, ngə nda səɗənda ləkutə kənda ga sətə tə ya dalnjiɓa nda, ngə Yesu tə gi ngya ti. 8Badəgal dlama nji'inda tə səya ləkutə kənda ku laku, alenya nji tsəu tə ɓəltsə heli ga piya ku laku ka cha ma'i ti. 9Dlama nji'inda kwa ma'i biyamar Yesu ana a hi nyi kwa pə kurakə nda kwa na, “Fala nə zər Dauda! Ndər papa'akur ngə ndə ngə kwa shili ku tləmər Tlakə nga! Fal nə Hyel nda kya huɗamələm!”

10Sakanda Yesu tə dzəva Urshalima, dəhə njir mələm kwa pə kurakə nda kwa na, “Na cha wanga?”

11Ngə dlama nji'inda tə na, “Yesu nga, ndər mətakər hya'atə vu Nazarat tə hə'i Galili.”

Yesu tə Gədləbiya Njir Shafəli ku Mbwa'alə Hyel

(Mar 11:15-19; Luk 19:45-48; Yoh 2:13-22)

12Yesu tə gwa ku babal Mbwa'alə Hyel ga gədləbiya njir shafəli. Ngə cha mbəlmbəl nda tyaɓər njir bəla kwaba ana hwakə njir ɗəlnda mbətla Masar, 13ga nar nda, “Tsəfətsəfə nyi ku Likatəkatə nə Hyel ənda, ‘Njo nga kiɗa ki pətlənya.’ Ngə hya shandə ka tləl mbu njir həl!”

14Njir wuləfə ka njir gadal tə shili da Yesu ku Mbwa'alə Hyel nda, ngə cha mbandə nda. 15Huɗa wawa'ar fərist ka maləm gadlagadla tə tla, nda nda la'a səshinshin nda cha kwa məra, ana nda ngatə kurakə nda ngulisha'a kwa pə ku Mbwa'alə Hyel, nda kwa na, “Fal nə zər Dauda!” 16Kəl ngə nda jau Yesu, “Kwa ngatə kə səngə ngulisha'a ingo na ngə wa?”

Ngə cha ɓəlakə nda, “Ah, kwa ngatə ya. A hya ta kəratsənti ku likatəkatə nda tə na ənda, ‘Aka ka dlədləɓətə nyi nə ngulisha'a ana nguli didizəu nda fal ngha’?”

17Ngə Yesu tə ngya nda ku mələm nda ga təra yi Baitanya ga yi hanyi hinda.

Yesu tə Shu'unda Wur Kanda

(Mar 11:12-14, 20-24)

18Tsəɗakə mbudla, Yesu kwa ɓəl shili Urshalima ngə huɓa tənyi. 19Cha la'a wur kanda nya laku, ngə cha yada kiɗa cha, kəl ja, səda cha uya kyatə wa kəl heli tlələfəu. Ngə cha nar nyi nə wu nda, “A tsə'u da ko tsakətə ya pa'a wa!” Təma ngə wur kanda nda tə ulə hwa'a.

20Nda shawa inda tə la'a sənda ɗa, nda mər məngəl ga jawa, “Aman ngə wur kanda na 'ulə ɗəɗəu na?”

21Yesu tə nar nda, “Vəlvəl yo nar hi, ma cha jirikur da tsahi ya kəpal da nya ta hi wa, hyo nau mərtə səngə ya mərtə nyi nə wur kanda nga, ma'a sənda ndiya matsa ngə ma'a. Hyo nau nar nyi nə mə na, ‘Hya'atə ka bəzəu kərnghə gwatə fa'a,’ ya cho ɗa ənda. 22Ma hya nənyi jiri, dəhə sənda hya gədi ku pətlənya hyo dləutsi.”

Jau təkəra Gyalkur nda tsa Yesu

(Mar 11:27-33; Luk 20:1-8)

23Nda Yesu tə gwa ku Mbwa'alə Hyel nda, ku sakanda cho dlədləɓa nə nji, ka wawa'ar fərist ana njirawawa'a tə shili da cha. Ngə nda jau nyi, “Ana gyalkur manə nə ko mər sə'ina? Wa nənghə gyalkur nga?”

24Ngə Yesu tə ɓəlakə nda, “Yo jau hi tsəu, ma hya wum na'a, naya tsəu yo par hi nda gyalkur manə nə yo mər sə'inə ni. 25Amanə hya'ati Yohana na gyalkur mər baɓtisma? Səya kya huɗamələm zəma, aa tsa ndəu?”

Ngə nda ghəya kəpal ku pama kərnənda nda kwa na, “Mi sənda məno na? Ma məna ɓəlakə nyi bəra, Hya'atə kya huɗamələm, cho nar mən, mya gwa'atə a da hya nənyi jiri nə Yohana wa? 26Ma məna na tsəu hya'atə tsa ndəu, məno ləvər nji, aka dəhə nji dləukərtə ənda Yohana ndər mətakər cha.” 27Kəl ngə nda nar nyi nə Yesu, “A da ea zəndə wa.”

Ngə cha ɓəlakə nda, “Na ya tsə'u a da yo dəkar hi ndara gyalkur manə ngə yo mər sə'inə nə wa.

Ba'ada təkəra Ndə nda na Nguli Shili Mətləu

28“Mi sənda jigadəma kəhi kwa hara? Vanya ndə da na nguli nyi mətləu. Ngə cha yada zə'ualə ga nar nyi, ‘Za, ma'i ka gwa mər tlər ku fa anapəu.’

29“Ndə cha, ‘A da yo ma'i wa.’ Kəl ja, səkardzə kushiu, kəra cha nda sha ngə cha ma'i. 30Ngə adanə nda tə hya'ati ga yada vanya zər nda ga nar nyi tang wi nda. Ndə cha, ‘Kəma, təra naya ada.’ Ya a da cha nda ma'i wa. 31Wa ngə ku pama ngulisha'a mətlə ingə tə mər sənda ada nyi kwa ea?”

Ngə wawa'ar fərist ka njirawawa'a tə wuma, “Zə'ualə nda.”

Ngə Yesu tə nar nda, “Jiri yo nar hi, njir tsəm tsachi ka zawar i kwa ghəya gwa ku təlkur Hyel təvi hya gwa. 32Aka Yohana ndər mər Baɓtisma tə shili dahi ga char hi lakur tsa'atsa'akur, ya ngə a da hya nənyi jiri wa, ngə njir tsəm tsachi ana zawar i tə nənyi jiri. Madangə la'atə hi səna, ana hya nənyi jiri ga shar jigadəma kəhi wa.”

Ba'ada təkəra Njir Zwa ku Fa Anap

(Mar 12:1-12; Luk 20:9-19)

33Yesu tə na, “Səya ma hima da vanya ba'ada, vanya ndə da tə zuya fa anap nyi ga pati, ga tsəya ka'u kwa ka ɓəchə ɓitir anapəu, ngə cha latə jigəɗə ka ndər ɓəla, ngə cha nənyi nə njir zwa ga təra ki zhuli ku vanya hə'i. 34Manda bəjir mər anap nda tə ɗa, ngə cha sə mavi'i nyi nə njir zwa inda ka nda dləutsə nyi mbaɗə nyi. 35Ngə njir zwa inda səya mavi'i inda, ga tlatə zhang na dəga, nda tsəya vanyi ga vakənda vanyi na hangu. 36Ba'aka saka nga, ndə nda ɓəla sə alenya mavi'i nyi, ɗang matsa nda tangərma, kəl njir zwa inda tə mərtə nda tang wi nda. 37Udiya jwamənyi ngə cha sətə nda zər nyi. Cha na, ‘Kəpal da wa, nda kwa la'a səlir zər ɗa.’ 38Kəl ja, manda njir zwa inda tə la'a zər nda kwa shili, ngə nda nar nyi nə kərnənda, ‘Yau, jan ndər fa'aki nyi kwa shili, anda ma, mən tsəya nyi, ga sər fa'aki nyi ɗaka nəkəmən!’ 39Kəl ngə nda yi səya nyi ga bəzəbiya nyi biya tiya fa nda ga tsəya nyi.”

40Ngə Yesu tə jawa, “Nəchanə ja ya, ma tlakər fa nda tə shili, mi sənda cho shili mərtə nyi nə njir zwa inga?”

41Nda ɓəlakə nyi, “Cho kuɗənda nji pəla'a inga, ba nənyi fa nyi nda nə alenya njir zwa, nda kwa shili na nyi mbaɗə nyi ku bəjir mər fa nda.” 42Ngə Yesu tə nar nda, “Na hya kar kəratsəntə sənda Likatəkatə tə na wa ya?

‘Hangu nda njir həra ngyari,

abəra sakəda nyi da wa.

Nacha ngə tə ɗa ka hangu ɓəlkər!

Mərər Tlakə nga,

ya sər məngəl cha tə lya mən.’

43“Aka əngə ja, yo nar hi, njo dləuya təlkur Hyel tsahi ba nənyi nə alenya nji'inda kwa mər sənda Hyel kwa i. 44Kala ndə nda dla səya tə hangu na cho ɓəɓələ kuchiɗəkuchiɗəu, ma ndə nda hangu na təɗə səya təkəra cha tsəu, cho ha'agwa nyi kəɓətəu.”#21:44 Alenya tangərmar tsəfə na chi da na chada nə wa.

45Manda ka wawa'ar fərist ana njir Farisi tə ngatə ba'ada Yesu nda, ngə nda zəndə ənda ɓwanya kənda nda cho pa, 46kəl ngə nda gwa'a ka nda səya nyi, kəl ja, ləvəra səya nda tsa dlama nji aka nji hətə nyi tə ənda ndər mətakər cha.

Currently Selected:

Matta 21: hbbNT

Highlight

Copy