Luka 24

Hya'atər Yesu ku Hwa

(Mat 28:1-10; Mar 16:1-8; Yoh 20:1-10)

1Tsəɗakə mbudla, pəshir tangərmar pəchi ku sukəu, mahi'i inda ya tə hu nda ana sə shi'uni kwitkwitə inda nda ɓatliya. 2Nda yi həya a dangəlnda tə nji hangu nya hu nda. 3Nda gu ta cha, kəl ja, a da nda la'a dza Tlakə Yesu wa. 4Tsəu nda kwa jigadəmar nda sər mi ngə ənga, kəl jan alenya nji mətlə tə ta'i dzən nda ana ləkutə kənda kwa mbəl gagaɗa. 5Mahi'i inda uzhi ana huɗəma nda səya hə'i ndo ləvəra. Nji'inda nar nda, “Aka mi hyo gwa'a ndə nda na pi ku huɗa nji kuɗəkuɗa? 6A tsə'u cha tangnə wa, a hya'atə tə cha. Ɗənghatə ma na sənda cha nar hi bəji nda cha vu Galili. 7Cha na, ‘Tuku nja tləɗanda Zər Ndə anə njir mər səpəla'a, njo kukwanda nyi, pəshir hanyi makərkunyi cho hya'ati.’ ”

8Ngə mahi'i inda ɗənghatə na ɓwanya nyi. 9Nda nda səya kyatə hu nda, ngə nda nar nyi dəhə sə ingə nə kwabəzhang inda ana dəhə alenya nji'inda. 10Mahi'i inda dəkə sə ingə nə shawa inda nanda ingə, Maryamu Magdaliya ana Yuwana, ana Maryamu amanya Yakubu, ba'a alenya mahi'i inda kwa ngya kə'i nda. 11Kəl ja, shawa inda fiya ɓwanya mahi'i ingə ka sə ɓwa'atanyi, aka əngə anda nənyi jiri wa.

12Bitrus nənyi, tə mə na hwi yatə hu nda. Cha uzhi ga ndzamar gu ta cha, cha la'a pa'ua linin ba'a tə mbwa zhang. Ngə cha ɓəl yo ki cho mər məngəl ana sənda tə ɗa.

Atə Lakur Yi Imawus

(Mar 16:12-13)

13Pəshi nda tsəu, nji mətlə ku huɗa njir nəu Yesu kwa ma'i kyo vanya zər mələm njo nga Imawus, naɗəkura cha hya'atə vu Urshalima kwa ɗa babal taku kwabəzhang.

14Nda kwa ɓwanya ku pama kərnənda təkəra sə inda tə ɗa. 15Ku huɗa ɓwanya nda, kəl jan Yesu tə kərnyi tə shili ləhə dzən nda ga ghəya ma'i kə'i nda. 16A la'a nyi tə nda, kəl nda a da nda ngabiya nyi wa. 17Ngə cha nar nda, “Ɓwanya minə hyo pə ku pama kərnəhi əna?”

Təma nda ta'i ana huɗətla. 18Zhang kənda ana tləm nyi Kiliyobas tə nar nyi, “Kəl nakə tanyi ngə mihiɓi vu Urshalima nda pa'a tə zəndə sə ingə tə ɗa ku hanyi ingə ya?”

19Kəl cha nar nda, “Sə manə inga ɗa?”

Nda nar nyi, “Sə inda tə ɗa ana Yesu ndər Nazarat. Nacha ndər mətakər Hyel cha, gyalkur tsa cha aku tləra ana ɓwanya a biyamar Hyel ka nji. 20Nacha ngə ndə nda wawa'ar fərist ka gau kəea, tə tlanda nyi nəumar tah, ngə nda kukwanda nyi. 21Ɗəɗəm eo hari ənda nacha ngə kwa pəliya njir Isra'ila! Ənya makər nə hanyi cha, nda sə ingə tə ɗa. 22Ətsəu, alenya mahi'i ku pama ea tə par ea sər məngəl. Aka tsəɗakə mbudla nda ya tə hu nda, 23nda a da nda la'a dza cha wa, nda ɓəl shili ga na ənda nda la'a chama Hyel inda nar nda ana pi cha. 24Alenya nji ku pama ea tsəu, tə ya tə hu nda ga həya tang wi sənda mahi'i inda tə nar ea, kəl ja, a na nda la'a kərnyi wa.”

25Kəl Yesu tə nar nda, “Mi nga mərtə hi kəla dəma! Dza'u hya dləukər dəhə sə inda njir mətakər nə Hyel tə dəka! 26A da tuku ngə Kəristi nda Hyel tə tabiya sa ɓwaɓwatə ingə ga cha gwa ku səli nyi wa ya?” 27Ngə cha dəkəbiya nda dəhə sə inda likatəkatə Hyel tə na təkəra cha, ghəya tə dlədləɓə nə Musa shili tə sə inda njir mətakər nə Hyel tə tsəfəbiya.

28Nda nda shili ləhə dzər mələm nda ndo gwa'a yi kwa nda, ngə Yesu tə mər wi cho tərabiya, 29ngə nda gədi nyi, nda kwa na nənyi, “Hanyi tanghə ka ea tangna, kaɗə pəchi təɗa.” Ngə cha tyatə ka nda gu ki kənda. 30Nda ngya ka səm sərsuma, ngə cha hətə gwazhilakə ga mərtə nyi usaku nə Hyel, cha pəpasəu ga nə nda. 31Təma lya nda mbəɗiya dza, nda ngabiya nyi. Ngə cha satanyi tə lya nda. 32Nda na nə kərnənda, “A ɗufwa ma nda char ma ku bəji nda cho ndər na ma ku laku nda ma, bəji nda cho ɓwanya nə ma təkəra sənda likatəkatə Hyel təkəri nda?”

33Təma nda hya'atə ga ɓəla yi Urshalima. Nda yi həya kwabəzhang inda, nanda ka alenya nji tə mbwar zhang 34nda kwa na, “Vəlvəl Tlakə hya'atə ti! Cha chabiya kərnyi ma'a nə Bitrus!” 35Ngə nji mətlə inda tsəu tə dəkar nda sənda tə ɗa atə laku, ana ənda nda ngabiya nyi bəji nda cha pəpasəu gwazhilakəu.

Yesu tə Chabiya Nyi Kərnyi nə Shawa Nyi

(Mat 28:16-20; Mar 16:14-18; Yoh 20:19-23; TlCha 1:6-8)

36Tsəu tanda kwa ndəra, kəl janə Yesu ta'i ku pama nda, cha nar nda, “Piyarɗufəu ngya tsa'a nahi!”

37Ləvəra səya nda, nda kwa dzədzi, ndə nda nda mambəl nda la'a nda. 38Ngə cha nar nda, “Kami ləvəra səya hi ənga, hyo kəpal ku ɗufwa hya? 39Ndzamar ma cha ya ka hya ya, naya nə təkərɗa. Tsəka ɗa ma, hya ngati, aka a mambəl da na kum ana ɗihi wi nə ya nə wa.”

40Nda cha nar nda ənga, cha char nda cha cha ana hya cha. 41Tsəu tanda kwa kəpala aka hirgyaɗi ana məngəl, ngə cha nar nda, “Sərsum da tsahi tangnə ma?” 42Nda pasətsə nyi kalfi tsatsa ga nənyi. 43Cha dləutsə ga ɗənya nda kwa ndzam nyi.

44Ngə cha nar nda, “Sə inə ngə ya ɓwanya nə hi təkəri bəji nda ya kə'i hi, ənda tuku nja nyabiya sə inda nja tsəfə təkəra ya ku gadlagadla Musa, ana sə inda njir mətakər nə Hyel tə tsəfəbiya ana Likatəkatə Dəla nda Karti.”

45Ngə cha tiyanda kər, nda ngabiya likatəkatə Hyel, 46cha nar nda tsəu, “Əngə nja tsəfəbiya, ənda tuku Kəristi kwa sa ɓwaɓwatə cha tah, pəshir hanyi makərkunyi cho hya'atə ku hwa. 47Ya aku tləm nyi njo bəzə mafakə gwa'a farbikəu ana nə farbikər səpəla'a anə dəhə njir dunəya, avu Urshalima njo ghəya. 48Nahi ingə matauli sə'ina. 49Yo sətə hi sənda Ada ɗa mər alkawal, kəl ja, hya səkə vu Urshalima gwadagəu, kəl nja nə hi gyalkur hya'atə kya huɗamələm.”

Nja Hətə Yesu shi Huɗamələm

(Mar 16:19-20; TlCha 1:9-11)

50Ngə cha təra nanda biyatə ya mələm, nda yi Baitanya. A hinda cha har cha cha ga səkə nda papa'akur. 51Nda cha ku huɗa sə papa'akur nənda, ngə cha təkə nanda, nja hətə nyi shi huɗamələm. 52Nanda tsəu nda hətə nyi səli ga ɓəl gu Urshalima ana hirgyaɗi gagaɗa. 53Mada sakamani nda kwa fal Hyel ku Mbwa'alə Hyel.

Currently Selected:

Luka 24: hbbNT

Highlight

Copy