Luka 23

Nja Yi na Yesu Huɗə Bilatus

(Mat 27:1-2, 11-14; Mar 15:1-5; Yoh 18:28-38)

1Ngə dəhə daɓədzər njirawawa'a inda hya'ati ga təra na Yesu ya huɗə Bilatus. 2Nda ghəya ɓwanya təkəra cha nda kwa na, “Ea səya ndə na cho shakər nə njikə ea, cho na ənda ngwa nda da ba'a ki tsachi nə Kaisar wa. Cho na ənda Kəristi cha, tələu.”

3Ngə Bilatus tə jau nyi, “Nakə ngə təl njir Yahuda ya?”

Yesu tə nar nyi, “Nakə ngə tə pəbiya na kərngha.”

4Kəl ngə Bilatus tə nar nyi nə wawa'ar fərist ana dlama nji, “A na ya səya ndə nə na vanya bikəu na'a wa!”

5Nda tsakətə ɓwanya na dunama nda kwa na, “Ana sə'inda cho dlədləɓə nə nji ngə cho tlə mwali aku dəhə hə'i Yahudiya. A hi Galili ghəya cha, jan cha shili tə nə tangna.”

Nja Yi na Yesu Huɗə Hiridus

6Nda Bilatus tə ngatə ənga, cha jawa, “Ndər Galili nə ndə nə ya?” 7Nda cha ngatə ənda Yesu tə zəbiya ku ɓələr hə'i nda Hiridus kwa səm təlkur ti, ngə cha na, nja təra na Yesu ya huɗər Hiridus, aka aku bəji nda kərnya Hiridus avu Urshalima cha. 8Hiridus tə mər hirgyaɗi na la'a Yesu gagaɗa, ɗəɗəm cha chim ka cha la'a nyi, aka a wurtə cha ngatə ɓwanya təkəra cha, ya cho i ka cha la'a vanya səshinshin nda Yesu kwa məra. 9Hiridus tə jau Yesu ɗanghəu, kəl ja, a sə da Yesu tə ɓəlakə nyi nə wa. 10Kəl wawa'ar fərist ka maləm gadlagadla Musa inda ta'i tangnda inda tə wula Yesu ndo ɓwanya na kurakə dzəgam dzəgam ənda ndər mər səɗimi cha. 11Hiridus ka ləvaləva nyi tə mərtə nyi sər həyatəvi ga gyaɗənda nyi, ngə nda handzə nyi ləkutə nji təltəl, ga na nja ɓəlandə nyi yada Bilatus. 12Ka Hiridus na Bilatus da kwa ɗa parang pa'a wa, kəl ja, pəshinda nda ɗa bazhibazhi.

Nja Tlanda Nyi Nəumar Tə nə Yesu

(Mat 27:15-26; Mar 15:6-15; Yoh 18:39–19:16)

13Bilatus tə tsəmtə wawa'ar fərist, ka nji'inda wawa'a təkəra nji ana dəhə nji, 14cha nar nda, “Hya shili na ndə nə huɗə ɗa, abəra cho shakər nə nji. Jan ya ngwahibiya nyi tə biyaman hi, a naya uya nyi na bikə ngə hya wula nyi təkər ngə wa. 15Əngə Hiridus tsəu, nacha ngə sənda gwa'atə cha ɓəlandənyi shili da ya. A ndə nə da mər sənda njo kina tsa nyi təkəri wa. 16Aka əngə ja, yo dəgənyi ba'a ngya nyi cha təra.”#23:16 Alenya tsəfə na chi tə tsakətə chada 17: Aka dəhə bəjir ladər nə Dləgəlnda, a ngya tə tuku nə Bilatus cha dəliya nda ndə zhang ku jarum.

18Ngə dəhə nji'inda tə pə kurakə ga na, “Tsəya nyi nji, nja dəliya ea Barabas!” 19(Nja ɗaka fəu Barabas ku jarum təkəra bikə tlə mwali nda cha ɗaka məra ku mələm dəgal ana tsa ndəu.)

20Ngə Bilatus tə tsakətə ndər nə nda, aka cho i cha wuniya Yesu. 21Kəl kurakə nda kwa pəa, nda kwa na, “Kukwanda nyi nji! Kukwanda nyi nji!”

22Ngə Bilatus tə tsakətə nar nda makərkunyi, “Aka mya? Bikə mi ndə na məra? Ba naya na'a, a naya uya ndə nə na bikə nda njo kina tsa nyi wa. Yo dəgənda nyi ba'a ngya nyi cha təra.”

23Nanda tsəu kəl kurakəu nda kwa pə 'ual'ualəu, nda kwa gwa'a nja kukwanda nyi. Ngə nja dləukər na ɓwanya kənda. 24Ngə Bilatus tə tlanda nyi nəumar tə nə Yesu wi sənda nda gwa'a. 25Cha dəliya nda ndə nda nda kwa i, ndə nda nja fəu ku jarum təkəra bikəu tlə mwali ana tsa ndəu. Kəl ja, cha nənda Yesu nda mərtə nyi dəhə sənda nda kwa i.

Nja Kukwanda Yesu

(Mat 27:32-44; Mar 15:21-32; Yoh 19:17-27)

26Nda ləvaləva kwa ma'i na Yesu, ngə nda ɓə na vanya ndə hya'atə ku vanya zər mələm, tləm nyi Shiman, ndər mələm Sayirin. Nda səya nyi, ga nar nyi cha hə taməngəla cha nəu hir Yesu.

27Nji ɗang gagaɗə tə nəu hi nyi, aku huɗa nda ma'a alenya mahi'i inda kwa tiwi nda kwa lələ aka cha. 28Kəl ja, Yesu tə sha təwanə nda ga na, “Mahi'i Urshalima! Ngwa hya da ba'a tiwi ka ya wa, hya tiwi ka kərnəhi ana ngulisha'a kəhi. 29Aka bəji kwa shili nda nji kwa na, ‘Njir papa'akur ngə mahi'i nda pa'a da ta yah, inda pa'a da kwa yah, inda pa'a ngulisha'a tə sa 'ua nda.’ 30Aku bəji nda,

Nji kwa nar nyi nə mə i,

‘Dla ma təkəra ea!’

Nda kwa na nə dəgəl tsə'u,

‘Haɗiya ea ma!’

31Aka macha nda kwa mər chul sə'inə tsəu nə wu miɗakə ya, aman cho ɗa ma cha 'ual ja?”

32Nja yi na alenya njir bikə mətlə aka nja tsəya nda ka Yesu. 33Nda həya vanya mbwa njo nga “Pəpənghər kər,” nda kukwanda nyi tangnda, ana alenya njir bikə mətləu, ndə zhang təwa chisəma cha ana ndə zhang təwa matsala cha.

34Kəl Yesu tə na, “Farbikə kənda Ada, aka a da nda kwa zəndə sənda nda kwa mər wa.”

Nda tətəkəya dzaki nyi ku pama nda təwa ɓəlshi'u. 35Nji ta'i tangnda kwa ndzama. Njirawawa'a inda tsəu tə par nyi ɓwanya dlənyarvi nda kwa na, “A dləuya tə cha alenya nji, cha dləuya kərnyi ja, macha nacha ngə Kəristi nda Hyel tə Tabiya!”

36Ləvaləva inda tsəu tə həyatə cha, nda shili da cha ga nənyi ɓitir anap nda mwamwaləu. 37Nda kwa na, “Macha təl njir Yahuda ka, dləuya kərnghə ja!”

38A gi kəra cha, nja tsəfəya, “Ndə nənnə ngə təl njir Yahuda.”

39Zhang ku huɗa njir bikəu inda nja kukwanda kə'i cha tə mərtə nyi ɓwanya həyatəvi, cha na, “A nakə ngə Kəristi ma? Ya dləuya kərnghə ja, ana na ea tsəu!”

40Ngə vanya ndə nda tsə sal nda ga na, “A da ko ləvər Hyel wa ya? Nja tlanda nghə nəuma məlməl na nənyi. 41Na ma ya, tsa'atsa'a tanyi ngə nja mərtə ma, aka zhar bikə kəma nə ma uya, kəl ja, ndə na a bikə da mər cha wa.” 42Cha na tsə'u, “Yesu, ɗənghatə naya ma ka gwa kwa təlkur ngha!”

43Yesu tə nar nyi, “Jiri yo nar ngha, ənya nənna ko ngya tsa'a naya ki huɗamələm.”

Tər Yesu

(Mat 27:45-56; Mar 15:33-41; Yoh 19:28-30)

44Pəchi tangkər, ngə kutla tə haɗiya dəhə hə'i nda, kəl saka makər a ba akəu. 45Pəchi tə gu kutla ana miɗi Mbwa'alə Hyel tə tau dzaɗə mətləu. 46Ngə Yesu tə har kuraka cha ga na, “Ada! Aku cha ka ya tsau mambəl ɗa.” Nda cha na ənga, cha biya pi. 47Nda dəgalər ləvaləva nda tangnda aku bəji nda tə la'a sənda tə ɗa, ngə cha fal Hyel cho na, “Ndə na ndər mər sə tsa'atsa'a na!”

48Nda nji'inda tsəmtədzə ka ndzama tə la'a sənda ɗa, ngə nda ɓəl kyo ki, nda kwa dəgə hatla nda ana huɗətla. 49Dəhə nji'inda kwa zəndə Yesu kə'i mahi'i inda nəu nyi hya'atə vu Galili, nda ta'i naɗəu nda kwa ndzama.

Haɗə Yesu

(Mat 27:57-61; Mar 15:42-47; Yoh 19:38-42)

50-51Vanya ndə da, tləm nyi Yusufu ndər mələm Arimatiya, atə hə'i Yahudiya. Ndər mər sə tsa'atsa'a cha ndər ləvər Hyel. Cho chim təlkur Hyel shili. Nacha tsəu zhang cha ku huɗa njirawawa'a nə Yahuda, kəl nda ana cha dləukə nda na sənda nda ɓatliya ana sənda nda mər wa.

52Ngə cha yada Bilatus ka cha gədi nja nənyi dza Yesu. 53Ngə cha həya dza Yesu ga baɗəu nyi ku pa'ua haɗə ndəu nə linin, cha fəu nyi gu vanya hu nda nja dzəɗəbiya ku məa, a da nja ta haɗə ndə kwa pa'a wa. 54Səngə tə ɗa, tə bəjir akəu vanya zəkəu, Pəchir Ngyaməngya nə njir Yahuda.

55Mahi'i inda nəu Yesu hya'atə hi Galili, tə təra ka Yusufu ka ga nda ki la'a mbwa nda hu ti, ana ənda nja haɗə Yesu. 56Nda dzəgwa ɓəl kyo ki, nda ɓatliya sə nda kwa shi'uni kwitkwitə ana mal ɓəsa. A tə Pəchir Ngyaməngya nda ɓəliya sar tang wi nda gadlagadla tə na.

Currently Selected:

Luka 23: hbbNT

Highlight

Copy