Luka 17
17
Ɓwanya təkəra Səpəla'a ana Farbikəu
(Mat 18:6-7, 21-22; Mar 9:42)
1Yesu tə nar nyi nə shawa nyi, “Tuku ngə sə'inda kwa gwa'atə njo mər səpəla'a kwa shili. Kəl ja, sər təhuɗə na ndə nda tə shili təwa nyi! 2Bəliya nja mbatə nyi bəra dəgal tə wulya tlakə nyi nja bəzəu nyi gwatə kwar fa'a, tsa cho gwa'atə zhang ku pama ngulisha'a shiɗəɗə inə mər səpəla'a. 3Gəla ma ənda hyo ngya.
“Ma kuvangha mərtə nghə bikəu, ka ndər nənyi. Macha gədi farbikəu, ka farbikə nyi. 4Mada nacha mərtə nghə bikəu zhaka məɗəfə ku ɓupəchi zhang, ya cho na, ‘Farbikə ɗa, farbikə ɗa,’ ka farbikə nyi.”
Mərtə Jirikur Kəea 'Ualəu
5Ngə changhabal inda nar nyi nə Tlakəu, “Tsakətə ea jirikur.”
6Ngə Tlakə tə wum nənda, “Macha jirikur kəhi da mada wi məlar mustad nda kush gagaɗa, hyo nar nyi nə wur mbuɗa na, ‘Təsə tə dzə tangna, ka yi chiya kərnghə tə fa'a!’ Ya cho nəu nya hi.”
Mava Durdur
7“Wa ngə ndə nda ku pama hi nda na mava nda kwa zwa ndara kwa ɓəla kətəng nənyi, nda macha shi kwa takə cho nar nyi, ‘Kusa ka uya mbwar ngya ka səm sərsuma?’ 8Kəl ja, cho nar nyi, ‘Mərtə ɗa sərsum akə gwadagəu, ka shili nə na'a ya səma ya sa, ga ka nda dzəgwa səm nə ngha.’ 9Kwa usaku nji mava aka cha mər sənda cho kina mər ya? Laku da wa! 10Əngə tanyi ma hya mər dəhə sənda nja nar hi hya məra, kəl hya na, ‘Mavi'i tanyi na ea. Sənda eo kina mər ngə ea məra.’ ”
Yesu tə Mbandə Njir Bibi Kuma
11Yesu tə lakur ma'i yi Urshalima, ngə cha nəu pama Samariya ana Galili. 12Nda cho gwa ku vanya zər mələm, kəl jan njir bibi kuma, nda ta'ita nda naɗəu 13nda har kuraka nda ga na, “Yesu Ndər Gyalkur! Ngatə təhuɗə kəea!”
14Nda Yesu tə la'a nda, cha nar nda, “Ma'i ma yada fərist cha yi la'a hi.”
Ku lakur ma'i nda, kəl dza nda ɗa chichinyi. 15Nda zhang kənda la'a ənda nja mbandə nyi, ngə cha ɓələu, cho fal Hyel ana kurakə dzəgam dzəgaməu. 16Cha shili uzhi ana huɗəma cha səya hu'i a biyamar Yesu ga usaku nyi. Ya ndə nda ndər Samariya cha. 17Yesu tə na, “A nji kumə inda nja chinda wa ya? Aman alenya nji dlə inda? 18Mya gwa'atə kəl mihiɓi nə ngə kwa nau shili mərtə nyi usaku nə Hyella?” 19Yesu tə nar nyi, “Hya'atə ka ma'i tangha, jirikur nghə mbandə nghə ti.”
Shilir Təlkur Hyel
(Mat 24:23-28, 37-41)
20Alenya njir Farisi tə jau Yesu bəji nda təlkur Hyel kwa shili ti, ngə cha nar nda, “A da njo la'a shilir təlkur Hyel na li wa. 21A ndə da kwa nau na, ‘Jan cha,’ ndara ‘Wula cha,’ wa. Aka təlkur Hyel ku pama hi cha.”
22Ngə Yesu tə nar nyi nə shawa nyi, “Bəji kwa da shili nda hyo chima ka hya la'a pəchi zhang ku hanyir Zər Ndəu, ya a da hyo la'a wa. 23Njo nar hi, ‘Ndzam yi nanda,’ ndara ‘Ndzam tangna.’ Kəl ja, əngwa hi da biya ka ndzam wa. 24Ma Zər Ndəu kwa da ɓəla shili, cho shili wi ngə par kwa nghənghəɗi nghərəkəu kwa tahəbiya huɗamələm biya ana shili. 25Kəl ja, tuku kəl nacha sa ɓwaɓwatə 'ualəu gwadagəu, njir bəji na kwa ngya nyi. 26Tang wi bəjir Nuhu, əngə kwa ɗa ma Zər Ndə kwa da shili. 27Nji kwa səma ana sa, shili ka mahi'i kwa hədza, tsa'a tə bəji nda Nuhu tə gwatanyi ku param nda Hyel tə nar nyi cha ɓatlətə nda, kəl mandza tə kuɗənda nda dəhəu. 28Əngə a ɗa bəjir Lot. Madawa kwa səm kwa sa, njo ɗəlnda ɗəlbiya, njo tləka, njo hərə pampaməu. 29Kəl ja, pəshir Lot ngyar Sodom, nja pəkə nda hu'u ana kaɓəkaɓər hu'u səya kya huɗamələm ga kuɗənda nda dəhəu. 30Əngə sənda kwa ɗa ma Zər Ndə kwa da chabiyadza.
31“Pəshinda, ngwa ndə nda kyatə kəra vi da na cho səya hə vanya sə ku ki nyi wa. Əngə tsəu ndə nda kwa takəu, ngwa cha da ɓəla shi wa. 32Hya ɗənghatə na mala Lot! 33Ndə nda kwa gwa'a tsamartə pya cha cho tar nyi, ma ndə nda sanda pya cha tsəu, fiya nda cho fiya. 34Yo nar hi, vu'i nda səngə kwa ɗa, nji mətləu tə gangər zhang, njo hənda zhang kwa ngyar zhang. 35Mahi'i mətləu kwa ha'a, njo hənda zhang njo ngyar zhang.”#17:35 Alenya tsəfə tangərma nda nja tsəfə na chi tə tsakəngər chada 36 Nji mətləu kwa zwa njo hənda zhang ba'a ngyar zhang.
37Kəl shawa inda tə jau nyi, “Tlaka, tang ngə səngə kwa ɗa?”
Cha nar nda, “Mbwa nda sə tətə ti, tangnda kwadəga kwa tsəmdza.”
Currently Selected:
Luka 17: hbbNT
Highlight
Share
Copy
Want to have your highlights saved across all your devices? Sign up or sign in
© Wycliffe Bible Translators, Inc. and © The Nigeria Bible Translation Trust 2018
