Yohana 7

Ka Zamənya Yesu da Nə Nyi Jiri wa

1Ahir nga, Yesu kwa ma'i ka mbwa ka mbwa a tə hə'i Galili tanyi, a da cha i yi tə hə'i Yahudiya wa, aka njir Yahuda kwa gwa'a nda tsəya nyi. 2Bəjir Ladər ngya ku Madləɓa nə njir Yahuda kaɗa ɗa. 3Kəl ka zamənya Yesu inda nar nyi, “Hya'atə tangna ka təra yi Yahudiya, aka ga mada shawa nghə inda hi nda yi la'a səshinshin inə ka kwa mər na. 4Aka a ndə da kwa i cha mər tlər nyi tə ɗəwa, macha kwa i cha nja zəndə nyi wa. Wi ngə ka kwa mər chulkə ngə na tləra, kəl ka chabiya nyi kərnghə nə dunəya.” 5Aka ɗəɗəm ma'a ka zamə nyi da nənyi jiri wa. 6Kəl ngə Yesu tə nar nda, “Bəjir yi nda da taa ɗa na'a gwadagə wa, nahi ya bəji tsahi mada sakamani. 7Aka a laku da dunəya kwa ngya hi wa, kəl ja, naya a dunəya da kwa i ɗa wa, aka ya chabiya ənda dunəya ɗimi. 8Nahi nəkə hi, ma'i ma yatə vir ladər nga. Kəl ja, naya tsəu gwadagəu, aka bəji ɗa da taa ɗa wa.” 9Ahir cha nar nda ənga, ngə cha hanyar pəchi vu Galili.

Yesu tə Ya tə Vir Ladər

10Ahir ka zamə nyi inda təratə ya tə vir ladər nda, ngə kərnya Yesu tsəu tə hya'atə ga yi, kəl ja, a tə ɗəwa, a da cha chabiya kərnyi tə babal wa. 11Njirawawa'a Yahuda kwa gwa'a nyi ku ladər nda, nda kwa na “Aman cha zəma?” 12Kəl nji ɗang kwa ɓwanya təkəra cha, kwa na, “Ndə nga, ndə mənakə nga.” Alenya nji kwa na “Ndər shakər nə nji ngə ndə nga.” 13Kəl ja, a da dəhə nji ngə kwa pə ɓwanya mənakə təkəra cha tə babal wa, aka nda kwa ləvər njirawawa'a Yahuda.

14Sakanda ladər nda tə ɗa mənakə ti, ngə Yesu tə gwa ku Mbwa'alə Hyel, ga ghəya dlədləɓə nə nji. 15Ngə nja mər məngəl təkəra cha, ga na, “Aman aman ndə ngə kwa nau kəratsən jan a cha dlədləɓə wa?”

16Kəl ngə Yesu tə nar nda, “Sə ngə yo dlədləɓə nga, a nə kərɗa ngə wa, nə ndə nda tə sə ɗa nga. 17Aka madawa tə i nəu jigadəmar Hyel cho zəndə sə nə yo dlədləɓə na, nə Hyel na, a da nə kərɗa ngə wa. 18Ndə nda kwa ɓwanya təkəra kərnyi həkəra kərnyi nda cho məra. Kəl ja, ndə nda kwa la'a səlir ndər sə nyi, nacha ngə ndər dəkə jiri, a da njo uya nyi na gəzhi wa. 19A Musa ngə tə nə hi gadlagadla wa ya? Dəhə ka ənga a ndər ɓəlatə da lya hi wa. Ma nə hyo gwa'a ɗa ka tsa?”

20Ngə dlama nji tə wum ga na, “Məlləm ku kəra ka! Wa kwa gwa'a tsa ngha?”

21Ngə Yesu tə nar nda, “Səshinshin zhang tanyi ya məra, ya janə wendə hi ti. 22Musa nga nə hi gadlagadla tla bədzang, (madangə a na cha tə ghəya wa, shili ku aji cha). Ya Jan hyo mər ma'a tə Pəchir Ngyaməngya. 23Ma cha njo tla bədzang ma'a tə Pəchir Ngyaməngya, tsa nja da ɓəlnda gadlagadla Musa ya, manə hyo mər huɗətla naya, aka ya mbandə ndə tə Pəchir Ngyaməngya? 24Ngwa hya da mər nəuma a tə kərkaf tanyi wa, hya ɗəmbiya hə'i kwa gwadagəu.”

Kəpal təkəra Ndara Yesu ngə Ndər Dləuya

25Ngə alenya njir Urshalima tə na, “A jan ndə nda nda kwa gwa'a ka tsa nda wa ya? 26Jan cha ja kwa ɓwanya tə babal, ya sə da nda kwa nau nar nyi wa. Aa njirawawa'a kəmən nda tə dləukər ənda nacha ngə Kəristi ya? 27Aman cho ɗa na ɗa? Aka zəndətə mən mbwa nda ndə na hya'atə ti, ma Kəristi tə da shili, a ndə do zəndə mbwa nda cho hya'atə tə wa.”

28Sakanda Yesu kwa dlədləɓə ku Mbwa'alə Hyel, cha na ana kurakə dzəgam dzəgaməu, “Vəlvəl kwa zəndə ɗa hi, ana mbwa nda shili ya ti? A ya shili ana gyalkur kərɗa wa. Aka ndə nda sə ɗa ndər jiri cha. Ya a da hyo zəndə nyi wa. 29A zəndə nyi təya, aka a dzə nyi hya'atə ya, nacha nga sə ɗa.” 30Kəl ngə nda gwa'a nda səya nyi, kəl ja, a da ndə da tə nau tsəka nyi wa, aka bəji nyi da taa ɗa wa.

31Kəl nji ɗang ku Daɓədzə nda tə nənyi jiri ga na, “Ma Kəristi nda da shili, kwa nau cha mərtə səshinshin nda ndiya nə ndə nə ya?”

Nja Sə Njir Ɓəla Mbwa'alə Hyel ka nda Yi Səya Yesu

32Nda njir Farisi tə ngatə dlama nji'inda kwa ɓwanya chihəchihə təkəra Yesu, ngə wawa'ar fərist ka njir Farisi inda mbatə nya, ga sə njir ɓəla Mbwa'alə Hyel ka nda yi səya nyi. 33Ngə Yesu tə nar nda, “Tsəu taa ɗa kwa səkardzə kushə ka hi, ahir nga yo da təra gya da ndə nda sə ɗa. 34Hyo da gwa'a ɗa, ya a da hyo uya ɗa wa. Ya a da hyo nau ya tə vi nda ya tə wa.” 35Njirawawa'ar Yahuda tə na ku pama kərnənda, “Ya a bar cho nau ma'i nda a da məno uya nyi wa? Cho təra yada nji kəmən inda wiɗəwiɗənyi tə hə'i njir Heleni ya, aa cho yi dlədləɓə nə njir Heleni ya? 36Mi kəra cho har na ɓwanya nga, ənda məno da gwa'a nyi ya a məno uya nyi wa?” Ana tsəu, “Ya a da hyo nau ya tə vi nda ya tə wa?”

Yesu ngə Ɓitir Pi

37Pəshir nja udiya ladər nda, ya na cha ngə shimbuɗa tsəmdzə nda, ngə Yesu tə hya'atə tə ta'i, ga na nə nji ana kurakə dzəgam dzəgaməu, “Dəhə nji'inda kwa ngatə hili nda shili da ya, 38madawa tə na'a jiri cha shili sa, wi nda tsəfətsəfə nyi ku likatəkata, ‘Ɓitir pi kwa biya ku dza cha.’ ” 39Yesu tə pə ɓwanya nga a təkəra Shanguɗə papa'a nda dəhə nji'inda tə nənyi jiri kwa uya, aka ku bəji nda Shanguɗə nda da ta shili wa, aka a da nja ta hətə nyi səli nə Yesu gwadagə wa.

Kəpal tə Hya'atə ku Pama Nji təkəra Yesu

40Nda alenya nji ku pama nda tə ngatə sə nda cha na, ngə nda na, “Kəpal da wa, ndə na ndər mətakər Hyel nda njo səkə nda na.” 41Alenya nji tsəu tə na “Nacha nə Kəristi.” Ndə alenya nji “Mazah! Kwa nau Kəristi biya vu Galili ya? 42A likatəkatə tə na Kəristi kwa biya ku jul Təl Dauda, avu Baitalami nda mələm nda nja yah təl Dauda kwa ma?” 43Ngə kəpal tə gwa ku pama nda təkəra Yesu. 44Alenya nji gwa'atə nda səya nyi, kəl ja, a ndə da nau tsəka nyi wa.

Maləm Wawa'a inda da Nə Nyi Jiri nə Yesu wa

45Ma nda njir ɓəla Mbwa'alə Hyel nda ɓəl yada wawa'ar fərist ka njir Farisi inda, ngə nda na, “Mya gwa'atə a da hya shili nacha wa.” 46Ngə njir ɓəla inda wuma, “A vanya ndə da ta ɓwanya wi nə ndə nda wa.” 47Kəl njir Farisi inda tə jau nda, “Ma'a nahi tsəu shandə hi tə cha kər ya. 48Aa taa hya la'a vanya ndə təltəl ndara ndər Farisi tə nənyi jiri nə ndə ngə ya? 49Nji dzadza ingə kwa nəu nyi nga, a sə da nda kwa zəndə təkəra gadlagadla Musa wa, shi'u Hyel təkəra nda.” 50Nikodimus, ndə nda ɗaka yada cha nda, zhang cha ku huɗa maləm wawa'a inda, ngə cha nar nda. 51“Əzəm ya, gadlagadla kəmən chartə nja tlanda nyi nəuma nə ndəu, tivi nja ngatə sə ku nya cha ana gwa'abiya sənda mər cha ya?” 52Kəl nda wum ga na, “Nakə ma'a ndər Galili kə ya? Ngwahibiya likatəkatə mənakəu ko zəndəbiya ənda a ndər mətakər Hyel do zəbiya vu Galili pa'a wa.”

53Ngə dəhə nji tə təra kyo ki.

Currently Selected:

Yohana 7: hbbNT

Highlight

Copy