ɛMacu 28
28
iYilitsik ɛYɛso da ne iKpuu Da
(ɛMar 16.1-10; ɛLuk 24.1-12; ɛYoh 20.1-10)
1Kɛ ne sɛ ɛTuk ne iwɛsɛ niYahodawa na kɛ ne phee, ne cwiil ne ihwɛlɛ ywiriri, ɛtuk ne ɛyisɛ yɛ, ɛMɛri ne iMagadala gha ne ɛhiha wo ɛMɛri ne phɛ tɛ nibhɛ yɛɛn ikpuu da. 2Ne so ɛnggyɛ wo ivel da runket gbom, daa ɛli ne ɛmalɛka ɛDaray ɛbhɛ kɛ le daa ne irywa ɛ tɔm ɛ kungare ikɛɛ ɛnu ne ikpuu de gɔɔ ɛ soos nɛ. 3Ɛ kaa tolte ɛlɔ ne te derep, itsura ɛbhɛ da ta so hyahyak te nkyaaling. 4Ninaa ne hyep ikpuu da kaa ne wum ɛnik ɛbhɛ, nibhɛ ne yaa kparat nibhɛ tes te ikpom.
5ɛMalɛka gha ne yaak nikuk ka, “Sɔng ɛ phok ɛn ɛnik kang, nzi yɛɛ ɛ tɔk ɛn ɛYɛso ye ne kɛ gangat ɛbhɛ. 6Sɔng ɛ so ɛbɛ wo nang, ɛ kɛ yilitsik ɛli ne ɛ kɛ ku bol lo. Yɛɛs te ɛ yaang ɛn ɛlɔ gha ne kɛ laasek ɛbhɛ nɛ wo. 7Hyel ɛn dodooy te ɛbhɛ tɔng ɛn ninɔn ne icwam ɛbhɛ na, ɛ yaak ɛn nibhɛ, ‘ɛYɛso gha kɛ yilitsik ne ikpuu da, ɛ phɛɛs ne iGalili, aa bhɛ phɔt nyini nɛ, ˆaa bhɛ yaang ɛn ɛbhɛ ne iGalili de!’ iBol lɛ ne nggɛ ne yɛɛs naa tɔng nyini.”
8Nikuk ka ne shii bo nikɔn dodooy ɛlɔ ne ikpuu gha ne ɛnik, ne ɛgbaang ne irway ihwala, nibhɛ tel nibhɛ bhɛ mɔng ninɔn ne icwam ma. 9ɛYɛso gha ne kyi shii sɛme nɛ nibhɛ, ne ɛ yaak nibhɛ, “Nggɛ kyili nyini!” Nibhɛ ne yɛɛs nibhɛ bungaret ne ita ɛYɛso de nibhɛ kumure ita yɛ, nibhɛ re ɛbhɛ ntsong. 10ɛYɛso gha ne yaak nibhɛ, “Sɔng ɛ phok ɛn ɛnik kang, cwi ɛbhɛ yaak ɛn nigwaa nge na te nibhɛ phɛ ne iGalili, ne iGalili de nɛ nibhɛ yaa bhɛ yaang me nɛ.”
Nisooja Kɛ Tɔng ɛKɔn na ne ɛ kɛ Te
11Ne sɛ nikuk ka yek en, ɛbyin nisooja na nɛ nibhɛ kaa hyep ikpuu da ne phɛ ndɔ ɛgarang, nibhɛ bhɛ tɔng nindiinday nibo na nikɔn na nɛ nibhɛ kɛ tes so gbik. 12Nindiinday nibo na ne sɛme nɛ ninu nikɔɔn na nibhɛ ne bol ɛkɔn na nɛ nibhɛ yaa mɔn, nibhɛ ne nang nisooja na ijam gbom. 13Nibhɛ ne yaak nibhɛ, “Tɔng ɛn ninyi na te ɛ yɔng ɛn, ‘Ninɔn ne icwam ɛbhɛ na kɛ yɛɛs ne ɛtuk nibhɛ yi ɛbhɛ, nten de ne njwi kɛ so nwa.’ 14Wu bol lɛ kɛ bhɛ hɔn ɛlɔ ɛgɔm-na gha, njwi yaa ne yɛɛ ɛli ne njwi yaa bol lɛ ɛbhɛ ɛ sim, sɔng aa ne sɔ ɛn nggbang nang.”
15Nisooja na ne say ijam be nibhɛ ne mɔn ɛli ne kɛ tɔng nibhɛ wo. Ne le ɛnggyɛ wo, ibol lɛdee wo ne shwalat ndɔ niYahodawa na, phyii hɔn izenge.
ɛYɛso gha kɛ Nang Ninɔn ne iCwam Ɛbhɛ na ɛTomɛ
16Ninɔn ne icwam ɛnduwubɔ nɛ ɛbhɛ ɛdaan na ne phɛ ne iGalili, nibhɛ ne bhɛ phɛ ne ɛwarang ngo ne ɛYɛso gha kɛ ku yaak nibhɛ ɛlɛy yo. 17Ne sɛ nibhɛ kɛ yaang ɛYɛso yegha nibhɛ ne re ɛbhɛ ntsong, ɛbyin nibhɛ ne jung ngee to irway. 18ɛYɛso gha ne yɛɛs cɛcɛk, ne ɛ yaak nibhɛ, “Kɛ nang me igbɔm ɛdaa ne irywa da ne ivaa ndɔ ɛzay ya gbik. 19iPhɛ ɛlɛy, ne ɛ cwi ɛn ɛbhɛ tɔng ɛn igbagha ɛzay yo gbik wu tɛ roos me, nibhɛ tes en ninɔn ne icwam nge, ɛ yaak ɛn nibhɛ ne ibatisima de ndɔ ne irywɛɛk ɛkyɛɛ, ne irywɛɛk ɛNgɔn ne ihoo ne iKabyik ɛTaanggbey. 20Te ɛ mɛmɛ ɛn nibhɛ nɛ, tɛ nibhɛ hyep nikɔn na gbik ne nzi bok nyini ɛlɛy yo. Ne n so ne nyinɛn cɛcɛɛy ɛzay ya phyii taal le.”
Currently Selected:
ɛMacu 28: etxNT
Highlight
Share
Copy
Want to have your highlights saved across all your devices? Sign up or sign in
© Wycliffe Bible Translators, Inc. and
© the Nigeria Bible Translation Trust 2018
in cooperation with
iTen Language and Bible Translation Project
