ɛMacu 22
22
iBol ne iDira ne Tom ɛYɛl
(ɛLuk 14.15-24)
1ɛYɛso gha ne ta bol nɛ ninyi ndɔ ne igɔrɔp, ɛ yɔngɔ, 2“Yaa ten igbɔm ɛdaa ne irywa da ne ɛdɛ ɛgɔm ma ne ɛ kaa bok idira ne tom ɛngɔn ɛbhɛ ne ɛyɛl. 3Ne ɛ tom nikpuru ɛbhɛ ɛlɔ ninyi na ne kɛ mɔng nibhɛ idira de wu tɛ nibhɛ yɛɛs, ninyi na ne bhɛ mbaray. 4Ne ɛ ta tom nidɛng nikpuru ɛbhɛ na dɔng ɛ yaak nibhɛ, ‘Cwi ɛbhɛ yaak ɛn ninyi na ne kɛ mɔng nibhɛ idira de, wu kɛ ku ryɔng nikɔn ne idira na gbik, kɛ hyɛghɛ irwandɔng ngga ne kaa ku sal i hyep ne idira de, ire de kɛ ne bel. Yɛɛs ɛn ne idira de.’
5“Sɔng ninyi na ne kɛ mɔng nibhɛ idira de ne bhɛ tenes ibol lɛ nang, ɛdɛng ne phɛ ɛhay ɛbhɛ, ɛdɛng ne phɛ ɛtomɛ ne lɛbhɛl nikɔn ɛbhɛ, 6ɛbyin nɛ ne ji wumus nikpuru ɛgɔm ma, nibhɛ baasek nibhɛ nggbang nibhɛ phobho. 7ɛGɔm ma ne te njenjek gbom. Ne ɛ tom nisooja ɛbhɛ, nibhɛ ne bhɛ phobho ninaa ne phobho ninyi yɛnaa nggyɛ wo, nibhɛ wɔɔ ɛgarang ngɛ.
8“ɛGɔm ma ne yaak nikpuru ɛbhɛ na, ‘Kɛ ku ryɔng nikɔn ne idira na, ninaa ne kɛ ku tɔng nibhɛ wo, sɔng nibhɛ ne so ɛli nɛ nibhɛ yaa re idira de nang. 9iPhɛ ɛlɛy yang, ne ɛ cwi ɛbhɛ roos ɛn igbaang ne nkpiinɛ ɛgarang ngga te ɛ tɔng ɛn gbik ɛnyi na ne ɛ kɛ yɛɛ ne sɛ ɛn te ɛ yɛɛs ne idira de.’ 10Nikpuru ɛGɔm ma ne roos nkpiinɛ da, nibhɛ banas ninyi na nɛ nibhɛ kɛ sɛɛs, niyɛnɛng ngɛ, nɛ nibebhe yɛ gbik. Ninyi na ne yɛɛs ndɔ ne ijwee ne idira de hywet.
11“Kɛ ne sɛ ɛgɔm ma yɛɛs ne yaang ninaa ne re idira ɛbhɛ de nang, ne ɛ kyii yaang ɛdɛ ɛnyi gha, ndɔ ne idira de, ne hame ɛ bok itsura ne idira da. 12ɛGɔm ma ne yaak ɛbhɛ, ‘ɛSaa, ɛ kɛ mɔn ɛli ɛ lel ndɔ ɛbhɛ wo tang itsura idira daa?’ ɛNyi gha ne i shɛɛ nggbyak.
13“ɛGɔm ma ne yaak nikpuru ɛbhɛ na, ‘Rop ɛn ɛbhɛ ibɔ ne ita te ɛ cwaak ɛn ɛbhɛ ne izay, ɛlɔ gha ne ɛ so gbyik, ɛnggyɛ wo ne aa bhɛ san ne ntsɛk ne izinɛ.’ ”
14ɛYɛso ne ji taal ibol ɛbhɛ de ɛ yɔngɔ, “Kɛ yeres ninyi na gbogbom, kɛ ne karase nidɛng bɔbɔk.”
iPhom daa ne Tal iJam ɛKɛɛsat
(ɛMar 12.13-17; ɛLuk 20.20-27)
15Kɛ ne so ɛnggyɛ wo, niFarisawa na ne bhɛ bol lenɛ ɛli nɛ nibhɛ yaa ten ɛYɛso yegha daa ne ivol ɛbhɛ. 16Nibhɛ ne bhɛ tom ninɔn ne icwam nibhɛ gbik nɛ nidɛng ninyi ɛHyiridus sa, ɛlɔ ɛYɛso gha, nibhɛ ne yaak ɛbhɛ, “ɛKyɛɛ ne icwam, njwii ku yɛɛ ɛli ne ɛ so ɛnyi ɛcik. Ɛ ku mɛmɛ ninyi na nɛ nikɔn ɛTaanggbey ya nɛ ne itin nɛ. Sɔng ɛ sim ɛbyin ninyi ɛ mbaray nidɛng nang, sɔng ɛ tɔɔl sim ito daa ne ninyi nang. 17Nɛ ɛ mɔng njwi, icwas mo i bo ɛlii? ɛShara gha kɛ sim-mɛ wu te tal ɛKɛɛsat tegha ijam ne ivel de? Hang ɛ kɛ ring ngɛ?”
18ɛYɛso gha ne ku yɛɛ idal nibhɛ de, ne ɛ yaak nibhɛ, “Nyinɛn niluk en! iKyee iphɛ kɛ te ˆɛ ten ɛn mɛɛn noo? 19Tɔɔrek ɛn mɛɛn idɛ ijam kyɔsɔk ge ne ˆɛ tal ɛn ne ijam ne ivel de.” Nibhɛ ne bo idɛ ijam be nibhɛ ne nang ɛbhɛ. 20ɛYɛso gha ne yaak nibhɛ, “iZazurum ɛhay de woo? Ne ta so irywɛɛk ɛhay ne kɛ haa ne ijam kyɔsɔk gee?”
21Nibhɛ ne yɔngɔ, “iZazurum ne irywɛɛk ɛKɛɛsat.”
ɛYɛso gha ne yaak nibhɛ, “Ne ɛ nang ɛn ɛKɛɛsat tegha ɛkɔn na ne ɛ so ɛhaa ɛbhɛ gha, te ɛ ne ma nang ɛn ɛTaanggbey yegha ɛkɔn na ne ɛ so ɛhaa ɛbhɛ.”
22Ne sɛ nibhɛ kɛ phok iphɛ ɛlɛ wo, nibhɛ ne wum ɛnu, nibhɛ tek ɛbhɛ nibhɛ hyel.
iPhom ɛli ne sɛ Yiisitsik ne iKpuu
(ɛMar 12.18-27; ɛLuk 20.27-40)
23Nɛ ɛtuk kɛ, niSadukyawa na nɛ nibhɛ bo hang yilitsik ne ikpuu da sonɛ wo, ne yɛɛs ɛlɔ ɛYɛso gha, ne iphom, 24nibhɛ yɔngɔ, “ɛKyɛɛ ne icwam, ɛMuusaa gha kaa yɔngɔ wu ɛnyi kɛ ku ɛ tek ɛkuk ɛbhɛ tang ɛngɔn, te ɛgwaa ɛbhɛ ne bo ɛkuk kɛ, ɛ yɛk ɛbhɛ ne ihywee. 25Ne ɛ phok idɛ ibol de, nidɛng nigwaa na kaa sonɛ ɛniitaa, ɛkɔɔn nɛ ne tul ɛkuk ka, ne ɛ ku sɔng ɛ tek ɛkuk kɛ ne ɛngɔn nang, ɛgwaa ɛbhɛ ne bo ɛkuk kɛ. 26ɛKɔn ɛdaan nɛ ne ma te ne ɛhaa ne ifaa ɛgwaa gha, ne ɛhaa ne ma itwat tɛ, i phyii bhɛ hɔn ɛhaa ɛniitaa yɛ. 27ɛTsim mɛ gbik, ɛkuk ka ne ma ku. 28ɛLyilyɛghaa wo, sɛ ne ji sɛ kɛ bhɛ yiisitsik ne ikpuu ba, ɛkuk kɛghaa nggyɛ wo sɛ ne ji bhɛ soye ɛkuk ɛhay? Ndɔ nibhɛ ɛniitaa gha, ɛrɔngɔ kɛ boos ɛkuk ka.”
29ɛYɛso gha ne kyii nibhɛ nɛ, ne ɛ yɔngɔ, “Ɛ kɛ ben ɛn, sɔng ɛ yɛɛn ɛWee ne ibol ɛTaanggbey yo gbik ne ihwet ɛbhɛ da nang. 30Sɛ́ sɛ ninyi na kɛ yiisitsik ne ikpuu da, sɔng niras sɛ tuul nikuk kang, sɔng sɛ ne nang nikuk nɛ ninyi nibhɛ tuul nibhɛ nang, nibhɛ sɛ ne tes tɛ nimalɛka ɛTaanggbey. 31Daa ne ibol ninaa ne yiisitsik ne ikpuu da, ɛ kɛ ne shɛɛ tang tɔng ɛn ɛkɔn na ne ɛTaanggbey ya kaa bol lo naa? Ɛ kaa yɔngɔ, 32‘N so ɛTaanggbey ɛBaraying, ne ɛTaanggbey ɛShaaku ne ɛTaanggbey ɛYakub.’ Sɔng ɛTaanggbey ya so ɛTaanggbey ne ikpom mang, ɛ so ɛTaanggbey ninyi niken.”
33Ne sɛ idira ninyi de kɛ phok ɛlɛ wo, nibhɛ ne wum ɛnu daa ne imɛmɛ ɛYɛso da.
ɛShara gha ne Ɛ Shɛs ne iGbom
(ɛMar 12.28-34; ɛLuk 10.25-28)
34Kɛ ne sɛ niFarisawa na kɛ phok ɛli kɛ phoo niSadukyawa na nɛ wo, nibhɛ ne tumareey. 35Ɛdɛng ndɔ nibhɛ wo, ne ɛ so ɛhaa ne kpɛl ɛShara ne yaa ten ɛYɛso yegha. Ne ɛ phom ɛYɛso yegha, ɛ yaak ɛbhɛ: 36“ɛKyɛɛ ne icwam, ndɔ ne ibol ɛShara de iya phɛɛ yɛ iphɛ shɛs ne ihwet lɛɛ?”
37ɛYɛso gha ne yaak ɛbhɛ, idee ne iphɛ bo, “Sim ɛDaray ɛTaanggbey mo gha ne ikok mo gbik, ne iken mo gbik, ne irway mo gbik. 38iBol lɛdee wo iphɛ phɛ shɛs, iphɛ phɛ ne ta so idee ɛyisɛ yɛ. 39iDee ne ifaa yɛ ne ta so te iphɛ, iphɛ bo, ‘Sim ɛgwaa cɛcɛk mo gha ɛli ne ɛ sim ito mo. 40ɛShara ɛMuusaa gha ne ivol ninabawa da le daa ne ivol ifaa yɛdaa wo.’ ”#22.40 Ta yɛɛn: ɛLuk 10.25-28.
iPhom daa ne ɛKiriti
(ɛMar 12.35-37; ɛLuk 20.41-44)
41Kɛ ne sɛ niFarisawa na kɛ tumɛy ɛlɔ ɛdaan, ɛYɛso gha ne phom nibhɛ iphom, 42ɛ yɔngɔ, “Ɛ tas ɛn ikyee da ɛKiriti ghaa? Ɛ so ɛngɔn ɛhay?”
Nibhɛ ne kyii nɛ nibhɛ yaak ɛbhɛ, “Ɛ so ɛngɔn ɛDoda.”
43ɛYɛso gha ne yaak nibhɛ, “Kaa ne mɔn ɛli ne kaa sɛ iKabyik ge kɛ dat ɛDoda yegha ne ɛ yel-le ɛKiriti yegha ‘ɛDaray’ yaa?
44Phok ɛn ɛkɔn na ne
ɛDoda gha kaa yɔngɔ,
‘ɛDaray ya kaa yaak
ɛDaray nge gha,
“Soos ne iwɔ ne irwye nge,
naa yɛk ngɛ ninaa ne iphup mo na
teye ɛkɔn ne tek ita mo.” ’
45Wu ɛDoda gha bok ɛKiriti yegha ‘ɛDaray’ ya, ɛKiriti gha yaa ne mɔn ɛli ɛ kyii ta teye ɛngɔn ɛDoda ghaa?” 46Sɔng ɛnyi ɛdaan ne yɛɛ ne kyi ɛYɛso yegha ne ibol nang, ne lenɛ ɛtuk kɛghaa nggyɛ wo, sɔng ɛdɛ nibhɛ ne tang sim ɛ phom ɛYɛso yegha ɛkɔn nang.
Currently Selected:
ɛMacu 22: etxNT
Highlight
Share
Copy
Want to have your highlights saved across all your devices? Sign up or sign in
© Wycliffe Bible Translators, Inc. and
© the Nigeria Bible Translation Trust 2018
in cooperation with
iTen Language and Bible Translation Project
