ɛMacu 13
13
iBol ɛNyi ne Sanga iHywee
(ɛMar 4.1-9; ɛLuk 8.4-8)
1ɛTuk kɛghaa nggyɛ wo, ɛYɛso gha ne tek ijwee wo ɛ wuru ɛbhɛ soos ɛnu ɛrenes sa. 2iDira ninyi de nɛ nibhɛ kaa so ɛnggyɛ wo kaa ne kat gbom ɛli nɛ nibhɛ kaa te ɛYɛso yegha ɛ tɔm ndɔ ne ikparak ɛ soos nɛ, ninyi na ne ji kyinasek ɛnu ɛrenes. 3ɛYɛso gha ne ji tɔng nibhɛ ivol ne igɔrɔp ba gbom, ɛ bo: “ɛDɛ ɛnyi gha kaa wuru ɛ phɛɛs ne sanga ihywee ɛbhɛ. 4Kɛ ne sɛ ɛ so ne sanga da, idɛ ihywee de ne ho ne nkiinɛ, ninon ne yɛɛs nibhɛ tang. 5iZɛ́ng ne ho ne nkinkang, ɛlɔ gha ne hame ivel sonɛ gbom, ihywɛ ne shii wuru, daa ɛli sɔng ivel lɛ sonɛ gbom mo nang. 6Kɛ ne sɛ igbey kɛ ta, ifɛ ne hal ire de, ire de ne te yɔɔy iphɛ howo, daa ɛli ne sɔng ilwing ngɛ kaa tɔm kyukyum nang. 7iDɛ ihywee de ne ho ndɔ ne itsutsɔ, itsutsɔ da ne hɔn ifɛ nang ihywɛ ɛwil. 8iZɛng ne ji ho ne ivel nyɛnɛng, ihywɛ ne yɛk ibɔrɔk gbom: idɛ ibɔrɔk kɛ ne i so ikɔl idaan, idɛng ne i so nzuwubɔ ɛtaraa, idɛng ne ji i so nzuwubɔ icwat. 9Ɛnyi gha ne ɛ bok itoro ne tenes, te ne ɛ phok.”
ɛKɔn na ne ɛ kɛ Te ɛYɛso gha Bol ndɔ ne iGɔrɔp Ba
(ɛMar 4.10-12; ɛLuk 8.9-10)
10Ninɔn ne icwam ɛYɛso na ne yɛɛs ɛlɔ ɛbhɛ, nibhɛ ne yaak ɛbhɛ, “iKyee phɛ kɛ te ɛ bol nɛ ninyi na ndɔ ne ivol ne igɔrɔp baa?”
11ɛYɛso gha ne kyii ne ɛ yaak nibhɛ, “Kɛ phaal nyini ɛduk ne igbɔm ɛTaanggbey da, sɔng kɛ ne ma phaal nibhɛ nɛ nang. 12ɛNyi gha ne ɛ bok ɛkɔn na, yaa ne hante ɛbhɛ nɛ te ɛ hante ne sɛ gbom. ɛHaa ne ɛ sang ɛkɔn na nang, yaa ne ma yung phɔt ɛkyiikyɔnɔ gha ne ɛ bok ko i tek ɛbhɛ buu. 13Ne ɛ ji yɔngɔ, ‘ɛKɔn na ne ɛ kɛ ne te nzi bol nɛ nibhɛ ndɔ ne igɔrɔp ba ne so ɛlɛ:
Nibhɛ yaa i wɛɛ,
sɔng nibhɛ yaang nang,
nibhɛ yaa i tenes,
sɔng nibhɛ seng nang.’
14iBol ɛnɛbi ɛShaa de kɛ shwaak ghe daa nibhɛ, ne iphɛ bo;
‘Ninyi yɛnaa wo yaa ku i tenes,
sɔng nibhɛ ne kyii seng nang,
nibhɛ ne ku i wɛɛ
sɔng nibhɛ ne yaang nang,
kɔɔ ncɛt.
15Daa ɛli ne irway nibhɛ da
kɛ te nkpuy, itoro nibhɛ de
kɛ ne babhay, irwisɛ nibhɛ da
kɛ ne ta cwamas se.
Tɛ nibhɛ ne sang i wɛɛ,
itoro nibhɛ de sang phok,
irway nibhɛ da sang seng,
ɛli nɛ nibhɛ yaa hyereey
ɛlɔ nge gha,
mee ne ɛTaanggbey yo,
n ji te nibhɛ niken.’
16“Ɛ so ɛn nyini ninaa ɛwɛng daa ɛli ne irwisɛ mon da i yaang, itoro mon de ta phok. 17Nzi tɔng nyini itin nɛ, ninabawa na gbom nɛ ninyi ɛTaanggbey ya gbom kɛ sim ɛli nɛ nibhɛ yaa yaang ɛkɔn na ne ɛ yaang ɛn no, sɔng nibhɛ kɛ yaang nang. Nibhɛ ne ta sim ɛli nɛ nibhɛ yaa phok ɛkɔn na ne ɛ phok ɛn no, sɔng nibhɛ kɛ ne phok kang.”
ɛYɛso gha kɛ Kpɛl iBol ne iGɔrɔp Be
(ɛMar 4.13-20; ɛLuk 8.11-15)
18“Phok ɛn ɛkɔn na ne ibol ne igɔrɔp ɛhaa ne sanga ihywee de i bo. 19Nidɛng ninyi na sonɛ ne i sɛ nɛ nibhɛ kɛ phok ibol ne igbɔm ɛTaanggbey de sɔng nibhɛ ne seng iphɛ nang, ɛShɛtan na ne yɛɛs ɛ phɔt ɛkɔn na ne kɛ tup ndɔ ne irway nibhɛ da. Nibhɛ bhɛ ne so te ihywee de ne ihywɛ kɛ ho nkiinɛ wo. 20iHywee de ne ihywɛ kɛ ne ho nkinkang ngge ne so tɛ ninyi na nɛ nibhɛ kɛ phok ibol ɛTaanggbey de nibhɛ ne shii say iphɛ ne irway ihwala. 21Sɔng iphɛ ne lel ndɔ nibhɛ kyukyum nang, sɔng iphɛ ne ma phyɔngɔle ndɔ nibhɛ wo nang, yaa sɛ ishishim, ne nggbang kɛ yɛɛs nibhɛ, lenɛ ne ibol ɛTaanggbey de, nibhɛ ne shii hana iphɛ. 22iHywee de ne ihywɛ kɛ ne ho ndɔ ne itsutsɔ da ne so te ninyi na ne i sɛ nibhɛ kɛ phok ibol ɛTaanggbey de nang, icwas nikɔn ɛzay, ne tɔk iryat ne cwaal nibhɛ, iphɛ ring ibol de ne hɔn ndɔ ne irway nibhɛ da, sɔng iphɛ ne tang yɛk ɛkɔn nang. 23iHywee de ne ihywɛ kɛ ne ho ne ivel nyɛnɛng ngga, ne so te ninyi na nɛ nibhɛ kɛ phok ibol ɛTaanggbey de nibhɛ ne seng iphɛ. Nibhɛ ne ji yɛk ibɔrɔk; izɛng so ikɔl idaan, izɛng ne so nzuwubɔ ɛtaraa, izɛng ne so nzuwubɔ icwat.”
iDik ne iPhɛ kɛ Wuru ndɔ ne iHwap ɛLikama
24ɛYɛso gha ne ta tɔng nibhɛ idɛ ibol ne igɔrɔp be dɔng, ɛ yɔngɔ: “Yaa ten igbɔm ɛdaa ne irywa da ne ɛdɛ ɛnyi gha ne ɛ kaa tubhus ɛlikama ɛbhɛ ɛyɛnɛng ngɛ ne ihwap ɛbhɛ. 25Kɛ ne sɛ nyini na so nwa, ɛhaa ne iphup ɛnyi gha ne bhɛ sanga ihywee ne idik ndɔ ne ɛlikama wo ne ɛ kyii ɛ hyili. 26Kɛ ne sɛ ɛlikama wo kɛ yaa tuul itso, idik ge ne ma ji tɔɔrek ghe.
27“Nikpuru ɛhaa ne ihwap pa ne yɛɛs nibhɛ yaak ɛbhɛ, ‘ɛKyɛɛ ne ijwee, njwii maa bo ihywee izɛnɛng ne ɛ kaa tubhus ne ihwap mo da nang? Kɛ ne mɔn ɛlii idik ge kyii wuru nɛ woo?’
28“Ɛnyi gha ne yaak nikpuru ɛbhɛ na, ‘ɛHaa ne iphup nge ɛbhɛ kɛ mɔn ɛkɔn nɛghaa nggyɛ wo.’
“Nikpuru na ne yaak ɛbhɛ, ‘Ɛ ne sim ta njwi sɛ bhɛ sɛs idik gee?’
29“Ɛnyi gha ne yaak nikpuru ɛbhɛ na, ‘Kwa, aa yung bhɛ sɛs ɛn ɛ bying ɛn ne ɛlikama wo. 30Tek ɛn te iphɛ hɔn gbik, sɛ ne sɛ nten ne pha yɛ, ne mɔng ninaa ne pha na, nibhɛ ne tsa nibhɛ sɛs idik ge nibhɛ robhos ikpɔng ngɛ nibhɛ ne wɔɔ, nibhɛ ne ji pha ɛlikama gha nibhɛ bhɛ sit me nɛ ne igban.’ ”
iBol ne iTsara ne iMɔsita
(ɛMar 4.30-32; ɛLuk 13.18-19)
31ɛYɛso gha ne kyi ta tɔng nibhɛ idɛ ibol ne igɔrɔp be dɔng, ɛ yɔngɔ: “Yaa ten igbɔm ɛdaa ne irywa da ne itsara imɔsita ne ɛnyi kɛ bo ɛ tup ne ihwap ɛbhɛ. 32iTsara yɛdee nggyɛ wo ihywɛ ihywɛ kɛ taasek ihywɛ shɛs gbik ndɔ ne ihywee nikɔn de. I ne sɛ ihywɛ kɛ hɔn ihywɛ i ne phyin ɛbyin ne ivee gha gbik, ihywɛ teye ɛhon, ɛli nɛ ninon yaa yɛɛset nibhɛ ryɔng niryee nɛ ne ilaak kɛ.”
iBol ne iYis
(ɛLuk 13.20-21)
33Ne ɛ kyii ta boote nɛ nibhɛ ndɔ ne igɔrɔp ɛ yɔngɔ, “iGbɔm ɛdaa ne irywa da so te iyis ne ɛkuk kɛ hyoke nɛ ncɛt, ɛ yɛk ndɔ inuk ne mpɛ so gbom ɛ subhus mpɛ. iYis de ne te inuk ga wara gbom.”
ɛYɛso gha kaa Mɔn ɛTomɛ ne iVol ne Igɔrɔp ba Gbom
(ɛMar 4.33-34)
34ɛYɛso gha kaa tɔng ninyi na nikɔn nɛnaa wo ndɔ ivol ne igɔrɔp, sɔng ɛ kaa tɔng nibhɛ idɛ bol tang ne igɔrɔp ba nang. 35Ɛ kaa mɔn ɛlɛ wo te sɛ shwaak ɛkɔn na ne ɛnɛbi ɛShaa gha kaa boote wo ɛ yɔngɔ,
“Naa bol nɛ nibhɛ ndɔ ne igɔrɔp,
naa phaal nibhɛ nikɔn nɛ nibhɛ so
gying nten de ne kaa tum ɛzay ya.”
ɛYɛso gha kɛ Kpɛl iBol ne iGɔrɔp ne iDik Ge
36ɛYɛso gha ne tek idira ninyi de ɛbhɛ lel le ndɔ ne ijwee. Ninɔn ne icwam ɛbhɛ na ne bhɛ sɛ ɛbhɛ, nibhɛ ne yaak ɛbhɛ, “Tɔng njwi ɛkɔn na ne ibol ne igɔrɔp ne idik ge ne iphɛ kɛ wuru ndɔ ihwap ba i bol.”
37ɛYɛso gha ne kyii nibhɛ nɛ, ne ɛ yɔngɔ, “ɛNyi gha ne ɛ kɛ tubhus ihywee izɛnɛng ngge ɛbhɛ so ɛNgɔn ɛNyi gha. 38iHwap ba ifɛ soye ɛzay ya, ihywee izɛnɛng ngge ihywɛ ne soye ninyi na nɛ nibhɛ ne so ndɔ ne igbɔm ɛTaanggbey da, idik ge phɛ ne ji soye ninyi ɛShɛtan na. 39ɛHaa ne iphup pa ne ɛ kɛɛ sanga idik ge, ɛbhɛ so ɛShɛtan na, nten ne pha de iphɛ phɛ ne so nten ne taal ɛzay de, ninaa ne pha na nibhɛ ne ji so nimalɛka ɛTaanggbey.
40“ɛLi ne i sɛs idik ge i tumɛ i ji wɔɔ wo, ɛlɛy ne iphɛ sɛ ne te nten ne taal ɛzay de. 41ɛNgɔn ɛNyi gha sɛ tom nimalɛka ɛbhɛ, nibhɛ sɛ ne bhɛ tumɛ ninyi na nɛ nibhɛ tes ninyi ɛbhɛ na mɔn ɛfɔt to, gbik nɛ ninaa nɛ nibhɛ kɛ mɔn ibebhe, nibhɛ tuul nibhɛ ndɔ ne igbɔm ɛbhɛ da. 42Nibhɛ cwaak nibhɛ ndɔ ne ɛgbaang ne igboo, ɛlɔ gha nɛ nibhɛ sɛɛ san nɛ nibhɛ re izinɛ. 43Ninyi ne icik ka sɛ ne jii tol te iroy ndɔ ne igbɔm ɛKyɛɛ nibhɛ da. ɛNyi gha ne ɛ bok itoro ne tenes te ne ɛ phok.
iBol ne iRyat ne kɛ Rɛɛ
44“Yaa ten igbɔm ɛdaa ne irywa da ne iryat ne kɛ rɛɛ ndɔ ne ihwap, ɛdɛ ɛnyi gha ne bhɛ sɛ ihywɛ ɛ kyii hante ne rɛɛ yɛ yɛnɛnng. iRway ihwala yɛ ne ji te ɛbhɛ ɛ lɛbhɛl nikɔn na ne ɛ bok gbik, ɛ bo ijam mɛ ɛ say ne ihwap pɛdaa nggyɛ wo.”
iBol ne iKpɛɛ ne iFɛ bok iJam Gbom
45“Yaa ne ta ten igbɔm ɛdaa ne irywa da ne ɛhaa ne lɛbhɛl nikɔn ne ɛ tɔk ikpɛɛ ne ifɛ bok ijam gbom. 46Yaa ne sɛ ɛ kɛ bhɛ sɛ idɛ ikɛɛ de ne iphɛ bok ijam, ne ɛ kyii ɛbhɛ lɛbhɛl nikɔn na ne ɛ bok, ɛ ji bok ijam mɛ ɛbhɛ say ne ikɛɛ yɛdee nggyɛ wo.”
iBol ne ɛKara
47“Yaa ne ta ten igbɔm ɛdaa ne irywa da ne ɛKara ne kɛ cwaak ndɔ ɛrenes, izing ngge ne leesel ihywee-ihywee. 48Ne sɛ ihywɛ kɛ yɛɛnɛ, ninyi na ne ji bhɛ hɔ ɛbhɛ gɔɔ ne itaa, nibhɛ soos nibhɛ kasa izing izɛnɛng ngge nibhɛ cwaasek ndɔ ne isap nibhɛ ne ji lok izing igywebhe de gɔɔ. 49ɛLɛy ne iphɛ sɛ ne te nten ne taal ɛzay de, nimalɛka ɛTaanggbey ya sɛ yɛɛs nibhɛ kasa ninyi nibebhe na ndɔ ninyi ne cik ka. 50Nibhɛ cwaasek ninyi ne bebhe na ndɔ ne ɛgbaang ne igboo, ɛlɔ gha nɛ nibhɛ sɛɛ bhɛ san nɛ nibhɛ i re izinɛ.”
iMɛmɛ iFas ne iCwɛl Lɛ
51ɛYɛso gha ne phom ninɔn ne icwam ɛbhɛ na ɛ yɔngɔ, “Ɛ kɛ seng ɛn nikɔn nɛnaa wo gbik ghee?”
Nibhɛ ne yɔngɔ, “Ɛɛy.”
52Ne ɛ ji yaak nibhɛ, “iPhɛ ɛlɛy, gbik ɛnyi ne kpɛl ɛShara gha ne ɛ kɛ teye ɛngɔn ne icwam ne igbɔm ɛdaa ne irywa gha ne so te ɛnyi ne ijwee gha ne ɛ kɛ tuul nikɔn niphas nɛ nitɛl lɛ ndɔ ne ɛgban ɛbhɛ.”
Ninyi ne iNazarat ta kɛ Mbaray ɛYɛso Yegha
(ɛMar 6.1-6; ɛLuk 4.16-30)
53Ne sɛ ɛYɛso gha kɛ taal tɔng ivol ne igɔrɔp pɛdaa wo, ne ɛ hyel ɛ tek ɛlɔ yɛ, 54ɛ phɛ ɛgarang ɛbhɛ. Ɛya bhɛ mɛmɛ ninyi na nɛ ndɔ ne idee ne itsɔɔy nibhɛ, ninyi na ne wum ɛnu zii daa ne imɛmɛ ɛbhɛ da, nibhɛ ne yɔngɔ, “ɛNyi yɛghaa wo bhɛ le ne ntsɛntsɛng ngɛdee wo ɛbii? Ɛ ta lenɛ nikɔn ne kparat tɛ na wo ɛbii? 55Sɔng ɛbhɛ ɛ so ɛngɔn ɛhaa ne gangat nikɔn ta nang nge? Sɔng i bok ɛgyinɛ gha ɛMɛri nang? Sɔng ne ɛ so ɛgwaa ɛYakub, ne ɛYisifu, ne ɛSimɔn gbik ne ɛYahuza nang nge? 56Nzo nigwaa ɛbhɛ nikuk ka nɛ ne njwɛɛn so ɛbɛ wo nɛ nibhɛ wo nang? Ne ɛ ji bhɛ lenɛ nikɔn nɛ naa wo ɛbii?” 57Nibhɛ ne te njenjek ne ɛYɛso gha.
ɛYɛso gha ne yaak nibhɛ, “I naas ɛnɛbi gha ne ndiinday de nigarang nga gbik, kang ne ɛgarang ɛbhɛ ne ijwee ɛbhɛ.” 58Sɔng ɛYɛso gha ne mɔn nikɔn ne kparat ta gbom ɛgarang ɛbhɛ gha nang, daa ɛli ne hame nibhɛ kɛ nang ne itin nɛ ne ɛbhɛ wo.
Currently Selected:
ɛMacu 13: etxNT
Highlight
Share
Copy
Want to have your highlights saved across all your devices? Sign up or sign in
© Wycliffe Bible Translators, Inc. and
© the Nigeria Bible Translation Trust 2018
in cooperation with
iTen Language and Bible Translation Project
