ɛLuka 23
23
Kɛ Phɛ ne ɛYɛso gha ɛLɔ ɛBilatus
(ɛMac 27.1-2,11-14; ɛMar 15.1-5; ɛYoh 18.28-38)
1iTɔrɔng niYahodawa de ne kpuruuy gbik nibhɛ phɛ ne ɛYɛso gha ɛlɔ ɛBilatus. 2Kɛ ne sɛ nibhɛ kɛ tuu ɛnggyɛy wo nang, nibhɛ ne rop ɛYɛso yegha ne ihyoo nibhɛ bo, “Njwi kɛ wum ɛnyi yɛghaa wo ɛ subhus ninyi. ˆƐɛ bok nibhɛ wu hang nibhɛ tal ɛKɛɛsat re ijam ne ivel, ne ɛ ta yaak nibhɛ wu yee i soye ɛKiriti, i ta soye ɛgɔm.”
3ɛBilatus sa ne phom ɛYɛso yegha, ɛ yaak ɛbhɛ, “iGyɛ so ɛgɔm niYahodawa na ɛsaa?”
ɛYɛso gha ne kyii nɛ, ɛ yaak ɛbhɛ, “Ɛɛy, ɛ bo ɛlɛy.”
4ɛBilatus sa ne yaak nindiinday nibo ɛTaanggbey ya gbik ne idira ninyi de, “Sɔng nzi yaang ɛnyi yɛghaa wo kɛ mɔn ɛkɔn ɛbebhe nang.”
5Nibhɛ ne jung re ɛnu ɛyisɛ nibhɛ yɔngɔ, “Lenɛ ne mɛmɛ ɛbhɛ da ɛ kɛ te ninyi ne ivel ne iYahudiya na yɛk ishishim. Ɛ kɛ tsa ɛkɔn neghaa wo ne iGalili, ɛbhɛ ghaa kɛ ne i hɔn ne ɛbɛ.”
Kɛ Phɛ ne ɛYɛso gha ɛLɔ ɛHyiridus
6Kɛ sɛ ɛBilatus sa kɛ phok ɛlɛ wo nang, ne ɛ phom nibhɛ, ɛ yaak nibhɛ, “ɛNyi yɛghaa wo so ɛnyi ne iGalili naa?” 7Nibhɛ ne yɔngɔ yɛɛy. Ne sɛ ɛBilatus sa kɛ seng wu ɛYɛso gha le ne ivel ba ne ɛHyiridus sa ɛbhɛ so ɛgɔm mɛ wo, ne ɛ yɛk ngɛ nibhɛ bo ɛbhɛ nibhɛ phɛ ne ɛbhɛ ɛlɔ ɛHyiridus sa, ne ɛ kaa so ne iYɛrushɛlɛm nɛ nten nɛ. 8Kɛ ne sɛ ɛHyiridus sa kɛ yaang ɛYɛso yegha nang, ne ɛ yɛk irway ihwala gbom, daa ɛli ne ɛ kaa ku i tɔk te ɛ sɛɛ yaang ɛbhɛ. Ɛ kaa ku i phok ngka ɛYɛso de ne ɛ yaa sim te ɛ sɛ yaang ɛdɛ ɛkɔn ne kparat ta ne ɛYɛso gha yaa mɔn. 9iPhɛ ɛlɛy yang, ɛHyiridus sa ne phomos ɛYɛso yegha nikɔn na, sɔng ɛYɛso gha ne kyii ɛbhɛ ibol nang. 10Nindiinday nibo ɛTaanggbey ya nɛ Ninaa Kpɛl ɛShara gha ne shompeey ɛnu ɛyisɛ nibhɛ hante ne sɔke ne igboo yɛ te yaang ibebhe ɛYɛso de. 11ɛHyiridus sa nɛ nisooja ɛbhɛ na ne cɔk ɛYɛso yegha irway nibhɛ ne i sɛ ɛbhɛ. Nibhɛ bo ɛgbaang ne ɛtura, ne ɛbhɛ so te ɛwoo nigɔm, nibhɛ yɛk ɛbhɛ nɛ, nibhɛ kyii ne ɛbhɛ ɛlɔ ɛBilatus sa. 12ɛTuk kɛghaa nggyɛ wo nang, ɛBilatus sa ne ɛHyiridus sa kaa ne teye nitay daa ɛli ne sɔng nibhɛ kaa ku i yaang en ywit tang.
Kɛ Hyɛ ɛYɛso yegha ɛShara ne iKu
(ɛMac 27.15-26; ɛMar 15.6-15; ɛYoh 18.39–19.16)
13ɛBilatus sa ne yel-le nindiinday nibo ɛTaanggbey ya nɛ nigɔm ma gbik ne igbagha wo ɛlɔ ɛdaan, 14ne ɛ yaak nibhɛ, “Ɛ kɛ yɛɛs ɛn mɛɛn ne ɛnyi yɛghaa wo ɛ bok ɛn wu ɛ subhus ninyi. Nggɛ ne phɛl ɛbhɛ ɛbɛ wo, ɛnu ɛyisɛ mon, sɔng nggɛ ne sɛ ɛbhɛ ne ɛdɛ ɛkɔn ɛbebhe gha ne ɛ bo ɛn wu ɛɛ mɔn no nang. 15Ɛlɛy ne ɛHyiridus sa kɛ ma bhɛ sɛ ɛbhɛ. iPhɛ phɛ kɛ te ɛ kɛ bhɛ kyii njwii ne ɛbhɛ ɛbɛ wo. Sɔng ɛnyi yɛghaa wo kɛ mon ɛkɔn ne sɛɛ yɔng yaa phoo ɛbhɛ wo nang. 16iPhɛ ɛlɛy yang, naa ne sɔn ɛbhɛ ne ihon tsasarak n ji tek ɛbhɛ ɛ hyel.” 17Nten ne iDira ne Tes iDee de Tsak ko nang ɛBilatus sa kaa ne i biri ninyi na ɛnyi ɛdaan ndɔ ninaa ne kɛ rop po.#23.17 Sɔng idɛ ɛWee ne ile daa kaa haa ikɛn nɛdee wo nang.
18iDira ninyi de gbik ne byinkit nibhɛ tɔɔk izɔlɔs, nibhɛ yɔngɔ, “Te phoo ɛnyi yeghaa wo, te tul njwii ɛBarabas se!” 19Kaa rop ɛBarabas segha daa ɛli ne ɛ kaa yɛk ninyi nɛ nibhɛ yaa bɛɛs igbɔm phyii bhɛ phoo ne ɛnyi.
20ɛBilatus sa ne jung ngee sim te sɛɛ tek ɛYɛso yegha, iphɛ ɛlɛy yang ne ɛ ta roo nɛ ninyi na dɔng. 21Nibhɛ ne jung ngee rɛrɛ nibhɛ bo, “Te gangat ɛbhɛ! Te gangat ɛbhɛ!”
22ɛBilatus sa ne boote nɛ nibhɛ ɛhaa ne itwat tɛ, ɛ yaak nibhɛ, “Ɛlɔ ne ikyee? ɛFɔt ne iKyee ne ɛ kɛ mɔn ne? Sɔng nzi yaang ɛ kɛ mɔn ɛkɔn na ne aa te i phoo ɛbhɛ wo nang. Naa yɛk ngɛ hal ɛbhɛ, te tek ɛbhɛ.”
23Ninyi na ne jung hante ne yinɛ izɔlɔs nibhɛ bo wu te gangat ɛYɛso yegha, ivol nibhɛ ba ne mɔɔng ifɛ re. 24ɛBilatus sa ne hyɛ ɛYɛso yegha ɛshara gha ɛli nɛ nibhɛ bol lo. 25Ɛ kaa tul nibhɛ ɛnyi gha nɛ nibhɛ sim mo. ɛNyi gha ne kaa rop ɛbhɛ ɛlɔ ne bɛɛs igbɔm ba gbik ne iphoo ɛnyi ba, ɛ ji nang nibhɛ ɛYɛso yegha wu tɛ nibhɛ bhɛ mɔn ɛbhɛ ne ɛkɔn na nɛ nibhɛ sim.
Kɛ Gangat ɛYɛso Yegha
(ɛMac 27.32-44; ɛMar 15.21-32; ɛYoh 19.17-27)
26Nisooja na ne bo ɛYɛso yegha nibhɛ yaa hyel lɛ. Kɛ ne sɛ nibhɛ so ne ihywel ba, nibhɛ ne sɛ ɛdɛ ɛnyi ne iSɛrene gha ne i bok ɛbhɛ ɛSimɔn ɛ yaaso ndɔ ɛgarang nga. Nibhɛ ne wum ɛbhɛ nibhɛ nang ɛbhɛ ihon ne gangat ɛYɛso wo ɛ roos ɛbhɛ ne ɛtsim.
27iDira ninyi de kaa ne so gbom nɛ nibhɛ kaa ma kungus ɛYɛso yegha. Nikuk kaa ne ma sonɛ nɛ, nɛ nibhɛ kaa san ɛYɛso yegha, nibhɛ banga ikpun. 28ɛYɛso gha ne hyereey ɛ yaak, “Nikuk ne iYɛrushɛlɛm yɛɛy! Sɔng ɛ san ɛn mɛɛn no nang, san ɛn ishwin ne itso mon, ne ivaa ninɔn mon.” 29Nten yaaso nɛ ninyi na sɛ yɔngɔ, “ɛKuk ɛkuru gha, ne ɛ kɛ sang ku yɛk ko, ɛ sang ku sunga ɛngɔn na, ɛbhɛ soye ɛhaa ɛwɛng.” 30Nten nɛdee nggyɛ wo nɛ ninyi na sɛ yaak ibarang ngge:
“Hoghɛse ɛn daa mos!”
Nibhɛ ne yaak igbol ba, “Cwamas ɛn njwii.”#23.30 Ta yɛɛn: ɛHos 10.8.
31ɛYɛso gha ne hante ne yaak nibhɛ, “Wu ninyi kɛ mɔn nikɔn nɛnaa wo daa ne ihon no ne ifɛ tɔ ishwirim mo, nibhɛ sɛ ne ji mɔn ɛlii ne sɛ́ sɛ ifɛ kɛ howo woo?”#23.31 Ta yɛɛn: ɛHos 10.8.
32Kaa ne ma boos nidɛng ninaa ɛyi na ifaa ne yaa bhɛ phobho nibhɛ gbik ne ɛYɛso gha. 33Kaa ne sɛ nibhɛ kɛ bhɛ tuu ɛlɔ gha ne i bok ɛbhɛ ɛlɔ ne iKpɔrɔk ne iTso ba, nibhɛ ne gangat ɛYɛso yegha ɛnggyɛ wo nɛ ninaa ifaa na, ɛdaan ne so ne iwɔ ne irwye ɛbhɛ ɛdɛng ne ji so ne iwɔ ne itsan ɛbhɛ.
34ɛYɛso gha ne yɔngɔ, “ɛTaa, hana nibhɛ nɛ, sɔng nibhɛ yɛɛ ɛkɔn na nɛ nibhɛ mɔn nang.”
Nisooja na ne ji ren inɛn daa ne ibol ne itsura da, te nibhɛ seng ɛwoo ne ɛrɔngɔ yaa boos.
35Ninyi na ne kyinasek nibhɛ wɛɛ. Nindiinday ya ne i cɔk ɛbhɛ irway nibhɛ bo, “Ɛ kɛ phɔrɔt nidɛng te ne ɛ ma phɔt ito ɛbhɛ de, wu ɛbhɛ ɛ so ɛKiriti gha ne ɛTaanggbey ya kɛ kasa wo.”
36Nisooja na ne ma cɔk ɛbhɛ irway ba. Nibhɛ bo inɛn ɛnap, nzɔwɔkɔk kɛ nibhɛ nang ɛbhɛ wu te ɛ sɔ. 37Nibhɛ ne ji yɔngɔ, “Wu igyɛ wo ɛ so yɛ ɛgɔm niYahodawa na, ne ɛ phɔt ito mo!”
38Nibhɛ haal, nibhɛ baa daa ɛco ne ihon na ne kɛ gangat ɛYɛso yegha nɛ wo, nibhɛ bo,
“ɛgɔm niyahodawa ghaa wo!”
39ɛDɛng ndɔ ninaa ɛyi na ne kɛ gangat nibhɛ nɛ niYɛso yena, ne ɛ ma cwaak ne idɛ ibol ne bɛɛs de, ɛ yaak ɛYɛso yegha, “Nzi shɛɛ bo igyɛ soye ɛKiriti gha nang? Ne ɛ phɔt ito mo, ɛ ta phɔt njwii.”
40ɛHaa ne ifaa yɛ ne sit ɛbhɛ ne ɛbung, ɛ yaak ɛbhɛ, “Ɛɛ ma phok ɛnik ɛTaanggbey yo ne kɛ hyɛ njwɛɛn ɛshara ɛdaan nɛ ne ɛbhɛ woo? 41Njwit to nang, i tal njwii ne ɛkɔn na ne njwi kɛ mɔn, njwii saasel iphɛ. Ɛbhɛ wo sɔng ɛ kɛ ne mɔn ɛkɔn ɛbebhe nang.”
42Ne ɛ ji yaak ɛYɛso yegha, “ɛYɛso! Yaa sɛ ɛ kɛ bhɛ wara ne igbɔm mo da te ɛ ne taate ne mee.”
43ɛYɛso gha ne kyii ɛbhɛ nɛ, ɛ yaak ɛbhɛ, “Nzi tɔng ngɛ itin nɛ, izenge wo aa bhɛ soos ɛlɔ nge daa ne ijwee ne irway ihwala wo.”
iKu ɛYɛso De
(ɛMac 27.45-56; ɛMar 15.33-41; ɛYoh 19.28-30)
44Kɛ ne sɛ ɛceree ne igbey, ɛzay ya ne ku te gbyik gbik. Ɛlɔ gha ne shɛɛ ɛlɛ wo ɛ phyii hɔn ɛwa ɛtat. 45Sɔng iroy de kaa ne tɔ tol nang, ɛlɛbhɛlɛ ndɔ ne iDeng nga ne le dak ɛ kpɛrɛt ɛceree ɛ hobhoset ɛphaa. ɛLɛbhɛlɛ ndɔ ne iDeng nga ne ɛ kɛ hobhose ɛLɔ gha kɛ Tul Kang ngo ne ɛHaa ne kɛ Tul Kang i Shɛs so. 46ɛYɛso gha ne yel-le ne ɛgbaang ne izɔlɔs, ɛ yɔngɔ, “ɛTaa, nggɛ tek iken nge de ndɔ ne iwɔ mo.” Kɛ ne sɛ ɛ kɛ boote ɛlɛ wo nang, ifɔng ɛbhɛ da ne ji wuru.
47ɛNdiinday nisooja na ne ɛ sonɛ ɛlɔ yɛwo ne yaang ɛkɔn na ne ɛ kɛ te wo, ne ɛ nang ɛTaanggbey ye ne ndiinday, ɛ yɔngɔ, “ɛTsak! ɛNyi yeghaa wo ɛnyi ɛyɛnɛng.”
48Kɛ ne sɛ ninyi na nɛ nibhɛ kaa tumɛy ɛnggyɛ wo, tɛ nibhɛ yaang ɛkɔn na ne ɛɛ tes so, kɛ yaang ɛlɛ wo, nibhɛ kyii gbik ne ibɔ nibhɛ ɛgyɛy, nibhɛ bees irway. 49Ninyi nɛ nibhɛ kaa ne i yɛɛ ɛYɛso yegha, gbik nɛ nikuk ka nɛ nibhɛ kɛ les ne iGalili de nibhɛ kungus ɛYɛso yegha ne shɛɛ kyakyak nibhɛ wɛɛ nikɔn nɛnaa nggyɛ wo.#23.49 Ta yɛɛn: ɛLuk 8.2-3.
iRɛɛ ɛYɛso Da
(ɛMac 27.57-61; ɛMar 15.42-47; ɛYoh 19.38-42)
50ɛDɛ ɛnyi ne itɔrɔng niYahodawa na kaa ne sonɛ ne kaa bok ɛbhɛ ɛYisifu, ɛ kaa so ɛnyi ɛyɛnɛng ɛ ta so cik. 51Ɛ kaa ne mbaray ibol ne itɔrɔng ngge. Ɛ kaa ne so ɛnyi ɛgarang ne iRamatiya ne iphɛ so ne ivel ne iYahudiya. Ɛ kaa ne ta i hyep igbɔm ɛTaanggbey.
52Ɛ kaa ne phɛ ɛlɔ ɛBilatus sa, ɛbhɛ phom ɛbhɛ, wu te ɛ nang nge ikom ɛYɛso de te rɛɛ. 53Ne ɛ bo ikom ɛYɛso de ɛ harap iphɛ ne ɛtura ne ililing ɛ ji bhɛ rɛɛ ndɔ ne idɛ ikpuu ba ne ɛ kaa ku ryɔng ifɛ ɛmbambang ne ɛphang, ne hame kɛ ku rɛɛ ne ɛnyi. 54ɛTuk kɛ kaa ne so ɛTuk iwii ne yaa yunga tsa iWɛsɛ ba.
55Nikuk ka nɛ nibhɛ kɛ le ne iGalili de nɛ niYɛso yena ne kungus ɛtsim ɛYisifu gha nibhɛ bhɛ yaang ikpuu ba, nibhɛ ne ta yaang ɛli ne kɛ rɛɛ ikom be. 56ɛTsim mɛ ɛlɛy, nibhɛ ne ji kyii nibhɛ hyil en nibhɛ bhɛ ryɔng inɔɔy ne mpɛ bok ɛnkyinkyɔp. Nibhɛ ne ji cwiil nibhɛ shɛɛ ne iWɛsɛ ba tɛ nibhɛ hyep ne ikpii da.
Currently Selected:
ɛLuka 23: etxNT
Highlight
Share
Copy
Want to have your highlights saved across all your devices? Sign up or sign in
© Wycliffe Bible Translators, Inc. and
© the Nigeria Bible Translation Trust 2018
in cooperation with
iTen Language and Bible Translation Project
