ɛLuka 22
22
Kɛ Rop ɛNu wu yaa Phoo ɛYɛso Ye
(ɛMac 26.1-5; ɛMar 14.1-2; ɛYoh 11.45-53)
1Nten ne iDira ne iBɛrɛdi ne Sang iYis de, nɛ niYahodawa na bok iphɛ iDira ne tes iDee de tsak ko kaa ne yek cɛcɛk, 2Nindiinday Nibo ɛTaanggbey ya nɛ Ninaa ne Kpɛl ɛShara gha ne yaa tɔk ɛli nibhɛ sɛɛ sɛ ikɛk nibhɛ phoo ɛYɛso yegha, nibhɛ ne kyii phok ɛnik ninyi wo.
ɛYahuza gha kɛ Sim Aa Rɛp ɛYɛso Ye
(ɛMac 26.14-16; ɛMar 14.10-11)
3ɛShɛtan na ne lel ndɔ ne irway ɛYahuza ba ne i bok ɛbhɛ ɛSikɔrɔti gha ne ɛ so ɛdaan ndɔ ninɔn ne icwam ɛnduwubɔ nɛ ninyi ifaa na. 4ɛYahuza gha ne bhɛ sɛ nindiinday nibo ɛTaanggbey ya nɛ ninaa ne wɛɛ iDeng nga, nibhɛ ne bol lenɛ ɛli ne aa rɛp nibhɛ ne ɛYɛso gha. 5Ninyi yɛnaa nggyɛ wo ne yɛk irway ihwala gbom nibhɛ ne taal en nɛ wu n yaa nang ɛbhɛ ijam. 6ɛYahuza gha ne sim ibol lɛ, ne ɛ ji yaa tɔk ikɛk kɛ ne aa rɛp nibhɛ ne ɛYɛso yegha gying tɛ nibhɛ wum ɛbhɛ.
iRyɔng ɛlɔ ne Re iRe iDira ne Tes iDee Tsak
(ɛMac 26.17-25; ɛMar 14.12-21; ɛYoh 13.21-30)
7ɛTuk ne iDira ne iBerɛdi ne sang iYis sa ne i tuu, ne yaa hyɛghɛ ninɔn ne ifarak ne hap itsanga ne Tes iDee de Tsak ko. 8ɛYɛso gha ne tom niBiturus se, nibhɛ ne ɛYohana, ɛ yaak nibhɛ, “Cwi ɛn ɛbhɛ ryɔng ɛn njwɛɛn ɛlɔ gha ne njwɛɛn yaa re ne iDira ne tes iDee de Tsak ko.”
9Nibhɛ ne phom ɛYɛso yegha nibhɛ yaak ɛbhɛ, “Ɛɛ sim te njwi sɛ bhɛ ryɔng ɛlɔ yɛ ɛbii?”
10ɛYɛso gha ne yaak nibhɛ, “Cwi ɛn, yaa sɛ ɛ kɛ bhɛ lel ɛn ndɔ ɛgarang nga, aa ne sɛm nyini ne ɛdɛ ɛnyi gha ne ɛ bok ɛtus inɛn. Kungus ɛn ɛbhɛ, ɛbhɛ lel ɛn ne ijwee wo ne ɛ phɛɛs so. 11Te ne ɛ yaak ɛn ɛhaa ne ijwee gha: ‘ɛKyɛɛ ne icwam ma bo wu te tɔɔrek njwi izuk ko ne yaa re ne ire ne iDira ne Tes iDee Tsak, nɛ ninɔn ne icwam ɛbhɛ.’ 12Aa ne tɔɔrek nyini ɛdɛ ɛgbaang ne izuk ko dak ɛsoo ne kɛ ku yaak nilɔ ne sooset, ryɔng ɛn nikɔn na ɛnggyɛ. 13Nibhɛ ne wum ɛnkiinɛ, nibhɛ ne hyel nibhɛ bhɛ sɛ nikɔn na ɛli ne ɛYɛso gha kɛ ku tɔng nibhɛ wo. Nibhɛ ne ji ryɔng ire ne Tes iDee de Tsak ko.”
iRe ɛDaray De
(ɛMac 26.26-30; ɛMar 14.22-26; 1iKɔr 11.23-25)
14Kɛ ne sɛ nten nɛ kɛɛ tuu, ɛYɛso gha ne bo ninɔn ne Tom ɛbhɛ na nibhɛ bhɛ soos ɛlɔ ne re ire gha. 15Ne ɛ yaak nibhɛ, “Nggɛ ku has irway gbom, te nzɛ re ire ne iDira ne Tes iDee Tsak kɛdee wo ne nyinɛn nyɛɛn nggyi sɔ nggbang ngga! 16Nzi tɔng nyini sɔng naa tang re iphɛ nang, naa hyep ɛtuk ka ne iphɛ sɛ bhɛ shwaak ghe daa ne igbɔm ɛTaanggbey.”
17ɛYɛso gha ne ji bo ɛhyihyangas sa ɛ tɔɔl ɛTaanggbey ye irway ihwala ɛ ji yɔngɔ, “Ngga ɛn te ɛ hosop ɛn ndɔ mon.” 18Nzi tɔng nyini, sɔng naa tang sɔ inɛn ɛnap pɛdaa wo nang, naa hyep igbɔm ɛTaanggbey ba kyi bhɛ kyii.
19Ne ɛ bo ibɛrɛdi de, ɛ tɔɔl ɛTaanggbey ye irway ihwala, ɛ kpɛl iphɛ, ɛ ji nang nibhɛ ɛ yaak nibhɛ, “iBek ngedee wo ne kɛ nang ɛlɔ mon, ku i mɔn ɛn ɛlɛ wo te ne ɛ tas ɛn ne mee.”
20ɛTsim mɛ nɛ nibhɛ kɛ re ire de, ne ɛ ta bo ɛhyihyangas sa dɔng, ɛ yɔngɔ, “ɛHyihyangas sɛghaa wo so ɛhaa ne ìtsɛm ihywas ne ɛTaanggbey ya yaa rop daa neyi nge na ne yaa lok ko.”
21“Ne ɛ yaang ɛn, ɛnyi ne aa rɛp me wo ɛ so ɛbɛ wo, njwii re ire de ne ɛbhɛ! 22ɛNgɔn ɛNyi gha yaa ne ku ɛli ne kɛ ku yɔngɔ wo, ne so ɛkɔn ne ɛnik daa ɛnyi gha ne aa ne rɛp me wo nang!” 23Ninɔn ne Tom ma ne yaa phomos en ndɔ nibhɛ, wu ɛya phɛɛ yɛ bhɛ sɛ mɔn ɛkɔn nɛghaa wo dek.
iShamas daa ɛHaa ne ɛ So ɛNdiinday
24iShamas ne lel ndɔ ninɔn ne Tom ma daa ɛhaa nɛ nibhɛ wɛɛ te ɛbhɛ phyin ne ndiinday.#22.24 Ta yɛɛn: ɛMac 18.1; ɛMar 9.34; ɛLuk 9.46. 25iPhɛ ɛlɛy yang, ɛYɛso gha ne yaak nibhɛ, “Nigɔm ninyi ne hame nibhɛ so niYahodawa na i yɛbhɛsek nikpuru nibhɛ; nindiinday ya ne ji yɔng wu n si phyighis nibhɛ. 26Sɔng iphɛ ne te ɛlɛy ndɔ mon no nang. Te ɛhaa ne ɛ phyin ne ndiinday de te tɛ ɛbhɛ so ɛshɛɛrɛng ngɛ, te ɛndiinday ya ne te tɛ ɛbhɛ so ɛkpuru.#22.26 Ta yɛɛn: ɛMac 23.11; ɛMar 9.35. 27Ɛhay ɛbhɛ phyin ne igbom bee? ɛNyi gha ne ɛ kɛ soos, ku i mɔn ɛbhɛ woo, hang ɛhaa gha ne ɛbhɛ tak iyɔm be? Nzo nzi bo ɛhaa ne soos sa. Mee woo ne nzo ndɔ mon te ɛhaa ne mɔn nyini.”#22.27 Ta yɛɛn: ɛYoh 13.12-15.
28Nyinɛn ɛ so ɛn ninaa ne ɛ kɛ kyinak ɛn ne mee nten ne sɔ nggbang nge da. 29Nzi ne naas nyini igbɔm ba ɛli ne ɛKyɛɛ nge gha kɛ ma nang me wo. 30Ɛ sɛ re ɛn ɛ ta sɔ ɛn ɛlɔ ne re ire nge gha daa ne igbɔm da, ɛ sooset ɛn nilɔ ne soos ne igbɔm ɛ bol itaang nzuwubɔ ne iphɛ ifaa niSɛrɛla de ɛshara.#22.30 Ta yɛɛn: ɛMac 19.28.
ɛYɛso gha i Bo wu ɛBiturus Yaa Re iShamas Ne
(ɛMac 26.31-35; ɛMar 14.27-31; ɛYoh 13.36-38)
31ɛYɛso gha ne yaak ɛSimɔn negha, “ɛSimɔn, ɛSimɔn! Phok me, ɛShɛtan kɛ phom ikɛk, kɛ ne nang ɛbhɛ ne aa bɛm nyini ɛ te nyini zɛzɛk ɛli ne ɛhaa ne ihwap i bɛm ɛlikama ɛbhɛ ɛ tul ishoo yɛ. 32Nggɛ ne ku roo ɛTaanggbey ye daa ne ito mo ɛSimɔn ɔɔy, wu hang ìnang ne itin mo de taasek. Yaa ne sɛ ɛ kɛ bhɛ kyii ne ɛ te nigwaa mo na itsɔngɔl gɛgɛy.”
33ɛBiturus sa ne kyii nɛ ɛ yɔngɔ, “ɛDaray, nggɛ ku sim-mɛ gbik naa roos sɛ. Wu iphɛ kɛ ma yung bhɛ hɔn yaa rop njwii ne igyɛ, ta phoo njwii ne igyɛ, gbik nggɛ sim.”
34ɛYɛso gha ne yaak ɛbhɛ, “Nzi tɔng ngɛ ɛBiturus ɔɔy, ɛrom yaa yɔng te tɛpeey ɛdaan izenge wo ˆaa ne yɔng wu hang i yɛɛ me ɛ te ɛtat.”
Nikɔn na Yaa Hyereey Gbik
35ɛYɛso gha ne phom ninɔn ne icwam ɛbhɛ na ɛ yaak nibhɛ, “Nten de ne nggaa tom nyini n yaak nyini hang ɛ boos ɛn irambak ne ijam be, ne irambak de gbik ne ikpikpangat da ɛ kaa bhɛ wɔs ɛn ɛkɔn bɛ?”
Nibhɛ ne kyii nɛ nibhɛ yɔngɔ, “Kwa!”#22.35 Ta yɛɛn: ɛMac 10.9-10; ɛMar 6.8-9; ɛLuk 9.3; 10.4.
36Ne ɛ yaak nibhɛ, “ɛLyilyɛghaa wo nang, ɛnyi gha ne ɛ bok ijam gbik ne irambak te ne ɛ bo. ɛHaa ne ɛ sang ɛwal te ne ɛ rɛp ɛgbaang ne ɛtura ɛbhɛ ɛ say yɛ. 37Nzi ne bok nyini, ibol de ne kɛ ku haa ndɔ ne iwee ne ibol ɛTaanggbey yo i bo, ‘Kɛ byinki ɛbhɛ ndɔ ninaa ne ɛfɔt,’ kɛ ne shwaak ghe daa mee, ɛli ne iphɛ so nggbinggbing i shwaak ɛkɔn na ne kɛ ku haa wo daa me wo.”#22.37 Ta yɛɛn: ɛSh 53.12.
38Ninɔn ne icwam ɛbhɛ na ne yaak ɛbhɛ, “ɛDaray! Yaang idɛ ᐩihywa dedee be ihywɛ ihywaa ne njwi bok.” ɛYɛso gha ne yaak nibhɛ, “iHywɛ kɛ ne hɔn nɛ.”
ɛYɛso gha kɛ bhɛ Roo Daa ne iGol Niphaa
(ɛMac 26.36-46; ɛMar 14.32-42)
39ɛYɛso gha ne tek ndɔ ɛgarang nga, ɛli ne ɛ ku mɔn no, ɛ phɛ daa ne iGol ne iPhaa de, ninɔn ne icwam ɛbhɛ na ne ma ta kungus ɛbhɛ. 40Kɛ ne sɛ nibhɛ kɛ bhɛ tuu ɛlɔ yɛ nang, ne ɛ yaak nibhɛ, “Roo ɛn ne ɛTaanggbey ya, aa yung ho ɛn ndɔ ne tɛrɛk ga.”
41ɛYɛso gha ne tek nibhɛ ɛ hyeete, ɛ phɛ gyigyɔɔ, ɛli ne sɛɛ pheng ikɛɛ iphɛ bhɛ hɔn, ɛbhɛ cwi ne irwa-nggburuk ɛ roo ne ɛTaanggbey ya, 42ɛ yaak ɛbhɛ, “ɛTaa, sɛɛ yɔng aa sim, ɛ sɛɛ ne ba me ɛhyihyangas nggbang ngɛdaa wo. Gbik ne iphɛ ɛlɛy, sɔng nzi ne bo wu te ɛ roos ideeng nge de nang, idee mo ne aa ne roos.”
43ɛMalɛka ne le daa ne irywa, ɛ te ɛbhɛ itsɔngɔl gɛgɛy. 44ɛYɛso gha kaa ne so ndɔ nggbang gbom ne ɛ hante ne roro ne ɛTaanggbey ya. iLong ne ɛbhɛ ne yaa wuusi iphɛ tongot tɛ ᐩihyɔn neyi.
45Kɛ ne sɛ ɛYɛso gha kɛ yilitsik ɛlɔ ɛroo gha ɛ phɛ gɔɔ ɛlɔ ninɔn ne icwam ɛbhɛ na, ne ɛbhɛ sɛ nibhɛ sos nwa, nibhɛ kɛ tes kyɔkyɔt lenɛ ne irway ishwii nɛ nibhɛ bok. 46ɛYɛso gha ne yaak nibhɛ, “iKyee phɛ kɛ te ˆɛ so ɛn nwa baa? Seme ɛn, te ˆɛ roo ɛn, aa yung ho ɛn ndɔ ne itɛrɛk ga.”
Kɛ Wum ɛYɛso Yegha
(ɛMac 26.47-56; ɛMar 14.43-50; ɛYoh 18.2-11)
47ɛYɛso gha ne tɔ ndɔ ne ivol ba nang iwa ninyi ne wuru, duu, nibhɛ phɛɛs ɛlɔ ɛbhɛ. ɛYahuza ne ɛ kaa so ɛdaan ndɔ ninɔn ne icwam ɛbhɛ na, ɛbhɛ kɛ ne ho ɛyisɛ, ɛ phɛɛs ne nang nibhɛ ɛYɛso yegha. Kɛ ne sɛ nibhɛ kɛ tuu ɛlɔ niYɛso yena nang, ɛYahuza gha ne phɛ ɛlɔ ɛYɛso gha, ɛbhɛ wum ɛbhɛ hap, ɛ kyili ɛbhɛ. 48ɛYɛso gha ne yaak ɛbhɛ, “ɛYahuza! Aa wum ɛNgɔn ɛNyi gha hap ɛ ji rɛp ɛbhɛ?”
49Kɛ ne sɛ ninɔn ne icwam ɛYɛso na kɛ yaang ɛkɔn na ne aa te wo, nibhɛ ne yaak ɛbhɛ, “ɛNdiinday, njwi tul ᐩihywa mos de naa?” 50ɛDɛng ne shii yɛɛn itsoro ɛkpuru ɛgɔm nibo ɛTaanggbey yo ɛ tɛmɛ ifɛ ɛ bala.
51ɛYɛso gha ne yaak nibhɛ, “Tek ɛn ɛlɛy!” Ne ɛ ji yɛɛn itsoro ɛnyi wo ne kɛ tɛmɛ wo ɛ dad ifɛ ɛ te ifɛ ikpen.
52ɛTsim mɛ ɛlɛy yang, ɛYɛso gha ne ji boote nɛ nindiinday nibo ɛTaanggbey ya, nɛ ninaa ne hyep ideng nga, gbik nɛ ninu nikɔɔn na nɛ nibhɛ kɛ yɛɛs ne wum ɛbhɛ wo, ɛ yaak nibhɛ, “Ɛ kɛ bhɛ wuusi ɛn nɛ nibara ne ncwɛng ɛ yaaso ɛn nɛ ɛli te nzo ɛsas lɛɛ? 53Nggɛ shɛɛ ɛbɛ wo nɛ nyinɛn ndɔ ne iDeng ngge cɛcɛɛy, sɔng ɛ kɛ ne ku yɔng aa wum ɛn mɛɛn nang. ɛLyilyɛghaa wo iphɛ ne ji so nten mon, nten de ne igbyik ge iphɛ i re igbɔm ba.”#22.53 Ta yɛɛn: ɛLuk 19.47; 21.37.
ɛBiturus sa kɛ Ton ɛYɛso Yegha
(ɛMac 26.57-58,69-75; ɛMar 14.53-54,66-72; ɛYoh 18.12-18,25-27)
54Nibhɛ ne wum ɛYɛso yegha nibhɛ phɛ ne ɛbhɛ ne ijwee ɛgɔm nibo ɛTaanggbey yo. ɛBiturus sa ne maa kungus nibhɛ ɛtsim kyaam. 55Kaa ne murak igboo ɛsaa gha nibhɛ saa, ɛBiturus sa ne ma bhɛ soos ndɔ nibhɛ ɛɛ saa igboo wo. 56Kɛ ne sɛ igboo wo kɛ tolte ɛBiturus segha, ɛdɛ ɛngɔn ɛlyilyap pa ne ɛ so ɛkpuru ne seng ɛbhɛ ɛ kɛ soos ɛ saa igboo wo, ne ɛ see ɛbhɛ ne irwisɛ ne ɛ ji yɔngɔ, “ɛNyi yɛghaa wo ma so ɛdɛng ndɔ ninyi ɛYɛso na.”
57ɛBiturus sa ne yɔngɔ, “ɛKuk! Sɔng nzi yɛɛ ɛbhɛ nang.”
58Kɛ ne sɛ kɛ phyɔngɔle ncɛt, ɛdɛ ɛnyi gha ne ta seng ɛBiturus segha, ne ɛ yɔngɔ, “Ɛ ma so ɛdaan ndɔ nibhɛ.”
ɛBiturus sa ne yɔngɔ, “ɛSaa! Sɔng nzo ɛdɛng nang.”
59Kɛ ne sɛ ɛwa ɛdaan kɛ phee, ɛdɛ ɛnyi gha ji yɔngɔ, “ɛTsak! ɛNyi yɛghaa wo kɛ so ne ɛbhɛ, daa ɛli ne ɛ so ɛnyi ne iGalili.”
60ɛBiturus sa ne yɔngɔ, “ɛSaa! Sɔng nzi ma yɛɛ ibol de ne ɛ bol nang.”
Kɛ ne se ɛBiturus tang cwaal ɛnu ɛbhɛ, ɛrom me ne ji tɛpeey. 61ɛYɛso gha ne hyereey ɛ see ɛBiturus segha ne irwisɛ, ɛNggyɛy yo ne ɛBiturus sa ne ji taate ɛli ne ɛYɛso gha kɛɛ yaak ɛbhɛ, “ɛRom yaa yɔng te tɛpeey ɛdaan izenge, aa ne ton me ɛ te ɛtat.” 62Ne ɛ wuru gɔɔ ne izay ɛbhɛ san gbom.
Kɛ Sɛ ɛYɛso yegha ta Hal Ɛbhɛ
(ɛMac 26.67-68; ɛMar 14.65)
63Ninyi na nɛ nibhɛ kaa hyep ɛYɛso yegha ne yaa sɛ ɛbhɛ nibhɛ hal ɛbhɛ. 64Nibhɛ ne rop ɛbhɛ irwisɛ nibhɛ ji yaak ɛbhɛ, “Cwaang ngɛ te ˆɛ seng ɛnyi gha ne ɛ kɛ hale yɛwo!” 65Nibhɛ ne bol nikɔn na gbom nɛ nibhɛ yaa cɔk ɛbhɛ irway.
Kɛ Phɛ ne ɛYɛso gha ne iTɔrɔng
(ɛMac 26.59-66; ɛMar 14.55-64; ɛYoh 18.19-24)
66Kɛ ne sɛ ihwɛlɛ kɛ wuru, Ninu niKɔɔn na, nɛ nindiinday nibo ɛTaanggbey ya, gbik nɛ Ninaa ne Kpɛl ɛShara gha ne sɛm en ne itɔrɔng, ne bo ɛYɛso yegha i phɛ nɛ. 67Nibhɛ ne ji yaak ɛbhɛ, “Yung mɔng njwii, igyɛ ɛ so ɛKiriti ghaa?”
ɛYɛso gha ne kyii nɛ, ɛ yɔngɔ, “Wu nggɛ mɔng nyini, sɔng aa ne nang ne itin nɛ nang. 68Wu nggɛ ne phom nyini ibol, sɔng aa ne kyii ɛn mɛɛn nɛ nang. 69Yaa ne lenɛ ɛlyilyɛghaa wo, aa ne yaang ɛn ɛNgɔn ɛNyi gha kɛ soos ne iwɔ ne irwye ɛTaanggbey ne ɛ Bok iTo Gbik.”
70Nibhɛ ne byinki izɔlɔs, nibhɛ yaak ɛYɛso yegha, “Ɛ so ɛNgɔn ɛTaanggbey naa?”
ɛYɛso gha ne kyii nibhɛ nɛ, ɛ yaak nibhɛ, “Nyinɛn ɛ bo ɛn ɛlɛy.”
71Nibhɛ ne ji yɔngɔ, “nJwɛɛn ne ji ta tɔɔ hyep iya bol lɛɛ? Njwɛɛn no, njwɛɛn ne ma phok ɛkɔn na ne ɛ kɛ boote wo!”
Currently Selected:
ɛLuka 22: etxNT
Highlight
Share
Copy
Want to have your highlights saved across all your devices? Sign up or sign in
© Wycliffe Bible Translators, Inc. and
© the Nigeria Bible Translation Trust 2018
in cooperation with
iTen Language and Bible Translation Project
