ɛTomɛ 5
5
iBol ɛHananiya ne ɛSafaratu
1ɛDɛ ɛnyi gha kaa ne ma sonɛ ne kaa bok ɛbhɛ ɛHananiya ne i bok ɛkuk ɛbhɛ ɛSafaratu, ɛ kaa ne ma bhɛ rɛp ihwap ba ne mang. 2Ne ɛ rɛɛ ɛbyin ne ijam ma ne iyɛɛ ɛkuk ɛbhɛ da, ɛ ji bo ɛbyin nɛ ɛ yɛɛs ɛ nang ninɔn ne tom ma. 3ɛBiturus sa ne yaak ɛbhɛ, “ɛHananiya! iKyee iphɛ kɛ te ɛ sim ɛShɛtan na luk kɛ ɛ rɛɛ ɛbyin ne ijam ne ihwap ba ɛ ji ɛ hyɛ iKabyik ɛTaanggbey de irywɛɛk gaa? 4ɛLi ne ɛ kɛ tang rɛp po, ihwap ba kɛ so ivaa mo, kɛ ma yung sɛ ɛ kɛ rɛp po, ijam mɛ kɛ ne soye izee mo. iKyee phɛ kɛ ne teyɛ ɛ yɛɛs ne ihywee ne icwas sɛdaa wo ndɔ ne irway mo daa? Sɔng ɛten ɛsii ne ɛ kɛ ne luk ɛbhɛ nang, ɛTaanggbey ne ɛ kɛ luk.”
5Ne sɛ ɛHananiya gha kɛ phok ɛlɛ wo, ne ɛ ho ɛ ku. ɛGbaang ɛnik ne wum ninyi na nɛ nibhɛ kɛɛ phok ibol lɛ wo. 6Ninɔn niphas ne yɛɛs nibhɛ harap ikom mɛ nibhɛ bo nibhɛ bhɛ rɛɛ.
7Ne sɛ niwa itwat kɛ phee, ɛkuk ɛbhɛ ɛSafaratu gha ne ma ji tuu, ɛlɛy sɔng ɛ yɛɛ ɛkɔn na ne ɛ kɛ te ne ɛras sa nang. 8ɛBiturus sa ne yaak ɛbhɛ, “Mɔng me, igbak ne jam mɛdaa wo ne kɛ bhɛ nang nyini ɛlɔ ne ihwap baa?”
ɛSafaratu gha ne yaak ɛBiturus segha, “Ɛɛy, igbak kɛ.”
9ɛBiturus sa ne yaak ɛSafaratu yegha, “iKyee iphɛ kɛ te ɛ kɛ byinki ɛn ɛnu gha ne ɛras mo gha ɛɛ phɔwɔse ɛn iKabyik ɛDaray dee? iPhɛ dee ninyi na nɛ nibhɛ kɛ bhɛ rɛɛ ɛras mo gha, nibhɛ kɛ bhɛ kyii nibhɛ yɛɛs ne tuu ɛnu ne izuk, nibhɛ yaa ne ma ta bo yɛ nibhɛ wuru nɛ.” 10Nɛ ne nten nɛ ɛSafaratu gha ne ho ne ita ɛBiturus de, ɛ ku. Ne sɛ ninɔn niphas sa kɛ tuu nibhɛ ne sɛ ɛSafaratu gha kɛ ku, nibhɛ ne bo ɛbhɛ nibhɛ bhɛ rɛɛ ɛlɔ gha nɛ nibhɛ kɛ rɛɛ ɛras sa nɛ wo. 11ɛGbaang ɛnik ne wum idira ninaa ne roos de nɛ ninyi na gbik nɛ nibhɛ kɛɛ phok ibol nikɔn nɛdee wo.
ɛTaanggbey ya kɛ Tes Ninyi na Niken Gbom
12Ninɔn ne tom ma ne mɔn nikɔn ne kparat nɛ nikɔn ne ɛnik gbom ndɔ ninyi na. Ninaa ne roos sa gbik ne bhɛ tumɛ en ndɔ ne iDeng ngge ɛlɔ gha ne bok ɛbhɛ ɛlɔ ɛSirim ɛSɔlɔmɔn na. 13Sɔng ɛdɛ ɛnyi gha ne ɛ sang so ɛhaa ne roos sa ne tang yɛɛ ne lel ndɔ nibhɛ wo nang, gbik ne iphɛ ɛlɛy ninyi na ne i naas nibhɛ ne ndiinday.
14Ninyi na gbom niras nɛ nikuk ne i naas ne itin nɛ ne ɛDaray ya, idira ninaa ne roos de ne i hanas se nɛ. 15Nikɔn nɛnaa nggyɛ wo ne te ninyi na yaa tang nisha, nibhɛ laasek nibhɛ daa nilɔ ne laal gbik ne ikpangga ne nkpiinɛ, wu yaa sɛ ɛBiturus i phebhe, te izazurum ɛbhɛ ne phyin ne dat nidɛng nibhɛ ne tes niken. 16iDira ninyi de ne les nigarang nga nɛ nibhɛ so cɛcɛk ne iYɛrushɛlɛm be, nibhɛ yɛɛset nɛ nisha na nɛ ninaa ne ikpabyik ivebhe da i tak nibhɛ iyɔm ne tes niken gbik.
Kɛ Baasek Ninɔn ne Tom ma Nggbang
17ɛGɔm nibo gha nɛ niSadukyawa na ne yaa waa irway nɛ ninɔn ne tom ma. 18Nibhɛ ne bhɛ wumus ninɔn ne tom ma, nibhɛ bhɛ gangat nibhɛ ne ijwee ne nyang. 19Ne sɛ ɛtuk, ɛmalɛka ɛTaanggbey ne yɛɛs ɛ phaasel ninu ne izuk ne ijwee ne nyang nga, ɛ tul ninɔn ne tom ma ne izay, ɛ yaak nibhɛ, 20“Cwi ɛn ndɔ ne iDeng ngge te ɛbhɛ tɔng ɛn ninyi na ibol ne iken iphas sɛ de wo.” 21Ne sɛ nibhɛ kɛ phok ɛlɛ wo, nibhɛ ne wuru ne ihwɛlɛ gbyigbyik nibhɛ phɛ ndɔ ne iDeng ngge, nibhɛ yaa bhɛ mɛmɛ ninyi na nɛ.
Ne sɛ ɛgɔm nibo gha nɛ ninyi ɛbhɛ na kɛɛ tuu, ne yel-le itɔrɔng ngge nɛ ninu nikɔɔn niSɛrɛla na, nibhɛ ne ji tom mɛ ne ijwee ne nyang ngo te bhɛ bo ninɔn ne tom ma yɛɛs nɛ. 22Ne sɛ nisooja na kɛ bhɛ tuu ijwee ne nyang ngo, sɔng nibhɛ ne sɛ ninɔn ne tom ma nang. Nibhɛ ne kyii nibhɛ bhɛ mɔng nibhɛ ibol lɛ. 23Nibhɛ yɔngɔ, “Njwi kɛ bhɛ sɛ ijwee ne nyang ngo so kyup, kɛ gangat nilɔ yɛ, ninaa ne hyep kɛ kyinasek nɛ ninu ne izuk kɛ. Gbik ne iphɛ ɛlɛy, kɛ ne sɛ njwi kɛ phaal ninu ne izuk kɛ, njwi ne sɛ idɔ yɛ buu, wɛlɛng ɛnyi.” 24Ne sɛ nibhɛ kɛ phok ɛlɛ wo, ɛndiinday ne ninaa ne hyep iDeng nga nɛ nindiinday nibo na ne te buruburu gbom, nibhɛ ne yaa sap daa ɛkɔn na ne aa te nɛ nibhɛ.
25ɛDɛ ɛnyi gha ne yɛɛs ɛ yaak nibhɛ, “Phok ɛn! Ninyi na ne ɛ kɛ gangke ɛn nibhɛ ndɔ ne ijwee ne nyang ngo nibhɛ so ndɔ ne iDeng nibhɛ mɛmɛ ninyi nɛ.” 26iPhɛ ɛlɛy ɛndiinday ninaa ne hyep pa nɛ ninaa ne hyep iDeng nga ne bhɛ bo ninɔn ne tom ma nibhɛ yɛɛs nɛ. Sɔng nibhɛ kaa ne bhɛ bo ihwet tang daa ɛli nɛ nibhɛ kaa phok ɛnik ɛlɔ nɛ ninyi na ya yung phengɛ nibhɛ.
27Ne sɛ nibhɛ kɛ yɛɛs nɛ ninɔn ne tom ma, nibhɛ ne tek nibhɛ ɛnu ɛyisɛ ne itɔrɔng nga. ɛGɔm nibo gha ne phomos nibhɛ, 28ɛ yɔngɔ, “Njwi kɛ bol ne nyinɛn gbom wu hang ɛ tang mɛmɛ ɛn ne ɛkɔn daa ne irywɛɛk ɛYɛso wo. Gbik ne iphɛ ɛlɛy, ˆɛ kɛ ne taal ɛn iYɛrushɛlɛm be ne imɛmɛ mon da gbik, ɛ ne ji sim ɛn te aa yɔng ɛn wu neyi ɛnyi yɛghaa wo so daa ne ito mos!”#5.28 Ta yɛɛn: ɛMac 27.25.
29ɛBiturus sa nɛ ɛbyin ninɔn ne tom ma ne kyii nibhɛ nɛ, nibhɛ yɔngɔ, “iPhɛ so nggbinggbing njwi roos ibol ɛTaanggbey de ne njwi yaa roos idee ɛten ɛsii de. 30Ɛ kɛ phoo ɛn ɛYɛso yegha, daa ɛli ne ɛ kɛ gangat ɛn ɛbhɛ dak ne ihon. Nɛ so ɛTaanggbey ya ne ɛ so ɛTaanggbey nikyɛɛ nikyɛɛ mos, ɛbhɛ kɛ yiisik ɛYɛso yegha tsik ndɔ ne ikpuu da. 31ɛTaanggbey ya ne nang ɛbhɛ ne nindiinday, ɛ tek ɛbhɛ ne iwɔ ne irwye ɛbhɛ, ɛ teye ɛndiinday ne ɛhaa ne phɔt, te ne lenɛ ɛlɛy niSɛrɛla na san ɛbɔk i hana nibhɛ ne ɛfɔt nibhɛ wo. 32Njwii tɔng nyini ibol nikɔn de ne njwi kɛ yaang, ɛlɛy ne iKabyik ɛTaanggbey de ne ɛTaanggbey ya kɛ nang ninyi nɛ nibhɛ kɛ roos ibol ɛbhɛ de.”
33Ne sɛ nindiinday ya kɛ phok ɛlɛ wo, nibhɛ ne te njenjek nibhɛ yaa sim tɛ nibhɛ sɛɛ phobho ninɔn ne tom ma. 34Gbik ne iphɛ ɛlɛy, ɛdɛng ndɔ niFarisawa na ne i bok ɛbhɛ ɛGamaniyɛl ne ɛ ta so ɛhaa ne kpɛl ɛShara, nɛ ninyi na gbik kaa naas ɛbhɛ ne ndiinday ne yilitsik ndɔ ne itɔrɔng, ne ɛ yɛk ngɛ itɔrɔng ngge wuusik ninɔn ne tom ma ne izay nyɛɛn. 35Ne ɛ ji yaak itɔrɔng ngge, “Nyinɛn nigwaa en niSɛrɛla, wɛɛ ɛn hywɛɛ daa ɛkɔn na ne ɛ sim te aa mɔn ɛn ninyi yɛnaa wo nɛ. 36Ne ra ɛtsim, ɛdɛ ɛnyi gha kaa wuru nɛ ne kaa i bok ɛbhɛ ɛTawudas, ne ɛ kaa bo ito ɛbhɛ te ɛgbaang ɛnyi. Ninyi na kaa ne hɔn ikpɔl nwaas nɛ nibhɛ kaa roos ɛduu ɛbhɛ. Kaa ne sɛ kɛ phoo ɛbhɛ ninaa ne roos ɛduu ɛbhɛ gha ne tes en shwaa gbik, ibol ɛbhɛ de ne te buu. 37Ɛtsim ɛbhɛ, ɛdɛ ɛnyi ne iGalili gha ne kaa i bok ɛbhɛ ɛYahuza ne ma ta wuru nɛ nten de ne kaa tɔng ninyi ne ivel lɛdaa nggyɛ wo. Ɛ yɔng wu te ninyi nibhɛ mbaray igbɔm, ɛbyin ninyi na ne ma ta roos ɛduu ɛbhɛ. Ne ma ta phoo ɛbhɛ, ninaa ne roos ɛduu ɛbhɛ na ne ma tes en shwaa. 38iPhɛ ɛlɛy, nzi ne bok nyini shɛɛ ɛn kyakyak nɛ ninyi yɛ na wo. Tek ɛn nibhɛ, wu ɛten ɛsii ɛbhɛ bok ibol nikɔn nɛdee wo, iphɛ sɛ ne taal le. 39Wu iphɛ ne le ɛlɔ ɛTaanggbey, sɔng aa ne yɛɛ ne kyɛngɛ ɛn nibhɛ wo nang. Wɛɛ ɛ nyini hywɛɛ aa yung yaa dat ɛn iphup ne ɛTaanggbey.”
Nindiinday ya ne sim ibol ɛbhɛ de. 40Nibhɛ ne yel-le ninɔn ne tom ma ndɔ ne ijwee wo, nibhɛ hal nibhɛ. Nibhɛ ji yaak nibhɛ wu hang nibhɛ tang boote ibol ndɔ ne irywɛɛk ɛYɛso wo dɔng. Nibhɛ ne ji yaak nibhɛ te nibhɛ hyel. 41Ninɔn ne tom ma ne tek ɛnu ɛyisɛ nibhɛ gha ne ɛgbaang ne irway ihwala, daa ɛli nɛ nibhɛ yaang nibhɛ kɛ ma hɔn nibhɛ kɛ sɔ nggbang ngga da ne irywɛɛk ɛYɛso wo. 42Ninɔn ne tom ma ne re ɛnu ɛyisɛ ne tɔng ibol iyɛnɛng ngge izenge ne ihwɛlɛ ndɔ ɛsaa ne iDeng nga, ne ndɔ ne idee ninyi, nibhɛ bo wu ɛYɛso gha ɛbhɛ soye ɛKiriti gha.
Currently Selected:
ɛTomɛ 5: etxNT
Highlight
Share
Copy
Want to have your highlights saved across all your devices? Sign up or sign in
© Wycliffe Bible Translators, Inc. and
© the Nigeria Bible Translation Trust 2018
in cooperation with
iTen Language and Bible Translation Project
