ɛTomɛ 3
3
Kɛ Te ɛLɔɔm ɛKen
1Kaa ne sɛ ɛdɛ ɛtuk kɛ, niBiturus se na ne ɛYohana ne phɛɛs ne iDeng tɛ nibhɛ bhɛ roo ne ɛTaanggbey, nten nɛ kaa ne so igyɔs itat izee ne igbey. 2Ɛdɛ ɛnyi gha kaa ne so ɛnggyɛ wo ne kaa ku yɛk ɛbhɛ ɛ so ɛlɔɔm, i tang ɛbhɛ izenge ne ihwɛlɛ i teesek ɛnu ne izuk ne iDeng nga ne i bok ɛbhɛ ɛNu ne iZuk ɛYɛnɛng nga te ɛ roro ijam ɛlɔ ninaa nɛ nibhɛ phɛɛs ndɔ ne iDeng ngge.
3Kɛ ne se ɛlɔɔm ma kɛ yaang ɛBiturus segha ne ɛYohana gha phɛɛs ne lel ndɔ ne iDeng ngge, ne ɛ roo nibhɛ ijam. 4ɛBiturus sa ne ɛYohana gha ne ren ɛbhɛ ne irwisɛ ntinting, ɛBiturus sa ne yaak ɛbhɛ, “Wɛɛ njwii.” 5Ɛnyi gha ne ren nibhɛ ne irwisɛ da nting, ɛ wɛɛ tɛ nibhɛ yaa nang ɛbhɛ ɛkɔn. 6ɛBiturus sa ne yaak ɛbhɛ, “Sɔng n bok ijam, ne ɛzurufa, ne izinariya nang, gbik ne iphɛ ɛlɛy, naa ne nang ngɛ ɛkɔn na ne n bok. Ndɔ ne irywɛɛk ɛYɛso ɛKiriti ne iNazarat, nzi bok kɛ yilitsik te ɛ hyel.” 7ɛBiturus sa ne wum ɛbhɛ iwɔ ne irwye ɛ yiisik ɛbhɛ tsik, ita ɛnyi de ne irwisɛ ne ita yɛ ne shii tes gɛgɛy ɛ te ɛken. 8Ɛnyi gha ne taay hɔbhɔk ɛ kyinak tsik, ɛ yaa hyel, ɛ roos ɛBiturus segha ne ɛYohana gha nibhɛ bhɛ lel ndɔ ɛsaa ne iDeng nga, ndɔ nggyɛ wo ne ɛ ji hyel ɛ taasey ɛ dɛp ɛTaanggbey ye. 9Gbik ninyi na ne yaang ɛbhɛ ɛli ne ɛ hyel ɛ dɛp ɛTaanggbey yegha. 10Ninyi na ne seng wu ɛbhɛ so ɛnyi gha ne ɛ kaa sooset ɛNu ne iZuk ɛYɛnɛng ne iDeng nga ɛ roro wo. Ninyi na ne wum en zii gbom daa ɛkɔn na ne kɛ mɔn ɛnyi yɛghaa wo nɛ.
ɛBiturus sa kɛ Bol nɛ Ninyi ndɔ ɛlɔ ɛSirim ɛSɔlɔmɔn
11Kɛ ne sɛ ɛnyi gha ne kɛ te ɛbhɛ ɛken na kɛ wum ɛBiturus segha ne ɛYohana gha, gbik ninyi na ne ku wum en zii, nibhɛ tel nibhɛ bhɛ pham ɛBiturus segha ne ɛYohana gha ɛlɔ gha ne i bok ɛbhɛ ɛlɔ ɛSirim ɛSɔlɔmɔn na. 12Ne sɛ ɛBiturus sa kɛ yaang ɛlɛ wo ne ɛ yaak nibhɛ: “Ninyi niSɛrɛla, ikyee iphɛ kɛ te ˆɛ kɛ wum nyini zii daa ɛkɔn nɛghaa woo? iKyee phɛ kɛ ne te ˆɛ wɛɛ ɛn njwii woo? ˆƐ wɛɛ ɛn te ihwet mos ifɛ kɛ te ɛnyi yɛghaa wo hyel lo naa? Hang ɛ wɛɛ ɛn te irway ne re ntsong mos? 13ɛTaanggbey ɛBaraying ne ɛShaaku, ne ɛYakub, ɛTaanggbey nikyɛɛ-nikyɛɛ njwɛɛn na kɛ nang ɛkpuru ɛbhɛ ɛYɛso yegha ne ndiinday. ɛYɛso gha ne ɛ kaa nang ɛn ɛbhɛ te i phoo wo. Ɛ kaa ne mbaray ɛn nyini ɛbhɛ ɛnu ɛyisɛ ɛBilatus ɛli ne ɛ kaa jung i sim te aa tek ɛbhɛ ɛ hyel. 14Ɛ kaa mbaray nyini ɛYɛso yegha ne ɛ so ɛnyi ɛcik, ɛnyi ɛkang, ɛ yang yɔngɔ ɛn te tek ɛhaa ne phobho ninyi te ɛ hyel.#3.14 Ta yɛɛn: ɛMac 27.15-23; ɛMar 15.6-14; ɛLuk 23.13-23; ɛYoh 19.12-15; ɛSh 5.3-11. 15Ɛ kaa phoo ɛn ɛHaa ne ɛ nang iken, ɛbhɛ ne ɛTaanggbey ya kɛ ne yiisik ɛbhɛ tsik ndɔ ne ikpuu da. Njwi kaa yaang ɛli nɛ nikɔn nɛnaa wo kɛ tes. 16Nang ne itin ne irywɛɛk ɛYɛso iphɛ kɛ te ɛnyi yɛghaa wo ne ɛ yɛɛn ɛn ɛbhɛ ɛ ta yaang ɛn no kɛ yɛk ihwet da. Kɛ lenɛ ne ìnang ne itin ndɔ ne irywɛɛk ɛYɛso ɛnyi yɛghaa kɛ te ɛken na gbik ko. Gbik mon no ɛ yaang ɛn.”
17“Nigwaa ɛn, nzi yɛɛ ɛ kaa mɔn ɛn ɛYɛso yegha ɛlɛ wo, daa ɛli ne nyinɛn no nɛ nindiinday mon na, sɔng ɛ kaa ɛ yɛɛ ɛn ɛkɔn na ne ɛ mɔn ɛn nang. 18iPhɛ kɛ ne shwaasek ibol de ne ɛTaanggbey ya kaa ku bol ɛnu ninabawa na gbik, ɛ yɔngɔ wu iphɛ so nggbinggbing ɛKiriti ɛbhɛ gha sɛ sɔ nggbang ngga. 19iPhɛ ɛlɛy yang, ne ɛ san ɛn ɛbɔk te ɛ kyii ɛn ɛlɔ ɛTaanggbey ya te ɛ kuus nyini ɛfɔt mon no. 20ɛDaray ya yaa ne nang nyini ihwet ifas, ne ɛ ji tom nyini ne ɛYɛso gha ne ɛ so ɛKiriti ɛbhɛ gha ne kɛ ku kasa nyini nɛ wo. 21iPhɛ ne so nggbinggbing ɛYɛso gha ma shɛɛ dak ne irywa wo, ɛ hyep nten de ne ɛTaanggbey ya sɛ kyi ta yɛk ngɛ nikɔn na tes niphas sɛ, ɛli ne ɛ kaa ku bol ne ile de ɛnu ninabawa ɛTaanggbey ya. 22ɛMuusaa gha kaa yɔngɔ, ‘ɛDaray ɛTaanggbey mon na sɛ nang nyini ɛdɛ ɛnɛbi gha te mee wo, ɛ sɛ ne so ɛdɛ ɛnyi mon na. iPhɛ ne so ngbingbing tɛ ne ɛ tenes ɛn gbik ɛkɔn na ne ɛ sɛ tɔng nyini. 23ɛHiha ɛnyi ne ɛ kɛ ne sang tenes ibol ɛnɛbi yɛdee nggyɛ wo, sɛ ne tul ɛbhɛ gbik ndɔ ninyi ɛTaanggbey ya.’ ”
24“Gbik ninabawa na, kaa tum ne ɛSamɛl phyin bhɛ hɔn ninaa nɛ nibhɛ kɛ yɛɛs ɛtsim ɛbhɛ, kaa ne bol ivol nikɔn na nɛ nibhɛ kɛ tes ndɔ nituk kɛnaa wo. 25Nyinɛn ɛ so ɛn ninɔn ninabawa na, ɛ ta so ɛn ninɔn ne ìtsɛm ma ne ɛTaanggbey ya kaa ne ta rop nɛ nikyɛɛ mon na nten de ne ɛ kaa yaak ɛkyɛɛ mon ɛBaraying ngegha, ‘Sɛ ne lenɛ ne ihywee mo, ɛzay ya sɛ ne sɛ ɛwɛng gbigbik.’ 26Kaa ne sɛ ɛTaanggbey ya kɛ yiisik ɛkpuru ɛbhɛ gha tsik ndɔ ne ikpuu ba, ne ɛ tsa ɛ tom ɛbhɛ ɛlɔ mon, daa ɛli ne ɛTaanggbey ya sim te aa sit nyini ne ɛwɛng, te ɛ hyere ɛrɔngɔ ndɔ mon no, te ɛ tek ihywel ikpɛɛ ɛbhɛ da.”
Currently Selected:
ɛTomɛ 3: etxNT
Highlight
Share
Copy
Want to have your highlights saved across all your devices? Sign up or sign in
© Wycliffe Bible Translators, Inc. and
© the Nigeria Bible Translation Trust 2018
in cooperation with
iTen Language and Bible Translation Project
