ɛTomɛ 13
13
Kɛ Kasa ɛBanabas se ne ɛShawulu i Tom Nibhɛ
1Ndɔ ne idira ninaa ne roos ne iNtakiya na, ninabawa nɛ nikyɛɛ ne icwam kaa ne sonɛ ɛlɛ, ɛBanabas ne ɛSimiyɔn na ne bok ɛbhɛ ɛNija, ne ɛLushiyɔs ne ɛ so ɛnyi ne iSɛrene, ne ɛManayen ne ɛ kɛ shɛɛ ne ɛgɔm ɛHyiridus, gbik ɛShawulu. 2Kɛ ne sɛ nibhɛ re ɛTaanggbey yegha ntsong, nibhɛ kuma iKabyik ɛTaanggbey de ne yaak nibhɛ, “Tul ɛn mɛɛn ɛBanabas se ne ɛShawulu te nibhɛ mɔn ɛtomɛ gha ne nggɛ ku kasa nibhɛ nibhɛ yaa mɔn.” 3Kɛ ne sɛ nibhɛ kɛ roro nibhɛ kuma wo, nibhɛ ne ji tek ɛBanabas segha ne ɛShawulu ne iwɔ, nibhɛ nang nibhɛ ɛnu. Nibhɛ ne ji yɛk nibhɛ ne nkiinɛ.
ɛBanabas sa ne ɛShawulu kɛ Phɛ ne iKuburus
4iKabyik ɛTaanggbey de ne yaak ɛBanabas segha ne ɛShawulu gha wu tɛ iphɛ ne iSɛlukiya. Nibhɛ ne ji bhɛ le ɛnggyɛ wo nibhɛ ne lel ne ɛkparak nibhɛ ne phɛ ne ikop ne iKuburus. 5Kɛ ne sɛ nibhɛ kɛ bhɛ hɔn iSalamis nibhɛ ne sanga ibol ɛTaanggbey de ndɔ ne idee ne itsɔɔy niYahodawa da. ɛYohana gha ne bok ɛbhɛ ɛMarakus sa kaa sonɛ nibhɛ ɛ phyighis nibhɛ ne ɛtomɛ gha.
6Nibhɛ ne bhɛ roos nigarang ne ikop ne iKuburus de gbik, nibhɛ ne phyii hɔn iPafos. ɛNggyɛy yo, nibhɛ ne bhɛ sɛ ɛdɛ ɛnyi ne iYahudiya gha ne ɛ so ɛnɛbi ne irywɛɛk ne kaa bok ɛbhɛ ɛBa-ɛYɛshuwa. 7ɛNɛbi ne irywɛɛk kɛgha nggyɛ wo kaa ne so ɛtaay ɛSajus ɛBulus ne ɛ soye ɛgɔm-na ne iKuburus sa. ɛGɔm-na yɛghaa nggyɛ wo kaa ne ntsɛntsɛng, ne ɛ yel-le ɛBanabas segha ne ɛShawulu gha ɛ sim te ɛ sɛɛ phok ibol ɛTaanggbey de. 8Kaa ne yeres ɛBa-ɛYɛshuwa yɛghaa wo ɛLimas sa ne ilem ne iHɛlɛni de, kaabi i bo wu “ɛHaa ne ikyarakyut.” Ɛ kaa ne mbaray ibol ɛBanada de, ɛ sim te aa ring ɛgɔm-na gha ne nang ne itin nɛ. 9ɛShawulu gha ne ta bok ɛbhɛ ɛBulus sa kaa ne bok iKabyik ɛTaanggbey hyɔrɔ ndɔ ɛbhɛ, ne ɛ see ɛLimas segha ne irwisɛ ntinting. 10Ne ɛ yaak ɛbhɛ, “Ɛ soyɛ ɛngɔn ɛShɛtan! Ɛ bok iphup nɛ nikɔn nicik gbik! Ɛ bok intsɛntsɛng igywebhe ne irywɛɛk. Aa ne kɔɔng ngɛ tang tɔ bees nkpiinɛ icik ɛDaray daa? 11ɛLyilyɛghaa wo, ɛDaray ya yaa ne dat tɛ, aa teyɛ ɛwil ɛ bo nten gbom sɔng ɛ yaang ɛlɔ nang.”
Nɛ nten nɛ, ɛbung ne igbyik ne cwaal ɛbhɛ irwisɛ, ɛ yaa bama nilɔ, ɛ tɔk ɛnyi gha ne aa hɔ ɛbhɛ ɛntsɛng. 12Ne sɛ ɛgɔm-na gha kɛ yaang ɛlɛ wo, ne ɛ wum me zii daa ɛkɔn na ne ibol iDaray de kɛ mɛmɛ nɛ wo, ne ɛ nang ne itin nɛ.
ɛTomɛ ne Kɛ Mɔn ne iNtakiya ndɔ iVel ne iBisidiya
13ɛBulus sa nɛ nyini ɛbhɛ na ne tek iPafos de, nibhɛ berey ndɔ ne ikparak, nibhɛ phɛ ne iFaga ne ivel ne iPamifiliya. ɛNggyɛ wo ne ɛYohana gha ne i bok ɛbhɛ ɛMarakus sa kaa bhɛ tek nibhɛ nɛ, ɛ kyii ɛ phɛ ne iYɛrushɛlɛm be. 14Nibhɛ le ne iFaga de nibhɛ ne phɛ ne iNtakiya ne ɛ so ne ivel ne iBisidiya. Ne sɛ ɛTuk ne iWɛsɛ niYahodawa na nibhɛ ne bhɛ lel ndɔ ne ijwee ne itɔɔy yo nibhɛ soos. 15Ne sɛ kɛ tɔng ɛShara ɛMuusaa gha ne ibol niNabawa de, nindiinday ne ijwee ne itɔɔy yo ne tom nibhɛ nɛ, nibhɛ bo, “Nigwaa en, wu ɛ bok ɛn idɛ bol ne iphɛ yaa phyik ninyi na boote ɛn iphɛ.”
16ɛBulus sa ne yilitsik, ɛ te nibhɛ iwɔ dɛɛ wu tɛ nibhɛ shɛɛ nggbyak, ɛ ji yɔngɔ, “Nyinɛn niSɛrɛla na, ne ɛbyin mon ne re ɛTaanggbey ye ntsong tenes ɛn mɛɛn. 17ɛTaanggbey ninyi niSɛrɛla gha kaa kasa nikyɛɛ-nikyɛɛ njwɛɛn. Ne ɛ yɛk ngɛ nibhɛ hɔn gbom nten de nɛ nibhɛ gha bhɛ shɛɛ ne iMasad de. Ɛ kaa ne bo ihwet gbom, ɛ tul nibhɛ ndɔ ne ivel ne iMasad da. 18ɛTaanggbey ya kaa ne bo ɛbɔk nɛ nibhɛ ndɔ ɛhay ya, ishay de nzuwubɔ nwaas. 19Kaa ne sɛ ɛtsim mɛ ne ɛTaanggbey ya kɛ bunga igbagha ɛniitaa ndɔ ne ivel ne iKaana, ne ɛ nang ninyi ɛbhɛ na ivel lɛ ifɛ teye ivaa nibhɛ. 20Nikɔn nɛnaa wo gbik kaa tes ndɔ ne ishay ikpɔl nwaas ne nzuwubɔ iwii (450).”
“ɛTsim mɛ ɛlɛy ɛTaanggbey ya ne yaa naas nibhɛ ninaa ne bol ɛshara, phyii bhɛ hɔn nten ɛnɛbi ɛSamɛl. 21Ne lenɛ ɛlɛy, nibhɛ ne roo wu te nang en ɛgɔm. ɛTaanggbey ya ne nang nibhɛ ɛSool le ne ɛ so ɛngɔn ɛKyis ne ɛ so ihywee ɛBinyami. Ɛ kaa ne boos igbɔm ba ishay nzuwubɔ nwaas. 22Ɛtsim mɛ ne ɛTaanggbey ya kɛ tul ɛSool legha, ne ɛ yɛk ne ɛDoda ɛ teye ɛgɔm nibhɛ gha. ɛTaanggbey ya ne boote daa ne ito ɛDoda de ɛ yɔngɔ, ‘Nggɛ sɛ ɛDoda ye ne ɛ so ɛngɔn ɛYɛsɛ, ɛbhɛ so ɛnyi gha ne nggɛ cwaak ɛbhɛ ndɔ. Aa ne mɔn me nikɔn na gbik ne nzi sim te ɛ sɛ mɔn.’ ”
23“Ndɔ ne ihywee ɛDoda de ne ɛTaanggbey ya kɛ ne yɛɛs niSɛrɛla na ne ɛhaa ne phɔt ta, ɛYɛso gha, ɛli ne ɛ kaa ku sim-mɛ wo. 24Ɛli ne ɛYɛso gha kɛ ne tɔ tang yɛɛs so, ɛYohana gha kɛ sanga ninyi niSɛrɛla na gbik ibol ɛTaanggbey de, wu te nibhɛ san ɛbɔk te yɛk nibhɛ ne ibatisima. 25Kaa ne sɛ ɛYohana gha taasel ɛtomɛ ɛbhɛ gha, ne ɛ yaak ninyi na, ‘Ɛ bo ɛn nzo me ɛhay lɛ? Sɔng mee nzo me ɛnyi gha ne ɛ hyep ɛn no nang. Ɛ yang yaaso ɛtsim nge. Sɔng nggɛ ma yung hɔn nzɛɛ biri irwik ne ikpikpangat ɛbhɛ nang.’ ”#13.25 Ta yɛɛn: ɛMac 3.11; ɛMar 1.7; ɛLuk 3.16; ɛYoh 1.20,27.
26“Nigwaa en, ninɔn ɛBaraying gbik ne nyinɛn no ne hame ɛ so ɛn niYahodawa na, ne ɛ re ɛn ɛTaanggbey yegha ntsong ngga, njwɛɛn ne kɛ tom njwɛɛn ne ibol ne phɔrɔt tɛdee wo. 27Sɔng ninyi ne iYɛrushɛlɛm na nɛ nindiinday nibhɛ na kaa yɛɛ te ɛYɛso gha bhɛ so ɛhaa ne phɔt ninyi na nang. Sɔng nibhɛ ne ta seng ibol ninabawa de ne i tɔng cɛcɛɛy Nituk ne iWɛsɛ na nang. Nibhɛ kaa ne shwaak ibol de nɛ ninabawa na kaa ku bol lo nten de nɛ nibhɛ kɛ phoo ɛYɛso yegha. 28Sɔng nibhɛ kaa ne sɛ ɛYɛso yegha ne ɛkɔn na ne ɛ kɛ hɔn sɛɛ phoo ɛbhɛ nang, gbik ne iphɛ ɛlɛy nibhɛ ne jung yaak ɛBilatus segha wu te phoo ɛbhɛ.#13.28 Ta yɛɛn: ɛMac 27.22; ɛMar 15.13-14; ɛLuk 23.21-23; ɛYoh 19.15. 29Ne sɛ nibhɛ kɛ mɔn ɛYɛso yegha ɛli ne ɛWee ne iBol ɛTaanggbey yo kɛ ku bol lo, nibhɛ ne ji ɛtura ɛbhɛ daa ne ihon no nibhɛ bhɛ rɛɛ ɛbhɛ ndɔ ne ikpuu. 30ɛTaanggbey ya ne yiisik ɛbhɛ tsik ndɔ ne ikpuu da. 31Ɛ kaa ne bonɛ nituk maa ɛɛ mɔɔng ɛbhɛ wuru ninyi ɛbhɛ na nɛ nibhɛ kaa hyel nɛ nibhɛ nibhɛ le ne iGalili nibhɛ yɛɛs ne iYɛrushɛlɛm be. Nibhɛ bhɛ ne so ninaa ne tɔng ninyi na nikɔn na nɛ nibhɛ kɛ yaang ngo.”#13.31 Ta yɛɛn: ɛTom 1.3.
32“Njwii tɔng nyini ibol iyɛnɛng ngge ne ɛTaanggbey ya kaa ku sim nikyɛɛ-nikyɛɛ njwɛɛn na nɛ wo. 33ɛTaanggbey ya kɛ ne shwaak ibol lɛdee wo daa njwɛɛn ne njwɛɛn soye ninɔn nibhɛ na, lenɛ daa ɛli ne ɛ kɛ yiisik ɛYɛso yegha tsik ndɔ ne ikpuu da. ɛLi ne kɛ haa ndɔ ne iYwel ne iFaa wo i bo,
‘Ɛ so yɛ ɛngɔn nge
izenge wo nggɛ te me ɛkyɛɛ mo.’ ”
34“ɛTaanggbey ya kɛ yiisik ɛYɛso yegha tsik ndɔ ne ikpuu, sɔng aa ne sim ibek ɛbhɛ de sa nang. ɛTaanggbey ya kɛ ne shwaak ibol de ne iphɛ bo,
‘Naa sim-mɛ ne ibol Niwɛng niwɛwɛy de,
ne nggaa ku sim ɛDoda ye nɛ.’
35ɛTaanggbey ya kɛ ne ta boote ndɔ ne idɛ iYwel lo, ɛ yɔngɔ,
‘Sɔng ɛ sɛ tek ibek nge de iphɛ sa nang.’ ”
36“Kaa ne sɛ ɛtsim mɛ ne ɛDoda gha kɛ taal ɛtomɛ gha nɛ ɛTaanggbey ya kɛ nang ɛbhɛ nten ɛbhɛ de ne ɛ wum nwa, i rɛɛ ɛbhɛ ɛlɔ gha ne kɛ rɛrɛs nikyɛɛ nɛ, ibek ɛbhɛ ne sa ndɔ ne ikpuu da. 37Ne so ɛYɛso gha ne ɛTaanggbey ya kaa yiisik ɛbhɛ tsik ndɔ ne ikpuu da, sɔng ibek ɛbhɛ de kaa ne sa nang.”
38“iPhɛ ɛlɛy nigwaa nge, seng ɛn wu kɛ lenɛ ne ɛYɛso gha ne hana nyini ne ɛfɔt mon no, sɔng kɛ lenɛ ne ɛShara ɛMuusaa nang. 39Kɛ ne lenɛ ne ɛYɛso, gbik ɛnyi gha ne ɛ kɛ nang ne itin nɛ, kɛ ne say ɛbhɛ wu ɛ so cik ɛnu ɛyisɛ ɛTaanggbey, ɛkɔn na ne hame ɛShara ɛMuusaa gha kaa sang yɛɛ ne mɔn nɛ wo. 40Wɛɛ ɛn nyini yɛnɛng ɛkɔn na ne ɛTaanggbey ya kɛ bol ɛnu ninabawa na yaa yung sɛ nyini. ɛKɔn na ne ɛ bo,
41‘Phok ɛn, nyinɛn no ne
ɛ sɛ ɛn ɛTaanggbey yegha,
ˆaa wɛɛ ɛn zii ne ɛ kus ɛn,
daa ɛli ne naa mɔn ɛdɛ ɛkɔn
na nten mon de.
ɛKɔn na ne hame ˆaa nang ɛn
ne itin nɛ wu ɛnyi kɛ
ma yung mɔng nyini.’ ”
42Ne sɛ ɛBanabas sa ne ɛBulus sa kɛ tek ijwee ne itɔɔy yo ninyi na ne roo nɛ nibhɛ wu tɛ nibhɛ sɛ kyi ta yɛɛs ɛTuk ne iwɛsɛ ne ɛ yaaso, tɛ nibhɛ hante ne tɔng en ibol lɛdee wo dɔng. 43Ne sɛ ninyi na kɛ gas en niYahodawa na nɛ ninyi na nɛ nibhɛ kɛ lel ndɔ ne ikpii niYahodawa na gbom, nɛ nibhɛ re ɛTaanggbey yegha ntsong ngga, ne kungus ɛBulus segha ne ɛBanabas sa. ɛBulus sa ne ɛBanabas sa ne bol nɛ nibhɛ, nibhɛ kpɛng nibhɛ wu tɛ nibhɛ re ɛnu ɛyisɛ ne shɛɛ ndɔ ne izɛɛng ɛTaanggbey de.
44Ne sɛ ɛTuk ne iWɛsɛ gha kɛ bhɛ hyereey, ninaa ɛgarang nga ne ku wuru gbik nibhɛ yɛɛs ne phok bol ɛDaray de. 45Ne sɛ niYahodawa na kɛ yaang ɛgbaang ne idira ninyi wo, nibhɛ ne yaa waa irway, nibhɛ hyis ɛBulus segha ne ɛnyɛs, nibhɛ re ishamas nibhɛ jii ishamas ivol ɛbhɛ da. 46ɛBulus sa ne ɛBanabas sa ne boote ne irway nviit nibhɛ yɔngɔ, “iPhɛ kɛ so ngbingbing njwi tsa tɔng nyini niYahodawa na ibol ɛTaanggbey de. Ɛ ne mbaray ɛn nyini iphɛ. iPhɛ kɛ ne tɔɔrek, sɔng ɛ kɛ ma yung hɔn ɛn sɛɛ nang nyini iken ne inat de nang. Njwi yaa ne tek nyini njwi phɛ ɛlɔ ninyi na ne hame nibhɛ so niYahodawa. 47ɛTaanggbey ya kɛ ku yaak njwi,
‘Nggɛ yɛk kɛ nɛ ɛ kɛ teyɛ ɛwɛwɛy
ɛlɔ ninyi ne hame nibhɛ so niYahodawa na
te ɛzay ya gbik sɛ iphɔrɔt.’ ”
48Ne sɛ ninyi na ne hame nibhɛ so niYahodawa na kɛ phok ɛlɛ wo, nibhɛ ne yɛk irway ihwala nibhɛ nang ibol ɛTaanggbey de ne ndiinday. Ninyi na ne ɛTaanggbey ya kɛ ku kasa nibhɛ nibhɛ aa sɛ iken ne inat de ne nang ne itin nɛ.
49iBol ɛTaanggbey de ne shwalat nɛ ne ivel lɛ gbik. 50niYahodawa na ne shɔk nidɛng ndɔ nikuk ka nɛ nibhɛ so ninaa ne roos ikpii niYahodawa na, ne i naas nibhɛ ne ndiinday gbik nɛ nidɛng nindiinday ɛgarang ngɛ. Nibhɛ ne yaa baasek ɛBulus segha gha ne ɛBanabas sa nggbang, nibhɛ roos nibhɛ ɛgarang nibhɛ gha. 51ɛBulus sa ne ɛBanabas sa ne te ɛbung ne ita nibhɛ kokok tɛ nibhɛ tɔɔrek ɛli ne kɛ mbaray nibhɛ, nibhɛ ji hyel nibhɛ phɛ ne iKɔnyum.#13.51 Ta yɛɛn: ɛMac 10.14; ɛMar 6.11; ɛLuk 9.5; 10.11. 52Ninaa ne roos ne iNtakiya na ne yɛk irway ihwala gbom iKabyik ɛTaanggbey ne so ndɔ nibhɛ hyɔrɔ.
Currently Selected:
ɛTomɛ 13: etxNT
Highlight
Share
Copy
Want to have your highlights saved across all your devices? Sign up or sign in
© Wycliffe Bible Translators, Inc. and
© the Nigeria Bible Translation Trust 2018
in cooperation with
iTen Language and Bible Translation Project
