EVASELIO A MATEO 3
3
Soane Patita
1I te temi aia nee ha leva ia Soane-Patita, o akonaki i te toafa o Sutea. 2Nee ina ui: Kotou fakahemala, koteuhi kua fakaovi mai te puleaga o te atu lagi. 3Ko Soane ko ia ae nee ui ki ai e te polofeta ko Esaia, i tana palalau:
Koeni te leo o ae e kalaga i te toafa:
Koutou teuteui te ala o te Aliki,
Koutou fakatonutonu ona ala liliki.
4Nee mau e Soane he teu fului kamelo, pea mo he kilii pipi i tona huluga kie. Nee ina kai ni hee pea mo te meli vao. 5Nee omai kia ia te hahai mai Selusalemi, mo Sutea katoa pea mo te fenua katoa o te Solotane; 6pea nee natou vete fakahaha anatou agahala, pea nee papitemai natou e Soane i te u vai o te Solotane.
7Kae, i tana sio ki te omai a ni faliseo mo ni Satuseo kaugamalie ki tana papitema, nee ina ui leva kia natou: Lanu o te u vipeli*, ko ai ae nee ina fakaha kia koutou ke kotou feholaki mai te hauhau ae ka to mai? 8Koia koutou fakatupu mua he fua ae e tuha mo te fakahemala, 9pea aua naa koutou ui i okoutou loto: e matou mau Apalahamo ko tamatou tamai! Koteuhi e au fakaha atu kia koutou, mai te u maka aeni, e feala ke fakatupu e te Atua ni fanau maa Apalahamo. 10Kua tuu foki te toki i te aka o te ulu akau: koia ko te akau fuli ae e mole fua ki ni fua lelei e tuusi anai o li ki te afi. 11Ko au, e au papitemai koutou aki te vai, ke aumai koutou ki te fakahemala; kae ko ia ae e hau i oku muli e malohi age ia au, pea e mole au tuha i te too o ona sulie. Ko ia, e ina papitemai anai koutou aki te Laumalie Maonioni pea mo te afi. 12E ina too i tona nima tana akau haha fulumeto; e ina fakamaa anai tana hahaaga fulumeto, pea e ina tanaki anai tana fulumeto ki te fale tanakiaga magisi, kae e ina tutu anai te kaui fulumeto i he afi ae e mole anai toe mate.
Papitema o Sesu-Kilisito
13Pea nee hau leva ia Sesu mai Kalilea ki te Solotane kia Soane, ke papitemai ia ia e Soane. 14Kae nee taofi leva ia ia e Soane, o ui: Ko au ae e aoga ke papitemai e koe, kae e ke hau kia au! 15Nee tali leva e Sesu kia ia: Tuku ke fai i te lakaga aeni, koteuhi e lelei age ke ta fakahoko i ai te u mea fuli ae e totonu. Pea nee mole toe taofi leva ia ia e Soane. 16I te osi o tona papitema, nee mavae leva ia Sesu mai te vai. Pea koeni, nee ava leva te atu lagi, pea nee sio leva ia ia ki te Laumalie o te Atua e hifo mai o hage ko he lupe hina, o hau kia ia. 17Pea koeni, nee kalaga leva he leo mai te atu lagi, o fakaha te u palalau aeni: ko ia aeni ko toku Alo ofaina, ae kua au tuku ki ai toku ofa katoa.
Currently Selected:
EVASELIO A MATEO 3: WB2011
Highlight
Share
Copy
Want to have your highlights saved across all your devices? Sign up or sign in
© 2011, Eglise évangélique, chez Lotoato Logote Hihifo, Vaitupu, Wallis
- Les droits sont administrés par Midi Bible, une branche de la Société Biblique de Genève
- Rights are administrated by Midi Bible, a branch of Société Biblique de Genève, 1032 Romanel-Sur-Lausanne, Switzerland