EVASELIO A MATEO 11
11
Viki o Soane-Patita e Sesu
1I te osi o te tuku e Sesu ana fakatonutonu ki ana tisipulo e hogofulu ma lua, nee mavae leva ia ia mai hena, o faiako pea mo akonaki i te u kolo o te fenua.
2Ko Soane, i tana logo i tona pilisoni ki te u gaue a Kilisito, nee ina fekau leva ana tisipulo ke olo, o fehui kia Sesu: 3Pe ko koe ae e tonu ke hau, pe e tonu ke matou talitali ki he tahi age? 4Nee tali leva e Sesu kia natou: Kotou olo o fakaha kia Soane te u mea ae e kotou logo ki ai pea mo sisio ki ai: 5Kua sisio te u kivi, kua haele te u vae ketu, kua maa te u kilia, kua logo te u tuli, kua tuuake te u mate, pea kua fakaha te logo lelei ki te kau masiva. 6Manuia ia ae e mole higa anai o tupu ko au!
7I tanatou olo, nee palalau leva ia Sesu ki te hahai, o fakata kia Soane: Pe kotea ae nee kotou olo o sioi i te toafa? Pe ko he foi kaho ae nee ofe e te matagi? 8Kae kotea foki ae nee kotou olo o sioi? Pe ko he tagata nee teuteu ki ni teu tauleleka? Koeni, ko natou ae e natou teuteu ki te u teu tauleleka e nonofo i te u fale o te u hau. 9Pe kotea koa ae nee kotou olo o sioi? Pe ko he polofeta? Io, e au fakaha atu kia koutou, pea e lahi age i he polofeta. 10Koteuhi ko ia ae nee kupu ki ai i te tohi:
Koeni, e au fekaui taku tagata avelogo i ou mua,
Ke teuteui tou ala i ou mua.
11E au ui mooni atu kia koutou, ia natou ae kua tupu mai te fafine, nee mole heeki ha he tahi ae e lahi age ia Soane Patita. Kae, ko ae e veliveli osi i te puleaga o te atu lagi e lahi age ia ia. 12Talu mai te temi o Soane Patita o kaku mai ki te lakaga nei, e ohofi fakamalohi te puleaga o te atu lagi, pea e too ia e te kau malohi. 13Koteuhi nee kikite te kau polofeta fuli pea mo te lao o kaku mai kia Soane; 14pea, kapau e kotou fia mahihino ki ai, ko ia ko te Elia ae nee tonu ke hau. 15Ko ae e ina mau ni ona taliga ke fakalogo ke logo ia ia.
16Pe ko ai anai e au fakatatau ki ai te taitupu aeni? E tatau ia ia mo ni toe ae e heheka i ni malae fakafenua, pea e natou kalaga ki onatou kaumea, 17o ui: Nee matou pupuhi atu kia koutou te fakatagi, pea nee mole kotou mee; nee matou hiva atu ni hiva mate, pea nee mole kotou tagi laulau. 18Koteuhi nee hau ia Soane, nee mole kai ia ia pea nee mole inu ia ia, pea nee natou ui: E nofo ia ia mo he temonio. 19Nee hau te Foha o te tagata, nee kai ia ia pea nee inu ia ia, pea nee natou ui: Ko he tagata kai fakavale mo inu kava, ko he kaumea ia ia o te kau popelikano mo te u hahai mauli kovi. Kae kua fakatonuhia te poto e ana gaue.
Valoki o te kau loto noa
20Pea nee kamata fai leva e Sesu ni valoki ki te u kolo ae nee hoko ai te lahiga o ana milakulo, koteuhi nee mole natou fakahemala. 21Malaia kia koe, Kolasini! malaia kia koe, Petesaita! koteuhi, kanapau nee fai te u milakulo ae nee fai i lotomalie o koutou i Tile mo Sitone, kua fualoa age tanatou fakahemala, o too te taga mo te lefulefu. 22Koia, e au ui atu kia koutou: i te aho o te fakamaau, e fai anai kia Tile mo Sitone, o maamaa age ia koulua. 23Pea ko koe, Kafanaume, pe e hiki anai ia koe o kaku ki lagi? Kailoa. E tuku anai ia koe ki lalo, o kaku ki te nofoaga o te kau mate; koteuhi kanapau nee fai i Sotoma te u milakulo ae nee fai i lotomalie o ou, nee kei tuu anai ia ia i te aho nei. 24Koia, e au ui atu kia koutou: I te aho o te fakamaau, e fai anai ki te fenua o Sotoma, o maamaa age ia koe.
Fakatahi a te tisipulo mo tona Aliki
25I te temi aena, nee palalau leva ia Sesu, o ui: E au fakafetai kia koe, Tamai, Aliki o te lagi mo te kele, koteuhi nee ke fufu te u mea aeni ki te kau poto mo te kau atamai, pea nee ke fakaha natou ki te u toe liliki. 26Io, Tamai, e au fakafetai kia koe koteuhi nee ke loto ke fena. 27Kua foaki mai te u mea fuli kia au e taku Tamai, pea e mole he tahi e ina iloi te Alo, gata pe ki te Tamai; e mole he tahi e ina iloi te Tamai, gata pe ki te Alo pea mo ia ae e fia fakaha ki ai e te Alo.
28Kotou omai kia au, koutou fuli ae e vaivai mo mafasia, pea e au foaki atu anai kia koutou he malolo. 29Kotou too kia koutou taku amo taki, pea kotou tali aku akonaki, koteuhi e au agamalu mo agavaivai; pea e kotou mau anai te malolo ki okotou laumalie. 30Koteuhi e malu taku amo taki, pea e maamaa taku kavega.
Currently Selected:
EVASELIO A MATEO 11: WB2011
Highlight
Share
Copy
Want to have your highlights saved across all your devices? Sign up or sign in
© 2011, Eglise évangélique, chez Lotoato Logote Hihifo, Vaitupu, Wallis
- Les droits sont administrés par Midi Bible, une branche de la Société Biblique de Genève
- Rights are administrated by Midi Bible, a branch of Société Biblique de Genève, 1032 Romanel-Sur-Lausanne, Switzerland
