EVASELIO A SOANE 3
3
Sesu mo Nikotemo: Te tupu foou
1Kae nee i ai leva he tagata i te kau faliseo, nee higoa ko Nikotemo, ko he pule o te kau Sutea, 2ae nee hau leva kia Sesu i te pouli, o ui kia ia: Pule, e matou iloi ko he toketa ia koe nee ke hau mai te Atua; koteuhi e mole he tahi e ina fai te u milakulo aena e ke fai, mo kapau e mole fakatahi ia mo te Atua. 3Nee tali leva e Sesu kia ia: E mooni, e mooni, e au ui atu kia koe, kapau e mole tupu foou he tagata, e mole feala ke sio ia ki te puleaga o te Atua. 4Nee ui leva e Nikotemo kia ia: Pe e feala feafeai ke tupu he tagata moka kua matua ia? Pe e feala ke toe ulu ia ki te fatu o tana fae, o toe tupu mai? 5Nee tali leva e Sesu: E mooni, e mooni, e au ui atu kia koe, kapau e mole tupu mai he tagata i te vai mo te Laumalie, e mole feala ke ulu ia ki te puleaga o te Atua. 6Ko te mea e tupu mai te kakano e kakano ia, pea ko te mea e tupu mai te Laumalie e laumalie. 7Aua naa ke ofolele koteuhi nee au ui atu kia koe: E tonu ke kotou tupu foou. 8E agi te matagi ki te kogamea e loto ia ki ai, pea e ke logo ki tana mumuhu; kae e mole ke iloi pe e hau ia mai fea, pe e alu ia ki fea. E feia ki te tagata fuli nee tupu mai te Laumalie. 9Nee ui leva e Nikotemo kia ia: E hoko feafeai te mea aia? 10Nee tali leva e Sesu kia ia: Ko koe ko te toketa o Iselaele, pea e mole ke iloi te u mea aia! 11E mooni, e mooni, e au ui atu kia koe, e matou palalau ki te mea e matou iloi, pea e matou fakamooni ki te mea nee matou sisio ki ai; pea e mole kotou tali tamatou fakamooni. 12Kapau e mole koutou tui moka au palalau atu kia koutou o uhiga mo te u mea o te kele, pea e feafeai anai ke kotou tui moka au palalau atu anai kia koutou o uhiga mo te u mea o te lagi? 13E heeki hake he tagata ki te lagi, gata pe ki ae nee hifo mai te lagi, te Foha o te tagata ae e nofo i te lagi.
Fakatata o te gata kapa
14O hage ko Moisese nee ina fakatuu leva te gata i te toafa, pea e feia pe mo te Foha o te tagata e tonu ke fakatuu ake ia ki oluga, 15o tupu ko he tahi pe e tui kia ia, ke ina mau te mauli heegata. 16He nee ofa lahi osi te Atua ki te malamanei nee ina foaki ai tona Alo ulutokotahi, o tupu ko he tahi pe e tui kia ia ke aua naa mate ia, kae ke ina mau te mauli heegata. 17He nee mole fekaui mai e te Atua tona Alo ki te malamanei ke ina fakamaaui te malamanei, kae ke fakamauli te malamanei e ia. 18Ko ae e tui kia ia e mole fakamaaui anai ia; kae ko ae e mole tui kua fakamaaui ia, koteuhi nee mole tui ia ki te huafa o te Alo ulutokotahi o te Atua. 19Pea koeni te fakamaau aia, nee hau te malama ki te malamanei, kae nee lahi age te ofa o natou tagata ki te fakapouli i tonatou ofa ki te malama, koteuhi nee kovi anatou gaue. 20Koteuhi ko ae e ina fai te kovi e fehia ia ki te malama, pea e mole hau ia ki te malama, o tupu ke aua naa ha ana gaue; 21kae ko ae e ina fai te mooni e hau ia ki te malama, o tupu ke ha ana gaue, koteuhi nee fai natou i te Atua.
Fakamooni foou a Soane-Patita
22Hili te mea aia, nee alu leva ia Sesu mo ana tisipulo ki te fenua o Sutea; pea nee nofo ia i ai mo natou, pea nee faipapitema ia. 23Nee faipapitema foki mo Soane i Enoni, o ovi ki Salimi, koteuhi nee lahi te vai i ai, pea nee olo ki ai te hahai ke papitema. 24Koteuhi nee heeki tuku ia Soane ki te pilisoni.
25Pea nee malaga leva he fihi i te u tisipulo a Soane mo he tagata Sutea o uhiga mo te fakamaa. 26Nee natou olo leva kia Soane, o ui kia ia: Pule, ko ae nee nofo mo koe i tahi kauvai o te Solotane, ae nee ke fakamooni ki ai, koeni, e faipapitema ia, pea e olo fuli te hahai kia ia. 27Nee tali leva e Soane: E mau pe e te tagata te mea ae nee tuku kia ia mai te lagi. 28Ko koutou totonu, e kotou fakamooni kia au nee au ui: E mole ko au ko Kilisito, kae nee fekaui mai au i ona mua. 29Ko ae a ana te fafine ohoana, ko te tagata ohoana; kae ki te kautagata o te tagata ohoana ae e tuu i ona tafa pea e fakalogo kia ia, e ina logoi he fiafia lahi uhi ko te leo o te tagata ohoana: koena la toku fiafia, pea kua katoa osi ia. 30E tonu ke tupu ake ia o lahi, kae ke au hifo o veliveli. 31Ko ae e hau mai oluga e maoluga ia i te tagata fuli; ko ae nee tupu i te kele e kele, pea e palalau ia o hage ko he tahi o te kele. Ko ae e hau mai te lagi e maoluga ia i te tagata fuli, 32e fakamooni ia ki te u mea ae nee sio ia mo logo ki ai, pea e mole pe tali e he tahi tana fakamooni. 33Ko ae nee ina tali tana fakamooni, nee ina fakamooni e mooni te Atua; 34koteuhi ko ae nee fekaui mai e te Atua e ina fakaha te u folafola a te Atua, koteuhi e mole tuku e te Atua kia ia te Laumalie mo he tuakoi. 35E ofa te Tamai ki te Alo, pea kua ina tuku te u mea fuli ki ona nima. 36Ko ae e tui ki te Alo e ina mau te mauli heegata; ko ae e mole tui ki te Alo e mole pe sio anai ia ki te mauli, kae e nofo anai te hauhau o te Atua i ona oluga.
Currently Selected:
EVASELIO A SOANE 3: WB2011
Highlight
Share
Copy
Want to have your highlights saved across all your devices? Sign up or sign in
© 2011, Eglise évangélique, chez Lotoato Logote Hihifo, Vaitupu, Wallis
- Les droits sont administrés par Midi Bible, une branche de la Société Biblique de Genève
- Rights are administrated by Midi Bible, a branch of Société Biblique de Genève, 1032 Romanel-Sur-Lausanne, Switzerland
