EVASELIO A SOANE 21
21
Ha a Sesu i te tai o Tipeliate
1I te hili o te mea aia, nee toe ha foki Sesu ki ana tisipulo, i te matatai o Tipeliate. Pea nee fenei leva tana fakaha ia kia natou.
2Ko Simone Petelo, mo Tomasi ae nee higoa ko Titimo, mo Natanaele mai Kana i Kalilea, mo te u foha o Sepeteo, pea mo ihi age tisipulo e toko lua a Sesu, nee natou fakatahi. 3Pea nee ui age leva e Simone Petelo kia natou: E au alu o fagota. Nee natou ui age leva kia ia: E matou olo foki mo koe. Nee natou olo leva o hopo ki he vaka, pea nee mole natou mau he mea i te po aena. 4I te mafoa ake o te uhu, nee tuu leva Sesu i te matatai; kae nee mole iloi e te kau tisipulo ko Sesu ia. 5Nee ui age leva e Sesu kia natou: Fanau, pe nee mole kotou mau he meakai? Nee natou tali leva kia ia: Kailoa. 6Nee ui age leva e Sesu kia natou: Kotou aau te kupega i te faahi matau o te vaka, pea e kotou mau anai ia. Pea nee natou aau leva te kupega, pea nee mole kei natou faa toho ake ki oluga te kupega, i te lahi o te ika. 7Pea ko te tisipulo ae nee ofa ai Sesu nee ina ui age leva kia Petelo: Ko te Aliki! Pea ko Simone Petelo, i tana logo ko te Aliki, nee ina tui leva tona kofu mo tui tona kilii pipi, koteuhi nee telefua ia, pea nee fakato ifo leva ia ki te tai. 8Nee olo age leva te u tisipulo ake ae mo te vaka, pea mo toho ake te kupega kua fonu i te ika, koteuhi nee natou mamao mai te kele ia meta e teau ape.
9I tanatou hake ake ki uta, nee natou sisio leva i ai ki he afi kua mamala kakaha, mo ni ika nee tunu i oluga, pea mo he pane. 10Nee ui age leva e Sesu kia natou: Koutou aumai ni ika nee hoki kotou gelu mai. 11Nee hopo leva Simone Petelo ki te vaka, o toho ake ki uta te kupega, kua fonu i te ika lalahi, ko te teau nimagofulu ma tolu; kae logo ai te lahi o te ika, nee mole mahae leva te kupega. 12Nee ui leva e Sesu kia natou: Kotou omai o kakai. Nee mole he tahi i te kau tisipulo nee toa i te fehui age kia ia: Pe ko ai ia koe? he kua natou iloi ko te Aliki ia. 13Nee fakaoviovi age leva Sesu o too te pane, pea nee ina foaki age ia kia natou, pea nee ina fai tatau ki te u ika.
14Ko te tolu fakaha aia e Sesu ia ia ki ana tisipulo talu mai tana toe tuuake mai te kau mate.
Ofa o Petelo ki te Aliki
15I te osi o tanatou kakai, nee ui age leva e Sesu kia Simone Petelo: Simone, foha o Sonasi, pe e ke ofa ia au o lahi age i te ofa ia au o natou aeni? Pea nee tali age leva e Petelo kia Sesu: Io, Aliki, e ke iloi e au ofa ia koe. Nee ui age leva e Sesu kia ia: Fafaga aku akeno. 16Nee toe ui age leva e Sesu kia ia, ko tona tua lua aia: Simone, foha o Sonasi, pe e ke ofa ia au? Pea nee tali leva e Petelo kia ia: Io, Aliki, e ke iloi e au ofa ia koe. Nee ui age leva e Sesu kia ia: Fafaga aku ovi fafine. 17Nee toe ui age leva e Sesu kia ia, ko tona tua tolu aia: Simone, foha o Sonasi, pe e ke ofa ia au? Pea nee loto mamahi Petelo i tana fehui tua tolu age kia ia: Pe e ke ofa ia au? Pea nee tali age leva e Simone Petelo kia Sesu: Aliki, e ke iloi ia mea fuli, e au ofa ia koe. Nee ui age leva e Sesu kia ia: Fafaga aku ovi fafine. 18E mooni, e mooni, e au ui atu kia koe, i tau kei tupulaga, nee ke noo pe ia koe, pea nee ke alu pe ki he kogamea nee ke loto ki ai; kae ka ke matua ifo anai, e ke folahi anai ou nima, pea ko he tahi kehe e hai noo anai koe, pea e ina taki anai koe ki te kogamea e mole ke loto anai ki ai. 19Nee ina fakaha te mea aia o uhiga mo te fahiga te mate ka fakakololiai ai anai e Petelo te Atua. I te osi o tana palalau aia, nee ui age leva e Sesu kia ia: Mulimuli mai ia au.
Te tisipulo nee ofa ki ai ia Sesu
20Pea nee mafuli leva ki muli ia Petelo, o sio e hau i ona muli te tisipulo ae nee ofa ai Sesu, ae nee punou ki te fatafata o Sesu i te lolotoga o te kai afiafi, o ui: Aliki, ko ai ae e ina fakatau anai koe? 21I tana sio age kia ia, nee ui leva e Petelo kia Sesu: Pea ko ia aeni, Aliki, kotea te mea e hoko anai kia ia? 22Nee ui age leva e Sesu kia ia: Kapau e au loto ke mauli ia o kaku ki taku toe liliu mai, kotea tona mauhiga kia koe? Ko koe, mulimuli mai ia au. 23Nee mafola leva i ai te palalau, e mole toe mate anai te tisipulo aia. Kae nee mole ui age e Sesu kia Petelo: E mole mate anai ia, kae nee ina ui: Kapau e au loto ke mauli ia o kaku ki taku toe liliu mai, kotea tona mauhiga kia koe?
24Ko te tisipulo aia nee fakamooni ki te u mea aia, pea nee ina tohi natou. Pea e tou iloi e mooni tana fakamooni.
25Nee lahi age ihi mea nee fai e Sesu; kapau nee tohi ia mea fuli aia i onatou aluaga fakalikiliki, e au mahalo e mole feauga anai te malamanei ke tanaki ai te fua tohi e tohi anai.
Currently Selected:
EVASELIO A SOANE 21: WB2011
Highlight
Share
Copy
Want to have your highlights saved across all your devices? Sign up or sign in
© 2011, Eglise évangélique, chez Lotoato Logote Hihifo, Vaitupu, Wallis
- Les droits sont administrés par Midi Bible, une branche de la Société Biblique de Genève
- Rights are administrated by Midi Bible, a branch of Société Biblique de Genève, 1032 Romanel-Sur-Lausanne, Switzerland
