EVASELIO A SOANE 17
17
Faikole a Sesu ko te pule faisakilifisio
1I te osi o tana palalau aia, nee hiki leva e Sesu ona mata ki te lagi, o ui: Tamai, kua hoko mai te hola! Fakakololiai tou Alo, o tupu ke fakakololiai koe e tou Alo. 2O hage ko tau foaki age kia ia te pule ki te kakano fuli, koteuhi ke ina foaki te mauli heegata kia natou fuli ae nee ke foaki age ki ai. 3Pea koeni te mauli heegata, ke natou iloi koe, ia koe, ko te Atua e tahi mo mooni, pea mo ae nee ke fekaui mai, Sesu-Kilisito. 4Nee au fakakololiai koe i te kele, nee au fakaosi te gaue nee ke foaki mai kia au ke au fai. 5Pea i te lakaga nei, Tamai, fakakololiai au i ou tafa totonu aki te kololia ae nee au mau i ou tafa ia mua o te fakatupu o te malamanei.
6Nee au fakaha tou huafa ki te u tagata ae nee ke foaki mai kia au mai te lotomalie o te malamanei. Ko te u tagata natou a au, pea nee ke foaki mai natou kia au; pea nee natou taupau tau folafola. 7I te lakaga nei kua natou iloi ko te u mea fuli ae nee ke foaki mai kia au e natou hau maia koe. 8Koteuhi nee au foaki age kia natou te u folafola ae nee ke foaki mai kia au; pea nee natou tali natou, pea kua natou iloi papau nee au hau maia koe, pea kua natou tui nee ke fekaui mai au. 9E au faikole o uhiga mo natou. E mole au faikole o uhiga mo te malamanei, kae o uhiga mo natou ae nee ke foaki mai kia au, koteuhi a au natou; 10pea ko mea fuli a aku e a au, pea ko mea fuli a au e a aku; pea e fakakololiai au ia natou. 11E mole au toe nofo i te malamanei, kae e natou nonofo i te malamanei, pea e au alu atu kia koe. Tamai Maonioni, taupau i tou huafa natou ae nee ke foaki mai kia au, koteuhi ke natou tahi o hage ko taua. 12I taku kei nofo mo natou i te malamanei, nee au taupau natou i tou huafa. Nee au taupau natou ae nee ke foaki mai kia au, pea nee mole he tahi o natou ne puli, gata pe ki te foha o te malaia, koteuhi ke fakahoko ai te Tohi tapu. 13Pea i te lakaga nei, e au alu atu kia koe, pea e au fakaha te u mea aia i te malamanei, koteuhi ke katoa toku fiafia ia natou. 14Nee au foaki kia natou tau folafola; pea kua fehia te malamanei kia natou, koteuhi e mole natou kau i te malamanei, o hage ko au e mole au kau i te malamanei. 15E mole au kole atu kia koe ke ke too kehe natou mai te malamanei, kae ke ke taupau natou mai ae e kovi. 16E mole natou kau i te malamanei, o hage ko au e mole au kau i te malamanei. 17Fakatapui natou ki tau mooni, ko tau folafola ko te mooni ia. 18O hage ko tau fekaui mai au ki te malamanei, nee au toe fekaui foki mo natou ki te malamanei. 19Pea e au fakatapui ia au totonu o uhiga mo natou, koteuhi ke fakatapui mo natou totonu e te mooni.
20E mole au faikole o uhiga pe mo natou aeni, kae o uhiga foki mo natou ae e tui anai kia au i tanatou folafola, 21koteuhi ke natou tahi fuli, o hage ko koe, Tamai, e ke ia au, pea o hage ko au e au ia koe, pea mo natou ke natou tahi ia taua: koteuhi ke tui te malamanei nee ke fekaui mai au. 22Nee au foaki kia natou te kololia ae nee ke foaki mai kia au, koteuhi ke natou tahi o hage ko taua e ta tahi, 23ko au ia natou, pea ko koe ia au, koteuhi ke natou tahi katoa, pea ke iloi e te malamanei nee ke fekaui mai au, pea nee ke ofa ia natou o hage ko tou ofa ia au. 24Tamai, e au loto ko te kogamea ae e au nofo ai ke toe nofo ai mo natou ae nee ke foaki mai kia au, koteuhi ke natou sisio ki toku kololia, te kololia ae nee ke foaki mai kia au, koteuhi nee ke ofa ia au i mua o te fakatafito o te malamanei. 25Tamai agatonu, nee mole iloi koe e te malamanei; kae nee au iloi koe, pea kua iloi e natou aeni nee ke fekaui mai au. 26Pea nee au fakailoilo kia natou tou huafa, pea e au toe fakailoilo anai ia kia natou, koteuhi ke nofo ia natou te ofa ae nee ke ofa ai ia au, pea ke au nofo ia natou.
Currently Selected:
EVASELIO A SOANE 17: WB2011
Highlight
Share
Copy
Want to have your highlights saved across all your devices? Sign up or sign in
© 2011, Eglise évangélique, chez Lotoato Logote Hihifo, Vaitupu, Wallis
- Les droits sont administrés par Midi Bible, une branche de la Société Biblique de Genève
- Rights are administrated by Midi Bible, a branch of Société Biblique de Genève, 1032 Romanel-Sur-Lausanne, Switzerland
