EVASELIO A SOANE 15

Sesu ko te tafito vite mooni

1Ko au ko te fuu vite mooni, pea ko taku Tamai ko te tagata faivite. 2Ko te u vaa fuli ia au e mole fua, e ina tuusi ia; pea ko te u vaa fuli e fua, e ina pakimaga ia, o tupu ke toe asilisili fua ia o lahi age. 3Koeni kua kotou maa koteuhi ko te folafola ae nee au fakaha atu kia koutou. 4Kotou nonofo ia au, pea e au nofo anai ia koutou. O hage ko te vaa vite e mole feala ke fua ia ia totonu, mo kapau e mole pipiki ia ki te fuu vite, e feia mo koutou, e mole feala ke kotou fua, mo kapau e mole kotou nonofo ia au. 5Ko au ko te fuu vite, ko koutou ko te u vaa vite. Ko ae e nofo ia au, pea e au nofo ia ia, e fua ia o lahi, koteuhi ka hala mo au e mole kotou fealagia he mea. 6Kapau e mole nofo he tahi ia au, e siaki ia ki fafo o hage ko te vaa vite, pea e moamoa ia; pea e tanaki ia o li ki te afi, pea e ulo ia. 7Kapau e kotou nonofo ia au, pea e nofo aku folafola ia koutou, kotou kole he mea pe e kotou loto anai ki ai, pea e foaki atu anai ia kia koutou. 8Kapau e kotou fua o lahi, e fakakololiai anai i ai taku Tamai, pea e kotou liliu anai i ai ko aku tisipulo.

9O hage ko te Tamai nee ofa ia au, nee au ofa foki ia koutou. Kotou nonofo i toku ofa. 10Kapau e kotou taupau aku fekau, pea e kotou nonofo anai i toku ofa, o hage ko taku taupau te u fekau a taku Tamai, pea mo taku nofo i tona ofa. 11Kua au fakaha te u mea aeni kia koutou, o tupu ke nofo toku fiafia ia koutou, pea ke katoa tokotou fiafia.

12Koeni taku fekau: Kotou feofaofani ia koutou, o hage ko toku ofa ia koutou. 13E mole he ofa e toe lahi age i te foaki o tona mauli o uhiga mo ona kaumea. 14Ko koutou ko oku kaumea, mo kapau e kotou fai te mea e au fekau atu kia koutou. 15E mole au toe fakahigoa koutou ko te u faifekau, koteuhi e mole iloi e te faifekau te mea e fai e tona pule; kae e au fakahigoa koutou ko oku kaumea, koteuhi nee au fakaha kia koutou te u mea fuli nee au ako mai taku Tamai. 16E mole ko koutou ae nee kotou filifili au; kae ko au, nee au filifili koutou, pea nee au fakanofo koutou, o tupu ke kotou olo, pea ke kotou mau he fua, pea ke tologa tokotou fua, o tupu ko he mea e kotou kole anai ki taku Tamai i toku huafa, ke ina foaki atu ia kia koutou. 17Ko te mea e au fekau atu kia koutou: Kotou feofaofani ia koutou.

Fehia a te malamanei kia natou e tui kia Kilisito

18Kapau e fehia te malamanei ia koutou, kotou iloi nee uluaki fehia ia ia au, ia koutou. 19Kapau ko koutou nee a te malamanei, e ofa anai te malamanei i tana mea. Kae koteuhi e mole ko koutou a te malamanei, pea nee au filifili koutou mai te lotomalie o te malamanei, koia e fehia ai te malamanei ia koutou. 20Kotou manatui te folafola nee au fakaha atu kia koutou: E mole lahi age te faifekau i tona pule. Kapau nee natou fakatagai au, pea e natou toe fakatagai anai mo koutou; kapau nee natou fai taku folafola, pea e natou toe fai anai takotou folafola. 21Kae e natou fai anai kia koutou te u mea fuli aena o tupu ko toku huafa, koteuhi e mole natou iloi ae nee ina fekaui mai au. 22Kapau nee mole au hau pea kapau nee mole au palalau kia natou, nee mole natou mau he agahala; kae i te lakaga nei e mole natou mau he mea ke kofu ai tanatou agahala. 23Ko ae e fehia kia au, e fehia foki ia ki taku Tamai. 24Ka na nee mole au fai i te lotolotoga o natou, te u gaue ae nee mole fai e he tahi, nee mole anai hanatou agahala; kae i te lakaga nei kua natou sisio ki te u gaue aia, pea kua natou fehia ia au mo taku Tamai. 25Kae nee hoko te mea aia o tupu ke fakamooni ai te folafola ae nee tohi i tanatou lao:

Nee natou fehia noa kia au.

26Ka hau anai te Palakeleto*, ae e au fekaui mai anai kia koutou mai te Tamai, te Laumalie o te mooni, ae e hau mai te Tamai, e ina fakamooni anai kia au. 27Pea mo koutou foki, e kotou fakamooni anai kia au, koteuhi nee kotou nonofo mo au talu mai te kamataaga.

Currently Selected:

EVASELIO A SOANE 15: WB2011

Highlight

Copy

Want to have your highlights saved across all your devices? Sign up or sign in

Les droits sont administrés par Midi Bible, une branche de la Société Biblique de Genève
Rights are administrated by Midi Bible, a branch of Société Biblique de Genève, 1032 Romanel-Sur-Lausanne, Switzerland

Learn More About Ko te Tohi Tapu i te fakauvea