SENESI 8
8
Mavae i te aleka
1Nee manatui leva e te Atua ia Noe, mo te u manu fuli, mo te u manu fekai, mo te u manu lalata fuli ae nee nofo mo ia i te aleka; pea nee fekaui leva e te Atua he matagi ke agi i oluga o te kele, pea nee kamata hifo leva te vai ki lalo. 2Nee mapunu leva te u matapuna o te moana lahi mo te u matapa o te atu lagi, pea nee mole toe to leva te ua mai te lagi. 3Nee kamata mavae leva te vai mai te kele, o mamao mai ai. Koia i te osi o te u aho e teau nimagofulu, nee kamata hifo leva te vai ki lalo. 4I te aho hogofulu ma fitu o te fitu mahina, nee tuu leva te aleka i oluga o te mouga ko Alalate. 5Nee hoko atu te hifo o te vai o kaku ki te mahina hogofulu. I te uluaki aho o te mahina aia, nee ha leva te u tumutumu o te u mouga.
6I te osi o te u aho e fagofulu, nee avahi leva e Noe te matapa fakamalama ae nee ina fau i te aleka. 7Nee ina tuku leva te kolopo* ke alu, pea toe hau o kaku ki te temi ae nee moamoa ai leva te vai i oluga o te kele. 8Nee ina toe tuku foki te lupe ke alu, ke sioi ai pe kua mamaha te vai i oluga o te kele. 9Kae nee mole mau leva e te lupe he kogamea ae ke tuku ai ona vae, pea nee toe liliu leva ia kia Noe i te aleka, koteuhi nee kei nofo te vai i oluga o te kele katoa. Pea nee falo leva e Noe tona nima o too te lupe o fakaulu ki te aleka i ona tafa. 10Nee toe talitali leva ia ia i ni ihi aho e fitu, pea nee ina toe tuku leva te lupe ke toe mavae mai te aleka. 11Nee toe liliu age leva te lupe kia ia i te afiafi; pea koeni, nee ina uusi i tona gutu he lau olive. Nee iloi leva e Noe kua mavae te vai i oluga o te kele. 12Nee toe talitali leva ia ia i ni ihi aho e fitu; pea nee ina toe tuku leva te lupe ke alu. Kae nee mole toe liliu age leva te lupe kia ia.
13I te tau onogeau ma tahi o Noe, i te uluaki mahina, i te uluaki aho o te mahina aia, nee moamoa leva te vai i oluga o te kele. Nee too leva e Noe te ato o te aleka ke sio ia ia, pea koeni, kua moamoa te kele. 14I te lua mahina, i te aho uafulu ma fitu o te mahina, nee moamoa lelei leva te kele.
15Koia nee palalau leva te Atua kia Noe, o ui: 16Mavae mai te aleka, ia koe mo tou ohoana, mo ou foha pea mo te u ohoana o ou foha. 17Fakamavae foki ki tua te u manu fuli ae nee nonofo mo koe, te u manulele, mo te u manu lalahi, mo te u manu liliki pea mo te u manu totolo. Ke natou mafolafola i oluga o te kele, pea ke natou fanaunau mo liuliuga i oluga o te kele. 18Pea nee mavae leva ia Noe mai te aleka mo ona foha, mo tona ohoana, pea mo te u ohoana o ona foha. 19Pea nee mavae leva mai te aleka te u manu fuli, o mulimuli ki onatou faahiga, te u manu lalahi, mo te u manu liliki, te u manulele mo te u manu totolo.
20Nee fakatuu leva e Noe he aletale ki te Eteleno; pea nee ina too leva ni manu i te u manu maa fuli mo te u manulele maa fuli, pea nee ina momoli leva ni failaulau i te aletale. 21Nee mamanu leva te Eteleno ki te magoni o te sakilifisio, pea nee ina ui leva i tona loto: E mole au toe fakamalaia anai te kele o tupu ko te tagata, koteuhi e kovi te u manatu o te loto o te tagata mai tona kei veliveli; pea e mole au toe tauteai anai te u mea fuli ae e mauli, o hage ko te mea aeni kua au fai. 22I te temi katoa ae e tuu ai anai te kele, ko te temi nunusi o te pulapula mo tona temi utu, te momoko mo te vevela, te temi nive mo te temi mafana, te aho mo te pouli, e mole natou toe gata anai.
Currently Selected:
SENESI 8: WB2011
Highlight
Share
Copy
Want to have your highlights saved across all your devices? Sign up or sign in
© 2011, Eglise évangélique, chez Lotoato Logote Hihifo, Vaitupu, Wallis
- Les droits sont administrés par Midi Bible, une branche de la Société Biblique de Genève
- Rights are administrated by Midi Bible, a branch of Société Biblique de Genève, 1032 Romanel-Sur-Lausanne, Switzerland
