SENESI 11
11
Tule o Papele
1Nee palalau tahi te kele katoa, ki he lea e tahi mo ni kupui palalau e tatau.
2Koteuhi nee natou mavae leva mai te potu esite, nee natou mau leva he kele laumalie i te fenua ko Sinea, pea nee natou nonofo leva i ai. 3Nee natou ui leva: Tou tutuu ki oluga! Tou fai ni piliki, pea tou tao natou i te afi. Pea nee natou fakaaoga leva te piliki ko te maka, pea mo te kele pupulu ko te sima. 4Nee natou toe ui leva: Tou tutuu ki oluga, pea tou fakatuu he kolo mo he tule ae e kaku tona tumutumu ki te lagi; ke logologona ai totatou higoa, pea ke aua naa tou mavetevete anai i oluga o te kele katoa. 5Nee hifo leva te Eteleno o sio ki te kolo mo te tule ae nee fakatuu e te u foha o te tagata. 6Nee ui leva e te Eteleno: Koeni, e natou nonofo ko he hahai e tahi, pea e natou palalau ki he lea e tahi, pea koeni te mea kua natou kamata fau; i te temi aeni e mole he mea ae e ina toe taofi anai natou i te fakahoko o te u mea fuli ae e natou loto anai ki ai. 7Koia tou hifo o veuki ai tanatou palalau, ke aua naa natou toe felogoi ia natou. 8Pea nee fakamavetevete leva natou e te Eteleno i oluga o te kele katoa; pea nee natou fakagata leva i ai te fakatuu o te kolo. 9Koia ae nee tuku ai leva ki te kolo aia te higoa ko Papele, koteuhi ko te kogamea aia nee veuki ai e te Eteleno te lea o te kele katoa, pea ko te kogamea aia nee fakamavetevete ai natou e te Eteleno i oluga o te kele katoa.
Tamai a Apalamo
10Koeni te hakoga o Semi. Ko Semi, i tona tau teau, nee ina fakatupu leva ia Alepakesate, i te hili o tau e lua ki te lomaki. 11Nee mauli leva ia Semi, i te osi tupu o Alepakesate ia tau e nimageau; pea nee ina fakatupu leva ni foha mo ni ofafine. 12Ko Alepakesate, i tona tau tolugofulu ma nima, nee ina fakatupu leva ia Selake. 13Nee mauli leva Alepakesate i te osi o te tupu o Selake ia tau e fageau fagofulu ma tolu; pea nee ina fakatupu leva ni foha mo ni ofafine.
14Ko Selake i tona tau tolugofulu, nee ina fakatupu leva ia Epele. 15Nee mauli leva ia Selake, i te osi o te tupu o Epele ia tau e fageau ma tolu; pea nee ina fakatupu leva ni foha mo ni ofafine.
16Ko Epele, i tona tau tolugofulu ma fa, nee ina fakatupu leva ia Peleke. 17Nee mauli leva ia Epele, i te osi o te tupu o Peleke ia tau e fageau tolugofulu; pea nee ina fakatupu leva ni foha mo ni ofafine.
18Ko Peleke, i tona tau tolugofulu, nee ina fakatupu leva ia Leu. 19Nee mauli leva ia Peleke, i te osi o te tupu o Leu ia tau e luageau ma hiva; pea nee ina fakatupu leva ni foha mo ni ofafine.
20Ko Leu, i tona tau tolugofulu ma lua, nee ina fakatupu leva ia Seluki. 21Nee mauli leva ia Leu, i te osi o te tupu o Seluki ia tau e luageau ma fitu, pea nee ina fakatupu leva ni foha mo ni ofafine.
22Ko Seluki, i tona tau tolugofulu, nee ina fakatupu leva ia Nakole. 23Nee mauli leva ia Seluki, i te osi tupu o Nakole ia tau e luageau; pea nee ina fakatupu leva ni foha mo ni ofafine.
24Ko Nakole, i tona tau uafulu ma hiva, nee ina fakatupu leva ia Telake. 25Nee mauli leva ia Nakole, i te osi tupu o Telake ia tau e teau hogofulu ma hiva; pea nee ina fakatupu leva ni foha mo ni ofafine. 26Ko Telake, nee tau fitugofulu, nee ina fakatupu leva ia Apalamo, mo Nakole, mo Alane.
27Koeni te hakoga o Telake: Ko Telake nee ina fakatupu leva ia Apalamo, mo Nakole, mo Alane. Nee fakatupu leva e Alane ia Lote. 28Nee mate leva ia Alane i mua o tana tamai ko Telake, i te fenua ae nee tupu ai, i Ulu i Kaletea. 29Nee ohoana leva ia Apalamo mo Nakole: ko te higoa o te ohoana o Apalamo ko Salai, pea ko te higoa o te ohoana o Nakole ko Milika, ofafine o Alane. Ko Alane ko te tamai foki aia a Siseka. 30Nee paa ia Salai: nee mole mau hana fanau.
31Nee too leva e Telake tona foha ko Apalamo, mo Lote, foha o Alane, foha o tona foha, pea mo Salai, tana taahine ohoana o Apalamo tona foha. Pea nee natou mavae fakatahi leva mai Ulu ki Kaletea, o olo ki te fenua o Kanaane. Nee natou kaku leva ki Salani, pea nee natou nofo leva i ai.
32Ko te u aho o Telake ko ona tau e luageau ma nima; pea nee mate leva ia Telake i Salani.
Currently Selected:
SENESI 11: WB2011
Highlight
Share
Copy
Want to have your highlights saved across all your devices? Sign up or sign in
© 2011, Eglise évangélique, chez Lotoato Logote Hihifo, Vaitupu, Wallis
- Les droits sont administrés par Midi Bible, une branche de la Société Biblique de Genève
- Rights are administrated by Midi Bible, a branch of Société Biblique de Genève, 1032 Romanel-Sur-Lausanne, Switzerland
