Sakalia 14
14
Toe liliu o le Aliki ki le kele o aumai
le fakamauli
1Ko leinei, kua au le aso o le Eteleno,
Ti e vae loa ou koloa i loto malie o ou.
2E kau fakatasi loa a atu puleaga fuli ke lotou osoi Selusalemi.
E too loa le kolo, e kaia loa a fale, ti e fakamakeke loa a fafine.
E ano loa le vaelua o le kolo ki le popula.
Kae e feala loa ke nofo le toega o le kakai i le kolo.
3E sa loa le Eteleno, ti e taui loa e ia a puleaga ana,
Ofaipe lana tau i le aso o le velo.
4E tuu loa ona vae i le aso lena ki le mauga o Oliveto,
Leia e agaaga ki Selusalemi, i le potu esite.
E mafaa loa le mauga o Oliveto i loto malie, mei le potu esite ki le potu uesite,
Ti e tuu loa se popoko lasi i ai :
E solomuli loa se tasi vaelua o le mauga ki le potu noleto,
Ti ko se tasi vaelua ki le potu saute.
5E kotou sosola loa i le vaivailiua o oku mauga,
Talie e ano loa le vaivailiua o mauga o kaku ki Ateseli ;
E kotou sosola loa ofaipe lakoutou sosola i mua o le mafuike,
I le temi o Osiasi, sau o Suta.
Ti e au loa le Eteleno, loku Atua, mo ana kau sagato fuli.
6I le aso lena, e leaise i ai loa se malama ;
E i ai loa se momoko lasi mo se aisi.
7E toka tasi loa le aso lena, ti e iloa a ia e le Eteleno toka tasi,
E leaise ao loa a ia pe pouli.
Kae e sa loa le malama i le afiafi.
8I le aso lena, e tafe loa ni vai mauli mei Selusalemi,
Ti e tafe loa le tasi vaelua ki le tai o le potu esite,
Ti ko le tasi vaelua ki le tai o le potu uesite ;
E tatau loa i le temi vevela mo le temi momoko.
9E sau loa le Eteleno i le malama nei katoa.
I le aso lena, e toka tasi loa le Eteleno,
Ti e toka tasi loa lona suafa.
10E liliu loa le fenua katoa ofaipe le fenua tokamalie, mei Kepa o kaku ki Limoni
I le potu saute o Selusalemi ;
Ti e malaga loa Selusalemi ki aluga ti e tuu loa a ia i lona tuuaga,
Mei le matapa o Pesamino o kaku ki le uluaki matapa,
O kaku ki le matapa o agele,
Ti mei le tule o Ananeele o kaku ki tatauaga vino o le sau.
11E nofo loa i le kolo, ti e leaise toe i ai loa se malaia.
E fimalie loa Selusalemi.
12Ko leinei le malaia leia e taai loa ki ai e le Eteleno a kakai fuli
Ala na tau loa ki Selusalemi.
E pala loa olatou tino kae koi lotou tutuu i olatou vae,
Ti e maluluku loa i le pala olatou mata i olatou pokoi mata,
Ti e vilo loa i le pala lolatou alelo i lolatou gutu.
13I le aso lena, e fakatupu loa e le Eteleno se maveuveu lasi ia latou ;
E too loa e leia le lima o leia,
Ti e lotou siki loa le lima a la ki la.
14E tau loa a Suta i Selusalemi,
Ti e tanaki loa a koloa o puleaga fuli ala e takatakai ia Selusalemi :
Le aulo, mo le paaga, mo ni kofu, o lasi ai.
15E toe taai foki e le malaia a osi,
Mo mule, mo kamelo, mo asino,
Ti mo manu fuli ala e maua loa i nofolaga solia ana :
E tatau le malaia lena mo leia ake.
16Ko latou fuli ala e toe loa i atu puleaga fuli
Ala na ano o tau ki Selusalemi
E pale loa i fetuu fuli
O atolasio ki le sau, le Eteleno o kau tau,
Ti mo fakamanatu le aso o tapenakulo.
17Kapau e i ai ni famili o le malama nei ala e leaise pale ki Selusalemi
O atolasio ki le sau, le Eteleno o kau tau,
E leaise to loa le ua kia latou.
18Kapau e leaise pale loa le famili o Esipito ki Selusalemi, kapau e leaise au a ia o atolasio,
E leaise to loa le ua kiate ia ;
E taai loa a ia ki le malaia leia e taai loa ki ai e le Eteleno a puleaga
Ala e leaise pale loa o fakamanatu le aso o tapenakulo.
19Ko lena loa le tautea o Esipito,
Le tautea o puleaga fuli
Ala e leaise pale loa o fakamanatu le aso o tapenakulo.
20I le aso lena, e tosi loa i ga pele o osi :
Maokioki ki le Eteleno !
Ti e fai loa a kulo o le fale o le Eteleno
Pe ipu ala i mua o le aletale.
21Ko kulo fuli i Selusalemi mo Suta
E fakatapu loa ki le Eteleno o kau tau ;
Ko latou fuli ala e momoli ia loa ni sakilifisio e au loa
O fakamoso a kanoi manu ki ai.
Ti e leaise toe maua loa se tagata fai koloa i le fale o le Eteleno o kau tau,
I le aso lena.
Currently Selected:
Sakalia 14: FB2000
Highlight
Share
Copy
Want to have your highlights saved across all your devices? Sign up or sign in
© Société Biblique de Genève, 2000-2020
