Sakalia 11
11
Fakamaau o pule o Iselaele
1Lipane, fakamavaa ou matapa,
Ti ke kai e le afi ou sete !
2Ke ke tagi, sipele, talie kua siga le sete,
Kua maumau latou ala na malaga ki aluga !
Ke kotou fetagisi, ulu sene o Pasani,
Talie kua maumau le vaomatua leia na leaise mafai ke ulu i ai !
3Kua tagi laulau le kau tausi manu,
Talie kua maumau lolatou kololia ;
Kua fetagisi a uviki laione,
Talie kua ti ki lalo le fia nealasi o le Solotane.
4Koia e folafola ai le Eteleno, loku Atua, o pati :
Fagai a ovi ala e fakatuutuu ki le fale tamate manu !
5Ko latou ala e totogi ia latou e tamate fakavalevale ia latou,
Ko leia e fakatau ia latou e pati :
Ke fakafetai ki le Eteleno, talie kua kau mou koloa !
Ti e leaise saofaki latou e olatou tagata tausi manu.
6Talie e leaise kau toe folafola loa ki le kakai o le fenua,
E pati le Eteleno :
Ti ko leinei, e kau tuku a tagata
Ki lima o la ki la ti mo lima o lolatou sau.
E lotou maumaui loa le fenua,
Ti e leaise kau saofaki loa se tasi i olatou lima.
7Ti na kau kamata fagai loa le kau ovi leia na tonu ke ave ki le fale tamate manu, latou ala na fakaaloalofa lasi i le kau manu. Na kau too loa a tokotoko e lua : Na kau fakaigoa le tasi ko KALASIA, ti na kau fakaigoa le tasi ko FAKATASI. Ti na kau fagai loa le kau ovi. 8Na kau kapu loa a tagata tausi ovi e toka tolu i le masina e tasi. Ti na oki a ia, na oki loa le kataki o loku loto kia latou, ti na toe vesia foki olatou loto kiate au. 9Ti na kau pati loa : E leaise kau toe fagai loa koutou ! Ke mate le ovi leia kua tonu ke mate, ti ke motusi leia e tonu ke motusi, ti ke fekaiaki ia latou le toega ! 10Na kau too loa laku tokotoko leia ko Kalasia, ti na kau fatii loa a ia, ke motusi ai laku sai leia na kau fai mo kakai fuli. 11Na motusi loa le sai i le aso lena ; ti ko ovi fakaaloalofa ala na tokaga kiate au, na fakamaoki loa i ai ki le folafola a le Eteleno. 12Na kau pati loa kia latou : Kapau e kotou loto malie, ke kotou soli mai loku totogi ; ti kapau e leai, aua na kotou soli mai a ia. Ti na lotou fua loa loku totogi ko ni fa sikele siliva e kau tolu. 13Na pati mai loa le Eteleno kiate au : Ti le siliva ki le tagata fai ipu, le totogi fulumalie lena na lotou fakafuafua au ki ai ! Ti na kau too loa a fa sikele paaga e kau tolu, ti na kau ti loa latou ki le fale o le Eteleno, ki le tagata fai ipu.
14Ti na kau fatii loa le lua o tokotoko, leia ko Fakatasi, ke motusi ai le pipiki fakatautaina a Suta mo Iselaele.
15Na pati mai loa le Eteleno kiate au : Toe too le teu o se tagata tausi manu valea !
16Talie ko leinei, e kau lagai loa i le fenua se tagata tausi manu leia e leaise tokaga loa ki le kau ovi leia ka mate ; e leaise ano loa a ia o afa a ovi ala koi muli, e leaise faitoo loa e ia a ovi ala kua lavelavea, e leaise fagai loa e ia a ovi ala e malolo ; kae e kai loa e ia le kanofi o ovi ala e pepeti, ti e kai loa e ia latou o kaku ki olatou motikuku.
17Malaia ki le tagata tausi manu veli, leia e tiaki ia lana kau ovi !
Ke oso le seleta ki lona lima ti mo lona fa mata atamai !
Ke malo lona lima,
Ti ke kivi lona fa mata atamai !
Currently Selected:
Sakalia 11: FB2000
Highlight
Share
Copy
Want to have your highlights saved across all your devices? Sign up or sign in
© Société Biblique de Genève, 2000-2020
