Luka 12

Ko iki akonaki ki le kau tisipulo

1I le temi lena, na fakatasi ake loa le kakai o lau i afe, ti kua lotou fetakatakafiaki foki, na kamata masau loa Sesu ki ana tisipulo : Kotou tokaga ki le fakatupu a le kau faliseo, leia ko le malualoi. 2E leaise nea leia e munia e leaise tonu ke sa loa, ti e leaise nea leia e fakapulipuli e leaise tonu ke iloa loa. 3Koia ko nea fuli ala e kotou masau ki ai i le fakapouli e logoi loa i le malama, ti ko le nea leia e kotou fakamumusu ki ai i kogafale e fakasa loa i taufufu. 4E kau pati atu kia koutou, kia koutou ala ko oku kaukau nea : Aua na kotou i kia latou ala e tamate ia le tino, ti oki, ti e leaise lotou mafai se tasi ake a nea. 5E kau fakasa atu loa kia koutou leia e tonu ke kotou i ki ai. Kotou i ki leia, mo ka oki lana tamate, e maua ia le pule ke ti ki le afi lee gato ; io, e kau pati atu kia koutou, ko ia lena e tonu ke kotou i ki ai. 6Pe leaise fakatau ni miti e lima ki ni fa piesi e lua ? Kae e leaise galo se tasi fua ia laua ana i mua o le Atua. 7Ti kua lau okoutou fului ulu fuli. Koia, aua na kotou i : E kotou mauiga ake i ni miti mauke ai.

8E kau pati atu kia koutou, ko leia e fakasa ia loa au i mua o tagata, e toe fakasa loa a ia e le Vosa o le tagata i mua o le kau aselo a le Atua ; 9kae ko leia e fakafiti loa kiate au i mua o le tagata, e toe fakafiti loa le Vosa o le tagata kiate ia i mua o le kau aselo a le Atua.

10Ti ko leia e masau veli ki le Vosa o le tagata, e fakamolemole loa kiate ia ; kae ko leia e fatituu loa ki le Laumalie Maokioki e leaise toe fakamolemole loa kiate ia.

11Ka ave loa koutou ki sinakoka, ki mua o le kau tui fakamaau ti mo le kau pule, aua na kotou tuania pe feaki loa lakotou puipui koutou, pe kolea le nea ka kotou masau loa ki ai ; 12talie e ako atu loa e le Laumalie Maokioki kia koutou i le temi fai lena le nea leia e tonu ke kotou masau ki ai.

Le tagata mou koloa valea

13Na pati loa se tasi kia Sesu, mei lotomalie o le kakai : Pule, pati mua ki loku taina ke vaelua mo au loma tofiga. 14Na tali loa Sesu kiate ia : Tagata, ko ai leia na fakanofo ia au ke fakamaau ia akoutou visi, pe ke vae ia okoutou koloa ? 15Ti na pati loa a ia kia latou fuli : Kotou tokaga ki le fulupipiki ; talie e leaise fakalogo le mauli o le tagata ki le lasi o nea ala e maua e ia. 16Ti na fakasa loa e ia kia latou se folafola fakatata : Na fua o lasi ai a kele o se tagata mou koloa. 17Ti na fakakaukau loa a ia i lona loto, o pati : Kolea ka kau fai loa ? Talie e leaise ganea leia ke tanaki ai laku magiti. 18Ti na pati loa a ia, ko leinei le nea leia ka kau fai loa : E kau maumaui loa oku fale tanakiaga magiti, ti e kau toe fakatuu loa ni iki ake ala e toe lalasi ake, ti e kau tanaki loa ki ai aku magiti fuli mo oku koloa fuli ; 19ti e kau pati loa ki loku laumalie : Ei loku laumalie, kua lasi ai ou koloa ala kua tanaki ki ni fetuu mauke ai ; malolo la, mo kai, mo inu, ti mo fiafia. 20Kae e pati le Atua kiate ia : Ko le vale a koe ! I le po fai leinei e toe afa atu loa kiate koe lou laumalie ; ti ko nea fuli ala na ke teuteui, pe a ai loa latou ? 21E toe fenaaki foki ki leia e tanaki ia ni koloa kiate ia, kae e leaise mou koloa a ia i mua o le Atua.

Ko i mo tuania

22Na pati loa Sesu ki ana tisipulo : Koia e kau pati ai kia koutou : Aua na kotou tuania ki lokoutou mauli ki le nea leia ka kotou kai loa, pe ki okoutou tino ki le nea leia ka kotou lava loa. 23Talie e mauiga ake le mauli i le nea kai, ti e mauiga ake le tino i le nea lava. 24Kotou tio ki kolopo : E leaise lotou faisaga pe utuutu, e leaise lotou tanaki ni nea kai ki se fata, kae e fagai latou e le Atua. E kotou mauiga lasi ake i manu lele ! 25Ko ai ia koutou e mafai ia le fakaloaloa o lona mauli i se fatiga lima e tasi ki ona tuania ? 26Kapau e leaise kotou mafai fua le ga nea noa lena, ti kolea loa e kotou tuania ia ai leia ake a potu. 27Kotou tio pe feaki le tutupu o sei laakau o le vao : E leaise lotou gaoi mo lalaga ; kae e kau fakasa atu kia koutou, ko Salomone foki, i lona kololia katoa, na leaise teu ofaipe se tasi o sei laakau ana. 28Kapau e teu fenaaki e le Atua a laakau ala e tuu i le vao i le aso nei, ti e laku loa ki le afi i apogipogi, ti e toe feaki ake loa lana fakalava koutou, kakai tui gaegae ? 29Ti ko koutou, aua na kotou mamae o afa tuumau le nea leia ka kotou kai loa mo le nea leia ka kotou inu loa, 30Talie e afa a nea fuli ana e le kau pagani o le malama nei. E iloa e lokoutou Tamana e aoga a nea fuli ana kia koutou. 31Kotou afa mua le puleaga o le Atua ; ti e soli atu loa i aluga a nea fuli ana kia koutou.

32Aua na kotou i, ga kau manu ikiiki ; talie kua malie ki lokoutou Tamana ke tuku atu kia koutou le puleaga.

33Kotou fakatau okoutou koloa ti kotou soli lona paaga ki le kau mativa. Kotou fai ni taga paaga ala e leaise toe popo, kotou tanaki se koloa lee gato i le lagi, i le ganea leia e leaise kaku ki ai le tagata kaia, ti e leaise maumau ai a ugogo. 34Talie ko le ganea leia e tuku ai lokoutou koloa, ko le ganea lena e toe tuku ai foki lokoutou loto.

Mauiga o le nofo alaala

35Ke toi okoutou kilii pipi ki okoutou sulugalava, ti ke ula okoutou malama. 36Ti ko koutou, ke kotou faipe ni tagata ala e talitali ke toe liliu mai lolatou pule mei se faiavaga, o tupu ke fakamavaa kiate ia le matapa mo ka kaku mai o fitifiti i le matapa. 37Manuia a tagata fakasausau ana ka maua mai loa e le pule e alaala, mo ka kaku mai a ia ! E kau fakasa maoki atu kia koutou : E toi loa e ia lona kilii pipi, ti e fakaeke loa e ia latou ki le laupapa kai, ti e au loa a ia o takatuu kia latou. 38Pe au a ia i le loto malie o le pouli, pe i le mafoata, manuia a tagata fakasausau ana, mo ka e maua mai loa e ia latou e alaala ! 39Ke kotou matala malie ki le nea leinei : Kanapau na iloa e le pule o le fale le ola leia kua tonu ke au ai le tagata kaia, e alaala loa a ia talie e leaise tuku loa e ia ke ulufia lona fale. 40Ko koutou foki, ke kotou nofo teuteu, talie e au loa le Vosa o le tagata i le ola leia na leaise kotou amanaki ki ai.

Ko tagata fakasausau e toka lua

41Na pati loa Petelo kiate ia : Aliki, pe ke fakasa le folafola fakatata leinei kia matou tefua, pe ki tagata fuli ? 42Ti na pati loa le Aliki : Ko ai loa le tagata taupau koloa agatonu mo poto leia e fakanofo loa e lona pule ke tokaga ki ana tagata gaoi, ti ke soli kia latou le nea kai leia e aoga i lona temi ? 43Manuia le tagata fakasausau lena, mo ka au loa lona pule, o maua mai a ia e fai fenaaki ! 44E kau fakasa maoki atu kia koutou, e fakanofo loa e ia a ia ke pule ki ona koloa fuli. 45Kae, kapau e pati loa le tagata fakasausau lena i lona loto : E tuvai mai loku pule ; ti kapau e tamate loa e ia a tagata fakasausau mo fafine fakasausau, ti kapau e kai loa a ia mo inu ke kona, 46e au loa le pule o le tagata fakasausau lena i le aso leia e leaise amanaki a ia ki ai ti mo le ola leia e leaise iloa e ia, ti e maumaui loa e ia a ia, o soli kiate ia lona vaega mo le kau agaveli. 47Ko le tagata fakasausau leia e iloa ia le finegalo o lona pule, kae na leaise teuteui e ia se nea, ti na leaise gaoi a ia o mulimuli ki lona finegalo, e tamate loa a ia ki ni fa ta mauke. 48Kae ko leia, na leaise iloa ia le finegalo o le pule, kae na fai e ia ni nea ala e tonu ke tautea, e tamate loa a ia ki ni fa ta teiki. E afa lasi loa ki leia na soli lasi ki ai, ti e fakaala lasi loa ki leia na fanaki lasi ki ai.

Kilisito, tupuaga o mavaevae

49Na kau au o ti se afi ki le malama nei ; ti kolea e kau oli ki ai, mo kapau kua ula a ia ? 50E i ai se papitema leia e tonu ke kau papitema ai, ti e kau loto ke fai ti ke soko mai la ! 51Pe kotou manatu na kau au o aumai le tokamalie ki le malama nei ? Leai, na kau au o aumai le mavaevae. 52Talie e kamata nei, e mavaevae loa le toka lima i se loto fale, ko le toka tolu e fakafesagai loa ki se toka lua, ti ko se toka lua ki se toka tolu ;

53ko le tamana ki lona vosa ti ko le vosa ki le tamana, ko le tinana ki le taine ti ko le taine ki le tinana, ko le tinana ki le fugao fafine ti ko le fugao fafine ki le tinana.

54Ti na toe pati loa Sesu ki le kakai : Ka kotou tio ki se ao lei e mafuta mei le galoaga o le laa, e kotou pati aifai : Ka ua loa, ti e soko a ia. 55Ti ka kotou tio kua agi mai le matagi o le potu saute, ti e kotou pati : Ka vevela loa, ti e soko a ia. 56Tagata malualoi ! E kotou iloa le agaaga o le kele mo le lagi ; kolea e leaise kotou matala ai ki le agaaga o le temi nei ?

57Ti kolea e leaise kotou iloa ai i okoutou loto le nea leia e totonu ? 58Ka ke ano mo lou fili ki mua o le tui fakamaau, faiga ke ke lauatea meiate ia i le temi leia e kolua ano fakatasi ai i le ala, talie ke aua na ave loa e ia a koe ki mua o le tui fakamaau, ti ke aua na ave loa a koe e le tui fakamaau ki le ofisa, ti ke aua na fakaulu loa a koe e le ofisa ki le pilisoni. 59E kau fakasa kiate koe, e leaise ke mavae loa mei ai kae e leikiaise ke ui lou maua o kaku ki le fa piesi fakaoki.

Currently Selected:

Luka 12: FB2000

Highlight

Copy