Senesi 9

Noe mo ona vosa

1Na tapuaki loa le Atua kia Noe mo ona vosa, o pati kia latou : Kotou fanaunau, mo kotou liuliuga, ti mo kotou fakaapele le kele. 2E i loa a manu fuli o le kele kia koutou, a manu lele fuli o le lagi, mo nea fuli ala e taka i aluga o le kele, ti mo ika fuli o le tai : kua tuku fuli atu latou ki okoutou lima. 3E tuku atu loa kia koutou a nea fuli ala e taugaoi mo mauli ke kotou kai : e kau tuku atu kia koutou a nea fuli ana ofaipe laku tuku atu kia koutou le mutie sesega. 4Kae ke aua fua na kotou kai loa se kanoi manu mo lona laumalie, mo lona toto. 5Ke kotou iloa foki, e kau toe afa loa le toto o okoutou laumalie, e kau toe afa loa a ia ki manu fuli ; ti e kau toe afa loa le laumalie o le tagata ki le tagata, ki le tagata leia ko lona taina. 6Kapau e liligi e se tasi le toto o se tagata, ti e toe liligi loa e le tagata lona toto ; talie kua fakatupu e le Atua le tagata o fakatatau kiate ia.

7Ti ko koutou, ke kotou fanaunau, mo kotou liuliuga, mo kotou mafola i aluga o le kele, ti mo kotou fakakakai a ia.

8Na toe masau loa le Atua kia Noe mo ona vosa, o pati : 9Ko leinei, e kau fai laku fakapapau kia koutou mo lokoutou sakoga i okoutou muli, 10ti mo nea fuli ala e mauuli i okoutou tafa : tatau a manu lele, mo manu lalata, mo manu fuli o le vao, mo manu fuli ala na mavae mei le aleka, ti mo manu fuli ala e mauli loa ki muli i aluga o le kele. 11E kau fai laku fakapapau kia koutou : E leaise toe tamate loa e le vai o le lomaki a kanofi fuli i se aso, ti e leaise toe to loa se lomaki o maumaui le malama nei. 12Ti na pati loa le Atua : Ko leinei le fakamailoga o le fakapapau leia e kau fai kia koutou, mo nea fuli ala e mauli mo koutou, mei tautupu ki tautupu : 13Kua kau fakatuu laku nuanua i le ao, ke tuu ko se fakamailoga o le sai leia kua kau fai mo le kele. 14I le aso leia e kau tanaki ai loa ni ao i aluga o le kele, e sa loa le nuanua i le ao, 15Ti e kau manatui loa laku sai leia kua kau fai mo koutou mo faasiga manu kesekese fuli, ti e leaise toe liliu loa le ua ko se lomaki o maumaui ia a kanofi fuli. 16E tuu loa le nuanua i le ao, ti e kau tio loa ki ai, ti e kau toe manatui loa le sai lee gato leia kua fai e le Atua ki nea fuli e mauli, mo nea fuli e kanofi ala e mauli i aluga o le kele.

17Ti na pati loa le Atua kia Noe : Ko lena le fakamailoga o le sai leia kua kau fai kiate koe mo nea fuli e kanofi ala e mauli i aluga o le kele.

18Ko vosa o Noe, ala na mavae mei le aleka : ko Semi, mo Kami, mo Safeti. Na liliu loa a Kami ko le tamana o Kanaane. 19Ko vosa ana e tolu o Noe, ti ko lolatou sakoga leia na fakakakai ia loa le malama nei katoa.

20Na kamata gaoi loa a Noe ki le kele, ti na to loa e ia se vite. 21Na inu loa e ia se vino, ti na kona loa a ia : ti na nofo telefua loa a ia i lona falela. 22Ko Kami, tamana o Kanaane, na tio loa ki le telefua o lona tamana, ti na fakasa loa e ia le nea lena ki ona fetaina e toka lua ala na nonofo i fafo. 23Koia na too ai loa e Semi mo Safeti se taupulupulu o teki ki ola tuauma, ti na la saele fakasolomuli loa ki loto o le falela, o uufi le telefua o lola tamana. Na tio kese ola mata ke aua na la tio ki le telefua o lola tamana. 24I le ofo ake a Noe i lona kona, na logo loa a ia ki le nea leia na fai kiate ia e le lua o ona vosa. 25Ti na pati loa a ia : Ke Malaia a Kanaane ! Ke liliu a ia ko le nea fakasausau a tagata fakasausau o ona fetaina. 26Na toe pati foki a ia : Ke manuia le Eteleno, ko le Atua o Semi ! Ti ke fakasausau a Kanaane kia Semi ! 27Ke fakalasi e le Atua a koloa o Safeti, ti ke agai a ia i falela o Semi, ti ke fakasausau a Kanaane kia Safeti !

28Na mauli loa a Noe, i le oki o le lomaki, i fetuu e kau lelau tolu kau lima. 29Ko aso fuli o Noe ko fetuu e kau lelau iva kau lima ; ti na mate loa a ia

Currently Selected:

Senesi 9: FB2000

Highlight

Copy