Senesi 7

Lomaki.

1Na pati loa le Eteleno kia Noe : Ulu ki le aleka, a koe mo lou famili ; talie kua kau tio e ke agatonu toka tasi i oku mua i le tautupu leinei. 2E ke too loa kiate koe ni soa manu e fitu i manu mea fuli, se manu tagata mo se manu fafine ; mo se soa manu e tasi i manu kelekele fuli, se manu tagata mo se manu fafine ; 3ti mo ni soa manu foki e fitu o manu lele o le lagi, se manu tagata mo se manu fafine, o tupu ke ke fakamauli olatou faasiga i aluga o le kele katoa. 4Talie, koi toe fua ni aso e fitu, ti e kau fakato ia loa le ua ki le kele i aso e kau fa mo po e kau fa, ti e kau fakapuli loa i aluga o le kele a nea fuli ala na kau fakatupu ia.

5Na fai loa e Noe a nea fuli ala na fakatotonu e le Eteleno kiate ia.

6Na fetuu kau lelau ono a Noe, i le aso leia na to ai loa le lomaki vai ki le kele. 7Ti na ulu loa a Noe ki le aleka mo ona vosa, mo lana avaga ti mo avaga o ona vosa, o tupu ke latou mauli i le lomaki vai. 8Ko manu mea ti mo manu kelekele, mo manu lele ti mo manu liliki ala na taka i aluga o le kele,

9na au loa kia Noe, o taki taumatua, ko se manu tagata mo se manu fafine, o mulimuli ki le nea leia na fakatotonu e le Eteleno kia Noe.

10I le sili o aso e fitu, na to loa le lomaki ki le malama nei. 11I le fetuu kau lelau ono o le mauli o Noe, i le lua masina, i le aso kau agafulu tupu fitu o le masina, i le aso lena na mapusi loa a matapuna fuli o le moana lasi ki aluga, ti na mavaa loa a matapa o le lagi. 12Ti na to loa le ua ki le malama nei i aso e kau fa mo po e kau fa. 13I le aso totonu lena na ulu loa ki le aleka a Noe, mo Semi, mo Kami, mo Safeti, ko vosa o Noe, mo le avaga o Noe, ti mo avaga e toka tolu o vosa o Noe mo latou : 14io latou, mo manu fuli o mulimuli ki olatou faasiga, manu lalasi o mulimuli ki olatou faasiga, mo manu liliki o mulimuli ki olatou faasiga, mo manu totolo o mulimuli ki olatou faasiga, ti mo manu lele o mulimuli ki olatou faasiga, mo manu lele liliki fuli, ti mo manu kapakau fuli. 15Na lotou ulu fuli loa ki le aleka ki tafa o Noe, o taki taumatua, a nea fuli ala na tukumanava.

16Na ulu loa se manu tagata mo se manu fafine i faasiga manu kesekese, o mulimuli ki le nea leia na fakatotonu e le Atua kia Noe. Ti na tapono loa e le Eteleno le matapa i muli o Noe.

17Ti na to loa le lomaki ki le kele i aso e kau fa. Na pale loa le vai ki aluga o lagai le aleka, ti na tele loa a ia i aluga o le fenua. 18Na asilisili pale loa le vai ki aluga, ti na mafola loa a ia i aluga o le kele katoa, kae na tele loa le aleka i aluga o le vai. 19Na asilisili pale loa le vai ki aluga, o kaku ki le temi leia na fakalaka ai loa a ia i aluga o tumutumu o mauga taualuga fuli ala na tuu i le lalo lagi.

20Na fakalaka loa le vai i aluga o tumutumu o mauga taualuga i ni meta e fitu mo le vaelua : na pupuli loa a mauga taualuga fuli i le vai.

21Na mamate loa a nea fuli ala na mauli i le kele, tatau a manu lele, mo manu lalata, mo manu fuli o le vao, mo manu totolo fuli o le kele, ti mo tagata fuli. 22Na mamate loa a nea fuli ala na tukumanava, ala na maua ia se manava i olatou pogoisu, ti na mauli i le kele malo. 23Na mamate loa a nea fuli ala na mauli i aluga o le kele, mei le tagata o kaku ki le manu lalata, mo manu totolo ti mo manu lele o le lagi : na tamate fuli loa latou ke puli i le kele. Na toe fai a Noe mo latou ala na nonofo mo ia i le aleka. 24Na nofo loa le vai i aluga o le kele i aso e kau lelau kau lima.

Currently Selected:

Senesi 7: FB2000

Highlight

Copy