Senesi 43

Lua fanoga o fetaina o Sosefo

ki Esipito

1Na toe asilisili veli le oge i le fenua o Kanaane. 2Na oki loa le fulumeto leia na avake i Esipito i le kai, ti na pati loa Sakopo ki ona vosa : Kotou toe liliu o totogi mai se nea kai. 3Na tali loa Suta kiate ia : Na fakapapau mai le tagata Esipito kia matou ke aua na motou toe sa ake ki ona mua, mo kapau e leaise motou nake loa mo lomatou taina muli. 4Koia kapau e ke tuku mai loa Pesamino ke ano mo matou, ti e motou ifo loa ki Esipito o totogi mai ni nea kai. 5Kae kapau e leaise ke loto ki ai, ti e leaise motou ifo loa ki Esipito, talie na fakapapau mai le tagata lena kia matou : Ke aua na kotou toe sa mai loa ki oku mua, mo kapau e leaise kotou au loa mo lokoutou taina muli. 6Na pati loa Iselaele : Kolea na kotou fai nea veli ai kiate au, o pati ki le tagata lena e i ai foki sokoutou taina. 7Na lotou tali loa kia Sakopo : Na fakavesilii matou e le tagata lena o uiga mo matou mo lomatou famili, o vesili mai a ia : Pe koi mauli lokoutou tamana ? Pe koi toe se tasi ake o okoutou taina ? Ti na motou tali loa ki ana vesili. Pe na mafai ke motou iloa e pati mai loa a ia ke avake lomatou taina ?

8Na pati loa Suta kia Iselaele : Tamana, tuku mai le toe ke ano mo au ! E tonu ke motou tutuu nei o ano, mo kapau e ke loto ke tou mauli, kae ke aua na tou mamate, tatou mo atatou fanau. 9Ko au, e kau tokaga loa kiate ia ; e ke afa mai loa a ia kiate au. Kapau e leaise kau liufaki mai a ia kiate koe, ti kapau e leaise kau toe tuku a ia ki ou mua, ti e kau sala loa i ou mua o lee gato. 10Talie kapau na leaise tou tuvai feneeki, kua motou toe liliu mai nei tua lua. 11Na pati loa lolatou tamana ko Iselaele kia latou : Ko lena e maua ke felaaki, ke kotou fai loa le nea leinei : Kotou fafao loa ki akoutou taga ni fua malilie o le fenua, ke kotou fai ai se moliga ki le tagata lena : kotou too ni kaloni, mo se meli, mo ni nea fakamanogi, mo se mila, mo ni fuai pinati, ti mo ni fuai amatie. 12Kotou toe fakaliliu le paaga leia na kotou maua i akoutou taga, e lagi ko se faisala, ti kotou toe too fakalasi sakoutou paaga. 13Kotou too mo lokoutou ga taina, ti kotou tutuu o toe liliu ki le tagata lena. 14Ke alofa le Atua mafimafi o tuku ke tali malie koutou e le tagata lena ti ke kotou toe liliu mai kiate au mo lokoutou taina ko Pesamino ti mo Simeone. Ti ko au, kapau e tonu ke kau nofo sala mo aku fanau, ti ke kau sala !

Tali e Sosefo ona fetaina

15Na lotou too loa le moliga, ti na lotou too foki se paaga o liuga lua, mo Pesamino, ti na lotou tutuu loa ki aluga o ifo ki Esipito ; na lotou ano loa ki mua o Sosefo.

16I le tio a Sosefo kia Pesamino leia kua nake mo latou, na pati loa a ia ki le pule o lona fale : Fakaulu a tagata anei ki fale, ti ke tamate ni manu o teuteui se kai, talie e kakai loa a tagata anei mo au i le lalatea. 17Na fai loa e le tagata pule le nea leia na fakatotonu e Sosefo kiate ia, ti na fakaulu loa e ia a tagata ki le fale o Sosefo. 18I le temi leia na fakaulu ai latou ki le fale o Sosefo, na lotou i lasi ai, ti na lotou pati loa : E ave nei tatou o tupu ko le paaga leia na velo ki atatou taga i le faiaga talu ai. Ko le nea leinei ke tapo ai mo osoi ai tatou, ti ke fakapopulai ai tatou kae too atatou asino. 19Na lotou fakafeofi loa ki le pule o le fale o Sosefo, ti na lotou masau loa kiate ia, i mua o le matapa. 20Na lotou pati loa : Tilou ake, ei aliki ! Na motou uluaki ifo mai i mua ki leinei, o totogi nea kai. 21I lamatou liliu, i le ganea leia na tonu ke motou malolo ai i le pouli, na motou fakamavaa loa amatou taga, ti na motou tasi maua loa lana paaga e tuku i le gutu o lana taga. Na motou toe aumai le paaga katoa lena. 22Na motou toe aumai foki se tasi paaga kese ke totogi ai ni iki amatou nea kai. E leaise motou iloa ia pe ko ai leia na tuku ia le paaga ki amatou taga. 23Na tali loa le tagata pule kia latou : Ke fimalie okoutou loto ! Aua na kotou tuania ia se nea ! Ko lokoutou Atua lena, le Atua leia o lokoutou tamana, na soli ia se koloa ki loto o akoutou taga. Na kaku malie mai lakoutou paaga kiate au. Ti na aumai loa Simeone e le pule o le fale kia latou. 24Ti na fakaulu loa latou e le tagata lena ki le fale o Sosefo. Na tuku loa e ia kia latou se vai ke fufulu ai olatou vae ; ti na soli foki e ia se nea kai ki alatou asino. 25Na lotou teuteui loa lalatou moliga o fakatalitali ke kaku ake Sosefo i le lalatea ; talie kua oki i le fakasa kia latou e lotou kai loa mo Sosefo i lona fale. 26I le kaku ake a Sosefo ki fale, na lotou momoli loa kiate ia le moliga leia na lotou aumai, ti na lotou punou loa o kaku ki le kele i mua o Sosefo. 27Ti na vesili loa Sosefo kia latou pe lotou malolo ; ti na toe pati loa a ia kia latou : Pe malolo lokoutou tamana, leia na kotou masau mai ki ai kua matua ? Pe koi mauli a ia ? 28Na lotou tali loa : E malolo lau tagata fakasausau, lomatou tamana, ti koi mauli foki a ia. Ti na lotou toe punou loa o kaku ki le kele i mua o Sosefo. 29Ti na siki ake loa e Sosefo ona mata ; ti na tio loa a ia kia Pesamino lona taina, vosa o lona tinana totonu, ti na pati loa a ia : Pe ko lokoutou taina muli leinei leia na kotou masau mai ki ai ? Ti na pati loa a ia kia Pesamino : Ke tapuaki le Atua kiate koe, ei loku vosa ! 30Na logoi loa e Sosefo i ona tootooga lona alofa ki lona taina, ti na fia tagi loa a ia. Na ulu fakatavili loa a ia ki lona kogafale o tagi i ai. 31I le oki o lana fufulu ona mata, na toe ulu ake loa a ia kia latou. Ti na faiga loa a ia ke aua na sa lona loto, o pati loa a ia ke tufa le nea kai. 32Na kai kese fai Sosefo, ti na kai kese ona fetaina, ti na toe kai kese le kau Esipito ala na fakaafe ki lona fale, talie na leaise taga ke kai fakatasi le kau Esipito mo le kau Epeleo, talie na fakalialia ai le nea lena kia latou. 33Na fakanonofo loa a fetaina o Sosefo i ona mua, o kamata mei leia na mua o kaku ki leia na mulimuli. Na lotou punamauli loa i le nea lena, ti na lotou fetioaki loa ia latou. 34Na fakatotonu loa e Sosefo ke tufa kia latou a nea kai ala na tuku i ona mua. Na lasi tua lima ake le vaega o Pesamino i ona fetaina. Na lotou inu loa, ti na lotou fakafiafia fakatasi loa mo Sosefo.

Currently Selected:

Senesi 43: FB2000

Highlight

Copy