Senesi 41

Sosefo i mua o Falaone

1Na sili loa ni fetuu katoa e lua, ti na fai loa e Falaone se moe miti : Ko leinei, na tuu a ia i le kauvai o le vaitafe. 2Ti na tio loa a ia ki ni pipi fafine e fitu, ala na fulumalilie mo pepeti, na pale ake loa i le vaitafe, o kai i le faisaga mouku. 3Ti ko ni iki ake pipi fafine e fitu, ala na fuluveveli mo kakala, na nake loa i olatou muli i le vaitafe, o tutuu i olatou tafa i le laugutu o le vaitafe. 4Ti na kai loa e pipi fafine fuluveveli mo kakala a pipi fafine fulumalilie mo pepeti. Ti na ala loa Falaone.

5Na toe moe loa a ia, ti na toe fai loa e ia se tasi moe miti. Na tio a ia ki ni taulu fulumeto e fitu, ala na fulumalilie mo fualalasi, na sosomo ake i le tafito fulumeto e tasi. 6Ti ko ni iki ake taulu fulumeto e fitu, ala na paao mo masunu i le matagi o le potu esite, na somo ake loa i olatou muli. 7Ti na folo loa e taulu fulumeto paao a taulu fulumeto fualalasi mo fuamalilie. Ti na ala ake loa Falaone ; ko lena lana moe miti. 8I le usu, na mamae loa le laumalie o Falaone, ti na kalagai loa e ia a tagata fainea fakatalatupua fuli mo le kau poto fuli o Esipito. Ti na fakamatala loa e ia kia latou ana moe miti. Kae na leaise mafai ke fakamatala e se tasi a moe miti kia Falaone.

9Ti na masau loa le pule vino, o pati kia Falaone : E kau fakamanatu loa i le aso nei laku sala. 10Na ita Falaone ki ana tagata fakasausau ; ti na tuku loa e ia au mo le pule pane ki le pilisoni, ki le fale o le pule o le kau tagata leo. 11Na ma fai loa toka lua ni moe miti i le po e tasi. Ti na ma tasi maua ia loa se fakamatala ki ama moe miti. 12I le fale pilisoni, na ma nonofo fakatasi mo se tama tupulaga Epeleo, ko le tagata fakasausau a le pule o le kau tagata leo. Na ma fakamatala loa kiate ia ama moe miti, ti na fakamatala loa e ia a ma moe miti taki tasi. 13Ti na soko loa a nea fuli ala na fakasa e ia o mulimuli ki lana fakamatala kia maua. Na toe fakanofo loa au e Falaone ki loku tuulaga, kae na tautau loa le pule pane ki le laakau.

14Na fakatotonu loa e Falaone ke avake Sosefo kiate ia. Ti na too fakatavili loa Sosefo i le fale pilisoni. Ti na tele loa e Sosefo lona kau kava, ti na fetogi loa e ia ona teu, ti na ano loa a ia ki mua o Falaone. 15Na pati loa Falaone kia Sosefo : Na kau fai ia se moe miti, ti na leaise mafai ke fakamatala a ia e se tasi. Ti na kau logo e ke fakamatala ia a moe miti, i le oki o lau fakalogo ki ai. 16Na tali loa Sosefo kia Falaone : E leaise ko au ! Kae ko le Atua leia e soli ia loa se tali malie kia Falaone.

17Na pati loa Falaone kia Sosefo : I laku moe miti, na kau tuu i le laugutu o le vaitafe. 18Ti na kau tio loa na pale ake i le vaitafe ni pipi fafine e fitu, ala na fulumalilie mo pepeti, ti na lotou kai loa le mutie i le faisaga mouku i tafa o le vaitafe. 19Ti na pale ake loa ni iki ake pipi fafine e fitu, ala na kakala mo fuluveveli, i olatou muli : Na leaise kau tio i se aso ki ni pipi fuluveveli felaaki i le fenua o Esipito. 20Ti na kai loa e pipi fafine kakala mo fuluveveli a pipi pepeti e fitu. 21Na lotou folo loa a pipi pepeti ki olatou manava, kae na leaise mailoga fua talie na lotou kakala aifai pe mua. Ti na kau ala loa. 22Na kau toe moe, ti na kau toe tio loa ki ni taulu fulumeto e fitu, ala na fualalasi mo fulumalilie, na sosomo ake i se tafito fulumeto e tasi. 23Ti na sosomo ake loa i olatou muli ni iki ake taulu fulumeto e fitu, ala na paao mo masunu i le matagi o le potu esite. 24Ti na folo loa e taulu fulumeto paao a taulu fulumeto fulumalilie e fitu. Ko lena laku moe miti ; kua oki i laku fakamatala ki le kau fai nea fakatalatupua, kae na leaise soli mai e se tasi lona fakamatala kiate au.

25Na pati loa Sosefo kia Falaone : Ko le nea leia na moe miti ki ai Falaone ko le nea e tasi. Kua fakasa e le Atua kia Falaone le nea leia ka fai loa e ia. 26Ko pipi fafine fulumalilie e fitu ko fetuu ana e fitu ; ti ko taulu fulumeto fulumalilie e fitu ko fetuu ana e fitu. Ko se moe miti e tasi. 27Ko pipi fafine kakala mo fuluveveli e fitu, ala na pale ake i muli o uluaki pipi fafine, ko fetuu ana e fitu ; ti ko taulu fulumeto paao mo masunu i le matagi o le potu esite, ko fetuu foki ana e fitu. Kae ko fetuu oge ana e fitu. 28Ko leinei le nea leia e kau fakasa kia Falaone : Kua fakasa e le Atua kia Falaone le nea leia ka fai loa e ia. 29Ko leinei, e ia loa ni fetuu mau i le fenua katoa o Esipito. 30Ti e muli mai loa ni fetuu oge e fitu i le fenua katoa o Esipito. Ti e galo loa le mau i le fenua o Esipito ; talie e tamate loa e le oge le fenua. 31O tupu ko le lasi o le oge lena ka to loa ki le fenua, e leaise toe iloa loa le mau o le fenua nei. 32Kapau na tio tua lua Falaone ki le moe miti, ko lona uiga, kua fakapapau e le Eteleno ke fai le nea lena, ti e leaise toe talitali loa a ia. 33Koia i le aso nei, ke afa e Falaone se tagata malie mo poto, ti ke fakanofo e ia a ia ke pule ki le fenua o Esipito. 34Ke fakanofo foki e Falaone ni kovana i le fenua, ke lotou tanaki ia le vaega lima o magiti fuli o Esipito i fetuu e mau e fitu o le fenua. 35Ke lotou tanaki a nea kai kesekese fuli i fetuu malilie anei ka au, ti ke lotou fakatuu ni fale koloa, o laku ki ai le fulumeto ke lasi se tokonaki, ti ke lotou taupau a nea fuli ana, i le pule a Falaone. 36E maua loa e Esipito se tokonaki nea kai ki fetuu oge e fitu, ti e leaise mamate loa le kakai i le oge.

Sosefo, kovana o Esipito

37Na malie loa a masau ana kia Falaone mo ana minisi fuli. 38Ti na pati loa Falaone kia ana minisi : E nofo le tagata leinei mo le Laumalie o le Atua. Pe tou toe maua loa se tasi ake tagata ofaipe ia leinei ? 39Ti na pati loa Falaone kia Sosefo : Ko leinei kua fakasa e le Atua kiate koe a nea fuli anei, e leaise toe maua se tasi ake tagata leia e toe atamai ake mo toe poto ake iate koe. 40Koia e kau fakanofo a koe ke pule ki loku puleaga, ti e fakalogo loa loku kakai katoa ki au fakatotonu. E kau malaga fua iate koe i le ekeekeaga fakasau. 41Ti na pati loa Falaone kia Sosefo : Tio, e kau tuku kiate koe i le aso nei le pule ki le fenua katoa o Esipito. 42Ti na too loa e Falaone lona mama i lona lima o velo ki le lima o Sosefo ; ti na fakakofu loa e ia Sosefo ki ni kofu tetea fulumalilie, ti na fakatau loa e ia se kasoa aulo ki lona ua. 43Ti na fakaeke loa e ia Sosefo ki le saliote leia e olo ake ki lana saliote, ti na kalaga loa i mua o Sosefo : Ke tutuli ! I le nea lena, na fakanofo loa a ia e Falaone ke pule ki le fenua katoa o Esipito. 44Ti na toe pati foki a ia kia Sosefo : Ko au ko Falaone ! ti e leaise siki loa e se tasi lona lima pe ko lona vae i le fenua katoa o Esipito.

Avaga o Sosefo

45Ti na soli loa e Falaone kia Sosefo le igoa ko Safinati-Paeneasi ; ti na soli loa e ia kia Sosefo a Asenate, taine o Potifela, ko le pelepitelo o Oni, ke avaga mo ia. Ti na ano loa Sosefo o fakatele le fenua katoa o Esipito. 46Na fetuu kau tolu Sosefo i lana ano ki mua o le sau o Esipito ko Falaone. Ti na mavae loa Sosefo meia Falaone, o ano o fakatele le fenua katoa o Esipito.

47I fetuu mau e fitu na fua mauke ai le kele. 48Na tanaki loa e Sosefo a fua fuli o fetuu ana e fitu, i le fenua katoa o Esipito. Ti na fakatuu loa e ia ni fale koloa i kolo fuli, o laku ki ai a fua o faisaga i olatou tafatafa. 49Na tanaki loa e Sosefo le fulumeto o tatau mo le one o le tai, ti na leaise koi mafai lona lau.

Tupu o Manase mo Efalaimi

50I mua o fetuu oge, na tupu loa kia Sosefo ni vosa e lua, ala na fanaui e Asenate, taine o Potifela, ko le pelepitelo o Oni. 51Na soli loa e Sosefo ki le vosa uluaki le igoa ko Manase, talie na pati a ia : Kua tuku e le Atua ke kau galoi oku mamae fuli mo loku mamao mei le fale katoa o loku tamana. 52Ti na soli loa e ia ki le vosa lua le igoa ko Efalaimi, talie na pati a ia : Kua soli mai e le Atua kiate au ni fanau i le fenua leinei na kau mamae lasi ai.

53Ti na oki loa a fetuu e fitu o le mau i Esipito. 54Ti na kamata loa a fetuu oge e fitu, ofaipe lona kua fakasa e Sosefo. Na to loa le oge i fenua fuli, kae na maua loa le pane i le fenua katoa o Esipito. 55I le aso leia na kamata pakupaku ai loa le kakai o le fenua o Esipito, na lotou tagi loa kia Falaone ke soli ake se pane kia latou. Na pati loa Falaone ki le kau Esipito fuli : Kotou ano kia Sosefo, ti kotou fai le nea leia e fakatotonu atu loa e ia kia koutou. 56Na veli loa le oge i le fenua katoa. Ti na fakamavaa loa e Sosefo a ganea fuli ala na tanaki ai a nea kai, ti na fakatau loa e ia le fulumeto ki le kau Esipito. Na toe asilisili veli loa le oge i le fenua o Esipito. 57Ti na au loa mei fenua fuli ki Esipito, o totogi fulumeto ia Sosefo ; talie na veli ai le oge i fenua fuli.

Currently Selected:

Senesi 41: FB2000

Highlight

Copy