Senesi 33

Fakatokatoka o Sakopo mo Esau

1Na siki ake loa e Sakopo ona mata, o tio : ko leinei, kua kaku ake Esau, mo tagata e tino lelau fa. Na vaevae loa e ia a toe ia Lea, mo Lasele, mo fafine fakasausau e toka lua. 2Na tuku loa e ia ki mua a fafine fakasausau mo ola toe, ti na olo atu loa ki ai a Lea mo ona toe, ti na muli loa Lasele mo Sosefo. 3Na ano loa a ia totonu i olatou mua, ti na punou loa a ia ki le kele o tua fitu i mua o lana kaku ki lona taina. 4Na makape loa Esau o fakafelavei kiate ia ; ti na folasi loa e ia ona lima kia Sakopo, o fui lona ua mo sogi kiate ia. Ti na la fetagisi loa.

5Ti na siki ake loa e Esau ona mata, o tio ki fafine mo toe, ti na pati loa a ia : Ko ai ma latou anei ? Ti na tali loa Sakopo : Ko fanau anei na soli mai e le Atua ki lau tagata fakasausau. 6Ti na fakafeofi ake loa a fafine fakasausau mo ola fanau, o punou ki le kele. 7Ti na toe fakafeofi ake loa a Lea mo ana fanau o punou ki le kele. Ti na fakafeofi ake loa a Sosefo mo Lasele o punou ki le kele. 8Ti na pati loa Esau : Kolea le uiga o kau manu ala na felavei mo au i le ala ? Ti na tali loa Sakopo : Ke kau maua i ai lou manava alofa. 9Ti na pati loa Esau : Ei loku taina, e kau nofo nei i le mou koloa ; taupau au nea. 10Ti na tali loa Sakopo : Leai, e kau kole atu kiate koe, kapau kua ke alofa kiate au, tali le moliga kua kau fai kiate koe. Talie kua kau tio ki ou mata ofaipe laku tio ki mata o le Atua, talie kua ke tali au i le loto malie. 11Koia tali ai laku moliga kua fai atu kiate koe, talie kua fakaapele au e le Atua ki ona kalasia, ti e leaise nea fua e puli kiate au. I le kole fakamakeke a Sakopo kia Esau, na tali loa e Esau lana kole. 12Ti na pati loa Esau : Ta ano, ti ta kau fanoga ; ti e kau muamua loa iate koe.

13Kae na tali loa Sakopo kiate ia : E iloa e loku aliki e gagae a toe, ti e tonu ke fakaeteete ki ovi fafine mo pipi fafine ala e nofo mo uviki ; kapau e fakamakeke latou ke saele i se aso katoa, ti e mamate loa le kau manu katoa. 14Ke muamua loku aliki i lana tagata fakasausau ; ti ko au, e kau saele mamalie loa i muli, o mulimuli ki le saele a le kau manu leia e saele loa i oku mua, ti mo le saele o toe, o kaku ki le lakaga leia e kau kaku atu ai loa ki loku aliki i Seili. 15Ti na pati loa Esau : E kau loto loa ke tuku atu kiate koe se koga o loku kakai. Ti na tali loa Sakopo : Kolea lona tupuaga ? Kua lasi ai le alofa o loku aliki kiate au, i lau tali au i le loto alofa. 16I le aso fai lena, na toe liliu loa Esau ki Seili.

Kaku o Sakopo ki Kanaane

17Na ano loa Sakopo ki Sukoti. Ti na fakatuu loa e ia i le ganea lena se fale kiate ia, mo ni fale pola ki ana kau manu. Koia leia na soli ai loa e ia le igoa ko Sukoti ki le ganea lena.

18I lana toe liliu mei Patane-Alame, na tau manuia loa Sakopo ki le kolo ko Siseme, i le fenua o Kanaane, ti na fakatuu loa e ia lona falela o ofi ki le kolo. 19Na totogi loa e ia le ga kele leia na tuu ai lona falela, mei vosa o Amole, ko le tamana o Siseme, ki ni fa kesita e kau lelau. 20Ti na fakatuu loa e ia se aletale i le ganea lena, o soli loa e ia ki ai le igoa ko Ele-Eloe-Isalaele : Atua, ko le Atua o Iselaele.

Currently Selected:

Senesi 33: FB2000

Highlight

Copy