Senesi 31

Toe liliu a Sakopo ki Kanaane

1Na logo loa Sakopo ki masau o vosa o Lapane, ala na pati : Kua too e Sakopo a nea fuli o lotatou tamana, ti kua fakatupu e ia lona koloa fuli ki nea o lotatou tamana. 2Na fakatokagai foki e Sakopo a mata o Lapane, na leaise koi tatau lana tio kiate ia pe mua.

3Koia na pati ai loa le Eteleno kia Sakopo : Toe liliu ki le fenua o ou tamana, ti mo le ganea leia na ke tupu ai, ti e kau nofo loa mo koe. 4Na kalagai loa e Sakopo a Lasele mo Lea ala na nonofo i faisaga i tafa o lana kau manu liliki. 5Ti na pati loa a ia kia laua : E kau tio i mata o lokoulua tamana e leaise koi tatau a ia kiate au mo mua ; kae na kau mo au le Atua o loku tamana. 6E kolua iloa malie na kau gaoi ki lokoulua tamana i loku makeke katoa. 7Ti na kakai au e lokoulua tamana, o fetogi tua kau agafulu e ia loku totogi ; kae na leaise fakataga e le Atua ke fai e ia se nea veli kiate au. 8Ka pati a ia : Ko lou totogi loa ko ovi pulepule, ti na fanaui loa e ovi fafine ni uviki pulepule. Ti ka pati a ia : Ko lou totogi loa ko ovi sikasika, ti na fanaui loa e ovi fafine fuli ni uviki sikasika. 9Kua too e le Atua mei lokoulua tamana lana kau manu, o soli mai kiate au. 10Na kau moe miti ti na kau tio ki ovi tagata ala na ano ki ovi fafine, na lotou pulepule mo ilaila ti mo safesafe. 11Ti na pati mai loa le aselo o le Atua kiate au i le moe : Sakopo ! Na kau tali : Ko leinei au ! 12Na pati loa a ia : Tio ou mata : E pulepule mo safesafe a ovi tagata fuli ana na ano ki ovi fafine ; talie na kau tio ki nea fuli ala na fai e Lapane kiate koe. 13Ko le Atua au o Petele, le ganea leia na ke pani lolo ai se fatu fakamanatu, leia na ke fai ai se fakapapau. I le aso nei, ke ke tuu ki aluga, ti ke mavae i le fenua leinei, o toe liliu ki le fenua leia na ke tupu ai.

14Na tali loa Lasele mo Lea kiate ia : Pe koi ma maua se vaega pe ko se tofiga i le fale o loma tamana ? 15Pe na leaise tio a ia kia maua ofaipe ni fafine matapule, o tupu ai lana fakatau maua, kae kai loa e ia lona paaga ? 16Koia kua ma maua ai le koloa fuli leia kua too e le Atua mei loma tamana, e maua mo ama fanau. Fai i le aso nei a nea fuli ala e fakasa atu e le Atua kiate koe.

17Na tuu ake loa Sakopo ki aluga, o fakaeke ana fanau mo ana avaga ki ni kamelo. 18Ti na ave loa e ia lana kau manu katoa mo ana nea fuli ala na maua e ia, ala na gaoi ki ai i Patane-Alame ; ti na ano loa a ia ki lona tamana ko Isaake i le fenua o Kanaane. 19I le temi lena na ano Lapane o koti lana kau manu. Na kaia loa e Lasele a taulaatua o lona tamana. 20Na kakai loa e Sakopo a Lapane, le tagata Alami, talie na sola fakafufu a ia kae na leaise fakasa e ia kiate ia. 21Na sola loa a ia mo nea fuli ala na maua e ia ; na tuu loa a ia o ano, ti na fakalaka loa a ia i le vaitafe o fakaagaaga ki le mauga o Kalate.

Tuli o Sakopo e Lapane

22I le tolu o aso, na fakasa loa kia Lapane kua sola Sakopo. 23Na too loa e Lapane ona fetaina, ti na lotou kapu loa Sakopo i aso e fitu, ti na maua loa e ia a ia ki le mauga o Kalaate. 24Kae na sa loa le Atua i le pouli i se moe miti kia Lapane, le tagata Alame, o pati kiate ia : Aua na ke masau loa kia Sakopo i se nea malie pe ko se nea veli ! 25Na kaku loa Lapane kia Sakopo. Na fakatuu loa e Sakopo lona falela i le mauga o Kalaate.

26Ti na pati loa Lapane kia Sakopo : Kolea na ke fai ? Kolea na ke kakai ai au, o ke ave oku taineliki ofaipe ni fafine popula ? 27Kolea na ke sola fakafufu ai, ti na ke kakai ai au ? Kolea na leaise ke fakasa mai ai kiate au ? Na kau tuku loa a koe ke ke ano i loto malie o ni fakafiafia mo ni sua, i le musika o le fa nafa mo le alepe ? 28Na leaise ke fakataga fua ke kau sogi ki oku makopuna mo oku taineliki ! Na ke fai se nea fakavale ! 29E makeke feauga loku lima ke kau fai ia kiate koe se nea veli ; kae na pati mai kiate au le Atua o lokoutou tamana i le aso nanafi : Aua na ke masau loa kia Sakopo i se nea malie pe ko se nea veli ! 30Ko leinei, kua ke ano talie kua ke mamae ki le fale o lou tamana, kolea na ke kaia ai oku atua ?

31Na tali loa Sakopo kia Lapane : Na kau i, ti na kau manatu : e lagi ke too loa ou taineliki. 32Kae ke mate leia e ke maua ai loa ou atua ! I mua o ota fetaina, afa i loku fale katoa au nea fuli, ti ke too latou. Na leaise iloa e Sakopo na kaia latou e Lasele. 33Na ulu loa Lapane ki le falela o Sakopo, mo le falela o Lea, ti mo le falela o fafine fakasausau, ti na leaise maua loa e ia se nea. Na mavae loa a ia i le falela o Lea, o toe ulu ki le falela o Lasele. 34Kae na too loa e Lasele a atua, o tatao i lalo o le ekeekeaga kamelo ti na tonatona loa a ia i aluga. Na sufe loa e Lapane le falela katoa, kae na leaise maua loa e ia se nea. 35Ti na pati loa Lasele ki lona tamana : Ke aua na ke ita, ei loku tamana, mo kapau e ke tio e leaise kau tuu ki aluga i ou mua, talie e kau maua le nea leia e soko masani ki fafine. Na fai loa e Lapane lana afa, kae na leaise maua loa e ia a atua.

36Na ita loa Sakopo, o masau fakaveli kia Lapane. Na pati loa a ia : Kolea laku sala, kolea laku agasala, ke ke afa fakamakeke ai au ? 37Kua ke sufe aku nea fuli. Pe na ke maua se nea fua e tasi o lou fale ? Ke ke fakasa mai a ia ki oku fetaina mo ou fetaina, ti ke lotou fakamaau loa taua. 38Ko leinei kua fetuu kau lua laku nofo i lou fale ; na leaise vilo fua se tinae o au ovi fafine mo au koti fafine, ti na leaise kau kai fua se ovi tagata o lau kau manu. 39Na leaise kau aumai fua kiate koe i se aso se manu na tamate e se manu fekai, ti na kau totogi kiate koe a nea fuli na puli. Na ke fakaala mai kiate au a manu fuli na kaia, tatau fai pe na kaia i le ao pe ko le pouli. 40Na kau tali le mamae o le vevela o le laa i le ao, mo le momoko i le pouli, ti na sola mamao le fia moe i oku mata. 41Ko leinei kua fetuu kau lua laku nofo i lou kaiga ; na kau gaoi kiate koe i fetuu e kau agafulu tupu fa ke totogi ai ou taineliki e toka lua, ti mo fetuu e ono ke totogi ai laku kau manu, kae ko koe, na ke fetogi tua kau agafulu loku totogi. 42Kanapau na leaise tokoi mai le Atua o loku tamana ko Apalaamo kiate au, le Atua leia e i ki ai loku tamana ko Isaake, na ke aga loa o kapu au mo oku lima ata. Kae na tio le Atua ki loku mamae mo le pakia o oku lima i le gaoi ; koia i le aso nanafi na fakasa e ia lona faitotonu kiate au.

43Na tali loa Lapane kia Sakopo : Ko taineliki ana ko oku taineliki, ko olatou fanau ko oku fanau, ko manu ana ko aku kau manu, ti ko nea fuli e ke tio ki ai ko aku nea. Kae kolea e feala ke kau fai i le aso nei ki oku taineliki mo oku fanau ala kua lotou fanaui ki le malama nei ? 44Au, ta fai se sai, e koe mo au, ti ke tuu loa le nea lena ko se fakamaoki i lota vasaa.

45Na too loa e Sakopo se fatu, ti na fakatuu loa e ia le fatu lena ko se fakamanatu. 46Ti na pati loa Sakopo ki ona fetaina ke lotou tanaki ake ni fatu. Na lotou tae ake loa ni fatu, o lotou tanaki fakatuuga loa latou. Ti na lotou kakai fuli loa i aluga o le tuuga fatu lena. 47Na fakaigoa loa e Lapane le ganea lena ko Sekale-Saatuta, ti na fakaigoa loa a ia e Sakopo ko Kaleti. 48Na pati loa Lapane : Ke tuu le tuuga fatu leinei ko se fakamaoki iate au mo koe ! Ko le tupuaga lena o lona igoa ko Kaleti, ko lona uiga : tuuga fatu o le fakamaoki. 49Na toe soli foki ki ai le igoa ko Misipa, ko lona uiga : tuuaga o leia e leoleo, talie na pati Lapane : Ke leoleo le Eteleno kiate koe mo au, i le temi leia e leaise ta toe fetioaki ai loa. 50Kapau e ke fakavelivelii loa oku taineliki, kapau e ke toe avaga loa mo ni iki ake fafine, tokaga ai talie e leaise ko se tagata leia e fakamaoki ia taua, kae ko le Atua totonu. 51Ti na pati loa Lapane kia Sakopo : Tio ki le tuuga fatu leinei, mo le fatu leia kua kau fakatuu i lota vasaa. 52E tuu loa le tuuga fatu lena mo le fatu lena ko ni fakamaoki kia taua : E leaise kau toe fakalaka loa i le tuuga fatu leinei ki lou fetuu, ti e leaise ke toe fakalaka mai loa i le tuuga fatu lena mo le fatu lena ki loku fetuu, o fai se nea leia e veli. 53Ke tuu le Atua o Apalaamo mo Nakole ko le tui fakamaau ia taua. Na fakapapau loa Sakopo i le suafa o le Atua leia na i ki ai Isaake. 54Ti na momoli loa e Sakopo se sakilifisio i le mauga, ti na fakaafe loa e ia ona fetaina ki se kaitasi. Na lotou kai loa, ti na lotou momoe loa i le mauga i le po lena.

55Ti na tuu ake loa Lapane i le usu koi mafoata, o sogi ki ona vosa mo ona taineliki, ti na tapuaki loa a ia kia latou. Ti na mavae loa a ia, o toe liliu ki lona kaiga.

Currently Selected:

Senesi 31: FB2000

Highlight

Copy