Senesi 17

Sai a le Atua mo Apalaamo

1I le fetuu kau iva tupu iva o Apalamo, na sa loa le Eteleno kia Apalamo, o pati kiate ia : Ko Au ko le Atua Mafimafi. Ke ke saele i oku mua, ti ke agatonu ! 2E kau fakatuu loa laku sai iate koe mo au, ti e kau liuliuga loa a koe o lasi.

3Na fakamapee loa Apalamo o fakatuu ona mata ki le kele ; ti na masau loa le Atua kiate ia, o pati : 4Ko leinei laku sai leia e kau fai kiate koe. E ke liliu loa ko le tamana o ni puleaga mauke. 5E leaise toe igoa loa a koe ko Apalamo ; kae e ke igoa loa ko Apalaamo, talie e kau fakaliliu loa a koe ko le tamana o ni puleaga mauke. 6E kau liuliuga loa a koe o lasi, e kau fakatupu loa meiate koe ni puleaga ; ti e tupu loa ni sau meiate koe. 7E kau fakatuu loa laku sai iate koe mo au, ti mo ou sakoga i ou muli, o mulimuli ki olatou tautupu. E lee gato loa le sai leinei, ti e fakasa e ia : ko Au ko lou Atua, ti ko le Atua o lou sakoga i ou muli. 8E kau soli loa kiate koe mo lou sakoga i ou muli, le fenua leia e ke nofo matapule ai, le fenua katoa o Kanaane, ko lou tofiga lee gato, ti e kau liliu loa ko lolatou Atua.

Le silikosisio, fakamailoga o le sai

9Na pati loa le Atua kia Apalaamo : Ko koe, e ke tausi loa laku sai, e koe mo lou sakoga i ou muli, o sosolo i olatou tautupu. 10Ko leinei laku sai leia e tonu ke kotou tausi i loku vasaa mo koutou, e koe mo lou sakoga i ou muli : E silikosisio loa tagata fuli ia koutou. 11E tuu loa lokoutou silikosisio ko se fakamailoga o le sai iate au mo koutou. 12I le valu o aso, e silikosisio loa a toe tagata fuli ia koutou, o sosolo i okoutou tautupu, tatau fuai leia na tupu i le loto fale mo leia na totogi paaga mei se tagata matapule, kae na leaise kau ki lou lanu. 13E silikosisio loa le tagata fakasausau leia na tupu i lou loto fale, ti mo le tagata fakasausau leia na ke totogi paaga ; ti e fai loa laku sai i lokoutou kanofi ofaipe se sai lee gato.

14Ko le toe tagata leia e leaise silikosisio loa i lona tino, e fakamavae loa a ia i lona kakai, talie kua tiaki e ia laku sai.

15Na pati loa le Atua kia Apalaamo : Aua na ke toe soli loa kia Salai lou avaga, le igoa ko Salai ; kae e igoa loa a ia ko Sala. 16E kau tapuaki loa kiate ia, ti e kau soli loa kiate koe se vosa iate ia. E kau tapuaki loa kiate ia, ti e liliu loa a ia ko le tinana o ni puleaga ; e tupu loa meiate ia ni sau o ni kakai. 17Na fakamapee loa Apalaamo o fakatau ona mata ki le kele ; ti na kata loa a ia, o pati i lona loto : E tupu feaki loa se vosa ki se tagata kua fetuu kau lelau ? Ti e faitoe feaki loa Sala, leia kua fetuu kau iva ? 18Ti na pati loa Apalaamo ki le Atua : Alofa ke mauli Isemaele i ou mua ! 19Na pati loa le Atua : E maoki e fanaui loa e lau avaga ko Sala se vosa kiate koe ; ti e ke soli loa kiate ia le igoa ko Isaake. E kau fakatuu loa laku sai mo ia ti mo lona sakoga i ona muli. E tuu loa a ia ko se sai lee gato. 20Kia Isemaele, kua kau tali lau kole. Ko leinei, e kau tapuaki loa kiate ia, e kau liuliuga loa a ia, e kau liuliuga loa a ia o lasi ; e tupu loa meiate ia ni sau e kau agafulu tupu lua, ti e kau fakaliliu loa a ia ko se puleaga lasi. 21Kae ko laku sai, e kau fai loa a ia mo Isaake, leia e fanaui loa e Sala kiate koe i le temi totonu leinei o le fetuu ka au.

22I le oki o lana masau kiate ia, na malaga loa le Atua i aluga o Apalaamo.

23Na too loa e Apalaamo a Isemaele, lona vosa, mo latou fuli ala na tupu i lona fale, ti mo latou fuli ala na totogi paaga e ia, a tagata fuli o lona fale. Ti na silikosisio loa e ia latou i le aso lena, o mulimuli ki le fakatotonu leia na tuku e le Atua kiate ia. 24Na fetuu kau iva tupu iva Apalaamo i le aso leia na silikosisio ai a ia. 25Na fetuu kau agafulu tupu tolu Isemaele lona vosa, i le aso leia na silikosisio ai a ia. 26Na silikosisio loa Apalaamo mo lona vosa ko Isemaele i le aso e tasi. 27Ti na silikosisio loa mo ia le kakai fuli o lona fale, latou ala na tupu i lona fale mo latou ala na totogi paaga mei ni matapule.

Currently Selected:

Senesi 17: FB2000

Highlight

Copy