Senesi 16

Akale ; tupu o Isemaele

1Ko Salai, le avaga o Apalamo, na leaise soli ia se fanau kia Apalamo. Kae na i ai sana fafine fakasausau Esipito, na igoa ko Akale. 2Ti na pati loa Salai kia Apalamo : Ko leinei, kua fakapaa au e le Eteleno ; e kau kole atu kiate koe ke ke ano ki laku fafine fakasausau ; e lagi feala loa ke kau maua iate ia ni fanau. Na fakalogo loa Apalamo ki le leo o Salai. 3Ti na too loa e Salai, le avaga o Apalamo, a Akale, ko le fafine Esipito leia ko lana fafine fakasausau, o soli ke avaga mo Apalamo, ko lona avaga totonu, i le sili o fetuu e kau agafulu ki le nofo o Apalamo i le fenua o Kanaane.

4Na ano loa a ia kia Akale, leia na tinae loa. I lana tio kua tinae a ia, na tio fakaveli loa Akale ki lona aliki fafine. 5Ti na pati loa Salai kia Apalamo : Ke vilo kiate koe loku mamae. Na kau tuku laku fafine fakasausau ki lou fatafata ; ti na talu lana tio kua tinae a ia mo lana tio fakaveli mai kiate au. Ke nofo le Eteleno ko le tui fakamaau iate au mo koe !

6Na tali loa Apalamo kia Salai : Ko leinei, e ke pule ki lau fafine fakasausau, ke ke fai kiate ia le nea leia e ke malie ia. Ti na fakavelivelii loa a ia e Salai ; ti na sola loa Akale o mamao meiate ia.

7Na maua loa a ia e le aselo o le Eteleno i tafa o se matapuna vai i le toafa leia e tuu i le ala o Sua. 8Na pati loa a ia : Akale, ko le fafine fakasausau a Salai, e ke au meifea, ti e ke ano kifea ? Na tali loa a ia : E kau sola mamao meia Salai, ko loku aliki fafine. 9Na pati loa le aselo o le Eteleno kiate ia : Ke ke toe liliu ki lou aliki fafine, ti ke fakataulalo i ona mua. 10Na pati loa le aselo o le Eteleno kiate ia : E kau liuliuga loa lou sakoga, ti e liliu loa a ia o lasi, o leaise mafai loa lona lau. 11Na pati loa le aselo o le Eteleno kiate ia : Ko leinei kua ke tinae, ti e ke fanaui loa se tama, ti e ke soli loa kiate ia le igoa ko Isemaele ; talie kua logo le Eteleno ki lau tagi i lou mamae. 12E fai loa a ia pe se asino vao ; e malaga loa lona lima ki tagata fuli, ti e siki loa le lima o tagata fuli kiate ia. E nofo loa a ia i mua o ona fetaina fuli. 13Na pati loa Akale : Pe na kau tio maoki i leinei ki leia e tio mai kiate au ? Ti na tuku loa e ia le igoa ko Ata-Ele-Loi ki le Eteleno leia na masau kiate ia : Ko Koe ko Ele Loi, ko le Atua leia e tio kiate au.

14Koia leia e igoa ai le sosoni lena, ko le sosoni o Lasai-Loi, sosoni o leia e tio kiate au ; e tuu a ia i le vasa o Katesi mo Paleti.

15Na fanaui loa e Akale se vosa kia Apalamo ; ti na soli loa e Apalamo le igoa ko Isemaele ki le vosa lena na fanaui e Akale kiate ia. 16Na fetuu kau valu tupu ono Apalamo i le fanaui e Akale o Isemaele kiate ia.

Currently Selected:

Senesi 16: FB2000

Highlight

Copy