Senesi 12

Mauli o Apalamo : lona kalagai

1Na pati loa le Eteleno kia Apalamo : Ano a koe i lou fenua, mo lou puleaga, mo le fale o lou tamana, ki le fenua leia e kau fakasa loa kiate koe. 2E kau fakatupu loa iate koe se puleaga lasi, ti e kau tapuaki loa kiate koe ; e kau fakaliliu loa lou igoa o lasi, ti e ke liliu loa ko se matapuna o le tapuakina. 3E kau tapuaki loa kia latou ala e tapuaki loa kiate koe, ti e kau fakamalaia latou ala e lauveli loa kiate koe ; ti e tapuakina loa a famili fuli o le malama nei iate koe.

4Na ano loa Apalamo, o mulimuli ki le pati a le Eteleno kiate ia, ti na ano loa a Lote mo ia. Na fetuu kau fitu tupu lima Apalamo, i lana mavae mei Salani. 5Na ave loa e Apalamo lana avaga ko Salai, mo Lote, le vosa o lona taina, ti mo nea fuli ala na lotou maua, ti mo tagata fakasausau ala na lotou maua i Salani. Na lotou mavae loa o ano ki le fenua o Kanaane. Ti na lotou tau loa ki le fenua o Kanaane.

6Na ano loa Apalamo i le fenua o kaku ki le ganea leia na igoa ko Siseme, o kaku ki le ulu sene o Mole. Na nofo le kau Kanaane i le temi lena i le fenua. 7Na sa loa le Eteleno kia Apalamo, o pati : E kau soli loa le fenua leinei ki lou sakoga. Ti na fakatuu loa e Apalamo i le ganea lena se aletale ki le Eteleno, leia na sa kiate ia. 8Ti na siki loa a ia i lena o ano ki le mauga, i le potu esite o Petele, ti na fakatuu loa e ia ona falela i le vasa o Petele i le potu esite mo Ai i le potu uesite. Na toe fakatuu loa e ia i lena se tasi aletale ki le Eteleno, ti na faikole loa a ia i le suafa o le Eteleno. 9Na toe soko atu loa e Apalamo lona fanoga o ano ki le potu saute.

Apalamo i Esipito

10Na to loa se oge i le fenua. Ti na ifo loa Apalamo ki Esipito ke nofo i ai, talie na lasi ai le oge i le fenua. 11I lana fakafeofi ke ulu ki Esipito, na pati loa a ia ki lana avaga ko Salai : Ko leinei, e kau iloa ko se fafine fulumalie a koe. 12Ka tio loa le kau Esipito kiate koe, e lotou pati loa : Ko lana avaga ! Ti e lotou tamate loa au, kae e lotou fakamauli loa a koe. 13E kau kole atu kiate koe ke ke pati loa, ko loku tuagaane a koe, o tupu ke lotou agamalie kiate au o tupu ko koe, ti ke lotou fakamauli loa au o tupu ko koe. 14I le kaku a Apalamo ki Esipito, na tio loa le kau Esipito ki le fulumalie lasi o le fafine. 15Ti na tio foki le kau aliki a Falaone ki le fafine ti na lotou viki loa a ia kia Falaone ; ti na ave loa le fafine ki le fale o Falaone. 16Na agamalie loa Falaone kia Apalamo o tupu ko le fafine ; ti na soli loa e Falaone kia Apalamo ni ovi, mo ni pipi, mo ni asino, mo ni tagata fakasausau, mo ni fafine fakasausau, mo ni asino fafine, ti mo ni kamelo. 17Kae na tautea loa e le Eteleno a Falaone mo lona fale ki ni malaia lalasi, o tupu ko Salai ko le avaga o Apalamo. 18Koia na fakatotonu ai loa e Falaone ke avake Apalamo kiate ia, ti na pati loa a ia : Kolea na ke fai ai le nea leinei kiate au ? Kolea na leaise ke fakasa mai ai kiate au ko lau avaga ? 19Kolea na ke pati ai : Ko loku tuagaane ? Koia na kau too ai a ia ke liliu ko laku avaga. I le lakaga nei, ko lena lau avaga, ke ke too a ia, ti ke ano ! 20Ti na tuku loa e Falaone le fakatotonu ki ana tagata ke kakau a ia ke ano, a ia mo lana avaga, ti mo nea fuli ala na maua e ia.

Currently Selected:

Senesi 12: FB2000

Highlight

Copy