Gaoi 24

Paulo i mua o le kovana ko Felise

1I le sili o aso e lima, na kaku ake loa le pule faisakilifisio ko Ananiasi mo ni kau fakamatuatua, mo se tagata poto masau na igoa ko Teletule. Na lotou tagi loa ki le kovana kia Paulo.

2Ti na kalagai loa Paulo, ti na kamata fakalakasala loa a ia e Teletule, o pati :

3Agai o Felise, e ke soli kia matou se tokamalie lasi ai, ti kua maua e le puleaga leinei ni nea malilie ai o tupu ko lau pule fakapoto tuumau aifuai ; ti e motou fakamaoki ki le nea aia i nea fuli mo potu fuli i se loto fakafetai katoa. 4Kae, o tupu ke aua na taofi fualoa a koe, e motou kole atu kiate koe ke ke fakalogo mai, i lou agamalie, ki le nea leia e matou fia fakasa kiate koe i ni ga kupu teiki fua. 5Na motou maua le tagata leinei, leia ko se taumasaki veli, leia e fakatupu ia ni maveuveu i le kau Sutea katoa o le malama nei, leia ko le pule o le magai lotu o le kau Nasaleti, 6leia foki na faiga ke fakakelekele ia le fale tapu. Ti na motou too a ia ti na motou loto ke fakamaaui a ia o mulimuli ki lamatou lao, 7kae na au loa le pule lasi o le solia ko Lisiasi, o too fakamakeke a ia mei omatou lima, 8kae fakatotonu e ia kia latou ala na fakalakasala ia a ia ke au kiate koe. E feala loa kiate koe totonu, mo ka ke fakavesilii a ia, ke ke iloa a nea fuli ala e motou fakalakasala ai a ia.

9Ti na fakamaoki loa le kau Sutea ki le masau a Teletule, o lotou pati e maoki fuli a nea ana.

Masau a Paulo i mua o Felise

10I le fakataga ake loa e le kovana kiate ia ke masau, na tali loa Paulo : E kau iloa, e ke tui fakamaau ki le puleaga leinei talu mei ni fetuu mauke ai, koia e kau masau loa i le fanaki i ou mua, o uiga mo loku puipui. 11E leikiaise fakalaka ni aso e kau agafulu tupu lua, e mafai ke ke iloa le nea lena, na kau pale ki Selusalemi o atolasio. 12Ti na leaise lotou maua au i le fale tapu, pe i se sinakoka, pe i le kolo, e kau masau mo se tasi, pe kau fakatupu ia se maveuveu i le kakai. 13Ti e leaise mafai ke lotou fakamaoki ki le nea leia e lotou fakalakasala ai au i le aso nei. 14E kau fakasa fakalauatea i ou mua le nea leinei : E kau tausi ki le Atua o oku tamana o mulimuli ki le ala leia e lotou fakaigoa ko se lotu mavae, kae e kau tui ki nea fuli ala e tosi i le lao ti mo le kau polofeta, 15ti e kau maua i le Atua le amanaki malie leinei, leia e lotou maua foki e latou anei, e i ai loa se toe tuuake o le kau agatonu mo le kau lee agatonu. 16Ti e kau faiga ke kau maua tuumau se loto mea i mua o le Atua mo mua o le tagata. 17I le oki o laku puli i ni fetuu mauke ai, na kau au loa o fai ni nea alofa ki loku puleaga, ti mo fai ni moliga. 18Ti na maua loa au e ni iki Sutea o Asia, na kau lolotoga fai a lekula o loku fakamea i le fale tapu, ti na leaise kau nofo mo ni kakai kese, pe na kau fakatupu ia se maveuveu. 19Ko latou loa ana na tonu ke au ki ou mua ti ke lotou fakalakasalai au, mo kapau na lotou maua ia se nea iate au. 20Ti ko latou anei, ke lotou fakasa pe kolea le nea veli leia na lotou maua iate au, i le temi leia na kau tuu ai i mua o le fono lasi, 21na saga fai ko le kalaga leia na kau fai i lotomalie o latou : E tupu ko le toe tuuake o le kau mate, leia e kau tuu ai i mua o koutou.

22Ko Felise, leia na malama malie ki le anoaga o le akonaki lena, na toe solo atu loa ki muli le fakamaau, o pati : E kau tioi loa le nea lena, mo ka kaku mai loa le pule solia ko Lisiasi. 23Ti na fakatotonu loa e ia ki le setulio ke leoleo Paulo, o tuku kiate ia ke evaeva, ti ke aua na taofi ona kaukau nea ke tausi kiate ia.

Fakaloa e Felise o le pilisoni o Paulo i Sesalea

24I le sili o ni iki a aso, na au loa Felise mo lana avaga ko Tulusila, leia ko se fafine Sutea, ti na kalagai loa e ia Paulo. Na fakalogo loa a ia kae masau loa Paulo ki le tui kia Kilisito. 25Kae i le masau a Paulo ki le faitotonu, mo le oli veli, ti mo le fakamaau fakamuli, na lulu loa Felise, o pati kiate ia : Ano, kua feauga le aso nei ; ka kau toe maua loa se tasi faigamalie, ti e kau toe kalagai atu loa a koe. 26Talie na amanaki a ia e soli ake loa e Paulo se paaga kiate ia ; koia leia na tautau kavelogo ai a ia ke au ke la lakupati.

27Kae i le oki o fetuu e lua, na fetogi loa Felise e Polisiusi Fesitusi. I le fia mata malie a Felise ki le kau Sutea, na tuku loa e ia Paulo i le pilisoni.

Currently Selected:

Gaoi 24: FB2000

Highlight

Copy