Gaoi 23

1I le tio fakamaumau a Paulo ki le kau fono, na pati loa a ia : Tagata fetaina, e iloa e loku loto na kau saele mea i mua o le Atua o kaku mai ki le aso nei…

2Ti na fakatotonu loa e le pule faisakilifisio ko Ananiasi kia latou ala na tutuu i ona tafa ke paai lona gutu. 3Ti na pati loa Paulo kiate ia : E taai loa a koe e le Atua, paa pena tea ! E ke ekeeke ke fakamaaui au, o mulimuli ki le lao, ti e ke maumaui le lao, o fakatotonu ke paai au ! 4Ti na pati loa latou ala na nonofo i ona tafa : E ke tauvele ki le pule faisakilifisio a le Atua ! 5Ti na pati loa Paulo : Na leaise kau iloa, fetaina, ko le pule faisakilifisio a ia ; talie e tuu i le tosi : E leaise ke masau veli loa ki le pule o lou kakai.

Fakasa e Paulo e faliseo a ia

6Ko Paulo, i lana iloa ko le tasi vaega o le fakatasi ko le kau Satuseo ti ko leia ake ko le kau faliseo, na kalaga loa i le fono lasi : Tagata fetaina, e kau faliseo, vosa o se faliseo ; e fakamaaui au o tupu ko le amanaki ki le toe tuuake o le kau mate. 7I lana fakasa le nea lena, na visi loa le kau faliseo mo le kau Satuseo, ti na vaelua loa le kakai. 8Talie na pati le kau Satuseo e leaise toe tuuake, ti e leai ni aselo mo ni laumalie, kae na tui ki nea ana le kau faliseo. 9Na toe asilisili ake loa le taukalaga, ti na tuu ake loa ki aluga ni sekelipa i le fetuuga o le kau faliseo, o kamata ia se visi lasi, o pati : E leaise motou maua fua se nea veli i le tagata leinei ; na saga na masau kiate ia se laumalie pe ko se aselo. 10I le tupu o le visi o lasi, na i loa le pule lasi o le kau solia, na lotou sae ia Paulo, ti na fakatotonu loa e ia ki le kau solia ke ifo o too ake Paulo meia latou, o ave ki le fale solia.

Sa o le Atua kia Paulo

11I leia ake a po, na sa loa le Aliki kia Paulo, o pati : Ke ke loto makeke ; talie, ofaipe lau fakamaoki kiate au i Selusalemi, e tonu foki ke ke toe fakamaoki i Loma.

Fono a le kau Sutea ke tamate Paulo

12I le mafoa mai o le ao, na kauakii loa e le kau Sutea se nea veli, ti na lotou fakapapau loa ke aua na lotou kai pe inu i mua o le tamate o Paulo. 13Na tino fa tupu latou ana na kauakii ia le nea lena, 14ti na lotou ano loa ki le kau pule faisakilifisio mo le kau fakamatuatua, o pati kia latou : Kua motou fakapapau ke aua na motou kai mo inu i mua o le tamate o Paulo. 15Ti ko leinei, ke kotou fakatasi mo le fono lasi o kole ki le pule lasi o le solia, ke aumai Paulo ki okoutou mua, o sakinake ke kotou fia iloa maoki lona anoaga totonu ; ti ko matou, i mua o lana fakaofi, e motou teuteu o tamate a ia.

16I le logo a le tama o le tuagaane o Paulo ki le puleaki fakapikoi lena, na ano loa a ia o ulu ki le fale solia, o fakasa le nea lena kia Paulo. 17Ti na kalagai loa e Paulo se tasi o le kau setulio, o pati kiate ia : Taki le tupulaga leinei ki le pule lasi, talie e fia fakasa e ia kiate ia se nea. 18Ti na too loa e le setulio le tupulaga, o taki ki le pule solia, o pati : Na kalagai au e le tagata pilisoni ko Paulo, ti na kole mai e ia kiate au ke kau taki mai kiate koe le tupulaga leinei, talie e fia fakasa atu e ia kiate koe se nea. 19Ti na too loa e le pule solia le tupulaga i lona lima o taki kese, ti na vesili loa a ia kiate ia : Kolea le nea leia e ke fia fakasa mai kiate au ? 20Ti na tali loa a ia : Kua loto tasi le kau Sutea ke kole atu kiate koe, ke avake Paulo apogipogi ki mua o le fono lasi, o sakinake ke lotou fia iloa maoki lona anoaga totonu. 21Aua na ke tali lalatou kole, talie kua lama a ia e se tino fa tupu o latou, ala kua fakapapau ke aua na kai pe inu i mua o le tamate o Paulo ; i le temi nei kua lotou tokamalie, ti e lotou talitali fua ke ke io. 22Ti na kakau loa e le pule solia le tupulaga, i le oki o lana fakatotonu kiate ia ke aua na toe masau ki se tasi o uiga mo le nea lena.

Fakasola o Paulo i le pouli ki Sesalea

23Ti na kalagai loa e le pule solia ni setulio e toka lua, o pati kia laua : Kolua teuteui loa ki le ola iva pouli, ni tagata solia e tino lelau lua, mo ni tagata eke osi e tino fitu, ti mo ni tagata too kalolo e tino lelau lua, ke ano o kaku ki Sesalea. 24Toe teuteui foki mo ni osi ke eke ai Paulo, o tupu ke ave mauli a ia ki le kovana ko Felise. 25Ti na fai loa e ia se tosi, o pati ai :

26Kolote Lisiasi, ki le agai o le kovana lasi ko Felise, malo le mauli !

27Na too le tagata lena e le kau Sutea ke tamate, ti na kau au mo le kau solia o saofaki a ia, i laku logo ko se tagata Loma a ia. 28I laku fia iloa le tupuaga o lalatou tukugavelii a ia, na kau ave loa a ia ki mua o le fono lasi. 29Ti na kau matala loa e tupu lona fakamaaui ko ni nea o uiga mo lalatou lao, kae na leikiaise fai fua e ia se sala leia e tonu ke mate ai, pe ke pilisoni ai. 30Ti i laku maua se logo kua kauakii e le kau Sutea se tukipo kiate ia, na kau kakau atu aifai a ia kiate koe, ti na kau fakasa kia latou ala na tukugavelii ia a ia, ke lotou tagi kiate koe totonu. Nofo la.

31Ti na ave loa Paulo e le kau solia, o mulimuli ki le fakatotonu kua fai kia latou, o taki a ia i le pouli o kaku ki Atipatilisi. 32I leia ake a aso, na toe liliu loa le kau solia ki le fale solia, kae lotou tuku loa le kau tagata eke osi ke ano mo Paulo. 33Ti na kaku loa le kau tagata eke osi ki Sesalea, ti na lotou fakatoo loa le tosi ki le kovana, ti mo fakasa loa Paulo kiate ia. 34I le oki o le lau o le tosi e le kovana, na vesili loa a ia pe kau Paulo ki le fenua fea. I lana iloa na au Paulo mei Silisia, na pati loa a ia : 35Koi kau fakalogo loa kiate koe, mo ka kaku mai loa latou ala na fakalakasala ia a koe. Ti na fakatotonu loa e ia ke leoleo a ia i le fale fakamaau o Elote.

Currently Selected:

Gaoi 23: FB2000

Highlight

Copy