Mak 13
13
Gyisɛse ka Ɛzonlenlɛ Sua ne ɛzɛkyelɛ nwo edwɛkɛ
(Mat 24.1-2; Luk 21.5-6)
1Mɔɔ Gyisɛse vi Ɛzonlenlɛ Sua ne anu finde la, ye ɛdoavolɛma ne mɔ ko hanle kɛ, “Kilehilevolɛ! Nea awolɛ mgbole ngɛnlɛma bie mɔɔ bɛvale bɛzile azua mgbole ɛhye mɔ a!”
2Gyisɛse buale ye kɛ, “Wɔnwu azua mgbole ɛhye mɔ? Bolɛ ko bɔbɔ ɛnrɛla bolɛ zo mɔɔ bɛnrɛdwula ye aze a.”
Ngyegyelɛ nee kpɔdekpɔdeyɛlɛ
(Mat 24.3-14; Luk 21.7-19)
3Gyisɛse hɔdɛnlanle Ɔlivi Boka ne azo, ɛleka mɔɔ ɔnwu Ɛzonlenlɛ Sua ne la. Pita, Gyemise, Dwɔn, yɛɛ Andelu rahanle hilele ye kɛ, 4“Ka kenle mɔɔ ɛhye mɔ kɛzi la kile yɛ, na ka debie mɔɔ bazi ahile kɛ mekɛ ɛdwu mɔɔ ɔwɔ kɛ ninyɛne ɛhye mɔ sisi la noko kile yɛ.”
5Gyisɛse zele bɛ kɛ, “Bɛnlea boɛ na awie ambɛlɛbɛla bɛ. 6Menli dɔɔnwo balua me duma nu ara, na bɛaraha kɛ, ‘Mame a mele Mɛzaya ne!’ na bɛabɛlɛbɛla dɔɔnwo ne ala. 7Noko saa konle si na ɔbikye bɛ, anzɛɛ bɛte kɛ konle ɛzi moa moa maanle bie anu a, bɛmmamaa bɛ ahonle tu. Ninyɛne ɛhye mɔ bazi, noko ɛnee awieleɛ ne ɛtɛdwule ɛkɛ. 8Maanle nee maanle baho, na arelemgbunli adwazo atia bɛ nwo. Azɛlɛ bakpusu ɛleka biala, yɛɛ ɛhɔne bara, noko ninyɛne ɛhye mɔ le kɛ awolɛ nyane la.
9 #
Mat 10.17-20; Luk 12.11-12 “Na bɛmɛ, bɛnlea bɛ nwo boɛ kpalɛ. Bɛbahye bɛ bɛahɔ kɔɔto. Bɛbabo bɛ wɔ nyianu azua ne mɔ anu; ɔlua me ti, bɛbagyinla mgbanyima nee arelemgbunli nyunlu na bɛaha Edwɛkpa ne bɛahile bɛ. 10Na saa ɔkɛra ye zɔhane bɔbɔ a, kyesɛ bɛdumua bɛbɔ Edwɛkpa ne nolo bɛkile maanle maanle kɔsɔɔti. 11Saa bɛkye bɛ bɛ nee bɛ kɔ kɔɔto a, bɛmmadumua bɛdwenledwenle edwɛkɛ mɔɔ bɛbaha la anwo. Mekɛ ne dwu a bɛdendɛ, ɔluakɛ edwɛkɛ mɔɔ bɛbaha la vi Sunsum Nwuanzanwuanza ne. 12Mediema baye mediema amaa kɛ bɛhu bɛ, yɛɛ selɛma baye bɛ mra amaa. Ngakula badwazo bɛ awovolɛma anwo zo na bɛaye bɛ bɛamaa bɛahu bɛ. 13#Mat 10.22 Ɔlua me ti, awie biala bakpɔ bɛ. Na mɔɔ kɛgyinla kpundii kɛhɔ awieleɛ la kɛnyia ngoane mɔɔ ɛnlɛ awieleɛ.
Munzudeɛ mɔɔ bɔ maanle
(Mat 24.15-28; Luk 21.20-24)
14 #
Dan 9.27; 11.31; 12.11 “Saa bɛnwu ‘Munzudeɛ ne mɔɔ bɔ maanle la’ kɛ ɔgyi ɛleka mɔɔ ɔnle kɛ ɔgyinla la a, (Kengavolɛ, te ɛhye abo!) ɛnee bɛdabɛ mɔɔ bɛwɔ Dwudiya la, bɛnriandi bɛhɔ awoka ne mɔ azo. 15#Luk 17.31 Awie mɔɔ gyi ye sua ti zo la mmaka kɛ ɔdwu aze yeahɔ ye sua ne anu kɛ ɔkava debie. 16Mɔɔ ɛhɔ ɛbɔ nu noko la mmasia ba sua zo kɛ ɔbava ye tɛladeɛ. 17Mekɛ ne anu, mraalɛ mɔɔ ɛva ɛkolɛ nee mrɛladane mraalɛ mɔɔ bɛ mra no nyɛfonlɛ la, bɛ gyakɔ! 18Bɛzɛlɛ Nyamenle na anwongyelelɛ ɛhye amba fɔsɛlɛ nu. 19#Dan 12.1; Yek 7.14 Ɔluakɛ mekɛ ne anu anwongyelelɛ ne bayɛ ɛzulolɛ kpalɛ mɔɔ sumunli kɛ Nyamenle bɔle ewiade toonwo mɔɔ yeradwu bekezɛ la, bie ɛtɛsile ɛlɛ, yɛɛ bie noko ɛnrɛzi ɛlɛ. 20Na Awulae ɛnlea ye menli ne mɔɔ yekpa nu yeye bɛ la ati yede mekɛ ne azo, anrɛɛ sonla ko bɔbɔ ɛnrɛha.
21“Saa awie biala se bɛ kɛ, ‘Nea, Mɛzaya ne wɔ ɛke’ anzɛɛ ‘Nea, yemɔ a wɔ nehane la’ a, bɛmmadie ye bɛdi. 22Ɔluakɛ Mɛzayama nee Nyamenle kpɔmanvolɛma alane dɔɔnwo bara. Bɛbaye ngonyia, bɛayɛ nwanwane ninyɛne mgbole kɛ bɛfa bɛabɛlɛbɛla Nyamenle menli ne mɔɔ yekpa nu yeye bɛ la saa ɔkɛyɛ boɛ a. 23Bɛnlea bɛ nwo boɛ! Kɛ meha debie biala mehile bɛ kolaa na ɛhye mɔ azi ɛ!
Sonla Ra ne ɛralɛ
(Mat 24.29-31; Luk 21.25-28)
24 #
Aye 13.10; Yiz 32.7; Dww 2.10,31; 3.15; Yek 6.12 “Mekɛ ne anu, wɔ anwongyelelɛ ne anzi, awozinli baheda sɛnzɛne ne azo, siane ɛnrɛda bieko, 25#Aye 34.4; Dww 2.10; Yek 6.13 nwɔlɔra badudu agua aze, yɛɛ bɛbadudu anwumaneamra bɛavi bɛ ndenle ne mɔ azo. 26#Dan 7.13; Yek 1.7 Akee bɛbanwu medame Sonla Ra kɛ melua amungu nu melɛba wɔ tumi bedevinli nee anyunlunyia nu. 27Mebamaa anwuma soanvolɛma ahɔ ewiade muleɛ ne amuala azo ahɔhuohua Nyamenle menli ne mɔɔ yekpa nu yeye bɛ la anloa, ɔvi ewiade ye ati yeahɔkpula ɔ bo.
Feege baka ne anwo ɛzukoalɛdeɛ
(Mat 24.32-35; Luk 21.29-33)
28“Bɛnlea feege baka ne na bɛzukoa nrɛlɛbɛ wɔ nwolɛ. Mekɛ mɔɔ ɔkɛbolo na ye ngane ne kɛze kɛ bɛfefɛ nya la, ɛnee bɛze kɛ wawaa ɛbikye. 29Zɔhane ala yɛɛ mekɛ mɔɔ bɛkɛnwu kɛ ninyɛne ɛhye mɔ ɛbɔ ɔ bo ɛlɛsisi la, ɛnee bɛhakye kɛ Mɛzaya ne ɛralɛ ɛbikye a. 30Bɛhakye ɛhye! Ninyɛne ɛhye mɔ basisi wɔ bɛdabɛ mɔɔ kɛkala bɛde aze la dɔɔnwo ne ala anye zo. 31Anwuma nee aze bapɛ nu aze, na me nloa edwɛkɛ ɛdeɛ, ɔnrɛpɛ nu ɛlɛ.
Awie biala ɛnze kenle ne anzɛɛ mekɛ ne
(Mat 24.36-44)
32 #
Mat 24.36
“Awie biala ɛnze kenle ne anzɛɛ dɔnehwele ko ne. Anwuma soanvolɛma yɛɛ Ralɛ ne bɔbɔ ɛnze. Selɛ ne angome ala a ze a. 33Bɛzinza na bɛnlea boɛ, ɔluakɛ bɛnze kenle ne mɔɔ mekɛ ne kɛdwu la. 34#Luk 12.36-38 Ɛhye le kɛ nrenya bie mɔɔ ɛlɛtu adenle na yeva ye awuke yewula ye sonvolɛma asa nu la. Biala nee ye gyima, na ɔse mɔɔ nea anlenkɛ kpole ne la kɛ ɔzinza. 35Zɔhane ati bɛzinza, ɔluakɛ bɛnze mekɛ mɔɔ awuke menle ne bara la, saa nɔsolɛ nu anzɛɛ alevinli mu nwiɔ avinli o, saa akɔlɛmɔleɛ anzɛɛ sɛnzɛnduduleɛ o. 36Saa ɔba arɛlevilɛ nu a, ɔnle kɛ ɔbato bɛ kɛ bɛdeda. 37Mɔɔ meka meahile bɛ la, meka meahile awie biala: Bɛzinza!”
Currently Selected:
Mak 13: NB
Highlight
Share
Copy
Want to have your highlights saved across all your devices? Sign up or sign in
Bible in Nzema © Bible Society of Ghana, 1998.
