Luk 7
7
Gyisɛse yɛ Wulomu sogya kpanyinli bie sonvolɛ ayile
(Mat 8.5-13)
1Mɔɔ Gyisɛse hanle ɛhye mɔ amuala hilele menli ne mɔ na ɔwiele la, ɔhɔle Kapɛnayɛm. 2Wulomu sogya kpanyinli bie mɔɔ wɔ ɛkɛ ne la lɛ ye sonvolɛ ko mɔɔ ɔkulo ye edwɛkɛ kpole kpalɛ a. Akɛlɛ ɛhye anwo ɛdo ye na ɔlɛdie adenle yeawu. 3Mɔɔ sogya kpanyinli ne dele Gyisɛse nganeɛ la, ɔzoanle Dwuu mgbanyinli bie wɔ ɔ nwo lɔ kɛ bɛhɔzɛlɛ ye bɛmaa ɔrayɛ ye akɛlɛ ne ayile. 4Mgbanyinli ne mɔ rale Gyisɛse anwo ɛkɛ ne na bɛbodole ye ɛsesebɛ kɛ, “Nrenya ɛhye fɛta wɔ moalɛ bɔkɔɔ. 5Ɔkulo yɛ menli ne edwɛkɛ yɛɛ ɔdaye a ɔzile nyianu sua ne ɔmanle yɛ a.”
6Yemɔti Gyisɛse nee bɛ hɔle. Na mɔɔ ɔka ekyii ɔdwu sua nu ɛkɛ ne la, Wulomu sogya kpanyinli ne zoanle ɔ gɔnwo mɔ manle bɛhɔyiale Gyisɛse na bɛzele ye kɛ, “Yɛmenle, mmafa ɛvɛlɛ ɛhye ɛto ɛ nwo zo na menfɛta kɛ wɔmɔ ɛkɛra me kpɔda ye abo. 7Eza menea a medame bɔbɔ menfɛta kɛ menwɔra ɛ nyunlu. Zɔhane ati wɔmɔ ka ɛ nloa edwɛkɛ ne ala na me sonvolɛ ne anwo kɛza. 8Melɛ sogyama bɔbɔ wɔ me bo ɛdeɛ, mɔɔ meka mekile bie kɛ, ‘Kɔ’ a, ɔkɔ; meka mekile bie noko kɛ, ‘Yɛ ɛhye’ a, ɔyɛ, noko medame mumua ne mewɔ tumi bo.”
9Gyisɛse dele ɛhye la ɔzinle ɔ nwo; ɔhakyile ɔ nye wɔ menli dɔɔnwo ne mɔɔ doa ye la anwo na ɔzele kɛ, “Meka meahile bɛ kɛ metɛnwunle diedi kpole zɛhae bie ɛlɛ, bɔbɔ wɔ Yizilayɛma avinli.”
10Menli mɔɔ bɛzoanle bɛ la ziale hɔle Wulomu sogya kpanyinli ne sua nu, na bɛhɔnwunle kɛ sonvolɛ ne ɛde kpɔkɛ.
Gyisɛse dwazo kunlanvolɛ raalɛ ne ara
11Aleɛ hyenle la Gyisɛse hɔle suakpole bie mɔɔ bɛfɛlɛ ye Neeyen la azo. Ye ɛdoavolɛma ne nee menli dɔɔnwo nee ye a hɔle a. 12Ɔhɔdwule sua ne kandiba la ɛnee bɛdo ɛlɔnwɔne na bɛ nee funli vi sua ne azo anuhɔlɛ kpole ne anu ɛlɛfinde. Ahenle mɔɔ ɛwu la le raalɛ kunlanvolɛ bie ara nrenya kokye, ɛhye ati ɛnee sua ne azo amra dɔɔnwo doa raalɛ ne. 13Mɔɔ Awulae nwunle raalɛ ne la alɔbɔlɛ hunle ye, na ɔzele ye kɛ, “Mmasu.” 14Akee ɔhɔvale ɔ sa ɔhanle ɛlɛka ne na bɛdabɛ mɔɔ bɛzo funli ne la gyinlanle na bɛzokoɛle. Gyisɛse zele kɛ, “Kpavolɛ! Mese, dwazo!” 15Sonla ne mɔɔ ɛwu la dwazole dɛnlanle aze na ɔbɔle ɔ bo kɛ ɔtendɛ, na Gyisɛse vale ye manle ɔ nli.
16Ɛzulolɛ hanle bɛdabɛ mɔɔ bɛwɔ ɛkɛ ne la amuala, na bɛyele Nyamenle ayɛlɛ bɛzele kɛ, “Nyamenle kpɔmanvolɛ kpole bie ɛvinde yɛ avinli! Nyamenle ɛra baboa ye menli.”
17Gyima ɛhye mɔɔ Gyisɛse lile la nganeɛ hɔle Dwudiya maanle ne anu amuala, na ɔdwule maanle maanle mɔɔ bikye ye la kɔsɔɔti anu noko.
Menli mɔɔ Dwɔn Sɔnevolɛ ne zoanle bɛ la
(Mat 11.2-19)
18Dwɔn Sɔnevolɛ ne ɛdoavolɛma hanle ɛhye mɔ amuala hilele ye. Yemɔti ɔvɛlɛle ye ɛdoavolɛma ne mɔ nwiɔ 19na ɔzoanle bɛ wɔ Awulae anwo ɛkɛ ne kɛ bɛhɔbiza ye kɛ, “Ɛnee wɔmɔ a ɛle ahenle ne mɔɔ ɛlɛba la, anzɛɛ yɛmaa yɛ nye ɛla awie fofolɛ ade ɔ?”
20Na mɔɔ bɛhɔle Gyisɛse ɛkɛ ne la, bɛhanle kɛ, “Dwɔn Sɔnevolɛ ne zoanle yɛ kɛ yɛrabiza wɔ saa wɔmɔ a ɛle ahenle ne mɔɔ ɔdaye Dwɔn ɔhanle kɛ ɔbara la, anzɛɛ yɛmaa yɛ nye ɛla awie fofolɛ ade ɔ?”
21Mekɛ zɔhane, Gyisɛse yɛle menli dɔɔnwo mɔɔ ɛnde kpɔkɛ nee bɛdabɛ mɔɔ ewulenzane wɔ bɛ nwo la ayile manle bɛdele kpɔkɛ, ɔdudule sunsum ɛtane ɔvile menli nwo na ɔdukuedukuele anyenzinliravolɛma dɔɔnwo anye. 22#Aye 35.5-6; 61.1 Na ɔbuale Dwɔn ɛdoavolɛma ne kɛ, “Bɛzia bɛhɔ na bɛhɔha mɔɔ bɛnwu ye nee mɔɔ bɛde la amuala bɛhile Dwɔn: anyenzinliravolɛma nwu debie, abuburama tia, kokobɛvolɛma anwo sa, anzondiliravolɛma te edwɛkɛ, bɛdwazo menli mɔɔ ɛwu la bɛba ngoane nu, na bɛbɔ Edwɛkpa ne nolo bɛkile ehyianvolɛma. 23Nyilalɛ ɛha bɛdabɛ mɔɔ medame ti bɛmkpo aze wɔ diedi nu la.”
24Nzinlii mɔɔ menli mɔɔ Dwɔn zoanle bɛ la hɔle la, Gyisɛse bɔle ɔ bo kɛ ɔka Dwɔn anwo edwɛkɛ yeahile menli dɔɔnwo ne kɛ, “Mɔɔ bɛhɔle Dwɔn anwo ɛkɛ ne wɔ fienemgbole ne anu la, duzu a ɛnee bɛ nye la kɛ bɛkɛnwu ye a? Ndile mɔɔ anwoma ɛlɛkpusu ye la ɔ? 25Duzu a bɛhɔle ye ɛnleanlɛ a? Sonla mɔɔ heda ɛdakpa la ɔ? Nɔhalɛ, bɛdabɛ mɔɔ bɛkeda ɛdakpa na bɛde anyelielɛ nu la wɔ arelemgbunli azua nu. 26Bɛha bɛhile me ɛ, duzu a ɛnee akee bɛhɔle ye ɛnleanlɛ a? Nyamenle kpɔmanvolɛ ɔ? Ɔle zɔhane, noko bɛnwunle mɔɔ tɛla Nyamenle kpɔmanvolɛ bɔbɔ la. 27#Mal 3.1 Ɔluakɛ Dwɔn a Nyamenle Edwɛkɛ ne ka ye ɔ nwo kɛ, ‘Nyamenle se: Mebazoa ɛbɔfoɔ meamaa yealumua ɛ nyunlu na yeahɔziezie adenle ne yeamaa wɔ’ la.” 28Na Gyisɛse hanle zɔle zolɛ kɛ, “Meka meahile bɛ, Dwɔn le kpole tɛla sonla biala mɔɔ bɛwo ye la; noko akee mɔɔ le ekyi kpalɛ wɔ Nyamenle Belemgbunlililɛ nu la le kpole tɛla ye.”
29 #
Mat 21.32; Luk 3.12 Menli mɔɔ dele ɛhye, nee adwuledievolɛma amuala lile fɛlɛko na bɛyele Nyamenle ayɛlɛ kɛ bɛdiele Dwɔn, bɛnlunle bɛ nwo na bɛmanle ɔzɔnenle bɛ a. 30Noko Falasiima nee mɛla kilehilevolɛma ɛdeɛ, bɛkpole mɔɔ Nyamenle kpondɛ kɛ bɛyɛ la na bɛkpole kɛ bɛnrɛmaa Dwɔn ɛnrɛzɔne bɛ.
31Gyisɛse zɔle ye edwɛkɛ ne azo zɛhae, “Duzu a menva adwuleso amra ye mendo nwo a? Kɛ bɛde la ɛne: 32Bɛle kɛ ngakula mɔɔ ɛlɛdi nwɔhoa wɔ gua zo la. Bɛdede ye ekpunli ekpunli. Ekpunli ko tea nu se ko kɛ, ‘Yɛbɔle anyelielɛ edwɛne yɛmanle bɛ, na bɛanzi; yɛyele awolɛ, na bɛanlie zo.’ 33Dwɔn Sɔnevolɛ ne rale, ɔhyele ɛhɔne dahuu na ɔhyile nza la bɛse, ‘Ɔle ayɛne!’ 34Medame Sonla Ra noko mera, medi na meno a eza bɛse, ‘Nea ɛhye! Adidikpoku, nzanli nee adwuledievolɛma nee bɛdabɛ mɔɔ awie ɛmbu bɛ bie la agɔnwo!’ 35Noko, Nyamenle nrɛlɛbɛ ne amra ne mɔ nyɛleɛ maa bɛnwu kɛ ɔle nɔhalɛ.”
Gyisɛse wɔ Falasiinli Saemɔn sua nu
36Falasiinli ko bie dole Gyisɛse ɛkponle. Gyisɛse hɔle na ɔdɛnlanle aze kɛ ɔdi debie. 37#Mat 26.7; Mak 14.3; Dw 12.3 Raalɛ bie wɔ sua ne azo mɔɔ bɔle ɛbɛla mgbane mgbane a. Ɔdele kɛ Gyisɛse wɔ Falasiinli ne sua nu la, ɔvale anatele mɔɔ wɔ toba mɔɔ bɛvale “alabaseta” bolɛ a bɛyɛle la anu la ko ɔhɔle ɛkɛ ne; 38ɔhɔhotole Gyisɛse agyakɛ anu na ɔbɔle ɔ bo kɛ ɔsu yeava ɔ nye monle yeanrinzi ɔ gyakɛ nwiɔ ne anwo. Akee ɔvale ɔ ti enrinli ɔkyikyile, ɔvole ɔ gyakɛ anwo na ɔwolale anatele ne ɔguale nwo. 39Mɔɔ Falasiinli ne mɔɔ yiale Gyisɛse la nwunle ɛhye la, ɔhanle ye ɔ ti akunlu kɛ, “Saa amgba nrenya ɛhye le Nyamenle kpɔmanvolɛ a, anrɛɛ ɔkɛnwu raalɛ holɛ ko mɔɔ ɛlɛfa ɔ sa aha ye la, na ɔkɛnwu ye ɛbɛla mgbane mgbane mɔɔ ɔbɔ la.”
40Gyisɛse zele ye kɛ, “Saemɔn, melɛ edwɛkɛ meka meahile wɔ.”
Saemɔn zele kɛ, “Kilehilevolɛ, ka kile me.”
41Gyisɛse bɔle ɔ bo zɛhae: “Nrenya bie mɔɔ bɔ bosea la woale ɛkɛ, ɔlɛ kavolɛma nwiɔ. Ko tua ye etaku nna nna ɛya nnu, yɛɛ ko noko tua ye etaku nna nna abulanlu. 42Kɛmɔ bɛannyia ye bɛandua la ati, ɔvale bɛ mu nwiɔ bɛ kakɛ ne ɔhyɛle bɛ. Na ɛnee ɛnea a, menli nwiɔ ɛhye, boni a kɛhulo nrenya ne edwɛkɛ kpalɛ a?”
43Saemɔn buale kɛ, “Medie medi kɛ mɔɔ ɔvale ye kakɛ kpole ne ɔhyɛle ye la ɔ.”
Gyisɛse zele ye kɛ, “Wɔbua ye bɔkɔɔ.” 44Akee ɔhakyile ɔ nye wɔ raalɛ ne anwo ɛkɛ na ɔzele Saemɔn kɛ, “Wɔnwu raalɛ ɛhye? Membale wɔ sua nu ɛke la wɔammaa me nzule meanwowo me gyakɛ anwo, na yemɔ, yeva ɔ nye monle yewowo me gyakɛ anwo na yeva ɔ ti enrinli yekyikyi. 45Wɔmɔ, wɔammiti me bie#7.45 Anzɛɛ “wɔanvo me nloa anwo wɔanyɛ me atuu.” wɔanyɛ me akɔaba, na yemɔ, sumunli kɛ de la ɔtɛgyakyile me gyakɛ anwo ɛvolɛ. 46Wɔanva ɔlivi nwole wɔanyɛ me ti zo, na yemɔ, yeva anatele yegua me gyakɛ anwo. 47Ɛhye ati meka meahile wɔ kɛ, ɛhulolɛ kpole ne mɔɔ yehile la, kile kɛ bɛva ye ɛtane bebelebe ne bɛhyɛ ye. Mɔɔ bɛkɛva ekyi bɛkɛhyɛ ye la ɛhulolɛ le ekyi bie ala.”
48Akee Gyisɛse zele raalɛ ne kɛ, “Bɛva wɔ ɛtane ne mɔ bɛhyɛ wɔ.”
49Bɛdabɛ mɔɔ bɛdede ɛkponle ne anwo la bɔle ɔ bo kɛ bɛka ye bɛ ti anu kɛ, “Na nwane bɔbɔ a le ɛhye, mɔɔ ɔkola ɔfa ɛtane ɔkyɛ a?”
50Na Gyisɛse zele raalɛ ne kɛ, “Kɔ anzonudwolɛ nu; wɔ diedi ɛlie wɔ ngoane.”
Currently Selected:
Luk 7: NB
Highlight
Share
Copy
Want to have your highlights saved across all your devices? Sign up or sign in
Bible in Nzema © Bible Society of Ghana, 1998.
