Luk 10
10
Gyisɛse soa abulasuu nee nwiɔ ne
1Nzinlii Awulae yele menli abulasuu nee nwiɔ noko na ɔzoanle bɛ nwiɔ nwiɔ ɔmanle bɛlumuale bɛhɔle sua biala azo nee ɛleka biala mɔɔ ɔdaye ɔbahɔ la. 2#Mat 9.37-38 Ɔzele bɛ kɛ, “Bɛyɔba ne ɛra dɔɔnwo, na gyimayɛvoma mɔɔ bu la le ekyi. Zɔhane ati bɛzɛlɛ kɛ egyinli menle ne kɛnyia gyimayɛvoma dɔɔnwo kɛmaa bɛkɛhɔbu bɛyɔba ne. 3#Mat 10.16 Bɛhɔ! Melɛsoa bɛ kɛ mboane mralɛ wɔ menli mɔɔ le kɛ bedi la avinli. 4#Mat 10.7-14; Mak 6.8-11; Luk 9.3-5 Bɛmmafa kodoku, yɛɛ bɛmmafa mgbɔlaboa; bɛmmagyinla bɛbiza awie biala ahye wɔ adenle nu. 5Awuke biala mɔɔ bɛkɛwolo nu la, bɛlumua bɛze kɛ, ‘Nyamenle anzonudwolɛ ɛha awuke ye anu amra.’ 6Saa awie mɔɔ kpondɛ anzonudwolɛ la bie wɔ awuke ne anu a bɛ anzonudwolɛ ne nee ye badɛnla. Na saa bie ɛnle ɛkɛ ne a bɛ anzonudwolɛ ne bazia ara bɛ nwo. 7#1 Kɔl 9.14; 1 Tem 5.18 Bɛmmadi tutɛnla. Bɛdɛnla awuke mɔɔ bɛkɛwolo nu na bɛkɛlie bɛ la anu ala, yɛɛ mɔɔ awuke ne anu amra kɛnyia ye kɛmaa bɛ la, bɛli na bɛnlo, ɔboalekɛ ɔwɔ kɛ gyimayɛvo biala nyia ye gyima nwo ahatualɛ. 8Sua biala mɔɔ bɛkɛhɔ zo na bɛkɛlie bɛ la, debie biala mɔɔ menli ne kɛva kɛmaa bɛ la bɛli, 9bɛyɛ wuleravolɛma mɔɔ wɔ sua ne azo la ayile, na bɛze menli mɔɔ wɔ ɛkɛ ne la kɛ, ‘Nyamenle Belemgbunlililɛ ne ɛbikye bɛ.’ 10#Gyi 13.51 Sua biala noko mɔɔ bɛkɛhɔ zo na bɛanlie bɛ la, bɛhɔ ye awɔdenle ne mɔ azo na bɛha kɛ, 11‘Munzule ɛha bɛ; bɛ sua ye azo anwea bɔbɔ mɔɔ wɔ yɛ gyakɛ abo la yɛkpokpo yɛagua bɛ ti zo; noko bɛhakye kɛ Nyamenle Belemgbunlililɛ ne ɛbikye bɛ.’ 12#Mɔl 19.24-28; Mat 11.24; 10.15 Na meka meahile bɛ: Ndɛnebualɛ Kenle ne Nyamenle baze Sodɔmma amumuyɛ anwunvɔne dɔɔnwo adɛla sua zɔhane azo amra.
Azua mɔɔ ɛnlie ɛnli la
(Mat 11.20-24)
13 #
Aye 23.1-18; Yiz 26.1—28.26; Dww 3.4-8; Emɔ 1.9-10; Zɛk 9.2-4 “Munzule ɛha bɛdabɛ mɔɔ bɛwɔ Koleezen la! Munzule ɛha bɛdabɛ mɔɔ bɛwɔ Bɛteseeyeda la! Ɔluakɛ nwanwane ninyɛne mgbole mɔɔ bɛyɛle wɔ bɛ azua ne mɔ azo la saa bɛyɛle bie wɔ Taya nee Saedɛn a, anrɛɛ menli ne dɛnlanle aze, hedale ɛrele na bɛbɔle nzonle bɛhilele kɛ bɛnlu bɛ nwo wɔ bɛ ɛtane nwo. 14Yemɔti Ndɛnebualɛ Kenle ne Nyamenle baze Tayama nee Saedɛnema anwunvɔne dɔɔnwo adɛla bɛ. 15#Aye 14.13-15 Na bɛmɛ Kapɛnayɛmma! Bɛkpondɛ kɛ bɛmaa bɛ zo anwuma ɔ? Kyɛkyɛ, bɛbavuandi bɛ bɛagua Ɛbolɔ senle nu.”
16 #
Mat 10.40; Mak 9.37; Luk 9.48; Dw 13.20 Gyisɛse zele ye ɛdoavolɛma ne kɛ, “Sonla mɔɔ kɛdie bɛ la ɛdie me; sonla mɔɔ andie bɛ la andie me, yɛɛ mɔɔ andie me la andie ahenle mɔɔ zoanle me la.”
Abulasuu nee nwiɔ ne ziale rale
17Abulasuu nee nwiɔ ne vale fɛlɛkolilɛ ziale rahanle hilele Gyisɛse kɛ, “Awulae, saa yɛbɔ wɔ duma yɛtendɛ yɛkile sunsum ɛtane ne mɔ bɔbɔ a bɛbɛlɛ bɛ nwo aze bɛtie yɛ!”
18Gyisɛse buale bɛ kɛ, “Menwunle kɛ Seetan vi anwuma kɛ ɛsɛlɛmanye la ɛrade aze. 19#Edw 91.13 Na bɛdie! Memaa bɛ tumi wɔ Kpɔvolɛ ne anwo zo. Eza memaa bɛ tumi kɛ bɛtietia nwɔlɛ nee nyamenleakɛlɛ nwo zo na debie biala ɛnrɛyɛ bɛ. 20Noko bɛmmadi fɛlɛko kɛ sunsum ɛtane ne mɔ tie bɛ a; bɛli fɛlɛko kɛ bɛhɛlɛ bɛ aluma wɔ anwuma.”
Gyisɛse di fɛlɛko
(Mat 11.25-27; 13.16-17)
21Mekɛ ne anu Sunsum Nwuanzanwuanza ne manle fɛlɛko yile Gyisɛse ahonle nu tɛkɛɛ na ɔhanle kɛ, “Egya, anwuma nee aze Awulae, meyɛ wɔ mo kɛ ninyɛne ɛhye mɔ mɔɔ wɔva wɔvea nrɛlɛbɛvolɛma nee nwomama la wɔye wɔhile menli mɔɔ ɛnze nwolɛ bie la. Ɛhɛe, Egya, ɛnee kɛ ɛkpondɛ kɛ ɔba ye la ɛne.
22 #
Dw 3.35; 10.15 “Egya ɛva ninyɛne kɔsɔɔti ɛwula me sa nu. Awie biala ɛnze Ralɛ ne sonla holɛ kɛ Selɛ ne ala, yɛɛ awie biala ɛnze Selɛ ne sonla holɛ kɛ Ralɛ ne nee bɛdabɛ mɔɔ Ralɛ ne kulo kɛ ɔye ye ɔkile bɛ la ala.”
23Akee Gyisɛse hakyile ɔ nwo wɔ ye ɛdoavolɛma ne anwo na ɔhanle ye ahane ɔhilele bɛ kɛ, “Bɛ nwo ɛyɛ moavolɛ kɛ bɛmɛ bɛnwu ninyɛne mɔɔ bɛnwu bɛ kɛkala la! 24Meka meahile bɛ kɛ Nyamenle kpɔmanvolɛma nee arelemgbunli dɔɔnwo hulole kɛ anrɛɛ bɛkɛnwu mɔɔ bɛmɛ bɛnwu ye la, noko bɛannwu ye, anzɛɛ bɛkɛde mɔɔ bɛde la, noko bɛande.”
Samɛleanli kpalɛ ne anwo ɛrɛlɛ
25 #
Mat 22.35-40; Mak 12.28-34 Mɛla kilehilevolɛ bie rale kɛ ɔbazɔ Gyisɛse yeanlea, na ɔbizale ye kɛ, “Kilehilevolɛ, duzu a menyɛ na meanyia ngoane mɔɔ ɛnlɛ awieleɛ a?”
26Gyisɛse buale kɛ, “Duzu a bɛhɛlɛ ye wɔ mɛla ne anu a? Kɛ ɛsi ɛkile ɔ bo ɛ?”
27 #
Sɛlɛ 19.18; Mɛla 6.5 Nrenya ne buale kɛ “Mɛla ne se, ‘Fa wɔ ahonle muala, wɔ ɛkɛla muala, wɔ anwosesebɛ muala, yɛɛ wɔ adwenle muala kulo Awulae wɔ Nyamenle ne’; na akee ‘Kulo ɛ gɔnwo kɛ ɛdawɔ ɛ nwo.’ ”
28 #
Sɛlɛ 18.5
Gyisɛse zele ye kɛ, “Wɔbua ye boɛ; yɛ ye zɔhane ala na ɛkɛnyia ngoane mɔɔ ɛnlɛ awieleɛ.”
29Na kɛmɔ mɛla kilehilevolɛ ne kpondɛ kɛ ɔbua ɔ nwo benle la ati, ɔbizale Gyisɛse kɛ, “Na me gɔnwo a le nwane?”
30Gyisɛse buale ye kɛ, “Nrenya bie vi Gyɛlusalɛm ɛlɛtolo ahɔ Gyɛleko na ɔhɔdɔle nwule avinli. Bɛkpokpole ye, na bɛbole ye bɛmanle asɛɛ ɔwule bɔkɔɔ, na bɛgyakyile ye ɛkɛ ne bɛhɔle. 31Na ɔrale kɛ sɛlɛvolɛ bie vale adenle ne azo, na mɔɔ ɔnwunle ye la, ɔbule ahane ɔhɔle. 32Zɔhane ala yɛɛ nrenya bie mɔɔ vi Livae abusua ne anu la ɔdaye ɔvale adenle ne azo a, na ɔhɔvindele nrenya ne mɔɔ bɛbodɛboda ye la anwo zo. Ɔdaye noko ɔdole ɔ nye ɔnleanle ye na ɔbule foa ko ɔhɔle. 33#2 Edk 28.15 Akee Samɛleanli bie ɔdaye ɔvale adenle ne azo na ɔradole ye. Mɔɔ ɔnwunle ye la, alɔbɔlɛ hunle ye. 34Ɔhɔle ɔ nwo ɛkɛ ne, ɔvale nwanye ɔnrinzinle ye nganlɛ ne mɔ anyunlu, ɔtotole nwole nu na ɔkyekyele; akee ɔvale ye ɔdɛnlanle ɔdaye ye ɛkpɔnwɔ ne azo na ɔ nee ye hɔle nyɛvolɛ sua bie anu na ɔnleanle ye gyɛlɛɛnye. 35Aleɛ hyenle la ɔyele dwɛtɛ fufule nwiɔ ɔmanle nyɛvolɛ sua menle ne na ɔzele ye kɛ, ‘Nea ye gyɛlɛɛnye maa me, na kakɛ biala mɔɔ ɛkɛbɔ ye wɔ dwɛtɛ ɛhye anzi la, saa mesia meba a, mebadua meamaa wɔ.’ ”
36Akee Gyisɛse dwulale ye edwɛkɛ ne kɛ, “Ɛnee menli nsa ye, ɛdawɔ ɛnea a bɛ nuhua boni a yɛle agɔnwolɛ manle nrenya ne mɔɔ dɔle nwule avinli la?”
37Mɛla kilehilevolɛ ne buale kɛ, “Sonla ne mɔɔ hilele ahunlunyele manle ye la ɔ.”
Gyisɛse zele kɛ, “Ɛdawɔ noko kɔ na kɔyɛ zɔhane ala.”
Gyisɛse kpɔla Maata nee Mɛle
38 #
Dw 11.1
Gyisɛse nee ye ɛdoavolɛma ne tu adenle la, bɛrale namule bie azo, na raalɛ bie mɔɔ bɛfɛlɛ ye Maata la liele ye hɔle ye sua nu. 39Maata lɛ ɔ diema raalɛ ko, bɛfɛlɛ ye Mɛle. Mɛle dɛnlanle Awulae agyakɛ abo ɛkɛ ne na ɔdiele ye ngilehilelɛ ne. 40Gyima ne mɔɔ ɛnee Maata angome gyi nwo la somaa ti, ɔmanle ye adwenle bɔle nu. Yemɔti ɔhɔle Gyisɛse anwo ɛkɛ ne na ɔhanle ɔhilele ye kɛ, “Awulae, wɔnwu kɛ me diema raalɛ ye ɛgyakyi gyima ye ɛkpolo me ngome la? Ka kile ye maa ɔrazɔ me nu.”
41Awulae buale ye kɛ, “Maata, Maata! Ninyɛne dɔɔnwo gyegye wɔ sɛkye wɔ adwenle. 42Debie ko ala a hyia a, na Mɛle ɛkpa nu ɛva mɔɔ le kpalɛ la, na bɛnrɛlie ye ɔ sa nu ɛlɛ.”
Currently Selected:
Luk 10: NB
Highlight
Share
Copy
Want to have your highlights saved across all your devices? Sign up or sign in
Bible in Nzema © Bible Society of Ghana, 1998.
