Luk 1
1
1Nana Tiyɔfelɛse.
Menli dɔɔnwo ɛbɔ mɔdenle ɛhɛlɛ ninyɛne mɔɔ ɛsisi yɛ nwo ɛke la anwo bie. 2Bɛhɛlɛle ninyɛne mɔɔ bɛdabɛ mɔɔ mɔlebɛbo ne bɛnwunle ye bɛ nye zo na bɛbɔle ye nolo la hanle hilele yɛ la. 3Zɔhane ati, Nana, kɛmɔ medame noko menleɛnlea ninyɛne ɛhye mɔ anu boɛ, ɔvi bɛ mɔlebɛbo ne la, medwenle nwolɛ kɛ ɔle kpalɛ kɛ menwɔhɛlɛ ye fɔɔnwo ne ala menwɔmaa wɔ. 4Meyɛ ɛhye amaa wɔanwu nɔhalɛ mɔɔ wɔ ninyɛne ɛhye mɔ mɔɔ bɛhilehilele wɔ la anu.
Bɛbɔ Dwɔn Sɔnevolɛ ne awolɛ nolo
5Mekɛ mɔɔ Hɛlɔdo di belemgbunli wɔ Dwudiya maanle ne anu la, ɛnee sɛlɛvolɛ bie wɔ ɛkɛ, bɛfɛlɛ ye Zɛkalaya.#1.5 Giliki ne anu ɔse “Zɛkalayase.” Sɛlɛvolɛ ɛhye vi Abaegya sɛlɛvolɛma ekpunli ne anu. Bɛfɛlɛ ɔ ye Ɛlezabɛte. Ɔdaye noko ɔvi Sɛlɛvolɛ Kpanyinli ne mɔɔ lumua, mɔɔ bɛfɛlɛ ye Aalɔn la abusua nu. 6Bɛ mu nwiɔ bɛbɔle ɛbɛla kpalɛ mɔɔ nwolɛ te la wɔ Nyamenle anyunlu, na bɛlile Nyamenle mɛla ne mɔ azo bɔkɔɔ. 7Bɛnlɛ ralɛ, ɔluakɛ ɛnee Ɛlezabɛte le mota, yɛɛ bɛ mu nwiɔ bɛwie mrelera yɛ.
8Kenle ko bie, ɛnee Zɛkalaya sɛlɛvolɛ ekpunli ne a yɛ gyima a, na eza yedwu Zɛkalaya anwo zo wɔ bɛ dahudahu ɛzonlenlɛ gyima ne anu, na ɔlɛyɛ ye sɛlɛvolɛ gyima ne wɔ Nyamenle anyunlu. 9Kɛmɔ sɛlɛvolɛma ngyehyɛlɛ ne de la, bɛguale nzeleba ne la ɔbɔle Zɛkalaya kɛ yemɔ a ɔwɔ kɛ ɔkpu ɛyɛlɛ wɔ azukponle ne azo a. Yemɔti ɔhɔwolole Ɛzonlenlɛ Sua ne anu na ɔhɔle Awulae azukponle ne anwo 10kɛ ɔkakpu ɛyɛlɛ. Mekɛ ne anu ɛnee menli gua alie nwo nehane na bɛlɛsɛlɛ.
11Arɛlevilɛ nu ala Nyamenle soanvolɛ bie yele ɔ nwo hilele ye, ɔragyinlanle azukponle ne fema zo, ɛleka mɔɔ bɛkpu ɛyɛlɛ ne la. 12Zɛkalaya nwunle ye la, ɔbɔle mgbatike na ɛzulolɛ hanle ye. 13Nyamenle soanvolɛ ne zele ye kɛ, “Zɛkalaya, mmasulo! Nyamenle ɛde wɔ nzɛlɛlɛ ne, ɛ ye Ɛlezabɛte bawo ralɛ nrenya, na ɛbavɛlɛ ye Dwɔn. 14Bɛwo ye a ɛ nye balie, yɛɛ menli dɔɔnwo noko bali fɛlɛko kɛ bɛwo ye a. 15Ɔbayɛ sonlakpole wɔ Awulae anyunlu. Ɔnle kɛ ɔno nwanye anzɛɛ nza ɛsesebɛ biala. Sunsum Nwuanzanwuanza ne bawolo ye, bɔbɔ, wɔ mekɛ mɔɔ ɔla ɔ nli akunlu la. 16Na ɔbahwe Yizilayɛma dɔɔnwo yeamaa bɛazia bɛara Awulae bɛ Nyamenle ne ɛkɛ. 17#Mal 4.5-6 Ɔbalumua Awulae anyunlu wɔ sunsum nee tumi nu kɛ Nyamenle kpɔmanvolɛ Yilaegya la. Ɔbamaa selɛma nee bɛ mra abɔ nu bieko; ɔbamaa anzosesebɛma azia arava Nyamenle adenle fɔɔnwo ne azo, na yeaziezie Awulae menli ne yeamaa ye.”
18Zɛkalaya bizale Nyamenle soanvolɛ ne kɛ, “Kɛkala mɔɔ me nee me ye yɛwie mrelera yɛ la, ɛnee kɛ ɔkɛyɛ na meanwu ɛhye nɔhalɛ ɛ?”
19Nyamenle soanvolɛ ne buale kɛ, “Mame a mele Nyamenle soanvolɛ kpanyinli ne mɔɔ bɛfɛlɛ ye Geebeleɛle la. Mame a megyi Nyamenle anyunlu a, yɛɛ yezoa me kɛ menva nrɛlaleɛ fɛlɛko ɛhye membɛlɛ wɔ a. 20Na wɔanlie me nrɛlaleɛ ne mɔɔ ye mekɛ dwu a ɔbayɛ zɔhane la wɔanli. Zɔhane ati sɛkɛlɛneɛ ne mɔɔ ɛkpondɛ la, yemɔ ɛne! Ɛbadɔ mumule kɔkpula mekɛ mɔɔ ɛwɔkɛ ne kɛyɛ ɛkɛ la.”
21Menli ne hendɛle dedee na Zɛkalaya ɛmba la, ɔyɛle bɛ azibɛnwo kɛ yehyɛ Ɛzonlenlɛ Sua ne anu zɛhae a. 22Nzinlii mɔɔ ɔvindele la, yeangola yeandendɛ yeangile bɛ, ɔvale ɔ sa a ɔyɛle sɛkɛlɛneɛ ɔhilele bɛ a, na bɛnyianle adwenle kɛ yenwu ɛnyelɛzodeɛnwunlɛ bie wɔ Ɛzonlenlɛ Sua ne anu.
23Mɔɔ ye ɛzonlenlɛ gyima mekɛ ne wiele la, ɔhɔle ye sua nu. 24Yeangyɛ biala yɛɛ Ɛlezabɛte nrenzɛle a, ɔveale sua nu toonwo siane nnu 25na ɔzele kɛ, “Awulae ɛboa me kpole, yeamaa menli angɔ zo anzi me amgbu kɛ mele mota.”
Gyisɛse awolɛ nwo nrɛlaleɛ
26Ɛlezabɛte nyianle siane nsia la Nyamenle zoanle ye soanvolɛ Geebeleɛle wɔ Galeli maanzinli nu, wɔ sua ne mɔɔ bɛfɛlɛ ye Nazalɛte la azo. 27Ɔvale nrɛlaleɛ ɔhɔmanle bɛlɛra bie mɔɔ ɛnee ɛnze nrenya na nrenya bie mɔɔ bɛfɛlɛ ye Dwosefi, mɔɔ vi Belemgbunli Devidi abusua nu la ɛyia ye la. Bɛlɛra ne duma a le Mɛle. 28Nyamenle soanvolɛ ne rale ɔ nwo ɛkɛ ne na ɔzele ye kɛ, “Ɔmɔ mɔɔ Nyamenle ɛlo wɔ a, ahye o! Awulae nee wɔ de, na yeyila wɔ kpole!”#1.28 Mɔmoane Mbuluku ne bie mɔ fa “wɔ mraalɛ avinli” sɔ zolɛ.
29Mɛle dele soanvolɛ ne ahyebizalɛ ne la, ɔ ti akunlu yɛle ye kesee, na ɔdwenlenle deɛ mɔɔ zɛhae ahyebizalɛ ne kile la anwo. 30Nyamenle soanvolɛ ne zele ye kɛ, “Mɛle, mmasulo, ɔluakɛ Nyamenle ɛlo wɔ kpole. 31#Mat 1.21 Nea, ɛbanrenzɛ wɔawo ralɛ nrenya, na ɛbavɛlɛ ye Gyisɛse. 32#2 Sam 7.12-13,16; Aye 9.7 Ɔbayɛ kpole na bɛavɛlɛ ye Anwuma Anwuma Nyamenle ne Ara. Awulae Nyamenle bayɛ ye belemgbunli kɛ ɔ nlenya Devidi la, 33na ɔbali Gyekɔbo abo zo amra anwo zo belemgbunli mekɛ mɔɔ ɛnlɛ awieleɛ. Ye belemgbunlililɛ ɛnrɛbɔ aze ɛlɛ.”
34Mɛle hanle hilele Nyamenle soanvolɛ ne kɛ, “Yɛmenle, menze nrenya, na kɛ ɔkɛyɛ na ɛhye ayɛ ɛkɛ ɛ?”
35Nyamenle soanvolɛ ne buale ye kɛ, “Sunsum Nwuanzanwuanza ne bara ɛ nwo zo, na Nyamenle tumi ne baheda ɛ nwo zo. Ɛhye ati bɛbavɛlɛ kakula ne Nwuanzanwuanza, yɛɛ Nyamenle Ara. 36Nea, wɔ busuanli Ɛlezabɛte, mɔɔ ɛnee bɛfɛlɛ ye mota na yewie ɛrelera yɛ bɔbɔ la ɛnrenzɛ, ye siane nsia a la zolɛ la. 37Ɔluakɛ debie biala ɛnle ɛkɛ mɔɔ Nyamenle ɛnrɛhola ɛnrɛyɛ a.”
38Mɛle hanle kɛ, “Yɛmenle, Awulae sonvolɛ a le me; mɔɔ wɔha la ɛyɛ zɔhane ɛmaa me.” Na Nyamenle soanvolɛ ne hɔle.
Mɛle kpɔla Ɛlezabɛte
39Mekɛ ne anu Mɛle hanle ɔ nwo hɔle Zɛkalaya sua zo wɔ Dwudiya maanzinli nu suakpole bie azo. Dwudiya le maanle mɔɔ awoka wɔ nu kpalɛ a. 40Mɛle dwule ala la, ɔhɔle Zɛkalaya sua nu na ɔhɔbizale Ɛlezabɛte ahye. 41Mɔɔ Ɛlezabɛte dele Mɛle ahyebizalɛ ne la, ɔ ra ne mɔɔ la ɔ kunlu la hanle ɔ nwo, Sunsum Nwuanzanwuanza ne wolole Ɛlezabɛte 42na ɔmanle ɔ ne zo ɔzele kɛ, “Bɛyila wɔ kpole wɔ mraalɛ muala avinli, na bɛyila ralɛ ne mɔɔ la ɛ kunlu la. 43Debie kpole ɛhye vi nienwu a ɛrado me a, kɛ me Awulae ɔ nli kɛra me ɛkpɔlalɛ? 44Mɔɔ mendele wɔ ahyebizalɛ ne ala la yɛɛ ralɛ ye mɔɔ la me kunlu la vale fɛlɛkolilɛ hanle ɔ nwo a. 45Nyilalɛ ɛha wɔ kɛ ɛliele ɛlile kɛ mɔɔ Awulae hanle hilele wɔ la bayɛ zɔhane a.”
Mɛle ye Nyamenle ayɛlɛ
46 #
1 Sam 2.1-10
Na Mɛle hanle kɛ,
“Me ɛkɛla yeyɛ Awulae
47yɛɛ me sunsum di fɛlɛko wɔ Nyamenle,
me Ngoanedievolɛ ne ati,
48ɔluakɛ yebu ye sonvolɛ awienvolɛ mɔɔ le kɛ
medame la bie,
na ɔvi ɛnɛ mɔɔ kɔ la awolɛndoazo kɔsɔɔti
bavɛlɛ me saleɛnli.
49Tumivolɛ Nyamenle ne ɛyɛ ninyɛne mgbole ɛmaa me.
Ye duma a le Nwuanzanwuanza;
50mekɛ biala ɔse bɛdabɛ mɔɔ bɛsulo ye la
anwunvɔne.
51Yedenrɛ ye tumi ɛsalɛ ne, na yebɔ bɛdabɛ mɔɔ
bɛmemaa bɛ nwo zo la asande,
yezɛkye bɛ ngyehyɛlɛ ne mɔ.
52Yemaa katakyiema vi bɛ arelemgbunli mbia zo
ɛdu ɛgua,
na yekpogya awienvolɛma zo.
53Yemaa bɛdabɛ mɔɔ ɛhɔne ɛlɛku bɛ la
ninyɛne kpalɛ yemaa bɛ ko ɛyi,
na yeye sukoavolɛma ali
yemaa bɛlɛ bɛ sa mgbane.
54Yeli ye ɛwɔkɛ ne mɔɔ ɔbɔle yɛ nlenya mɔ la azo,
na yera kɛ ɔbaboa ye sonvolɛ Yizilayɛ.
55Ɔ rɛle anvi kɛ ɔkɛze Ebileham nee ɔ bo zo amra
anwunvɔne kɔkpula mekɛ mɔɔ ɛnlɛ awieleɛ.”
56Mɛle nee Ɛlezabɛte dɛnlanle kɛyɛ siane nsa na yeazia yeahɔ ye sua zo.
Dwɔn Sɔnevolɛ ne awolɛ
57Mekɛ dwule kɛ ɔwɔ kɛ Ɛlezabɛte bɔ ɛkolɛ, na ɔwole ralɛ nrenya. 58Ye kpalɛzo amra nee ɔ nwo amra dele kɛ Awulae ɛhile ye ɛlolɛ kpole na bɛ nee ye lile nwolɛ fɛlɛko.
59Ye kenle mɔtwɛ ne azo, bɛyɛle kakula ne mrenyanu nzonlɛ, na bɛyɛle kɛ bɛfa ye bɛado ɔ ze Zɛkalaya. 60Na ɔ nli hanle kɛ, “Kyɛkyɛ, ye duma a le Dwɔn.”
61Bɛzele ye kɛ, “Awie ɛnle wɔ abusua ne anu mɔɔ bɛfɛlɛ ye zɔhane a!” 62Yemɔti bɛyɛle sɛkɛlɛneɛ bɛhilele ɔ ze bɛbizale ye duma holɛ ko mɔɔ ɔkulo kɛ bɛfa bɛfɛlɛ kakula ne la.
63Zɛkalaya bizale bɛ liele taboa mɔɔ bɛkɛlɛ zolɛ la, na ɔhɛlɛle zo kɛ, “Ye duma a le Dwɔn.” Ɛhye yɛle bɛ muala azibɛnwo. 64Ɛkɛ ne ala Zɛkalaya holale dendɛle bieko na ɔbɔle ɔ bo kɛ ɔye Nyamenle ayɛlɛ. 65Ɛzulolɛ hanle ye kpalɛzo amra amuala, na bɛhɔhanle mɔɔ ɛzi la wɔ Dwudiya maanzinli ne anu amuala. 66Awie biala mɔɔ dele la dwenlenle nwolɛ, ɔluakɛ ɛnee yela ɛkɛ ne wienyi kɛ Awulae tumi ne wɔ kakula ne anwo zo. Yemɔti bɛhanle kɛ, “Nɔhalɛ, kakula ɛhye bayɛ sonlakpole!”
Zɛkalaya ye Nyamenle ayɛlɛ
67Sunsum Nwuanzanwuanza ne wolole Dwɔn ɔ ze Zɛkalaya na ɔbɔle Nyamenle Edwɛkɛ ne nolo kɛ,
68“Bɛmaa yɛye Awulae, Yizilayɛ Nyamenle ne ayɛlɛ!
Yeraboa ye menli na yekpɔne bɛ.
69Yemaa yɛ Ngoanedievolɛ kpole bie
mɔɔ vi ye sonvolɛ Devidi abusua nu a.
70Ɔluale ye kpɔmanvolɛma nwuanzanwuanza ne mɔ
anwo zo ɔbɔle yɛ ɛwɔkɛ dɛba kɛ,
71ɔbalie yɛ yeavi yɛ agbɔvolɛ asa nu,
nee bɛdabɛ mɔɔ bɛkyi yɛ la tumi bo.
72Ɔhanle kɛ ɔbaze yɛ nlenya mɔ anwunvɔne,
na ɔ rɛle ɛnrɛvi ye ngyekyeleɛ nwuanzanwuanza ne.
73-74Ɔvuale ɔhilele yɛ nlenya Ebileham,
na ɔbɔle ɛwɔkɛ kɛ ɔkɛlie yɛ ɔkɛvi yɛ agbɔvolɛ asa nu,
amaa yɛazonle ye, mɔɔ ɛzulolɛ biala ɛnle nu,
75wɔ anwondelɛ nee fɔɔnwoyɛlɛ nu wɔ ɔ nyunlu
wɔ mekɛ mɔɔ yɛde ngoane nu la.
76 #
Mal 3.1
“Na wɔmɔ, me awolɛ, bɛbavɛlɛ wɔ Anwuma Anwuma
Nyamenle ne kpɔmanvolɛ, ɔluakɛ ɛbalumua
Awulae anyunlu wɔahɔziezie ye ndenle ne mɔ,
77na wɔamaa ye menli ne anwu kɛ
bɛbava bɛ ɛtane bɛahyɛ bɛ na bɛalie bɛ ngoane.
78Ɔlua yɛ Nyamenle ne ahunlunyele kpole ti, ɔbamaa
ngoanelielɛ kenle ne ado yɛ;
79 #
Aye 9.2
ye wienyi ne bada bɛdabɛ mɔɔ bɛde awozinli nu
nee bɛdabɛ mɔɔ bɛlɛkɔ ewule nu la anwo zo,
na yealie yɛ yeava anzonudwolɛ adenle ne azo.”
80Na kakula ne nyinle na ɔyɛle se wɔ sunsum nu. Ɔdɛnlanle fienemgbole ne anu toonwo ɔhɔkpulale kenle mɔɔ ɔyele ɔ nwo ɔhilele Yizilayɛma wɔ bagua nu la.
Currently Selected:
Luk 1: NB
Highlight
Share
Copy
Want to have your highlights saved across all your devices? Sign up or sign in
Bible in Nzema © Bible Society of Ghana, 1998.
