Dw 6
6
Gyisɛse maa menli apenle nnu aleɛ
(Mat 14.13-21; Mak 6.30-44; Luk 9.10-17)
1Ɛhye anzi Gyisɛse pɛle hɔle Galeli Tandane ne, mɔɔ eza bɛfɛlɛ ye Taebilease Tandane la anzi lɔ. 2Menli dɔɔnwo doale ye, ɔluakɛ bɛnwu kɛ ye ayileyɛlɛ si de nwanwane la. 3Gyisɛse nee ye ɛdoavolɛma ne hɔle boka bie azo na bɛdɛnlanle aze. 4Mekɛ ne anu ɛnee Dwuuma Akpabɛnwo Ɛvoyia ne ɛbikye. 5Gyisɛse manle ɔ nye zo na ɔnwunle kɛ menli dɔɔnwo ɛlɛba ɔ nwo ɛkɛ ne, yemɔti ɔzele Felepe kɛ, “Nienwu a yɛkɛnyia aleɛ yɛkɛdɔ yɛkɛmaa menli ɛwolaa ɛhye a?” 6(Ɔhanle ɛhye ɔvale ɔzɔle Felepe ɔnleanle; na ɛnee ɔze mɔɔ ɔdaye mumua ne ɔbayɛ la.)
7Felepe buale kɛ, “Amaa awie biala anyia ekyi bɔbɔ ali la, ɔwɔ kɛ yɛnyia kpanwo mɔɔ bo dwɛtɛ fufule ɛya nwiɔ.”
8Ye ɛdoavolɛma ne mɔ anu ko, Saemɔn Pita adiema Andelu hanle kɛ, 9“Kakula nrenya ko wɔ ɛke mɔɔ lɛ abɛlɛ kpanwo ngunguma nnu nee fɛlɛ nwiɔ a. Na ɛhye ɛnrɛdwu bɛ ɛleka bie.”
10Gyisɛse zele bɛ kɛ, “Bɛmaa menli ne mɔ ɛdɛnlɛdɛnla aze.” (Ndile mondonloo dɔɔnwo bie wɔ ɛkɛ.) Yemɔti bɛmanle menli ne amuala dɛnlɛdɛnlanle aze; bɛ nloa dwu menli kɛyɛ apenle nnu.#6.10 Menli apenle nnu ne mraalɛ nee ngakula ɛmboka nwolɛ. 11Gyisɛse vale kpanwo ne, ɔyɛle Nyamenle mo, na ɔhyɛle ɔmanle menli ne mɔ. Ɔvale fɛlɛ ne na ɔyɛle zɔhane ala, na awie biala nyianle bie lile manle ɔ ko yile. 12Mɔɔ awie biala ako yile la, Gyisɛse zele ye ɛdoavolɛma ne mɔ kɛ, “Bɛsesa ɔ bo zo ne mɔɔ ɛha la, bɛmmamaa yɛsɛkye ye.” 13Yemɔti bɛsesale, na kpanwo nnu ne mɔɔ menli ne lile la, ɔ bo zo ne mɔɔ hale la yile ahɛndɛne bulu nee nwiɔ.
14Mɔɔ menli ne nwunle nwanwane gyima kpole ɛhye mɔɔ Gyisɛse ɛli la bɛhanle kɛ, “Nɔhalɛ, ɛhye a le Nyamenle kpɔmanvolɛ ne mɔɔ bara ewiade la!” 15Gyisɛse nwunle kɛ bɛkpondɛ bɛahye ye ɛkɛ ne ala bɛazie belemgbunli la ati, ɔhwenle ɔ nwo na ɔdaye ɔ ngome ɔhɔle awoka ne mɔ azo lɔ bieko.
Gyisɛse tia azule nye
(Mat 14.22-33; Mak 6.45-52)
16Mɔɔ aleɛ ne ɛlɛmua nwo la, Gyisɛse ɛdoavolɛma ne tolole rale tandane ne anloa, 17bɛvole ɛlɛne nu na bɛziale bɛ nzi kɛ bɛpɛ bɛadɔ Kapɛnayɛm. Aleɛ dwole kpalɛ la, ɛnee Gyisɛse ɛtɛbale. 18Mekɛ ne anu ɛnee anwoma kpole bie ɛdwazo na azule ne ɛlɛtu ɛsesebɛ. 19Ɛdoavolɛma ne hanle ɛlɛne ne hɔle kilomita kɛyɛ nnu anzɛɛ nsia la yɛɛ bɛnwunle kɛ Gyisɛse ɛlɛtia azule ne anye ara ɛlɛne ne anwo a. Bɛ ahonle dule kpole 20na Gyisɛse zele bɛ kɛ, “Bɛmmasulo, na medame ɔ!” 21Bɛmanle ɔvole ɛlɛne ne anu, na ɛkɛ ne ala ɛlɛne ne hɔnwenle aze wɔ ɛleka mɔɔ ɛnee bɛ nye gyi kɛ bɛkɔ la.
Menli ne kpondɛ Gyisɛse
22Aleɛ hyenle la menli dɔɔnwo ne mɔɔ Gyisɛse ati bɛhale tandane ne anzi lɔ la nwunle kɛ ɛlɛne ko pɛ a ɛnee wɔ ɛkɛ ne a. Bɛze noko kɛ Gyisɛse anvo ɛdoavolɛma ne mɔ ɛlɛne ne anu, na bɛdule bɛgyakyile ye. 23Nzinlii nlɛne gyɛne vi Taebilease rale ɛleka mɔɔ Gyisɛse vale kpanwo ne na ɔyɛle mo ɔvale ɔmanle menli ne lile la. 24Yemɔti mɔɔ menli ne nwunle kɛ Gyisɛse ɛnle ɛkɛ, yɛɛ ye ɛdoavolɛma ne noko ɛhɔ la, bɛdabɛ noko bɛvale nlɛne mɔɔ rale la na bɛpɛle bɛrale Kapɛnayɛm kɛ bɛkakpondɛ ye.
Gyisɛse a le ngoane kpanwo ne a
25Menli ne nwunle Gyisɛse wɔ tandane ne anzi nehae la, bɛbizale ye kɛ, “Kilehilevolɛ, na kenlenzu a ɛrale ɛke a?”
26Gyisɛse buale bɛ kɛ, “Meka nɔhalɛ ne meahile bɛ: Bɛlile kpanwo ne na bɛ ko yile la ati yɛɛ bɛlɛkpondɛ me bo zo a, na tɛ kɛ asɛɛ bɛdele me nwanwane gyima mgbole mɔɔ menyɛle la abo la ati ɔ. 27Bɛmmayɛ gyima bɛkpondɛ aleɛ mɔɔ ɛngyɛ na azɛkye la; bɛyɛ gyima bɛkpondɛ aleɛ mɔɔ fa bɛ kɔ ngoane mɔɔ ɛnlɛ awieleɛ la anu la. Aleɛ ɛhye yɛɛ medame Sonla Ra, mebava meamaa bɛ a, ɔboalekɛ Nyamenle Selɛ ne ɛlie me ɛdo nu na yemaa me tumi kɛ menyɛ ye zɔhane.”
28Bɛbizale ye kɛ, “Duzu yɛɛ yɛyɛ na yɛahola yɛayɛ gyima mɔɔ Nyamenle kpondɛ la a?”
29Gyisɛse zele bɛ kɛ, “Gyima mɔɔ Nyamenle kpondɛ kɛ bɛyɛ la a le kɛ bɛkɛlie mɔɔ ɔzoanle ye la bɛkɛli.”
30Bɛbizale ye kɛ, “Duzu nwanwane gyima yɛɛ ɛkɛyɛ ɛkɛhile yɛ na yɛalie wɔ yɛali a? Duzu debie a ɛkɛyɛ a? 31#Ade 16.4,15; Edw 78.24 Yɛ nlenya mɔ lile aleɛ ne mɔɔ bɛfɛlɛ ye mana la wɔ ɛsɛlɛ ne azo, kɛmɔ Nyamenle Edwɛkɛ ne se la, ‘Ɔmanle bɛ aleɛ mɔɔ vi anwuma la bɛlile.’ ”
32Gyisɛse zele bɛ kɛ, “Meka nɔhalɛ ne meahile bɛ: tɛ Mosisi a vale aleɛ ne mɔɔ vi anwuma la manle bɛ a; Egya a maa bɛ aleɛ kpalɛ mɔɔ vi anwuma la a. 33Ɔluakɛ aleɛ ne mɔɔ Nyamenle fa maa bɛ la a le sonla ne mɔɔ vi anwuma ɛdwu aze na ɔmaa ewiade amra ngoane mɔɔ ɛnlɛ awieleɛ la.”
34Bɛzele ye kɛ, “Yɛmenle, maa yɛ aleɛ ɛhye bie kenle biala.”
35Gyisɛse buale bɛ kɛ, “Mame a mele ngoane kpanwo ne a. Mɔɔ kɛra me nwo la, ɛhɔne ɛnrɛhu ye ɛlɛ, yɛɛ mɔɔ kɛlie me kɛli la, nzuhɔne ɛnrɛhu ye ɛlɛ. 36Kɛkala, meka meahile bɛ kɛ bɛnwu me, noko bɛnrɛlie bɛnrɛli. 37Awie biala mɔɔ Egya bava ye amaa me la bara me nwo. Awie biala mɔɔ kɛra me nwo la menrɛvoa ye, 38ɔboalekɛ mevi anwuma membale kɛ mebayɛ mɔɔ zoanle me la ɛhulolɛdeɛ, na meamba kɛ mebali me ti anwo. 39Mɔɔ zoanle me la kpondɛ kɛ meyɛ ɛhye, amaa meamminli mɔɔ yeva yemaa me la bie, na meava bɛ muala meara ngoane nu wɔ mekɛ ne mɔɔ li awieleɛ la. 40Ɔluakɛ mɔɔ Egya kpondɛ la a le kɛ, bɛdabɛ mɔɔ bɛkɛnwu Ralɛ ne na bɛkɛlie ye bɛkɛli la kɛnyia ngoane mɔɔ ɛnlɛ awieleɛ; na mebadwazo bɛ meara ngoane nu wɔ mekɛ mɔɔ li awieleɛ la.”
41Dwuuma ne mɔ bɔle ɔ bo kɛ bɛtendɛ Gyisɛse bɛ nzo abo, ɔboalekɛ yeha kɛ, “Mame a mele kpanwo ne mɔɔ vi anwuma rale la.” 42Na bɛhanle kɛ, “Tɛ Dwosefi ara Gyisɛse ɛhye ɔ? Yɛze ɔ ze nee ɔ nli. Adenle boni azo a ɔlua mɔɔ ɔka kɛ ɔvi anwuma a yera a?”
43Gyisɛse zele bɛ kɛ, “Bɛgyakyi bɛ nzo abo ɛdendɛlɛ ne. 44Awie biala ɛnrɛhola ɛnrɛra me nwo, kyesɛ Selɛ ne mɔɔ zoanle me la twe ye bɛlɛ me; na mebadwazo ye meara ngoane nu wɔ mekɛ ne mɔɔ li awieleɛ la. 45#Aye 54.13 Nyamenle kpɔmanvolɛma hɛlɛle kɛ, ‘Nyamenle a kilehile menli kɔsɔɔti a.’ Awie biala mɔɔ te Selɛ ne ane na ɔtietia ɔ gyakɛ abo zo la ba me ɛkɛ. 46Ɛhye ɛngile kɛ awie biala ɛnwu Selɛ ne; mɔɔ vi Nyamenle ɛkɛ ne rale la a le sonla mɔɔ ɛnwu Selɛ ne a. 47Meka nɔhalɛ ne meahile bɛ: Mɔɔ kɛlie kɛli la lɛ ngoane mɔɔ ɛnlɛ awieleɛ. 48Mame a mele ngoane kpanwo ne a. 49Bɛ nlenya mɔ lile mana wɔ ɛsɛlɛ ne azo, na bɛwule. 50Kpanwo ne mɔɔ vi anwuma ba la le aleɛ mɔɔ awie biala mɔɔ kɛli bie la ɛnrɛwu ɛlɛ a. 51Mame a mele ngoane kpanwo ne mɔɔ vi anwuma rale la. Mɔɔ kɛli kpanwo ɛhye bie la badɛnla ngoane nu dahuu. Kpanwo ne mɔɔ mefa meamaa ye la a le me nwonane ye mɔɔ meva memaa la, amaa ewiade anyia ngoane.”
52Ɛhye vale kpolera kpole radole Dwuuma ne mɔ avinli na bɛbizale kɛ, “Kɛ sonla ɛhye si ava ye nwonane amaa yɛali ɛ?”
53Gyisɛse zele bɛ kɛ, “Meka nɔhalɛ ne meahile bɛ: Saa bɛanli medame Sonla Ra me nwonane, bɛanno me mogya a bɛnrɛnyia ngoane mɔɔ ɛnlɛ awieleɛ. 54Mɔɔ kɛli me nwonane ne bie na ɔkɛnlo me mogya ne bie la lɛ ngoane mɔɔ ɛnlɛ awieleɛ, na mebadwazo ye meara ngoane nu wɔ mekɛ mɔɔ li awieleɛ la. 55Ɔluakɛ me nwonane ne a le aleɛ kpalɛ ne a, yɛɛ me mogya ne a le nzule kpalɛ ne a. 56Sonla mɔɔ di me nwonane na ɔno me mogya la de me nu, yɛɛ medame mede ye nu. 57Egya mɔɔ zoanle me la de aze, yɛɛ ɔdaye ɔ ti melɛ ngoane. Zɔhane ala yɛɛ mɔɔ kɛva me kɛli la, medame me ti ɔkɛnyia ngoane a. 58Ɛhye a le kpanwo ne mɔɔ vi anwuma rale la; ɔnle kɛ mana ne mɔɔ bɛ nlenya mɔ lile a nzinlii bɛwule la. Mɔɔ kɛli kpanwo ɛhye bie la kenyia ngoane mɔɔ ɛnlɛ awieleɛ.”
59Gyisɛse hanle ɛhye wɔ mekɛ mɔɔ ɛnee ɔlɛkilehile wɔ Kapɛnayɛm nyianu sua ne anu la.
Ngoane mɔɔ ɛnlɛ awieleɛ edwɛkɛ
60Menli ne mɔɔ doa ye la anu dɔɔnwo dele ɛhye mɔɔ ɔhanle la na bɛhanle kɛ, “Ngilehilelɛ ɛhye yɛ se. Nwane a kɛhola ɛhye azo di a?”
61Awie anga angile Gyisɛse, noko ɔnwunle mɔɔ menli mɔɔ doa ye la ɛlɛka ye bɛ nzo abo wɔ ɛhye anwo la; yemɔti ɔzele bɛ kɛ, “Ɛhye kpondɛ amaa bɛakpo aze ɔ? 62Na saa akee bɛnwu Sonla Ra ne kɛ ɔlɛkɔ anwuma, ɛleka mɔɔ ɔvi ɔrale la ɛ? 63Mɔɔ maa ngoane la a le Nyamenle Sunsum ne; sonla anwosesebɛ ɛngola ɛnyɛ ɛhwee. Edwɛkɛ ne mɔɔ meha mehile bɛ la a le Nyamenle Sunsum mɔɔ maa ngoane la. 64Noko bɛ bie mɔ ɛnlie ɛnli.” (Mɔlebɛbo ne amuala ɛnee Gyisɛse ze bɛdabɛ mɔɔ bɛnrɛlie bɛnrɛli, nee sonla mɔɔ baye ye amaa la.) 65Na ɔvale ɔzɔle zolɛ kɛ, “Ɛhye ati a menganle mengilele bɛ kɛ awie biala ɛnrɛhola ɛnrɛra me nwo kyesɛ Selɛ ne ɛva ye ɛrɛlɛ me la.”
66Ɛhye ati, menli mɔɔ doa ye la anu dɔɔnwo ziale bɛ nzi na bɛangola bɛ nee ye anlua bieko. 67Zɔhane ati Gyisɛse bizale ye ɛdoavolɛma bulu nee nwiɔ ne kɛ, “Na bɛdabɛ noko ɛ, bɛkɛhulo kɛ bɛkɛhɔ ɔ?”
68 #
Mat 16.16; Mak 8.29; Luk 9.20 Saemɔn Pita buale ye kɛ, “Awulae, nwane ɛkɛ a yɛkɔ a? Wɔmɔ a ɛlɛ edwɛkɛ mɔɔ maa ngoane mɔɔ ɛnlɛ awieleɛ a. 69Kɛkala yɛlie yɛli, na yɛze kɛ wɔmɔ a ɛle Nwuanzanwuanza Ko ne mɔɔ vi Nyamenle ɛkɛ ɛra a.”
70Gyisɛse buale kɛ, “Bɛmɛ bulu nee nwiɔ ye, se memkpale nu menyele bɛ o? Noko bɛ nuhua ko le musuɔfoɔ!” 71Ɛnee ɔlɛka Dwudase mɔɔ le Saemɔn Yesekaleɔto ara ne edwɛkɛ. Ɔluakɛ ɛnee Dwudase le bulu nee nwiɔ ne anu ko bɔbɔ ɛdeɛ, noko ɔdaye ala a ɔbaye ye yeamaa a.
Currently Selected:
Dw 6: NB
Highlight
Share
Copy
Want to have your highlights saved across all your devices? Sign up or sign in
Bible in Nzema © Bible Society of Ghana, 1998.
