Mɔl 5
5
Adam abo zo amra
(1 Edk 1.1-4)
1 #
Mɔl 1.27
Adam nee ɔ bo zo amra awolɛndoazo ne ɛne. (Mekɛ mɔɔ Nyamenle bɔle sonla la, ɔbɔle ye kɛ ɔdaye ye ɛsaso. 2Ɔbɔle bɛ nrenya nee raalɛ, ɔyilale bɛ na ɔvɛlɛle bɛ “Sonla Dasanli.”) 3Adam lile ɛvolɛ ɛya ko abulasa la, ɔwole ye ɛsaso ralɛ nrenya na ɔdonle ye Sɛte. 4Sɛte awolɛ ne anzi, Adam dɛnlanle aze lile ɛvolɛ ɛya mɔtwɛ, na ɔwole mralɛ mrenya nee mraalɛ. 5Adam lile ɛvolɛ ɛya ngɔnla abulasa, na ɔwule.
6Sɛte lile ɛvolɛ ɛya ko ɛvolɛ nnu la, ɔwole ralɛ nrenya, ɔdonle ye Yinɔhye. 7Yinɔhye awolɛ ne anzi, Sɛte lile ɛvolɛ ɛya mɔtwɛ ɛvolɛ nsuu bokale ye ɛvolɛ ne anwo, na ɔwole mralɛ mrenya nee mraalɛ. 8Sɛte lile ɛvolɛ ɛya ngɔnla ɛvolɛ bulu nee nwiɔ, na ɔwule.
9Yinɔhye lile ɛvolɛ abulahɔnla la, ɔwole Kinan. 10Ɔwole Kinan la, ɔdɛnlanle aze ɛvolɛ ɛya mɔtwɛ ɛvolɛ bulu nee nnu, ɔwole mralɛ mrenya nee mraalɛ. 11Yinɔhye lile ɛvolɛ ɛya ngɔnla ɛvolɛ nnu, na ɔwule.
12Kinan lile ɛvolɛ abulasuu la, ɔwole Mahalalile. 13Ɛhye anzi ɔdɛnlanle aze ɛvolɛ ɛya mɔtwɛ ɛvolɛ abulanla, ɔwole mralɛ mrenya nee mraalɛ. 14Kinan lile ɛvolɛ ɛya ngɔnla ɛvolɛ bulu, na ɔwule.
15Mahalalile lile ɛvolɛ abulasia nee nnu la, ɔwole ralɛ nrenya Gyɛlɛde. 16Ɛhye anzi ɔdɛnlanle aze ɛvolɛ ɛya mɔtwɛ ɛvolɛ abulasa, ɔwole mralɛ mrenya nee mraalɛ. 17Mahalalile lile ɛvolɛ ɛya mɔtwɛ ɛvolɛ abulahɔnla nee nnu, na ɔwule.
18Gyɛlɛde lile ɛvolɛ ɛya ko abulasia nee nwiɔ la, ɔwole Yinɔko. 19Ɛhye anzi ɔdɛnlanle aze ɛvolɛ ɛya mɔtwɛ, ɔwole mralɛ mrenya nee mraalɛ. 20Gyɛlɛde lile ɛvolɛ ɛya ngɔnla abulasia nee nwiɔ, na ɔwule.
21Yinɔko lile ɛvolɛ abulasia nee nnu la, ɔwole Mɛtusɛla. 22Ɛhye anzi Yinɔko dɛnlanle aze ɛvolɛ ɛya nsa, ɔwole mralɛ mrenya nee mraalɛ. Mekɛ ɛhye anu Yinɔko nee Nyamenle luale. 23Yinɔko lile ɛvolɛ ɛya nsa abulasia nee nnu. 24#Hib 11.5 Yinɔko nee Nyamenle luale na yeanwu, ɔminliminlinle, ɔboalekɛ Nyamenle vale ye hɔle.
25Mɛtusɛla lile ɛvolɛ ɛya ko abulatwɛ nee nsuu la, ɔwole Leemɛke. 26Ɛhye anzi ɔlile ɛvolɛ ɛya nsuu abulatwɛ nee nwiɔ, ɔwole mralɛ mrenya nee mraalɛ. 27Yemɔti Mɛtusɛla lile ɛvolɛ ɛya ngɔnla abulasia nee ngɔnla, na ɔwule.
28Leemɛke lile ɛvolɛ ɛya ko abulatwɛ nee nwiɔ la, ɔwole ralɛ nrenya. 29Ɔhanle kɛ, “Nyamenle ɛmaa munzule ɛha azɛlɛ ye. Ɔlua zo ɛnɛ yɛyɛ zolɛ egyinli a yɛnwu nyane kpalɛ. Noko kakula ɛhye bamaa yɛ nyanenwunlɛ ne aha aze.” Ɛhye ati ɔdonle ye Nowa. 30Ɛhye anzi ɔlile ɛvolɛ ɛya nnu abulahɔnla nee nnu, ɔwole mralɛ mrenya nee mraalɛ. 31Leemɛke lile ɛvolɛ ɛya nsuu abulasuu nee nsuu, na ɔwule.
32Nowa lile ɛvolɛ ɛya nnu la, ɔwole mralɛ mrenya nsa: Hyɛm, Ham, yɛɛ Gyeefɛte.
Currently Selected:
Mɔl 5: NB
Highlight
Share
Copy
Want to have your highlights saved across all your devices? Sign up or sign in
Bible in Nzema © Bible Society of Ghana, 1998.