Mɔl 39
39
Dwosefi nee Pɔtefaa aye ne
1Yehyemeeyɛlema dɔle Dwosefi la, bɛ nee ye hɔle Yigyibiti, na Yigyibitinli bie mɔɔ bɛfɛlɛ ye Pɔtefaa, mɔɔ le Yigyibiti belemgbunli mgbanyima ne mɔ ko, na eza ɔle suakunlu ɛkɛ ne sinzavolɛma safohyenle la, dɔle Dwosefi vile bɛ ɛkɛ. 2Ɛnee Ɛdɛnkɛma nee Dwosefi a lua a, yemɔti ɔkpazile. Ɔdɛnlanle ɔ menle Yigyibitinli ne sua nu, 3na ɔ menle ne nwunle kɛ Ɛdɛnkɛma li Dwosefi anzi, na ɔmanle debie biala mɔɔ ɔvale ɔ sa ɔhanle ye la yɛle kpalɛ. 4Yemɔti Pɔtefaa anye liele Dwosefi anwo na ɔmanle ɔzonlenle ɔdaye mumua ne. Eza ɔyɛle Dwosefi kpanyinli kɛ ɔnlea ye sua nu ɛkɛ ne debie biala mɔɔ ɔlɛ la azo. 5Dwosefi ati Ɛdɛnkɛma yilale Yigyibitinli ne nee ye awuke ne, ɔvi mekɛ mɔɔ Pɔtefaa yɛle ye kpanyinli kɛ ɔnlea ye awuke ne nee debie biala mɔɔ ɔlɛ la azo la. Nyilalɛ ne bie hanle Pɔtefaa debie biala mɔɔ ɔlɛ la nee ye ɛya avule ne mɔ. 6Yemɔti ɔvale debie biala ɔwulale Dwosefi asa anu na ɔyele ye adwenle wɔ zolɛ. Debie mɔɔ ɔdwenlenle nwolɛ ala la a le ɔdaye Pɔtefaa ye aleɛ mɔɔ ɔdi la.
Dwosefi anwo yɛ fɛ na ɔgyi zo sengɔɔnwo. 7Mekɛ guale nu la, ɔ menle aye ne hulole ye na ɔzele ye kɛ, “Ɛnee me ɛla.” 8Dwosefi amkponle na ɔhanle ɔhilele ɔ menle aye ne kɛ, “Nea, mewɔ ɛke la ati, me menle ɛndwenle debie biala mɔɔ wɔ sua nu ɛke la anwo. Yeva debie biala mɔɔ wɔ sua nu ɛke la yewula me sa nu. 9Melɛ tumi wɔ awuke ye anu kɛ ɔdaye ala la, yɛɛ ɔtɛtuale me kɛ memmafa me sa meka debie biala kɛ ɛdawɔ ala, ɔboalekɛ ɔ ye a le wɔ. Duzu ati yɛɛ akee menwɔyɛ amumuyɛ kpole ɛhye, na menwɔyɛ ɛtane menwɔtia Nyamenle ɛ?” 10Raalɛ ne hanle mɔɔ kɛyɛ boɛ alehyenlɛ biala, na Dwosefi andie ye, ɔ nee ye anla, yɛɛ ɔ nee ye andɛnla bɔbɔ.
11Kenle ko Dwosefi hɔle sua nu ɛkɛ ne kɛ ɔkayɛ gyima, ɛnee mgbavolɛ mɔɔ wɔ sua nu ɛkɛ ne la amuala ɛvinde. 12Na Pɔtefaa aye ne hɔzɔle Dwosefi tɛladeɛ ne anu na ɔzele ye kɛ, “Ɛ nee me ɛla.” Na Dwosefi kpolole ye tɛladeɛ ne manle ye na ɔnriandile ɔvile sua nu ɛkɛ. 13Mɔɔ Pɔtefaa aye ne nwunle kɛ Dwosefi ɛkpolo ye tɛladeɛ ne ɛmaa ye, na yenriandi yevi sua nu ɛkɛ ne la, 14ɔdeanle nu ɔvɛlɛle mgbavolɛ mɔɔ wɔ ɔdaye ye sua nu ɛkɛ ne la na ɔzele bɛ kɛ, “Bɛnlea, Pɔtefaa ɛhɔdwu Hibulunli bie ɛra ɛke kɛ ɔrayɛ mgbane mgbane ɔhile sonla. Ɔrale me ɛkɛ ne kɛ ɔbadoa me ɔ nee me ala, yɛɛ mendeɛdeanle nuhua a. 15Na mɔɔ ɔdele kɛ melɛteɛdea nuhua mgbole mgbole la yɛɛ ɔvi sua ye anu ɔnriandile, ɔgyakyile ye tɛladeɛ ye ɛke.”
16Ɔvale Dwosefi tɛladeɛ ne ɔguale ɔ nwo ɛkɛ ne toonwo ɔ hu rale sua nu, 17na ɔhanle edwɛkɛ ko ne ala ɔhilele ye. Ɔzele ye kɛ, “Wɔ Hibulunli sonvolɛ ne, mɔɔ wɔhɔva ye wɔra la, rale kɛ ɔbado me bɔna. 18Na mɔɔ mendeɛdeanle nuhua mgbole mgbole la, ɔvi sua nu ɛke ɔnriandile. Ɔnriandile ɔgyakyile ye tɛladeɛ ne ɛke.”
19Mɔɔ Dwosefi amenle ne dele edwɛkɛ ne mɔɔ ɔ ye hanle kɛ, “Ɛbɛla mɔɔ wɔ sonvolɛ ne ɛrabɔ ɛhile me la ɛne.” la, ɔvale ɛya kpole. 20Na Pɔtefaa hyele Dwosefi dole efiade ɛleka mɔɔ belemgbunli ne pilizama wɔ la, na ɔhale ɛkɛ ne. 21#Gyi 7.9 Na ɛnee Ɛdɛnkɛma nee Dwosefi lua. Ɔhilele ɛhulolɛ dɔɔnwo wɔ ɔ nwo, na ɔmanle ɔzɔle nrenya ne mɔɔ nea pilizama ne mɔ anwo zo la anye. 22Nrenya ne vale debie biala mɔɔ wɔ efiade ɛkɛ ne nee pilizama ne mɔ amuala wulale Dwosefi asa anu. Debie biala mɔɔ bɛyɛle wɔ ɛkɛ ne la, Dwosefi a nleanle manle bɛyɛle a. 23Yeanvane nrenya ne mɔɔ nea pilizama anwo zo la anwo kɛ ɔkɛnlea debie mɔɔ bɛvale bɛwulale Dwosefi asa anu la, ɔboalekɛ ɛnee Ɛdɛnkɛma nee ye a lua a, yɛɛ debie biala mɔɔ ɔyɛle la, Ɛdɛnkɛma manle ɔyɛle kpalɛ.
Currently Selected:
Mɔl 39: NB
Highlight
Share
Copy
Want to have your highlights saved across all your devices? Sign up or sign in
Bible in Nzema © Bible Society of Ghana, 1998.
