Mɔl 34
34
Bɛkye Daena mialera nu bɛava ye
1Kenle ko Daena, Gyekɔbo nee ɔ ye Liya ara raalɛ ne, hɔle sua zo kɛ ɔkakpɔlɔkpɔla mraalɛ mɔɔ wɔ ɛkɛ ne la. 2Haevaenli Heemɔ, mɔɔ di belemgbunli wɔ sua ne azo la ara Hyikɛm nwunle ye la, ɔhyele ye mialera nu ɔ nee ye lale, ɔguale ɔ nyunlu aze. 3Na Hyikɛm ahonle vale Gyekɔbo ara Daena. Ɔhulole ye na ɔdendɛle bɛtɛɛ ɔhilele ye. 4Yemɔti Hyikɛm hanle hilele ɔ ze Heemɔ kɛ, “Gya bɛlɛra ɛhye maa me.”
5Gyekɔbo dele kɛ bɛgua ɔ ra raalɛ ne anyunlu aze, noko kɛmɔ ɛnee ɔ mra mrenya ne mɔ wɔ namule nu ɛlɛnea ye nlankɛ ne mɔ la ati, yeanga ɛhwee toonwo ɔhɔkpulale mekɛ mɔɔ bɛrale la. 6Hyikɛm ɔ ze Heemɔ rale Gyekɔbo anwo ɛkɛ ne kɛ ɔ nee ye kadendɛ. 7Gyekɔbo amra mrenya ne mɔ dele edwɛkɛ ne la, bɛziale bɛrale sua zo. Bɛvale ɛya na bɛyɛle kɛ bɛnrɛkponle, ɔboalekɛ yebɔ munzule wɔ Yizilayɛ kɛ ɔ nee Gyekɔbo ara raalɛ ɛla a. Ɔnle kɛ debie zɛhae si Yizilayɛ maanle nu fee. 8Noko Heemɔ nee bɛ dendɛle na ɔzele kɛ, “Me ra Hyikɛm ahonle ɛva bɛ ra raalɛ ne somaa. Mebodo bɛ, bɛva ye bɛmaa ɔgya. 9Bɛragya yɛ bie mɔ na bɛdabɛ noko bɛmaa yɛgya bɛ bie mɔ. 10Bɛ nee yɛ ɛdɛnla, na azɛlɛ ne ɛla ɛkɛ ne ɛmaa bɛ. Bɛdɛnla zolɛ na bɛli bɛ gua, bɛnyia agyadeɛ dɔɔnwo.”
11Hyikɛm ɔdaye ɔdendɛle ɔhilele Daena ɔ ze nee ɔ mediema mrenya ne mɔ kɛ, “Bɛmɛ bɛlie me bɛdo nu, na debie biala mɔɔ bɛkɛbiza me la, menwɔva menwɔmaa bɛ. 12Bɛva bɛlɛra ne bɛmaa mengya ye na debie biala mɔɔ agyalɛ ne ati bɛkɛbiza, nee ahyɛlɛdeɛ biala mɔɔ fɛta la, menwɔva menwɔmaa bɛ.”
13Kɛmɔ ɛnee Hyikɛm ɛgua bɛ diema raalɛ Daena anyunlu aze la ati, Gyekɔbo amra mrenya ne mɔ liele Hyikem nee ɔ ze Heemɔ ɛdwɛkɛ ne dole nu egyele zo. 14Bɛzele Hyikɛm nee ɔ ze Heemɔ kɛ, “Yɛnrɛhola yɛnrɛva yɛ diema raalɛ yɛnrɛmaa nrenya mɔɔ ɛtɛyɛle ye mrenyanu nzonlɛ la. Ɔle anyiemgba ɔmaa yɛ. 15Yemɔti saa bɛkɛyɛ kɛ yɛdayɛ la, na bɛ mrenya ne mɔ kɛyɛ bɛ mrenyanu nzonlɛ ɛdeɛ a, yemɔ yɛkɛkponle zolɛ. 16Yɛkɛkponle zolɛ yɛkɛmaa bɛkɛgya yɛ mra mraalɛ na yɛdayɛ noko yɛagya bɛ mra mraalɛ ne mɔ bie, na yɛ nee bɛ adɛnla yɛayɛ menli ko. 17Na saa bɛnrɛkponle, bɛnrɛyɛ bɛ mrenyanu nzonlɛ ɛdeɛ a, yɛbarava kakula raalɛ ne na yɛahɔ.”
18Mgbavolɛ ne mɔ edwɛkɛ ne zɔle Heemɔ nee ɔ ra Hyikɛm anye. 19Na Hyikɛm angyinla nwolɛ fee, ɔboalekɛ ɔ nye die Gyekɔbo ara raalɛ ne anwo. Hyikɛm le sonla mɔɔ bɛdi ye eni kpalɛ wɔ bɛ abusua ne anu a.
20Yemɔti Heemɔ nee ɔ ra Hyikɛm hɔle bɛ suakpole ne anuhɔlɛ kpole ne anloa ɛleka mɔɔ bɛyia la na ɔdendɛle ɔhilele mrenya mɔɔ wɔ suakpole ne azo la kɛ, 21“Menli ɛhye mɔ le agɔnwolɛma. Bɛmaa bɛ adenle bɛmaa bɛdɛnla azɛlɛ ye azo na bɛli bɛ gua, ɔluakɛ azɛlɛ ye le kpole maa bɛ. Bɛmaa yɛgya bɛ mra ne mɔ bie na bɛdabɛ noko bɛgya yɛ mra mraalɛ ne mɔ bie. 22Mɔɔ menli ɛhye mɔ kpondɛ na bɛadɛnla yɛ avinli bɛ nee yɛ ayɛ ko la a le kɛ, yɛ mrenya ne mɔ, ko biala kɛyɛ ye mrenyanu nzonlɛ, kɛmɔ bɛyɛ bɛ ɛdeɛ ne la. 23Yɛyɛ ye zɔhane a bɛ nlankɛ, bɛ agyadeɛ nee bɛ nyɛmoa ne mɔ kɔsɔɔti bayɛ yɛ ɛdeɛ. Bɛmaa yɛkponle zolɛ yɛmaa bɛ na bɛ nee yɛ ɛdɛnla.” 24Bɛdabɛ mɔɔ bɛhɔle anuhɔlɛ kpole ne anloa la amuala liele Heemɔ nee ɔ ra Hyikɛm edwɛkɛ ne dole nu. Na nrenya ko biala mɔɔ wɔ Hyikɛm, mɔɔ hɔle anuhɔlɛ kpole ne anloa la yɛle ye mrenyanu nzonlɛ.
25Ye kenle nsa ne azo mɔɔ ɛnee bɛ nganlɛ ne mɔ ɛlɛfofo bɛ la, Gyekɔbo amra ne mɔ anu nwiɔ, Semɛyɔn nee Livae, Daena amediema mrenya ne mɔ, vale bɛ dadeɛ na bɛhɔle bɛ nwo zo wɔ suakpole ne azo arɛlevilɛ nu, na bɛhunle mrenya mɔɔ wɔ sua ne azo la amuala. 26Bɛhunle Heemɔ nee ɔ ra Hyikɛm noko, na bɛvale Daena bɛvile Hyikɛm sua nu ɛkɛ ne bɛhɔle. 27Gyekɔbo amra mrenya mɔɔ hale la rale menli mɔɔ bɛhu bɛ la avinli, na bɛwuale suakpole ne azo debie biala, ɔboalekɛ bɛgua bɛ diema raalɛ ne anyunlu aze. 28Bɛvale bɛ nyɛmoa, bɛ nlankɛ, bɛ asoaso, yɛɛ debie biala mɔɔ wɔ suakpole ne azo, nee bɛ ɛya avule ne mɔ anu la amuala; 29bɛ anwonyia muala, bɛ mra ndetendete, bɛ mraalɛ, yɛɛ debie biala mɔɔ bɛ sa dɔle zolɛ wɔ bɛ azua nu la, bɛvale bɛ muala.
30Na Gyekɔbo zele Semɛyɔn nee Livae kɛ, “Bɛhwe dwɛwɔlɛ bɛmaa me, bɛmaa meyɛ Pɛlɛzema nee Keenama mɔɔ wɔ azɛlɛ ye azo la kpɔvolɛ. Yɛ nwo anzo, na saa bɛboɔboa bɛ nloa na bɛfa konle bɛtoa me a, bɛbabɔ medame nee me sua nu amra abo zo bɔkɔɔ.”
31Na mgbavolɛ ne mɔ zele kɛ, “Ɛnee yemɔti yɛmaa ɔyɛ yɛ diema raalɛ ye kɛ ɔle tuutuunli ɔ?”
Currently Selected:
Mɔl 34: NB
Highlight
Share
Copy
Want to have your highlights saved across all your devices? Sign up or sign in
Bible in Nzema © Bible Society of Ghana, 1998.
