Mɔl 29
29
Gyekɔbo ɛdwu Leeban sua nu
1Akee Gyekɔbo zɔle ye adendulɛ ne azo na ɔhɔdwule menli mɔɔ wɔ aduduleɛ la azɛlɛ zo. 2Ɔdole ɔ nye la, ɔnwunle bula bie wɔ ɛya bie anu na mboane ekpunli nsa gugua nwolɛ, ɔluakɛ bula zɔhane azo yɛɛ bɛmaa bɛ nzule a. Bolɛ ne mɔɔ heda bula ne azo la le kpole, 3yemɔti mboane ne mɔ bagua ɛkɛ, na saa bɛ nloa wie yia na mboaneneavolɛma ne mɔ ba a, bɛ muala bɛabɔ nu bɛahundo bolɛ ne na bɛamaa mboane ne mɔ nzule. Bɛwie a ɛnee eza bɛhundo bolɛ ne bɛheda bula ne azo.
4Gyekɔbo bizale bɛ kɛ, “Me mediema, nienwu a bɛvi a?”
Bɛbuale ye kɛ, “Yɛvi Hɛlan.”
5Gyekɔbo bizale bɛ kɛ, “Bɛze Neehɔ ara Leeban ɔ?”
Bɛbuale ye kɛ, “Yɛze ye.”
6Gyekɔbo bizale bɛ kɛ, “Ɔte kpɔkɛ ɔ?”
Bɛbuale ye kɛ, “Ɔte kpɔkɛ. Nea, ɔ ra raalɛ Relahyɛle a nee ye mboane ne mɔ ɛlɛba la.”
7Gyekɔbo zele kɛ, “Bɛnlea, ewia ne gyi zo ɛsesebɛ. Ɔtɛdwule mɔɔ bɛmaa nyɛmoa ne mɔ kuohua bɛ nloa ɛleka ko a. Bɛmaa mboane ne mɔ nzule na bɛva bɛ bɛhɔ adidi.”
8Bɛbuale kɛ, “Yɛngola yɛnyɛ ye zɔhane, kyesɛ mboane ekpunli ekpunli ne mɔ anloa yia kolaa na yeahundo bolɛ ne yeavi bula ne azo, na yɛamaa nyɛmoa ne mɔ nzule.”
9Mɔɔ ɔ nloa wɔ zolɛ ɔ nee mboaneneavolɛma ne mɔ ɛlɛtendɛ la, yɛɛ Relahyɛle nee ɔ ze mboane ne mɔ rale a, ɔluakɛ ɛnee ɔdaye a ɔnea bɛ a. 10Gyekɔbo nwunle ɔ nli adiema Leeban ara raalɛ Relahyɛle nee mboane ne mɔ ala la, ɔhɔle ɔhɔhundole bolɛ ne ɔyele ye wɔ bula ne azo na ɔmanle ɔ wuvuanyi ne mboane ne mɔ nzule. 11Akee Gyekɔbo vole Relahyɛle anvoka anwo na ɔdukuele nu ɔzunle. 12Na Gyekɔbo hanle hilele Relahyɛle kɛ ɔle ɔdaye Relahyɛle ɔ ze busuanli, na ɔ nli a le Relɛbɛka.
Na Relahyɛle nriandile hɔhanle edwɛkɛ ne hilele ɔ ze Leeban. 13Leeban dele ye awozoa ne nganeɛ la, ɔnriandile ɔrayiale ye, ɔyɛle ye atuu, ɔvole ɔ nvoka anwo, na ɔ nee ye rale sua nu. Gyekɔbo hanle edwɛkɛ biala hilele Leeban, 14na Leeban zele Gyekɔbo kɛ, “Amgba, ɛle me dehelɛ bɔkɔɔ!” Na ɔ nee ye dɛnlanle siane ko.
Gyekɔbo sonle Leeban agya Relahyɛle nee Liya
15Akee Leeban zele Gyekɔbo kɛ, “Me busuanli a le wɔ suzuamgba ɛdeɛ, noko ɔnle kɛ ɛyɛ gyima ɛmaa me mɔɔ mendua wɔ kakɛ a. Ka mɔɔ kenle ko ɛkɛlie la kile me.” 16Leeban lɛ ɔ mra mraalɛ nwiɔ. Bɛfɛlɛ kpanyinli ne Liya, yɛɛ bɛfɛlɛ ekyi ne Relahyɛle. 17Liya anye le monzomonzo, na Relahyɛle gyi zo sengɔɔnwo, yɛɛ ɔ nwo yɛ fɛ kpalɛ.
18Gyekɔbo kulo Relahyɛle, yemɔti ɔhanle kɛ, “Mesonle wɔ ɛvolɛ nsuu na meagya ɛ ra raalɛ ekyi ne, Relahyɛle.”
19Leeban buale kɛ, “Ɔle kpalɛ kɛ menwɔva ye menwɔmaa wɔ tɛla kɛ menwɔva ye menwɔmaa awie gyɛne la. Ɛ nee me ɛdɛnla.” 20Yemɔti Relahyɛle ati, Gyekɔbo zonlenle ɛvolɛ nsuu, noko mekɛ ne yɛle ɔ nye zo kenle kɛyɛ nsa bie, ɔluakɛ ɛnee ɔkulo Relahyɛle kpole kpalɛ.
21Akee Gyekɔbo zele Leeban kɛ, “Fa me ye ne maa me maa me nee ye ɛhɔla, ɔluakɛ me mekɛ ne ɛdwu.” 22Yemɔti Leeban dole ɔ sa vɛlɛle menli dɔɔnwo na ɔdole ɛkponle kpole bie wɔ ye awuke nu ɛkɛ. 23Noko nɔe ne ɔvale ɔ ra raalɛ Liya a ɔhɔmanle Gyekɔbo a, na Gyekɔbo nee ye lale. 24(Leeban vale ye sonvolɛ raalɛ Zelepa manle Liya kɛ ye sonvolɛ raalɛ ɔ.) 25Na aleɛ hyenle la, Gyekɔbo nwunle kɛ tɛ Relahyɛle ɔ, na Liya ɔ. Gyekɔbo bizale Leeban kɛ, “Na duzu edwɛkɛ a ɛ nee me ɛli la? Meanga kɛ mesonle wɔ meagya Relahyɛle ɔ? Duzu ati yɛɛ wɔbɛlɛbɛla me zɛhae ɛ?”
26Leeban buale ye kɛ, “Bɛnyɛ ye zɔhane wɔ yɛ maanle ye anu. Saa ralɛ raalɛ kpanyinli ne ɛtɛkɔle agyalɛ a, yɛnva kakula ne yɛmmaa agyalɛ. 27Kendɛ na ɛ nee ɛhye bɛwie bɛ dapɛne ko anyelielɛ ne, na nzinlii yɛanlea na saa ɛkɛzonle me ɛvolɛ nsuu bieko a, meava ɔdaye noko meamaa wɔ.”
28Gyekɔbo kponlenle zolɛ na ɔwiele ye dapɛne ko anyelielɛ ne. Akee Leeban vale ɔ ra raalɛ Relahyɛle manle Gyekɔbo gyale ye. 29(Leeban vale ye sonvolɛ raalɛ Belehaa manle Relahyɛle kɛ ye sonvolɛ raalɛ ɔ.) 30Yemɔti Gyekɔbo nee ɔdaye noko lale, na ɔhulole Relahyɛle dɔɔnwo ɔdɛlale Liya. Na Relahyɛle ati ɔzonlenle Leeban ɛvolɛ nsuu bieko.
Gyekɔbo amra mɔɔ ɔwole bɛ la
31Mɔɔ Ɛdɛnkɛma nwunle kɛ Gyekɔbo ɛngulo Liya la, ɔmanle ɔ ko lale ɛkɛ, na Relahyɛle yɛle mota. 32Liya nrenzɛle na ɔwole ralɛ nrenya, na ɔdonle ye Wulubɛn,#29.32 Wulubɛn: Ɔ bo a le “Nea, ralɛ nrenya. Nyamenle ɛnwu me amaneɛnwunlɛ.” 33Ɔnrenzɛle bieko na eza ɔwole ralɛ nrenya, na ɔzele kɛ, “Kɛmɔ Ɛdɛnkɛma ɛnwu kɛ bɛngulo me la ati yɛɛ yemaa me ralɛ nrenya ɛhye noko a;” na ɔdonle ye Semɛyɔn.#29.33 Semɛyɔn: Ɔ bo a le “Nyamenle ɛde.” 34Ɔnrenzɛle bieko na ɔwole ralɛ nrenya, na ɔzele kɛ, “Kɛkala ɛdeɛ, akee me hu nee me bayɛ ko, ɔboalekɛ mewo mrenya nsa memaa ye.” Yemɔti ɔdonle ye Livae.#29.34 Livae: Ɔ bo a le “Mrenya nsa.” (Mieza). 35Ɔnrenzɛle bieko na ɔwole ralɛ nrenya na ɔzele kɛ, “Kɛkala ɛdeɛ, mebaye Ɛdɛnkɛma ayɛlɛ.” Yemɔti ɔdonle ye Dwuda.#29.35 Dwuda: Ɔ bo a le “Ayɛlɛ.” (Mebaye Nyamenle ayɛlɛ.) Akee ye awolɛ tikale.
Currently Selected:
Mɔl 29: NB
Highlight
Share
Copy
Want to have your highlights saved across all your devices? Sign up or sign in
Bible in Nzema © Bible Society of Ghana, 1998.
