Mɔl 17
17
Ngyekyeleɛ ne nzonlɛ a le mrenyanu nzonlɛyɛlɛ
1Mekɛ mɔɔ Ebilam lile ɛvolɛ abulahɔnla nee ngɔnla la, Ɛdɛnkɛma yele ɔ nwo hilele ye na ɔzele ye kɛ, “Medame a mele Nyamenle Bedevinli ne a; di me mɛla zo na mmamaa ɛ nwo nyia ngehanleɛ biala. 2Me nee wɔ bayɛ ngyekyeleɛ, yɛɛ mebamaa ɛ bo zo amra azo dɔɔnwo kpalɛ.” 3Na Ebilam dule dɔle ɔ nyunlu mutule nu, na Nyamenle zele ye kɛ, 4“Me nee wɔ ɛyɛ ngyekyeleɛ ne; ɛbayɛ maanle maanle dɔɔnwo bɛ ze. 5Bɛnrɛvɛlɛ wɔ Ebilam bieko, bɛbavɛlɛ wɔ Ebileham,#17.5 Ebileham: Ɔ bo a le “Maanle maanle bɛ ze.” ɔluakɛ meyɛ wɔ maanle maanle dɔɔnwo bɛ ze. 6Mebamaa wɔanyia ɛ bo zo amra dɔɔnwo. Ɛ bo zo amra bazo somaa ayɛ maanle maanle, na bie mɔ ayɛ arelemgbunli.
7 #
Luk 1.55
“Me nee wɔ nee ɛ bo zo amra bayɛ ngyekyeleɛ mɔɔ baha awolɛndoazo ne mɔ amuala la, na yeayɛ ngyekyeleɛ mɔɔ bɛntulu ye ɛlɛ a. Mebayɛ wɔ Nyamenle na meayɛ ɛ bo zo amra noko Nyamenle. 8#Gyi 7.5 Na mebava azɛlɛ ne mɔɔ ɛlɛkpɔsakpɔsa zolɛ la meamaa wɔ nee ɛ bo zo amra. Bɛbava Keena azɛlɛ ne kɔsɔɔti bɛayɛ bɛ ɛdeɛ, na mebayɛ bɛ Nyamenle.”
9Nyamenle zele Ebileham kɛ, “Wɔmɔ, ɔwɔ kɛ ɛdawɔ nee ɛ bo zo amra kɔsɔɔti di me ngyekyeleɛ ne azo. 10#Gyi 7.8 Ngyekyeleɛ mɔɔ wɔ me nee ɛdawɔ nee ɛ bo zo amra yɛ avinli, mɔɔ ɔwɔ kɛ bɛdi zolɛ la ɛne: Ɔwɔ kɛ bɛyɛ nrenya biala mɔɔ wɔ bɛ avinli la mrenyanu nzonlɛ. 11-13Ɔvi ɛnɛ mɔɔ kɔ la, ɔwɔ kɛ bɛyɛ nrenya biala mɔɔ bɛkɛwo ye na ɔkɛli kenle mɔtwɛ la mrenyanu nzonlɛ. Saa bɛwo ye wɔ wɔ sua nu o, kanranli mɔɔ wɔva wɔ ezukoa wɔdɔ wɔvi ɛyɛvolɛ bie ɛkɛ ne la o, kanranli mɔɔ bɛwo ye wɔ wɔ sua nu ɛkɛ ne la o, ɔwɔ kɛ bɛyɛ ye mrenyanu nzonlɛ. Ɛhye a bahile kɛ bɛlɛdi me ngyekyeleɛ ne azo a. Ɔwɔ kɛ bɛyɛ bɛ mrenyanu nzonlɛ wɔ awolɛndoazo muala anu, amaa me ngyekyeleɛ ye nzonlɛ aha bɛ nwonane nu yeayɛ ngyekyeleɛ mɔɔ bɛntulu ye ɛlɛ a. 14Nrenya biala mɔɔ anyɛ ye mrenyanu nzonlɛ la ɛtulu me ngyekyeleɛ ne; ɔwɔ kɛ bɛye ye bɛfi me menli ne avinli.”
15Nyamenle zele Ebileham kɛ, “Ɛ ye Sɛleeyae noko, mmafɛlɛ ye Sɛleeyae bieko. Ye duma a le Sɛla. 16Mebayila ye, na yeayɛ maanle maanle bɛ nli. Ɔ bo zo amra bie mɔ bayɛ arelemgbunli.”
17Ebileham dule dɔle mutule nu zelele na ɔbizale ɔ nwo kɛ, “Asoo nrenya mɔɔ ɛli ɛvolɛ ɛya la bahola awo ralɛ? Asoo Sɛla mɔɔ ɛli ɛvolɛ abulahɔnla la bawo ralɛ?” 18Na ɔhanle ɔhilele Nyamenle kɛ, “Anrɛɛ ɛmanle Yehyemeeyɛle zɔle ɛ nye.”
19Nyamenle zele ye kɛ, “Kyɛkyɛ, ɛ ye Sɛla bawo ralɛ nrenya na ɛbavɛlɛ ye Ayezeke.#17.19 Ayezeke: Ɔ bo a le “Ɔsele.” Mebali me ngyekyeleɛ ne azo meamaa ye nee ɔ bo zo amra mɔɔ bɛntulu ye ɛlɛ a. 20Yehyemeeyɛle ɛdeɛ, mede mɔɔ wɔha la. Nea, meyila ye na mebamaa ɔ sa zo ada, bɛ nwo azo dɔɔnwo. Ɔbayɛ arelemgbunli bulu nee nwiɔ bɛ ze, na mebamaa yeayɛ maanle kpole kpalɛ. 21Noko Ayezeke mɔɔ Sɛla bawo ye ɛvolɛ bieko kabezɛ la, yemɔ yɛɛ me nee ye bakyekye me ngyekyeleɛ ne a.” 22Nyamenle wiele tendɛ la, ɔgyakyile Ebileham ɛkɛ ɔhɔle anwuma.
23Akee, Ebileham vale ɔ ra Yehyemeeyɛle nee ahanra mrenya mɔɔ bɛwole bɛ ye sua nu ɛkɛ, nee mɔɔ ɔvale ye ezukoa ɔdɔle la amuala na ɔyɛle bɛ mrenyanu nzonlɛ, kɛmɔ Nyamenle hanle hilele ye la. 24Mɔɔ bɛyɛ Ebileham mrenyanu nzonlɛ la, ɛnee yeli ɛvolɛ abulahɔnla nee ngɔnla. 25Ɛnee Yehyemeeyɛle ɛli ɛvolɛ bulu nee nsa yɛɛ bɛyɛle ye mrenyanu nzonlɛ a. 26Kenle ko ne ala a bɛyɛle Ebileham nee ɔ ra Yehyemeeyɛle mrenyanu nzonlɛ a. 27Kenle ko ne ala, mrenya mɔɔ wɔ sua nu ɛkɛ ne la, bɛdabɛ mɔɔ bɛwole bɛ ɛkɛ nee bɛdabɛ mɔɔ bɛdɔle bɛ ahanra la, bɛyɛle bɛ kɔsɔɔti mrenyanu nzonlɛ.
Currently Selected:
Mɔl 17: NB
Highlight
Share
Copy
Want to have your highlights saved across all your devices? Sign up or sign in
Bible in Nzema © Bible Society of Ghana, 1998.
