Mɔl 11
11
Babelɔn Tawa ne
1Alumua ne ɛnee ewiade amra amuala ka aneɛ ko, yɛɛ bɛ ɛdendɛlɛ le ko. 2Na bɛvi aduduleɛ bɛdule bɛ bo la, bɛradwule Babelonia azɛlɛ sɛsɛ bie azo na bɛdɛnlanle ɛkɛ. 3Nzinlii bɛhanle bɛhilele bɛ nwo ngoko kɛ, “Bɛrɛla! Bɛmaa yɛva ɛva yɛgua belekese, na yɛdo yɛmaa bɛyɛ ketekete.” Amgba bɛguale ɛva belekese bɛdonle bɛmanle bɛyɛle ketekete na bɛvale bɛmɛ bɛyɛle awolɛ, yɛɛ bɛnyianle bilewu mɔɔ bɛfa bɛasosɔ ayia ne mɔ azo la. 4Akee bɛzele kɛ, “Bɛmaa yɛkyekye suakpole ko na yɛzi tawa tendendenlenle ko mɔɔ kɔkpula Nyamenle ne ako abo nehane la, amaa yɛalie duma na yeamkponde azɛlɛ ye azo.”
5Ɛdɛnkɛma dwule aze rakpɔlale suakpole ne mɔɔ bɛkyekye nee tawa tendendenlenle ne mɔɔ sonla ɛzi la. 6Na ɔhanle kɛ, “Bɛnlea, kɛkala, bɛle menli ko, yɛɛ bɛ aneɛ le ko; ɛhye le mɔɔ kenle bie bɛbayɛ la mɔlebɛbo. Ɔnrɛhyɛ, bɛbahola bɛayɛ debie biala mɔɔ bɛkɛze kɛ bɛyɛ la. 7Bɛmaa yɛhɔkpɔtɔ bɛ ɛdendɛlɛ ne, amaa bɛande bɛ nwo aneɛ bieko.” 8Yemɔti Ɛdɛnkɛma manle bɛkpondenle bɛhɔle azɛlɛ ye azo ɛleka biala, na bɛgyakyile suakpole ne ɛkyekyelɛ. 9Bɛvɛlɛle suakpole ne Babelɔn, ɔboalekɛ ɛkɛ ne a Ɛdɛnkɛma manle menli ne aneɛ yɛle ngakyile ngakyile na ɔmanle bɛkpondenle azɛlɛ ye azo amuala a.
Hyɛm abo zo amra
(1 Edk 1.24-27)
10Hyɛm abo zo amra ɛne. Azuyilɛ ne anzi ɛvolɛ nwiɔ, mɔɔ ɛnee Hyɛm ɛli ɛvolɛ ɛya ko la, ɔwole ralɛ nrenya na ɔdonle ye Apakyehyade. 11Ɛhye anzi, Hyɛm dɛnlanle aze ɛvolɛ ɛya nnu na ɔwole mralɛ mrenya nee mraalɛ.
12Apakyehyade lile ɛvolɛ abulasa nee nnu la, ɔwole ɔ ra nrenya Hyila. 13Ɛhye anzi, Apakyehyade dɛnlanle aze ɛvolɛ ɛya nna ɛvolɛ nsa, na ɔwole mralɛ mrenya nee mraalɛ.
14Hyila lile ɛvolɛ abulasa la, ɔwole ɔ ra nrenya Yibɛ. 15Ɛhye anzi, Hyila dɛnlanle aze ɛvolɛ ɛya nna ɛvolɛ nsa, na ɔwole mralɛ mrenya nee mraalɛ.
16Yibɛ lile ɛvolɛ abulasa nee nna la, ɔwole ɔ ra nrenya Pilɛge. 17Ɛhye anzi, Yibɛ dɛnlanle aze ɛvolɛ ɛya nna abulasa, na ɔwole mralɛ mrenya nee mraalɛ.
18Pilɛge lile ɛvolɛ abulasa la, ɔwole ɔ ra nrenya Riliwu. 19Ɛhye anzi, Pilɛge dɛnlanle aze ɛvolɛ ɛya nwiɔ ɛvolɛ ngɔnla, na ɔwole mralɛ mrenya nee mraalɛ.
20Riliwu lile ɛvolɛ abulasa nee nwiɔ la, ɔwole ɔ ra nrenya Silɛge. 21Ɛhye anzi, Riliwu dɛnlanle aze ɛvolɛ ɛya nwiɔ ɛvolɛ nsuu, na ɔwole mralɛ mrenya nee mraalɛ.
22Silɛge lile ɛvolɛ abulasa la, ɔwole ɔ ra nrenya Neehɔ. 23Ɛhye anzi, Silɛge dɛnlanle aze ɛvolɛ ɛya nwiɔ, na ɔwole mralɛ mrenya nee mraalɛ.
24Neehɔ lile ɛvolɛ abulanwiɔ nee ngɔnla la, ɔwole ɔ ra nrenya Tilaa. 25Ɛhye anzi, Neehɔ dɛnlanle aze ɛvolɛ ɛya ko ɛvolɛ bulu nee ngɔnla, na ɔwole mralɛ mrenya nee mraalɛ.
26Tilaa lile ɛvolɛ abulasuu kolaa na yeawo ɔ mra mrenya Ebilam, Neehɔ, yɛɛ Hɛlan.
Tilaa abo zo amra
27Tilaa, mɔɔ wole Ebilam, Neehɔ, yɛɛ Hɛlan la abo zo amra ɛne: Hɛlan wole Lɔɔto. 28Hɛlan wule kolaa na ɔ ze Tilaa awu. Ɔwule ɔdaye ye maanle nu, suakpole ne mɔɔ bɛfɛlɛ ye Yule mɔɔ wɔ Babelonia maanle nu la azo. 29Ebilam gyale Sɛleeyae, yɛɛ Neehɔ gyale Melekaa, mɔɔ ɔ ze a le Hɛlan la. Hɛlan a wole Yesakaa a. 30Sɛleeyae yɛle mota; yeanwo ralɛ.
31Tilaa vale ɔ ra nrenya Ebilam, ye anlɔnra Lɔɔto, mɔɔ ɔ ze a le Hɛlan la yɛɛ ɔ ra Ebilam aye Sɛleeyae na bɛvile bɛ sua zo Yule, mɔɔ wɔ Babelonia maanle nu la kɛ bɛkɔ Keena azɛlɛ zo. Noko mɔɔ bɛhɔdwule Hɛlan la, bɛhale ɛkɛ ne bɛdɛnlanle. 32Ɛkɛ ne a Tilaa wule a; ɔlile ɛvolɛ ɛya nwiɔ ɛvolɛ nnu.
Currently Selected:
Mɔl 11: NB
Highlight
Share
Copy
Want to have your highlights saved across all your devices? Sign up or sign in
Bible in Nzema © Bible Society of Ghana, 1998.
