Gyi 4
4
Pita nee Dwɔn gyi mgbanyima ayia ne anyunlu
1Mɔɔ Pita nee Dwɔn anloa wɔ zolɛ bɛlɛtendɛ bɛahile menli ne mɔ la, sɛlɛvolɛma bie nee Ɛzonlenlɛ Sua ne neavolɛ kpanyinli ne nee Sadusiima fane ne anu amra bie mɔ ravindele bɛ nwo zo. 2Bɛvale ɛya kpole, ɔluakɛ ɛnee ɛzoanvolɛma ne ɛlɛkilehile menli ne mɔ kɛ Gyisɛse ɛdwazo ɛvi ewule nu, na ɔle sɛkɛlɛneɛ mɔɔ kile kɛ mɔwuamra badwazo ara ngoane nu bieko a. 3Ɛhye ati bɛhyele bɛ bɛhɔguale efiade kɛ aleɛ kye a bɛ nee bɛ kɛli, ɔluakɛ ɛnee aleɛ ɛdwo. 4Na bɛdabɛ mɔɔ bɛdele edwɛkɛ ne la anu dɔɔnwo liele lile na bɛkɛyɛ mrenya apenle nnu.
5Aleɛ hyenle la Dwuu mgbanyima ne nee asɔne ne anu adile adile ne mɔ nee mɛla kilehilevolɛma ne yiale Gyɛlusalɛm. 6Bɛdabɛ mɔɔ ɛnee bɛwɔ ɛkɛ ne bie la a le Sɛlɛvolɛ Kpanyinli Anase nee Kayafase, Dwɔn, Alɛzanda, yɛɛ bɛdabɛ mɔɔ bɛvi Sɛlɛvolɛ Kpanyinli ne abusua nu la. 7Bɛmanle ɛzoanvolɛma nwiɔ ne ragyinlanle bɛ nyunlu ɛkɛ ne na bɛbizale bɛ kɛ, “Kɛ bɛzile bɛyɛle nrenya ye ayile ɛ? Tumi boni azo anzɛɛ duma boni anu a bɛluale bɛyɛle zɛhae gyima a?”
8Sunsum Nwuanzanwuanza ne vale Pita nyinle, na ɔbuale bɛ kɛ, “Nana mɔ nee egya mɔ, 9saa ɛnɛ kenle ye bɛlɛbiza yɛ kpalɛ mɔɔ yɛyɛ yɛmaa nrenya abubura ye nee kɛ yɛzile yɛyɛle ye ayile la a, 10ɛnee bɛdie bɛmaa ɔdo Yizilayɛma kɔsɔɔti kɛ, ɔlua Gyisɛse Kelaese mɔɔ vi Nazalɛte, mɔɔ bɛmɛ bɛbɔle ye meanubaka nu bɛhunle ye, na Nyamenle dwazole ye vile ewule nu la duma nu a ɛnɛ nrenya ɛhye gyi bɛ nyunlu ɛke kɛ yede kpɔkɛ bɔkɔɔ a. 11#Edw 118.22 Gyisɛse a le mɔɔ Nyamenle Edwɛkɛ ne ka ye ɔ nwo kɛ,
‘Bolɛ ne mɔɔ bɛmɛ suasivoma bɛkpole la
ɛrayɛ bolɛ mɔɔ anwo hyia kpole kpalɛ
kɛ sua mgbɛnezo sika la.’
12Ɔ nwo zo yɛɛ yɛlua a yɛkɛnyia ngoane a, ɔluakɛ awie bieko ɛnle aleɛabo mɔɔ Nyamenle ɛva ye duma ɛmaa mɔɔ yɛdua ɔ nwo zo a yɛkɛnyia ngoane a.”
13Ɔyɛle ayiama ne azibɛnwo kɛ Pita nee Dwɔn ɛnyia akɛnrasesebɛ mɔɔ le zɛhae a, ɔluakɛ bɛze kɛ bɛle menli mɔɔ ɛnze nwoma a, na bɛliele bɛdole nu kɛ bɛ nee Gyisɛse a anrɛɛ lua a. 14Eza noko bɛnnwu mɔɔ bɛka a, ɔluakɛ nrenya ne mɔɔ bɛyɛle ye ayile la gyi bɛ nwo ɛkɛ. 15Ɛhye ati bɛvale bɛ bɛziele ahane ekyii, na bɛbɔle ɔ bo kɛ bɛdwenledwenle nwolɛ. 16Bɛbizale bɛ nwo kɛ, “Menli ɛhye mɔ kɛ yɛyɛ bɛ ɛ? Awie biala mɔɔ de Gyɛlusalɛm ɛke la ze kɛ bɛmɛ a bɛyɛ nwanwane gyima mɔɔ le zɛhae a, yɛɛ yɛngola yɛnga kɛ ɔnle zɔhane. 17Na amaa edwɛkɛ ne andende la bɛmaa yɛdua bɛ kɛ bɛmmabɔ Gyisɛse duma bɛka edwɛkɛ bɛkile awie biala bieko.”
18Yemɔti bɛvɛlɛle bɛ na bɛduale bɛ kɛ bɛmmatendɛ menli nu anzɛɛ bɛmmabɔ Gyisɛse duma bɛkilehile menli. 19Na Pita nee Dwɔn buale bɛ kɛ, “Saa ɔle kpalɛ wɔ Nyamenle anyunlu kɛ yɛkɛdie bɛmɛ na yɛkɛgyakyi Nyamenle a ɛnee bɛdabɛ bɛbua; 20na yɛmɛ, mɔɔ yɛde nee mɔɔ yɛnwu ye la, yɛnrɛhola yɛnrɛgyakyi ye ɛhanlɛ!” 21Ayiama ne bɔle bɛ kɔkɔ ɛsesebɛ na bɛgyakyile bɛ kɛ bɛhɔ, ɔluakɛ bɛnlɛ edwɛkɛ kpaziwɔkɛ biala mɔɔ bɛgyinla zolɛ bɛtwe bɛ nzo a ɔyɛ boɛ a, yɛɛ eza menli ne amuala ɛlɛyeyɛ Nyamenle wɔ mɔɔ ɛzi la anwo. 22Nrenya ne mɔɔ ɔlua ɔ nwo zo bɛyɛle nwanwane gyima kpole zɛhae la ɛnee ɛli ɛvolɛ mɔɔ bo abulanla.
Diedima ne sɛlɛ akɛnrasesebɛ avi Nyamenle ɛkɛ
23Mɔɔ bɛgyakyile bɛ la, Pita nee Dwɔn ziale hɔle bɛ gɔnwo mɔ anwo ɛkɛ na bɛhanle mɔɔ sɛlɛvolɛ mgbanyinli nee maanle mgbanyinli ne mɔ hanle la amuala bɛhilele bɛ. 24#Ade 20.11; Nih 9.6; Edw 146.6 Bɛdele edwɛkɛ ne la, bɛ muala bɛbɔle nu bɛzɛlɛle, “O Tumivolɛ Awulae mɔɔ bɔle anwuma nee azɛlɛ, nyevile nee mɔɔ wɔ nu la amuala, 25#Edw 2.1-2 ɛluale wɔ Sunsum Nwuanzanwuanza ne anwo zo ɛmanle yɛ nlenya Devidi, wɔ akɛlɛ ne dendɛle zele kɛ,
‘Duzu ati a maanle maanle ɛva ɛya kpole zɛhae a
na menli dwenle adwenle ɛtane zɛhae ɛ?
26Azɛlɛ ye azo arelemgbunli ɛboɔboa bɛ nloa,
maanle mgbanyinli ɛva adwenle ko
na bɛtia Nyamenle nee ye Mɛzaya ne.’
27 #
Mat 27.1-2; Mak 15.1; Luk 23.1,7-11 Hɛlɔdo nee Pɔnteɛse Paelɛte, nee bɛdabɛ mɔɔ bɛnle Dwuuma la, nee menli mɔɔ wɔ Yizilayɛ la amuala yiale nu wɔ suakpole ɛhye azo na bɛvale adwenle bɛtiale wɔ Sonvolɛ Nwuanzanwuanza Gyisɛse mɔɔ wɔyɛ ye Mɛzaya la. 28Bɛyiale nu bɛvale adwenle bɛyɛle debie biala, kɛmɔ ɛdawɔ wɔ tumi ɛhulolɛ ngyehyɛlɛ ne de la. 29Na Awulae, akee nea kɛ bɛlɛsi bɛanwunlonwunla yɛ a. Maa yɛ, wɔ ɛzoanvolɛma, akɛnrasesebɛ maa yɛhola yɛha wɔ Edwɛkpa ne. 30Kile wɔ tumi wɔ ayileyɛlɛ nu, na boa maa yɛlua wɔ Sonvolɛ Nwuanzanwuanza Gyisɛse duma nu yɛyɛ nwanwane ninyɛne.”
31Mɔɔ bɛwiele nzɛlɛlɛ ne yɛ la, ɛleka mɔɔ bɛyiale nu la kpusule. Na Sunsum Nwuanzanwuanza ne rawolole bɛ na bɛnyianle akɛnrasesebɛ kɛ akee bɛka Nyamenle edwɛkɛ ne kpalɛ.
Diedima ne kyɛ bɛ nwo ninyɛne
32 #
Gyi 2.44-45
Diedima ne amuala lile ahua wɔ ahonle nee adwenle nu. Bɛ nuhua biala anva ye debie biala ambɔ ye ɛbolɛ na bɛ nee bɛ gɔnwo mɔ hyɛle debie biala mɔɔ ko lɛ ye la. 33Na ɛzoanvolɛma ne vale tumi kpole lile Awulae Gyisɛse ewudwazo ne anwo daselɛ, na Nyamenle lole bɛ nyilalɛ dɔɔnwo. 34Bɛ nuhua biala angyia, ɔluakɛ bɛdabɛ mɔɔ bɛlɛ ninyɛne mɔɔ le kɛ azɛlɛ anzɛɛ azua la dɔnedɔnenle bɛ, bɛvale ezukoa mɔɔ bɛnyianle ye wɔ nu la 35bɛrɛlɛle ɛzoanvolɛma ne na bɛhyɛle bɛmanle awie biala nyianle bie, kɛmɔ bɛ ɛhyianlɛ ngakyile ne mɔ de la.
36Zɔhane ala yɛɛ Dwosefi ɔdaye noko ɔyɛle a. Nrenya ɛhye boka Livae abusua ne anwo. Bɛwole ye wɔ bɔra ne mɔɔ bɛfɛlɛ ye Saepelɛse la azo na ɛzoanvolɛma ne donle ye Baanabase. (Wɔ Hibulu aneɛ ne anu a duma ne abo a le “Sonla mɔɔ maa akɛnrasesebɛ la.”) 37Dwosefi hɔdɔnenle ye azɛlɛ mɔɔ ɔlɛ la na ɔvale ezukoa mɔɔ ɔnyianle ye wɔ nu la amuala ɔrɛlɛle ɛzoanvolɛma ne.
Currently Selected:
Gyi 4: NB
Highlight
Share
Copy
Want to have your highlights saved across all your devices? Sign up or sign in
Bible in Nzema © Bible Society of Ghana, 1998.
