Gyi 17

Pɔɔlo nee Saelase wɔ Tɛsalonaeka

1Pɔɔlo nee Saelase kpɔsale hɔle Amfepɔlese nee Apɔlonea na bɛrale Tɛsalonaeka. Dwuuma lɛ nyianu sua wɔ ɛkɛ. 2Kɛmɔ Pɔɔlo yɛ ye ala la, ɔhɔle nyianu sua ne anu na ɔ nee bɛ lile Nyamenle Edwɛkɛ ne anwo adwelie Ɛnwomenlelielɛ Kenle fane nsa. 3Ɔhilehilele nu ɔmanle bɛnwunle kɛ ɔwɔ kɛ Mɛzaya ne nwu amaneɛ na bɛdwazo ye bɛfi ewule nu, na ɔvale ɔzɔle zolɛ kɛ, “Gyisɛse ɛhye mɔɔ melɛka ɔ nwo edwɛkɛ meahile bɛ la, yemɔ a le Mɛzaya ne.” 4Bɛ nuhua bie mɔ liele lile na bɛhakyile bɛdoale Pɔɔlo nee Saelase; zɔhane ala yɛɛ Gilikima mɔɔ sonle Nyamenle nee mraalɛ mgbanyinli dɔɔnwo ne ala yɛle a.

5Ɛhye anwo akpule hunle Dwuuma ne mɔ. Yemɔti bɛsesale kpamgbanvolɛma bie bɛboɔboale bɛ nloa. Bɛmanle bɛdole nzaka wɔ suakpole ne azo toonwo bɛrale Gyeesen sua nu ɛkɛ kɛ bɛbakpondɛ Pɔɔlo nee Saelase bɛahwe bɛ bɛavinde bagua nu. 6Bɛannwu bɛ la, bɛhwenlenle Gyeesen nee mediema ne bie mɔ bɛvale bɛ bɛhɔmanle mgbanyima ne mɔ kɛ, “Menli ɛhye mɔ mɔɔ ɛbutu ewiade amuala anye aze la ɛra yɛ sua ye azo noko, 7na Gyeesen ɛlie bɛ azie. Bɛ muala bɛlɛbulu Maanle Maanle belemgbunli ne mɛla zo, na bɛkile kɛ belemgbunli bieko eza wɔ ɛkɛ, bɛfɛlɛ ye Gyisɛse.” 8Bɛvale edwɛkɛ ɛhye bɛmanle menli ne nyakanle bɛmanle ɔhanle mgbanyima ne mɔ noko. 9Na nzinlii mgbanyima ne mɔ manle Gyeesen nee mediema ne mɔ duale ezukoa lile bɛ nwo agyinlanu, na bɛgyakyile bɛ bɛmanle bɛhɔle.

Pɔɔlo nee Saelase wɔ Bɛlia

10Mɔɔ maanle nu muanle la, mediema ne mɔ manle Pɔɔlo nee Saelase hɔle Bɛlia. Bɛhɔdwule la, bɛhɔle Dwuuma nyianu sua ne anu. 11Dwuuma mɔɔ wɔ ɛkɛ ne la adwenle nu ɛbuke ɛdɛla bɛdabɛ mɔɔ bɛwɔ Tɛsalonaeka la. Zɔhane ati bɛliele Edwɛkpa ne na dahuu bɛnleɛnleanle Nyamenle Edwɛkɛ ne anu kpalɛ kɛ saa mɔɔ Pɔɔlo ɛlɛka la le nɔhalɛ a. 12Bɛ dɔɔnwo ne ala liele lile, yɛɛ Giliki mraalɛ nee mrenya dɔɔnwo mɔɔ lɛ duma la noko liele lile. 13Na mɔɔ Dwuuma mɔɔ wɔ Tɛsalonaeka la dele kɛ Pɔɔlo ɛhɔha Nyamenle edwɛkɛ ne wɔ Bɛlia la, bɛrale ɛkɛ ne na bɛrafutule menli ne mɔ ahonle. 14Na ndɛndɛ ne ala mediema ne mɔ manle Pɔɔlo adenle bɛmanle ɔhɔle; na Saelase nee Temɔte hale Bɛlia. 15Menli mɔɔ hɔle Pɔɔlo ɛzɔhonlɛ la vale ye toonwo bɛ nee ye hɔdwule Atɛnse na bɛazia. Na Pɔɔlo vale nrɛlaleɛ manle bɛhɔmanle Saelase nee Temɔte kɛ bɛrɛla waa bɛraboa ye.

Pɔɔlo wɔ Atɛnse

16Mɔɔ Pɔɔlo ɛlɛkendɛ Saelase nee Temɔte wɔ Atɛnse la, ɔnwunle kɛ awozonle ɛzonlenlɛ ɛva sua ne, yemɔti ɔlile nyane dɔɔnwo. 17Zɔhane ati ɔhɔle nyianu sua ne anu ɔ nee Dwuuma nee bɛdabɛ mɔɔ bɛnle Dwuuma na bɛsulo Nyamenle la hɔdendɛle. Dahuu ɔkɔgyinla mgbata ne mɔ azo na ɔ nee menli mɔɔ se la tendɛ nwolɛ. 18Eku nwiɔ bie mɔɔ Ɛpekulɛse nee Zɛno a dele la anu kilehilevolɛma rale na bɛ nee Pɔɔlo razule kpolera na bɛzele kɛ, “Na sonlamgbane ɛhye, duzu edwɛkɛ yɛɛ ɔkpondɛ yeaha a?”

Bie mɔ noko se, “Ɔzɔho kɛ ɔlɛbɔ ɛzonlenlɛ fofolɛ bie anwo nolo.” Bɛhanle ɛhye, ɔluakɛ Pɔɔlo hanle Gyisɛse nee ewudwazo nwo edwɛkɛ. 19Yemɔti bɛvale Pɔɔlo bɛrale Alɛyɔpagɛse azo bagua ne anu na bɛzele ye kɛ, “Yɛkulo kɛ ɛmaa yɛnwu ngilehilelɛ fofolɛ ɛhye mɔɔ ɛlɛka nwolɛ edwɛkɛ la anu kpalɛ. 20Wɔ edwɛkɛ ne bie mɔ yɛ yɛ nzo nu ngakyile, na yɛkulo kɛ yɛte ɔ bo.” 21(Ɔluakɛ menli mɔɔ wɔ Atɛnse nee nyɛvolɛ mɔɔ wɔ sua ne azo la le menli bie mɔɔ dahuu kulo kɛ bɛnyia mekɛ bɛtie anzɛɛ bɛka debie fofolɛ biala anwo edwɛkɛ a.)

22Pɔɔlo dwazole gyinlanle ayiama ne anyunlu na ɔhanle kɛ, “Atɛnsema, menwu kɛ adenle biala anu, bɛkulo nyamenlezonlenlɛ kpalɛ. 23Mekpɔsa suakpole ye azo dɔɔnwo, na mɔɔ menwu ye la a le kɛ ɛleka biala mɔɔ bɛsonle la ɛdɛneyelɛ ninyɛne wɔ ɛkɛ ne, yɛɛ eza bɛlɛ azubɔlɛ mokyea ko mɔɔ bɛhɛlɛ nwolɛ ‘Ɛhye le Nyamenle ne mɔɔ yɛnze ye la ɛdeɛ’ la wɔ ɛkɛ. Na mɔɔ bɛsonle ye, noko bɛnze ye la, yemɔ yɛɛ mebaha ɔ nwo edwɛkɛ meahile bɛ kɛkala la. 24#1 Arl 8.27; Gyi 7.48 Nyamenle ne, mɔɔ bɔle ewiade nee mɔɔ wɔ nuhua la amuala la le anwuma nee aze Awulae, na ɔndɛnla sua mɔɔ menli ɛva bɛ sa ɛzi la anu. 25Eza ɔngyia debie biala anwo na sonla ava ɔ sa anloa gyima akpondɛ debie amaa ye, ɔluakɛ ɔdaye a ɔmaa sonla biala ngoane nee ɛnwomenle nee debie biala a. 26Nyamenle bɔle sonla na ɔluale ɔ nwo zo ɔmanle menli ngakyile kɔsɔɔti mɔɔ wɔ aleɛabo la amuala rale. Ɔdaye yɛɛ ɔhyehyɛle ɛleka mɔɔ ɔwɔ kɛ bɛtɛnla nee maanle biala ɛkpazilɛ nee ye azedɔlɛ a. 27Ɔyɛle ɛhye amaa bɛakpondɛ ye kɛ bɛ sa kɛha ye na bɛanwu ye. Noko Nyamenle nee yɛ nuhua biala avinli ande biala, 28ɔluakɛ,

‘Ye nuhua yɛɛ yɛde na yɛkɔ, yɛba, na yɛnyia ngoane a.’

Ɔle kɛ mɔɔ bɛdabɛ bɛ edwɛkɛdwɛndolɛma bie mɔ hanle la.

‘Yɛdayɛ noko yɛle ɔ mra.’

29Saa yɛle ɔ mra a, ɛnee ɔnle kɛ yɛdwenle kɛ Nyamenle le abɔdeɛ bie mɔɔ le kɛ ezukoa nvutuke anzɛɛ dwɛtɛ fufule anzɛɛ bolɛ ananze bie mɔɔ sonla ɔdaye yeva ye adwenle yehyehyɛ na yeyɛ la. 30Nyamenle bule ɔ nye guale zo wɔ mekɛ mɔɔ ɛnee menli ɛnze la. Kɛkala, ɔlɛka yeahile menli kɔsɔɔti mɔɔ wɔ ɛleka biala la kɛ bɛnlu bɛ nwo wɔ bɛ ninyɛndane nwo. 31Ɔluakɛ yehile kenle mɔɔ ɔbalua sonla ne mɔɔ yedu ye yezie ɛkɛ ne la anwo zo yeabua aleɛabo amra kɔsɔɔti ndɛne a. Ɔdwazole sonla zɔhane ɔvile ewule nu ɔvale ɔzile edwɛkɛ ɛhye dawua ɔmanle awie biala.”

32Mɔɔ bɛdele kɛ Pɔɔlo ɛlɛka ewudwazo nwo edwɛkɛ la, bie mɔ golole ɔ nwo, yɛɛ bie mɔ noko zele kɛ, “Yɛkulo kɛ ɛsi edwɛkɛ ɛhye azo na ɛka ye bieko ɛkile yɛ wɔ kenle fofolɛ.” 33Na Pɔɔlo vi ayiama ne anyunlu hɔle. 34Noko menli ne bie mɔ liele lile na bɛhɔbokale ɔ nwo. Bie mɔ a le Dayoneseɛse, mɔɔ boka Alɛyɔpagɛse ayiama ne anwo, nee raalɛ bie mɔɔ bɛfɛlɛ ye Damalese la, yɛɛ bie mɔ dɔɔnwo.

Currently Selected:

Gyi 17: NB

Highlight

Copy