Gyi 14
14
Pɔɔlo nee Baanabase wɔ Ayekoneɛm
1Wɔ Ayekoneɛm noko, edwɛkɛ ko ne ala bie zile. Pɔɔlo nee Baanabase hɔle Dwuuma nyianu sua ne anu hɔdendɛle manle Dwuuma nee Gilikima dɔɔnwo liele lile. 2Na Dwuuma bie mɔ mɔɔ anlie anli la lile wulale bɛdabɛ mɔɔ bɛnle Dwuuma la bie mɔ manle bɛvale diedima ne mɔ ɛkpɔlɛ. 3Noko ɛzoanvolɛma ne dɛnlanle ɛkɛ hyɛle, bɛhanle Awulae anwo edwɛkɛ ne akɛnrasesebɛ zo na Awulae hilele nɔhalɛ mɔɔ wɔ ye ɛlolɛ nwo nolo ne mɔɔ bɛlɛbɔ la anu na ɔmanle bɛ tumi ɔmanle bɛyɛle sɛkɛlɛneɛ nee nwanwane ninyɛne dɔɔnwo. 4Na menli mɔɔ wɔ suakpole ne azo la anloa anzɛ bɛ nwo; foa ko hɔle Dwuuma anzi, yɛɛ foa ko hɔle ɛzoanvolɛma ne anzi.
5Nzinlii bɛdabɛ mɔɔ bɛnle Dwuuma la bie mɔ nee Dwuuma bɔle nu bɛ nee bɛ mgbanyima yɛle adwenle kɛ bɛkɔ ɛzoanvolɛma ne mɔ anwo zo bɛahɔzi bɛ awolɛ. 6Mɔɔ ɛzoanvolɛma ne dele la, bɛyele bɛ nwo zo na bɛhɔle Lesetela nee Dɛbi mɔɔ wɔ Laekewonea maanzinli nu la nee namunamu mɔɔ zuozua ɛkɛ ne la azo 7bɛhɔhanle Edwɛkpa ne wɔ ɛkɛ.
Pɔɔlo nee Baanabase wɔ Lesetela nee Dɛbi
8Nrenya bie wɔ Lesetela, bɛwole ye abubura, yemɔti ɔtɛtiale ɛlɛ. 9Ɛnee nrenya ɛhye ɛlɛtie Pɔɔlo kpalɛ. Na Pɔɔlo nwunle kɛ nrenya ne ɛnyia diedi mɔɔ kola yɛ ye ayile la, ɔnleanle ye koonwu 10na ɔdeanle nu ɔzele ye kɛ, “Dwazo gyinla!” Nrenya ne wulule gyinlanle na ɔbɔle ɔ bo kɛ ɔtia. 11Mɔɔ menli ne mɔ nwunle mɔɔ Pɔɔlo ɛyɛ la, bɛdeɛdeanle nu wɔ Laekewonea aneɛ ne anu kɛ, “Awozonle ne mɔ ɛhakyi bɛ nwo menli ɛra yɛ avinli!” 12Na bɛvɛlɛle Baanabase, Ziyɛse, na bɛvɛlɛle Pɔɔlo, Hɛmɛse, ɔluakɛ bɛse Pɔɔlo a tendɛ maa bɛ a. 13Na kɔmenle ne mɔɔ tendɛ Ziyɛse anloa azo, na ye amonle sua ne gyi sua ne kandiba ɛkɛ ne ala la vale nlankɛ nee ndotolo kɔtɔlɔba rale suakpole ne bane ne anlenkɛ kpole ne anloa kɛ ɔ nee menli ne mɔ bɛbabɔ azu bɛamaa ɛzoanvolɛma ne.
14Mɔɔ Baanabase nee Pɔɔlo dele mɔɔ menli ne mɔ kpondɛ ayɛ la, ɔyɛle bɛ azibɛnwo. Yemɔti bɛsuosuanle bɛ adɛladeɛ ne mɔ anu na bɛnriandile bɛhɔle menli ne avinli na bɛzele bɛ kɛ, 15#Ade 20.11; Edw 146.6 “Ayi mɔ, duzu ati a bɛlɛyɛ ɛhye mɔ ɛ? Yɛdayɛ noko yɛle menli kɛ bɛdabɛ la. Yɛrale kɛ yɛbabɔ Edwɛkpa ne nolo yeahile bɛ, amaa bɛahwe bɛ nwo bɛavi ninyɛne mgbane mgbane ɛhye mɔ mɔɔ anwo ɛnlɛ nvasoɛ la anwo, na bɛazonle tease Nyamenle ne mɔɔ bɔle anwuma, azɛlɛ, nyevile nee mɔɔ wɔ nuhua la amuala la. 16Mɔmoane ɔmanle menli muala adenle ɔmanle bɛyɛle mɔɔ bɛdabɛ bɛkulo la. 17Noko dahuu ɔdua ye ninyɛne kpalɛ mɔɔ ɔyɛ la azo ɔkile ɔ nwo ɔkile bɛ: ɔmaa bɛ ezule, yɛɛ ɛbuhenle ne dwu a ɔmaa bɛ aleɛ na ɔmaa bɛ nye die.” 18Noko ɛhye mɔ amuala anzi, ɔhale kyɛkyɛ mɔɔ ɛnee bɛngola bɛnzi menli ne mɔ aze wɔ bɛ azu ɛbɔlɛ ne anwo a.
19Nzinlii Dwuuma bie vi Anteɔko mɔɔ wɔ Paesedea maanzinli nu nee Ayekoneɛm la rale, bɛralile menli ne anzo bɛhɔle bɛ afoa na bɛzile Pɔɔlo awolɛ bɛmanle ɔ nye zo bulule; bɛhwenle ye bɛhɔdole sua ne kandiba, ɛnee bɛdwenle kɛ yewu. 20Na mɔɔ diedima ne rabɔle yiale ye la, ɔ nye rale zolɛ na ɔdwazole ɔ nee bɛ hɔle sua nu. Aleɛ hyenle la ɔ nee Baanabase bɛhɔle Dɛbi.
Pɔɔlo nee Baanabase ziale rale Anteɔko mɔɔ wɔ Selea la
21Pɔɔlo nee Baanabase hanle Edwɛkpa ne wɔ Dɛbi la, bɛnyianle ɛdoavolɛma gyɛlɛɛnye. Bɛvi ɛkɛ ne bɛziale bɛhɔle Lesetela nee Ayekoneɛm, yɛɛ Anteɔko mɔɔ wɔ Paesedea maanzinli nu la. 22Bɛmanle diedima ne mɔ anwosesebɛ na bɛzele bɛ kɛ bɛzɔ diedi ne anu kpundii. Bɛhilehilele bɛ kɛ ɔwɔ kɛ yɛnwu amaneɛ dɔɔnwo na yɛanwu Nyamenle Belemgbunlililɛ ne. 23Bɛzieziele mgbanyima bɛmanle bɛ, na bɛvale ɛhɔnehyelɛ nee nzɛlɛlɛ bɛdule bɛ bɛwulale Awulae ne mɔɔ bɛva bɛ rɛle bɛwule ye nu la asa anu.
24Akee bɛhɔkpɔsale Paesedea maanzinli ne anu na bɛrale Pamefelea maanzinli nu. 25Bɛhanle Edwɛkpa ne wɔ Pɛga na bɛhɔle Ateelea. 26Bɛvi ɛkɛ ne la bɛvale ɛlɛne bɛziale bɛrale Anteɔko. Ɛke a bɛdule bɛ bɛwulale Nyamenle ɛlolɛ ne abo kolaa na bɛabɔ bɛ gyima ɛhye mɔɔ bɛwie ye di la abo a.
27Mɔɔ bɛradwule Anteɔko la, bɛyiale asɔnema ne amuala na bɛhanle mɔɔ Nyamenle ɛva bɛ ɛyɛ la amuala bɛhilele bɛ, nee kɛ yezi yebuke diedi adenle yemaa bɛdabɛ mɔɔ bɛnle Dwuuma la. 28Na bɛ nee diedima ne dɛnlanle ɛkɛ ne hyɛle dɔɔnwo.
Currently Selected:
Gyi 14: NB
Highlight
Share
Copy
Want to have your highlights saved across all your devices? Sign up or sign in
Bible in Nzema © Bible Society of Ghana, 1998.
