Luka 20

Yesu tumi nwo adwobisa

(Mateo 21.23-27; Marko 11.27-33)

1Na ɔwale kyɛ ɛlɛho bie, bɔ né Yesu ɔyɛ ngyerɛkyerɛ kyire mmenia wɔ asɔneyɛɛ sua ne anu, ná osa kã nzɛmba nen, asɔfo mbanyi ne ahyerɛlɛfoɛ ne maen mbanyi bɛwale ye berɛ, 2na besele ye kyɛ, “Kã kyire yɛ, tumi beni yeɛ egyi so bɔ ɛyɔ sɔ nningyein hemɔ ye? Anaakyɛ, nwa yeɛ ɔmane wɔ sɔ tumi ne ɔ?” 3Na obuale bɛ kyɛ, “Me koso ngobisa ɛmɔ dwirɛ ko, na ɛ́mɔma me mmuayɛɛ: 4Yohane asubɔlɛ ne, ofi nyameɛso anaakyɛ ofi mmenia berɛ?” 5Na bɛdwenedwenene ye nwo besisele bɛ nwo kyɛ, “Sɛ yɛkã kyɛ, ‘Ofi nyameɛso’ a, okobisa kyɛ, ‘Nzaade, nzu ati yeɛ ɛmɔanne ye banni ɔ?’ 6Yeɛ sɛ yɛkã kyɛ, ‘Ofi mmenia berɛ’ a, mmenia ne amukoraa bɛkɔboro yɛ nyɔboɛ; ofikyɛ bede bedi amba kyɛ Yohane te ngɔmhyɛlɛniɛ.” 7Yiti bebuale kyɛ, “Yɛnze nekaa bɔ ofi ɔ.” 8Na Yesu sele bɛ kyɛ, “Nzaade me koso mengɔhã tumi horɛ bɔ ngyi so meyɔ sɔ nningyein hemɔ ɔ mengohyire ɛmɔ.”

Hwɛsofoɛ bɔnefoɛ biemɔ nwo anyandera

(Mateo 21.33-46; Marko 12.1-12)

9 # Yes 5.1, 2 Na Yesu hyɛle ye bo buli anyandera he hyirele mmenia nemɔ kyɛ, “Biaa bie yɔle bobe boo, ɔfa wurale hwɛsofoɛ biemɔ sa, na otuli atee hɔle maen bie aso dedeede ɔɔhyɛle. 10Na bobe mmaa telɛ dwuli ne, ɔsomane ye somvoɛ ko maa ɔhɔle hwɛsofoɛ nemɔ berɛ, kyɛ bɛ́ma ye bobe boo ne anu mmaa ne bie. Nakoso hwɛsofoɛ nemɔ bole ye, na bɛmaa osa hɔle nzanza. 11Na ɔsomane somvoɛ foforɛ; na ye koso bɛbole ye beguale ye nyunu ase, na bɛmaa osa hɔle nzanza. 12Na ɔsomane bɔ ɔtɔ so nza ɔ; na ye koso bepurapurale ye bɛfoane ye befili berɛ. 13Yeɛ bobe boo mene ne sele kyɛ, ‘Ɛhe de, ngɔyɛ ye sɛ? Ngɔsoma mma bɔ ɔla m’ahone nwo ɔ; ebiaa ye de bɛkɔfa anidie bɛkɔma ye!’ 14Nakoso hwɛsofoɛ nemɔ nwuni ye nen, besisele bɛ nwo kyɛ, ‘Bɔ odi ye bia ne ɛhe; ɛmɔma yɛhu ye, ná agyapadeɛ ne ɔyɛ yɛ deɛ.’ 15Yiti bɛhwene ye befili bobe boo ne anu beehuni ye. “Yiti nzikyɛ yeɛ bobe boo mene ne ɔkɔfa kɔyɛ bɛ ɔ? 16Ɔkɔwa koohu sɔ hwɛsofoɛ nemɔ, ná wafa bobe boo ne wawura mmenia foforɛ sa.” Na bɛtele sɔ dwirɛ ne nen, besele kyɛ, “Nyameɛ pa gua!”

17 # Edw 118.22 Nakoso ɔneane bɛ haa, na obisale kyɛ, “Né nzaade, ye bo kyire sɛɛ, ɛhe bɔ bahyerɛ ye kyɛ,

‘Nyɔboɛ bɔ suasilɛfoɛ bɛpole ye ne,

ye ala yeɛ waayɛ sua ne ndweasoɛ nyɔboɛ titire ɔ.’

18Ebiala bɔ okofi ase kɔtɔ sɔ nyɔboɛ ne aso ne, okobubu ye nu ahuronzi ahuronzi; yeɛ sɛ ɔte tɔ ebie so a, okonuku ye nyokonyoko.”

Ɛtoɔtualɛ nwo adwobisa

(Mateo 22.15-22; Marko 12.13-17)

19Na ahyerɛlɛfoɛ ne asɔfo mbanyi nemɔ benwuni kyɛ anyandera he bɔ Yesu buli ne, ɔne bɛ, yiti ahaa bɛpena kyɛ bɛkye ye berɛ ne ala, nakoso né besuro ɛlɔen ne. 20Yiti bɛtetɛle ye. Na bɛsomane mmenia biemɔ bɔ bayɛ bɛ nwo kyɛ bɛte mmeni paa ɔ maa bɛhɔle ye berɛ, kyɛ bɛɛfa dwirɛ besua ye ngaen, ná bagyina so baye ye bawura amrado tumi ne ye mmeraa sa. 21Yiti bebisale ye kyɛ, “Kyerɛkyerɛniɛ, yɛse kyɛ wɔ noa dwirɛ ne wɔ ngyerɛkyerɛ te turoloo, yeɛ ɛmva wɔ nye ndo sona ye dibea, na mmom ekyirekyire Nyameɛ atee ne nahorɛ nu. 22Aso otia mmeraa kyɛ yɛtua ɛtoɔ yɛma Kaesare, anaakyɛ ondia?”

23Na Yesu nwuni b’adwenemmɔne nen, osele bɛ kyɛ, “[Nzu ati yeɛ ɛmɔso me bɛnea ɔ] 24Ɛ́mɔma me denare ko maa nnea! Nwa mvonini ne dumaa yeɛ ɔwɔ so ye?” Bebuale kyɛ, “Kaesare deɛ ɔ!” 25Na osele bɛ kyɛ, “Nzaade ɛ́mɔfa Kaesare deɛ bɛ́ma Kaesare, ná ɛ́mɔfa Nyameɛ deɛ bɛ́ma Nyameɛ.” 26Na bangora bannya ye noa dwirɛ nu mvomsoɛ bangyina so wɔ mmenia n’anyunu berɛ, na mmom ye mmuayɛɛ ne yɛle bɛ nwanwa maa bɛhane bɛ noa bɛtole nu.

Ewutingyelɛ nwo adwobisa

(Mateo 22.23-33; Marko 12.18-27)

27 # Aso 23.8 Na Sadusiifoɛ bɔ bɛnwa awufoɛ dwɔsolɛ nne berɛ ne, bɛ nu biemɔ wale Yesu berɛ beebisale ye 28#Deut 25.5 kyɛ, “Kyerɛkyerɛniɛ, Mose hyerɛ mane yɛ kyɛ, ‘Sɛ bienzua bie oliɛma bienzua bɔ ogya braa ɔ owu, ná wanwo ba a, odi kyɛ oliɛma ne gya sɔ braa ne ná ɔwo mmaa ma bɔ wawu ne.’ 29Tie, né aliɛmaa mmienzua nzoo bie wɔ berɛ. Bɔ oli moa ne gyale braa, na owuli bɔ wanwo ba ɔ. 30Bɔ ɔtɔ so nyɔ ne gyale braa ne, 31yeɛ bɔ ɔtɔ so nza ne koso gyale ye; na sɔ alaa yeɛ aliɛmaa nzoo ne amukoraa begyale braa ne bɔ banwo ba ɔ, na bewuwuli. 32Na bɔ ɔpɛ ye bo ɔ, braa ne koso wuli. 33Yiti awufoɛ dwɔsolɛ ne anu, bɛ nu nwa yeɛ braa ne te ɔye ɔ? Ofikyɛ aliɛmaa nzoo ne gyale ye.”

34Na Yesu buale bɛ kyɛ, “Ewiase he anu mmenia begya, na bɛfa bɛ bɛma agyaa; 35nakoso bɛ bɔ bekobu bɛ kyɛ bɛfata kyɛ benya kyɛfa wɔ wiase bɔ ɔ́ba ne ne awufoɛ dwɔsolɛ nu ne de, bengya, yeɛ bɛmva bɛ bɛmma agyaa, 36na bɛngora benwu ko; ofikyɛ bɛtɛ kyɛ abɔfo mɔ, na bɛte Nyameɛ mma, ofikyɛ bɛte ewutingyelɛ nu mmaa. 37#Ɛks 3.6 Na ɔfa awufoɛ dwɔsolɛ nwo de, Mose koso maa yɛnwu ye wɔ ngyɛkyerɛ ne nwo dwirɛ ne anu, mmerɛ bɔ ɔfrɛ Awurade kyɛ: Abraham Nyameɛ, Yisake Nyameɛ ne Yakob Nyameɛ’ ne. 38Yiti, ɔtte awufoɛ Nyameɛ, na mmom ɔte ateasefoɛ Nyameɛ; ofikyɛ bɛ mukoraa bɛte ase bɛma ye.”

39Yeɛ ahyerɛlɛfoɛ nemɔ anu biemɔ buale kyɛ, “Kyerɛkyerɛniɛ, aye ye noa yé.” 40Yiti bangora bammisa ye dwirɛ biala ko.

Kristo ne nwo adwobisa

(Mateo 22.41-46; Marko 12.35-37)

41Na Yesu bisale bɛ kyɛ, “Ɔyɛle sɛɛ bɔ bɛnwa Kristo ne te Dawide awa#20.41 DAWIDE AWA: Anaakyɛ: Dawide bosoniɛ. ɔ? 42#Edw 110.1 Ɔnate kyɛ Dawide bɔbɔ kã ye wɔ Edwein Nwomaa ne anu kyɛ,

‘Awurade sele me Mene kyɛ,

Tena me sa famaa so,

43kodwu kyɛ ngɔfa wɔ pɔfoɛ mɔ ngɔyɛ wɔ gya bo ndiasoɛ ɔ.’

44Na sɛ Dawide frɛ ye me Mene a, né ɔwale ye sɛ bɔ ɔɔyɛle ɔwa ɔ?”

Ahyerɛlɛfoɛ nwo kɔkɔbɔlɛ

(Mateo 23.1-36; Marko 12.38-40)

45Na mmenia ne amukoraa begu so bɔ betie Yesu nen, osele ye asuafoɛ nemɔ kyɛ, 46“Ɛ́mɔnea ɛmɔ nwo yé wɔ ahyerɛlɛfoɛ nemɔ anwo. Bɛ yeɛ bekuro ndaadeɛ ndendenn wuralɛ bɛnate, ɔne kyɛ mmenia kobisa bɛ ahye wɔ dwaaso ɔ, ɔne mbanyi bia wɔ nyianu sua mɔ nu, ɔne mbanyi bia wɔ ɛpoentolɛ bo ɔ; 47bɛ yeɛ bɛbɔ akunafoɛ mmrasua apoo bede bɛ nningyein ɔ, nakoso bɛpati bɛbɔ mbaeɛ tendenn bekyire. Na bɛ yeɛ bekobua bɛ foɛ piri paa ɔ.”

Currently Selected:

Luka 20: EBP

Highlight

Copy